أنا بحب جاري المتجوز 😍🙈
أنا عمري 34 سنة، من 7 شهور مريت بتجربة انفصال صعبة جدًا عن جوزي اللي عشت معاه سنين طويلة.
بعد الانفصال قررت أعيش مع صاحبتي المقربة، وبدفع معاها إيجار البيت.
لما كنت لسه بنقل، قابلت جاري الجديد. طلع راجل محترم قوي، وبدأ على طول يساعدني في نقل الأغراض.
بصراحة، أنا أعجبت بيه على طول، من أول ما شوفته. خلينا نسميه “مايك”.
أنا دلوقتي عايشة في ضواحي مدينة كبيرة، علشان كده أنا وهو بنركب القطر كل يوم الصبح علشان نروح شغلنا. إحنا بنخرج تقريبًا في نفس الوقت، علشان كده بنتقابل.
أنا عارفة من الأول إن مايك متجوز وعنده أطفال، هو بيتكلم عنهم كتير قوي، ده غير إنه حاطط صورتهم خلفية تليفونه، كمان بينزل صورهم دايمًا على مواقع التواصل.
رغم كده، أنا معجبة بيه قوي. في الأول كان مجرد إعجاب بريء وسخيف، بس بعد كده حبيته.
جاري وسيم ولطيف ودمه خفيف. أول مرة ركبنا مع بعض القطر، سألني على شغلي، وكان باين عليه إنه مهتم فعلًا يسمعني. للأسف، جوزي السابق عمره ما عمل معايا كده، وكنا طول الوقت بنتخانق، عشان مكنش بيهتم بيا خالص.
كمان، مايك بيهتم بأولاده جدًا، وبيشتري لهم حلويات وحاجات كتير. ده مرة فضل مع بنته على التليفون طول الطريق يشجعها ويطمنها، علشان كان عندها عرض مسرحي في المدرسة وكانت خايفة.
هو طبيعته كده، حنين وطيب معايا ومع الناس كلها.
هو لغايه دلوقتي ما عملش أي حاجة تدل إنه وقع في حبي، إحنا لسه نعتبر أصدقاء مقربين، لأننا بنتقابل وبنتكلم كل يوم في رحلة القطر اللي مدتها 20 دقيقة.
بس أنا طول عمري ملفتة وجذابة، وكل اللي حواليا بيعجبوا بيا بسهولة، عشان كده أنا متأكدة إن إحنا هنرتبط قريب قوي.
علي فكرة. أنا أعرف مرات مايك من زمان، كنا مع بعض في نفس المدرسة، “لما شوفت صورتها افتكرتها على طول”.
بصراحة، أول ما عرفت إنها مراته كنت مستغربة جدًا، لأنهم عكس بعض في كل حاجة.
*هو دمه خفيف، وهي جد قوي.
*هو اجتماعي، وهي لأ.
*كمان، هي أذكى منه ومثقفة أكتر منه.
*أما من حيث الشكل بقى… مش عايزة أتكلم، أنتوا أكيد فاهمين.
طبعًا ده وحش قوي، أنتوا مش متخيلين هما قد إيه مختلفين عن بعض، الفرق ما بينهم زي الفرق ما بين الليل والنهار.
أنا متأكدة إن شخص لطيف زي مايك أكيد متورط مع الست دي.
الحاجة اللي حصلت بقه وخلتني اكتب هنا:
إن مايك امبارح بالليل خبط على الباب، وقال لي “ينفع تيجي تقعدي مع أولادي شوية؟”. وافقت على طول.
قال لي إن مراته عملت حادثة وهي راجعة من رحلة شغل، وعلشان مراته حامل كان قلقان عليها، وحجز رحلة علشان يروحلها.
قال لي مفيش حد من العيلة ساكن هنا في نفس الولاية، علشان كده طلب مني أهتم بيهم كام ساعة.
هو قال لي إن واحد قريبهم ركب عربيته، وبيسوق دلوقتي علشان يوصل الولاية ويبات مع الأولاد، بس لسه قدامه كام ساعة.
طيب، إيه المشكلة بقى؟
بناته كانوا عبارة عن كابوس! مايك عنده 3 بنات.
بنته الكبيرة متدلعة جدًا وقليلة الأدب، ومحترمتنيش أبدًا، كل شوية تتخانق معايا على كل حاجة، (العشاء، ومين اللي هينضف، والأفلام اللي سمحت لها تشوفها)، كمان سمعتها بتشتمني بصوت واطي أكثر من مرة.
البنت الوسطانية عايزة طول الوقت تلعب بصوت عالي، وتعمل دوشة، وتبهدل الدنيا.
البنت الصغيرة أغلب الوقت لطيفة وهادية، بس ساعات بتقلد أختها الوسطانية.
اللي خلاني جبت آخري بقى، إني وافقت ألعب مع البنتين الصغيرين “استغماية”، وفي الآخر البنات قفلوا الباب في وشي وسابوني بره البيت!
حاولت أقنع البنت الكبيرة تفتح لي من الباب الخلفي، عملت نفسها مش سمعاني، وحطت السماعات.
الحمد لله، قريبهم أخيرًا وصل، وقعد معاهم، وأنا رجعت بيتي.
اللي حصل ده خلاني حزينة قوي، لأني كنت بحلم أكون مرات أبوهم، وكنت متخيلة إن علاقتنا هتكون جميلة، لأني عارفة مايك قد إيه بيحب بناته.
لكن دلوقتي، أنا مبقتش عايزة أتعامل معاهم تاني أبدًا.
بس في نفس الوقت، ده أكبر دليل إن مايك ومراته مش مرتاحين مع بعض، لأن الأطفال اللي بيعيشوا في بيت سعيد مش بيعملوا التصرفات دي أبدًا.
أنا عايزة أعيش مع مايك، بس مش عارفة لو ده ينفع دلوقتي، علشان أنا والأطفال ما عرفناش نتفق خالص.
إذا كانوا عملوا معايا كده من دلوقتي، يبقى لما باباهم يطلق مامتهم، هيعملوا معايا إيه؟ أكيد هيبقوا أسوأ من كده، ويكرهوني.
أنا بحب مايك قوي، وعارفة إن علاقتنا هتكون جميلة، لكن بصراحة، اللي حصل ده هزني قوي.
أتمنى فعلًا لو عندي حد قريب مني أتكلم معاه في الموضوع ده، بس أنا عارفة إن كل الناس القريبين مني هيحكموا عليا.
_____________________
*ده تعليق علي ريديت:
بصراحة، مش باين عليكي إنك بتحبيه، أنتِ بتبالغي قوي وعايشة قصة رومانسية خيالية مش موجودة غير جوه دماغكِ أنتِ وبس.
أنتِ بتتصرفي كأنه هيسيب مراته ويهرب معاكي، وبتبرري ده لنفسكِ إن أطفاله متعبين، يبقى أكيد بيتهم مش سعيد، واتجاهلتي تمامًا حقيقة إن مراته حامل، وهو ساب كل حاجة علشان يجري عليها.
بتقولي إن الأطفال مش بيحترموكي، هما أصلًا مش عارفين أنتِ مين، وفجأة بقيتي مسؤولة عنهم! أكيد مش هيتعاملوا معاكي زي مامتهم، وعمركِ ما هتكوني زيها بالنسبة لهم أبدًا.
لو جريتي ورا مايك، هل متوقعة إنكِ هتكوني في علاقة ممتازة معاه؟
على فكرة، ده مش حقيقي، ومش معنى إنه لطيف معاكي يبقى هو خلاص بيحبكِ.
أنصحكِ تتكلمي مع مختص، علشان اللي بيحصل ده غلط ومش طبيعي.
*رد صاحبة القصة:
أنا عارفة إنه مش هيسيب كل حاجة ويهرب معايا، أكيد الموضوع محتاج شهور، ويمكن سنين في المحاكم، وترتيبات الحضانة لو قرر يسيب مراته.
وقبل ما حد يعلق، أنا عارفة إن مفيش ضمان إنه هيسيب مراته، بس مايك راجل محترم وصريح، ولو حصل أي حاجة بينا، أكيد هيسيب مراته.
أكيد ماينفعش نكون إحنا الاتنين في حياته، ده مش هيكون عادل، وهو قال لي قبل كده إنه بيحب العدل جدًا.
_________________
القصة مترجمة من ريديت. أصحاب القصة أجانب.
