
المجمع السكني 🏢🏘️
#حواديت_الاجانب
جوزي مسافر مع واحد من اولادنا وأخوه عشان يزوروا أمهم (اللي هي جدة ابني).
كنت بنضف أوضة المعيشة، وفجأة ظهر إشعار على آيباد جوزي. كان إيميل من “مجمع سكني” بيقولوا إنهم هيقفلوا المية السخنة مؤقتًا عشان بيعملوا تصليحات!!
الإيميل كان عليه اسم جوزي الأول واسم العيلة.
المشكلة إن بيتنا تمليك ومأجرناش أي بيت تاني من أكتر من عشر سنين،
المكان اللي جوزي فيه دلوقتي (في شمال ولاية نيويورك) مفيهوش شبكة. حاولت أبعتله صورة للإيميل، بس مش راضي يتبعت.
اتصلت بجوزي واتكلمنا شوية، الشبكة كانت وحشة بس قدرت أوضح له موضوع الإيميل. كل اللي قاله إنها أكيد غلطة. ماقدرناش نسمع بعض كويس والمكالمة قطعت.
بس لو الإيميل فعلا غلط زي ماهو بيقول، إزاي مكتوب اسم جوزي الأول واسم العيلة؟! (عشان أوضح الصورة، اسمه الأول شائع، لكن اسم عيلتنا مش شائع خالص).
دورت في الايميل عشان أشوف لو في أي رسايل تانيه مبعوته من المجمع السكني ده، بس ملقتش أي حاجة (جوزي اصلا بيسمح الايميلات القديمة علي طول).
بعت رد “للمجمع السكني”. جالي رد تلقائي فيه اسعار الايجارات وحاجات زي كده.
مش مكتوب رقم الشقة بالظبط، بس العنوان موجود، هو بعيد عن بيتي حوالي 15 دقيقة.
قررت أروح المكان بنفسي، عارفه أنها حاجة مجنونة، بس قررت أخاطر وانا مش عارفه اصلا ايه اللي هلاقيه هناك.
ما عنديش سبب إني أشك في جوزي غير الإيميل الغريب ده (اللي مديني إحساس مش مريح). وكمان عندي إحساس عام إن جوزي بقى… زهقان مني. الإحساس ده عندي بقاله فترة، بس هو كان دايمًا بيصر إن دي مجرد أوهام في دماغي وإنه مبسوط معايا.
هو لسه بيقولي انه بيحبني، بس في حاجة جوايا بتقولي أن جوزي متغير.
ده غير انه ساعات بيعمل حجج عشان يخرج من البيت. أنا لسه مش متأكده من حاجه يمكن يطلع كل ده مجرد وهم في دماغي.
علي فكره أنا وجوزي مرتبطين من زمان، أحنا حبينا بعض لما كان عمرنا 19 سنة بس.
صاحبتي قررت تيجي معايا وتساعدني.
صاحبتي المقرّبة كلمت رقم الصيانة وقالت لهم إنها شغالة دليفري ومعاها أكل بأكتر من 100 دولار لـ (وقالت اسم جوزي)، وقالت إنه نسي يكتب رقم الشقة بتاعه. الراجل اللي رد ماكانش بيتكلم إنجليزي كويس، لكن بعد ما كررت الكلام كذا مرة، في الآخر ادانا رقم الشقة.
إحنا الاتنين رحنا عند الشقة وصاحبتي خبطت على الباب. ردت علينا بنت، بس ما فتحتش الباب، ردت من الكاميرا اللي على الجرس.
صاحبتي قالت إنها بتدور على آدم. البنت قالت إن آدم مش موجود، بس ما قالتش أي تفاصيل تانية (وده منطقي، لأن صاحبتي غريبة تمامًا بالنسبة لها). لما مشينا، شفت البنت واقفة تبص علينا من شباك الشقة.
حاولت أكلم جوزي مليون مره، بس الشبكة كانت وحشة جدًا لدرجة إني بسمعه بالعافيه.
قررت أسافر لجوزي عشان أواجهه شخصيًا. معايا نسخة من الإيميل، وصورة للشقة، وكمان تسجيل للبنت وهي بتقول إن آدم مش موجود (وده معناه أن هي عارفاه).
بصراحة مش قادره أصبر ولازم أعرف الحقيقة.
🌿تحديث:
بكتب الكلام ده من أوضة الفندق. رحت أواجه جوزي، هو عرف على طول أول ما عربيتي وقفت إيه اللي بيحصل. خرج يقابلني برا، وأول حاجة قالها: إنتي رحتِ الشقة؟…..فقلت له: آه
قالي: يبقى لازم نتكلم…وبرضه قلتله: آه.
مش هدخل في تفاصيل الكلام اللي حصل بالضبط. كان نقاش طويل وفيه مشاعر كتير. باختصار هي حبيبته، وعلاقتهم بقالها أربع شهور. هي فاكرة إننا منفصلين وبنمر بعملية الطلاق.
عيلته ماكنتش عارفة حاجة عن الموضوع ده. أخوه وأمه، اللي كانوا موجودين، اتصدموا.
معلش مفيش عندي كلام أكتر أقوله. أنا خلاص اتصلت بمحامي طلاق، ومعالج نفسي، ومستشار مالي. شكرًا لكل الناس اللي دعمتني.
(القصة مترجمة من ريديت..أصحاب القصة أجانب).