الفرقة الكورية 🎶🕺🎤✨ قصص

قصة

الفرقة الكورية 🎶🕺🎤✨

بنت أختي أليكسا (14 سنة) وبنت أقرب صاحبة ليا دايزي (8 سنين) الاتنين مولودين في ديسمبر، الفرق بين أعياد ميلادهم أيام قليلة.

أنا وأختي علاقتنا مش قوية قوي، بنتقابل احيانًا في بيت العيلة وفي المناسبات، بس احنا مش قريبين لبعض، بصراحة كمان، أنا معرفش حاجات كتير عن بنتها أليكسا، كل اللي أعرفه عنها إنها انطوائية جدًا (تقريبًا مبتتكلمش في التجمعات العائلية)، وإنها بتحب الكتب ودايمًا لابسة سماعات (بس أنا معرفش هي بتسمع إيه).

“دايزي” هي بنت أعز صاحبة عندي، أنا ومامتها أصحاب من أيام المدرسة الإعدادية، وأنا موجودة في حياة دايزي من أول يوم اتولدت فيه (هي بتعتبرتي مامتها التانية)

أنا من عشاق الكيبوب (الموسيقى الكورية)، ودايزي كمان بدأت تشاركني نفس الشغف ده. هي بتحب نفس الفرقة الكورية اللي أنا بحبها، و بدأت تتعلم كلمات الأغاني والرقصات.

أنا قررت أعملها حاجة مميزة في عيد ميلادها واشتريت تذكرتين لحفلتهم اللي جاية في يناير (الفرقة الكورية). الهدية دي تعتبر غالية شوية، خصوصًا مع تذاكر السفر والإقامة، لكن فكرت أكتر في الذكريات الجميلة اللي هنعملها مع بعض في الرحلة دي.

الأسبوع اللي فات، أختي سمعتني بتكلم مع ماما عن المفاجأة اللي أنا محضراها ل دايزي في عيد ميلادها.

أختي قالتلي إن بنتها “أليكسا” بتحب نفس فرقة الكيبوب وطلبت مني أخدها هي كمان للحفلة عشان هدية عيد ميلادها.

شرحت لها إن ده مستحيل لأني اشتريت التذاكر خلاص، ومش هقدر أجيب واحدة تانية لأن تذاكر الحفلة خلصت بالكامل. غير كده، مش هقدر أتحمل تكلفة رحلة لـ3 أشخاص.

أختي اقترحت عليا آخد بنتها “أليكسا” بدل “دايزي” أولاً لأن بنتها أكبر في السن، وثانيا هي بنت أختي الحقيقية.

رديت عليها إن الرحلة دي كلها معمولة مفاجأه ل دايزي، ومش المفروض تطلب مني أخد هديتها وأديها ل أليكسا.

قلتلها المناسبات جايه كتير، و دلوقتي أنا خلاص عرفت إن أليكسا بتحب الفرقة دي، وهجيبلها بعد كده هدايا ليها علاقة بالحاجة اللي بتحبها.

أختي زعلت قوي واتهمتني أني بحب بنت غريبة أكتر من بنتها.

بعد كده ماما اتكلمت معايا وقالتي أن تصرفي غلط وان البنت المراهقة هتقدر الهدية دي أكتر من طفلة.

تفتكروا أنا فعلا غلطانة؟

🍃تحديث:

يوم الأحد كان عيد ميلاد أليكسا. بصراحة الكلام اللي قالته أختي وماما عن تبديل الهدايا وإن دايزي مش من العيله ضايقني جدًا، بس أليكسا ما لهاش ذنب في كل ده، وحسيت إني عايزة أجيبلها هدية تعجبها.

حاولت أتكلم مع أختي عشان أعرف ايه الحاجات اللي ممكن اجيبهالها، أو ايه اللي عندها بالفعل عشان ماشتريش حاجة تكون مكرره ومتعجبهاش. لكن أختي ردت عليّا بطريقة وقحة وشتمني وقالتلي إن أليكسا مش محتاجة هدية “أي كلام ” وكأنها شفقة 🙄

عشان أختي مش ناوية تساعدني، قررت أسأل جوزها. لحسن الحظ، كان مبسوط جدًا وشكرني إني بهتم بأليكسا. قالي إن بنت أختي عندها قلق اجتماعي، وما عندهاش أصدقاء قريبين، والكتب هي أكتر حاجة مفضله ليها، كمان الكيبوب، والدراما الكورية.

حسيت من كلامة أن أختي دايما بتضغط علي بنتها!!

المهم، قررت أجيبلها 3 حاجات ليها علاقة بالفرقة الكورية (العصاية الضوئية الرسمية للفرقة، عروسة علي شكل المغني المفضل ليها، والألبوم الجديد).

(عارفة، اتجننت شوية، بس كنت حاسة بالذنب جدًا).

لما أليكسا فتحت الهدايا بصتلي بنظره وابتسمتلي ابتسامة جميله جدًا ،أول مره في حياتها تبصلي بالطريقة دي، وشها نور من الفرحة واديتني أحلى وأطول حضن ❤️

كانت فرحانة جدًا لأنها كانت بتحوش عشان تشتري العصاية الضوئية لنفسها.

قلتلها يمكن المرة اللي جاية نروح “حفلة سوا” عشان تستخدم العصاية الضوئية بتاعتها.

وفجاة أختي قررت تخرب كل حاجة. ضحكت بتريقة وقالت قدام الكل: “أيوة، أكيد السنة دي هتروحي مع البنت المفضلة عندك… وطبعًا أليكسا هتكون آخر اهتماماتك.” 🙄

حسيت قد إيه أليكسا كانت مجروحة ومحرجة، بس حاولت تبين إنها قوية وشكرتني على كل الهدايا، وقالتلي إنها ما كانتش عايزة تروح الحفلة أصلاً لأنها بتكون زحمة وصوتها عالي قوي، و قالت، أنها عايزة ، تيجي تزورني في شقتي من وقت للتاني عشان نلعب ونقرأ سوا ❤️

أختي حاولت تقول إني مشغولة جدًا، قطعت كلامها وقلت لبنت أختي إني هرحب بيها في أي وقت.

بعد كده سمعت أختي وجوزها “بيتكلموا” في الموضوع، هما كانوا واقفين في المطبخ، وكان واضح إن جوزها غضبان منها جدًا (شكلة زعل من طريقة كلامها معايا).

بشكل عام، أعتقد إن الأمور كانت كويسة. ودلوقتي مستنية مفاجأة عيد ميلاد دايزي. 🎉

(القصة حقيقية مترجمة من ريديت، أصحاب القصة اجانب).

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!