
القصه دي فيها تحديث بعد 10 سنين.
🌹”فساتين الاميرات”🌹
🌹تاريخ نشر الرساله 12 أغسطس 2014
اتعرفت علي خطيبتي في الكليه، لما كنا لسه بندرس كنا مجرد اصحاب، لكن بعد التخرج ارتبطنا عاطفيا.
انا عمري 24 سنه وخطيبتي عمرها 23 سنه.
احنا متفقين مع بعض كويس جدا، بس مشكلتي الوحيده هي ملابس خطيبتي!!!
هي بتلبس فساتين شبه “اميرات القصص الخياليه” بتلبس كده كل يوم (باستثناء وقت الشغل).
لبسها كله عباره عن فساتين مكشكشه و بلوزات دانتيل، وحاجات غريبه شبه كده.
انا بعترف ان اللبس بيكون لايق عليها لانها جميله جدا و أي حاجه بتلبسها بتليق عليها.
في الاول كان عاجبني الموضوع ده، بس بعد ما عرفت الوقت اللي بتقضيه علشان تجهز نفسها وتهتم بالملابس، حسيت ان الموضوع ده مبالغ فيه.
خطيبتي عندها مدونه (موقع الكتروني) عليها عدد كبير من المتابعين.
وهي طول الوقت بتنشر صور لملابسها، بتقعد بالساعات تخيط الملابس وتنشر الصور، كمان بتبيع الملابس دي علي Etsy (متجر شبه امازون).
لما بنخرج مع بعض الناس بيبصوا عليها قوي ولاحظت ان في ناس بيصوروها واحنا ماشين من غير استئذان، طبعا ده بيخليني مش مرتاح علشان كده طلبت منها تخف الاي بتعمله ده شويه.
هي مافهمتش قصدي كويس واعتقدت اني بطلب منها تبطل تلبس حاجات غريبه علي شعرها لما بنكون مع بعض!!!
انا قولتلها كتير اني بحبها زي ماهي، بس كان عندي امل انها لما تبدأ شغل في مجال العمل اللي بتحبه تلتزم وتبقي شخصيه جاده اكثر.
لكن الظاهر ان حتي مديرتها وزمايلها في الشغل بيشجعوها علي اللبس الغريب ده!!
انا قلقان ان الناس مايتعاملوش معاها بجديه، او مايعرفوش اد ايه هي لطيفه وذكيه.
لان الملابس بتخليها تبان كأنها سطحيه او مش ذكيه.
انا شايف ان ملابس الاميرات والزهور الي علي شعرها كان ممكن تكون مقبوله لما كانت بنت صغيره لسه في الجامعه، لكن هي دلوقتي واحده ناضجه عمرها 23 سنه.
انا سألتها لو هي بتحب تلفت النظر؟
قالتلي لاء، بس هي بتحب البنات يعلقوا علي لبسها وعايزه تكون مميزه.
علي فكره هي لبسها محتشم ومفيش اي حاجه غير لائقه، بس الحقيقه انا شايف ان غلط نلبس فستان دانتيل وتاج من الزهور واحنا رايحين السوبر ماركت!!!
المفروض نلتزم بالمعايير ، لان اللبس المخالف بيلفت النظر زياده عن اللزوم.
ازاي اتكلم معاها في موضوع اللبس المناسب من غير ما اجرح مشاعرها؟
🌹تحديث: 23 أغسطس 2014 (بعد 11 يومًا)
ماكنتش مخطط اعمل تحديث لكن الامور اتغيرت.
للاسف ماكنش عندي اي فرصه اتكلم معاها في موضوع اللبس.
الاسبوع الي فات اتصلت بيه خطيبتي وقالتلي انها عايزه تتكلم معايه بعد ماتخلص شغلها.
اتقابلنا وعرضت عليها اعزمها علي العشاء؟
رفضت وقالتلي انها مش هتقعد كتير واننا لازم نتكلم
سألتها وانا بضحك انتي عايزه تنفصلي عني ولا ايه؟
بان عليها الاحساس بالذنب، هنا فهمت الامور ماشيه ازاي 😢
اتكلمنا اننا مختلفين جدا عن بعض ونظرتنا للمستقبل مختلفه، الحقيقه هي الي اتكلمت وانا وافقت علي كلامها.
انا كنت ناوي اتنقل من المدينه بمجرد ما عقد ايجار شقتي ينتهي، بس واضح انها مش عايزه تنقل معايه وصعب نكمل مع بعض والمسافه بينا بعيده كده.
كمان قالتلي اني مسيطر، بس انا مش شايف نفسي كده الحقيقه.
الانفصال كان بشكل ودي، بس انا مصدوم وحزين😢
في الاخر اتفقنا نفضل اصدقاء.
اول مره اتعرض للموقف ده (ان بنت تسيبني) علشان كده انا زعلان قوي والموضوع كان فظيع.
عندي مشكله دلوقتي، لما بدخل صفحتها علي وسائل التواصل بحس اني بتألم 😢 وبغير عليها.
صاحبي عرض عليا يدبرلي ميعاد غرامي، بس انا شايف انها مش فكره حلوه في الوقت ده..
🌹تحديث: 2 أبريل 2024 (بعد 10 سنين تقريبا)
كنت بتصفح بريد الكتروني قديم ولقيت الحساب ده
الحقيقه اتفاجأت ان الحساب لسه شغال.
عملت تسجيل دخول واكتشفت ان ناس كتير حاولوا يتواصلوا معايا.
حسيت بالاحراج وانا بفتكر ذكري الانفصال الي مر عليه 10 سنين.
افتكرت انا كنت متأثر اد ايه وقتها بعد ما العلاقه انتهت.
انا دلوقتي عندي 34 سنه، متجوز من اربع سنين من ست رائعه عمرها 31 سنه ❤
انا اتعلمت درس مهم جدا عن “دعم هوايات شريك الحياه”
مراتي بتحب خبز الحلويات 🍰 والجري .
احنا عندها طفله عمرها 3 سنين .
انا عايز بنتي تكون حره في التعبير عن نفسها بالطريقه الي تعجبها “طبعا في حدود الامان”
وعندي استعداد اعمل اي حاجه علشان بنتي 😍
لسه انا وخطيبتي السابقه اصدقاء علي وسائل التواصل، مش بنتكلم خالص بس بنعمل اعجاب لصور بعض.
هي متجوزه دلوقتي و لسه لبسها مختلف
مش بتلبس لبس الاميرات زي زمان بس لسه ازيائها مش عاديه.
شكلها سعيد جدا في المزرعه اللي عايشه فيها مع جوزها.
انا بعترف اني كنت غبي في عمر العشرين
انا دلوقتي متجوز وبدعم هوايات مراتي بسعاده ❤
🌹سؤال من حد من المتابعين علي ريديت:
ممكن نشوف منك تحديث جديد بعد 10 سنين
بتشتكي ان بنتك المراهقه بتلبس زي الاميرات؟ وبهنيك علي حياتك
اوك……بنتي بتحب اللون الوردي والبنفسجي ❤❤
(القصه حقيقيه مترجمه من ريديت)