
الأكل النباتي 🥗🥦🥕
أنا (25 سنة) خطيبي (31 سنة) بنحضر خلاص لفرحنا.
وإحنا بنخطط للفرح ما اختلفناش علي حاجات كتير ماعدا الأكل. أنا وعيلتي نباتيين، اخترنا نمط الحياة ده لأسباب كتير، اهمها إن عندنا تاريخ مرضي ومشاكل صحية.
خطيبي وعيلته عكسنا تمامًا، هما بيحبوا اللحمة جدًا وبيعتبروها جزء أساسي من حياتهم، وده عادي بالنسبالي طبعًا.
لما جينا نقرر منيو الأكل في الفرح، كنت عايزة أضيف 4-5 اصناف نباتية. خطيبي ومامتة اعترضوا وقالوا إن ده اهدار للفلوس على ” أكل مش حقيقي”.
كمان قالوا إن ده هيكون إهانة “للضيوف بتوعهم” واقترحوا إن الخيارات النباتية تكون مجرد “سلطات ومقبلات عادية” (وأمه اقترحت كب كيك).
قلت لأ.
أولًا: لأن أنا وعيلتي اللي دفعنا تكاليف الفرح ✔️
ثانيًا: عايزة ضيوفي يحسوا بالترحيب ومحدش يعاملهم كأنهم “درجة تانية” وكأننا بنرميلهم شوية “سلطة” بس ✔️
خطيبي اتكلم بتريقة وقال: “هو مش ده اللي النباتيين بياكلوه؟”.
رفضت أدخل في خناقة وقلت إن ده قرار نهائي.
من كام يوم اكتشفت إنه لغى كل الأطباق النباتية من المنيو تمامًا ومن ورايا. كنت بغلي حرفيًا!
كلمته في الشغل بس كان بيكنسل عليا.
رُحت على شُغله على طول وواجهته هناك وكنت منهاره ومنفعلة عليه جدا.
هو اتصدم لما شافني. في الأول قال إنها فكرة مامته وبعدين قالي أرجع البيت دلوقتي علشان أنا بعملة مشكلة في المكتب.
لما رجع البيت كملنا خناق، هو دافع عن نفسه وقال إن اللي عمله ده كان رد فعل طبيعي لأني بتجاهل أفكاره ورأيه ورافضة أراعي عيلته!!
رديت عليه أن فيه اصناف لحوم كتير، ليه مش من حقي يكون فيه 4-5 اصناف نباتية؟ خصوصًا وأنا اللي بدفع الفلوس؟!
هو صرخ وقال إن الفرح ده بتاعه هو كمان مش بتاع عيلتي بس.
دلوقتي عيلتي قالولي عادي مش مشكلة، هما هيلاقوا حل، وطلبوا مني أعدي الموضوع، بس أنا رفضت.
هل أنا غلطانة إني صممت على قراري في الموضوع ده؟
🌿تحديث:
مامته بعتتلي رسالة من شوية بتحاول تخليني أسمعها بعد ما كنت بتجاهل مكالماتها ومش برد عليها.
بعتتلي رسايل طويلة عريضة علشان “تناقش” اللي عملته في مكان شغل ابنها، ووصفت تصرفي بكل الأوصاف من “مش ناضج” لـ “مش متزن”.
بعدين بدأت تشرح إزاي لاحظت إن أنا وعيلتي بنتعامل بتجاهل مع رأي ابنها و”اختياراتة” في ترتيبات الفرح.
قالت إنها لاحظت تصرفاتي معاه ومع عيلته كلها، وكانت عايزة تتكلم من زمان بس مسكت نفسها عشان تحافظ على الهدوء.
بعدين جت على موضوع منيو الأكل وقالت إن ملهاش أي دخل في موضوع إلغاء الاصناف النباتية، بس ده ما يمنعش إنها بتدعم قرار ابنها.
وكمان قالت إنها شايفة إن تصرف ابنها كان سليم و مسؤول جدًا، لأن أنا مصممة اهدر الفلوس علي حاجات مش مهمة.
قالت كمان إني فضلت أكرر جملة “أنا اللي بدفع”، وإن في الحقيقة الفلوس دي مش فلوسي لوحدي، دي فلوسي وفلوسه لأننا خلاص هنتجوز.
اقترحت إني “أفوق شوية” وأبطل التفكير بعقلية “فلوسي وأنا اللي دفعت”.
وفي الآخر قالت إن الوضع ده كله بيخليني أبان بشكل “مش حلو”، وإن هي وابنها قدموا تنازلات كتير لكن أنا اخترت أتجاهلها وقررت أخلي الموضوع ده وكأنة “المعركة الأخيرة”.
ختمت كلامها إن مش بس ابنها زعلان، لاء كمان العيلة كلها زعلت لما سمعت بالموضوع، واقترحت إني أوافق على الحل الوسط بتاعهم وأنهي الكلام في الموضوع ده.
الكلام ده ضايقني قوي!
رديت عليها وقلت لها “إني لسه مصممة على موقفي، ولو الموضوع ده هيخليني ألغي الفرح كله، فأنا مش هتردد”.
بصراحة اللي بيحصل ده حاجة مش منطقية وسخيفة ، بجد سخيف قوي.بابا وماما مش عارفين حتى يقولوا إيه.
الظاهر إن خطيبي شاف ردي عليها (لأنه معاها) ودلوقتي بيحاول يكلمني، بس أنا مستنية لحد ما يرجع البيت وأشوف إذا كان لسه مصر على موقفه ولا لأ.
🌿تحديث:
استنيته يرجع البيت عشان نتكلم آخر كلام في الموضوع.
للتوضيح أكتر، عيلته وزنهم زايد شوية. مفيش مشكلة في ده طبعًا، هم حريين تمامًا في اختيار أسلوب حياتهم، لكن بيتضايقوا بسهولة لو حد قال قدامهم كلمات زي “الوزن” و”الأكل”.
لما قولت كده لخطيبي أنكر تماما قال إنه مش حقيقي، وإني بس بدخل المواضيع في بعض.
حاول يشرح لي ليه ضيوفه ممكن يشوفوا الاصناف النباتية دي “مزعجة”. وقال إن عيلته بتحب الأكل وبتعتبره “موضوع مهم جدًا”، وإنه مش عايز عيلته تحس إن فيه أصناف معينة “مش مسموح لهم يلمسوها”، أو يحسوا إن فيه “فرق في المعاملة بين عيلتي وعيلته”.
وبعدين بدأ يشرح إنها مجرد مناسبة، وإن عيلتي المفروض تتقبل اللي موجود في المنيو، ولو حسوا انهم “مضايقين” طب ايه المشكلة يعني؟! ده مجرد يوم واحد، أكيد يعني مش هيموتوا لو “أكلوا سلطة ومقبلات” اليوم ده.
الكلام ده كله مدخلش دماغي. لان ببساطة دي فرحي أنا ومن حقي أختار اللي أنا عايزاه.
بصراحة أكتر حاجة زعلتني، إني أكتشف إن خطيبي مش مهتم بيا ولا برأيي وأهم حاجة عنده نفسة وعايز يرضي أهلة علي حسابي. ودي حاجات صعب أعديها.
عادةً، أنا بحب الكلام بهدوء والحلول الوسط… طول حياتي كنت كده ، وفي الحقيقة أنا اتنازلت عن حاجات كتير قبل كدة. أكبر بكتير من مجرد أصناف أكل ومكنش عندي مشكلة في ده ، لكن زي ما الناس قالت… الموضوع مبقاش عن الأكل أصلًا المشكلة أكبر من كده.
يعني… هو حرفيًا مش هيخسر أي حاجة لو سابني أعمل اللي أنا عايزاه، لكن الواضح إنه مستعد يخسر كل حاجة بسبب الموضوع ده.
خلاص يعتبر هو اللي اختار.
رجعتله الخاتم وقررت أنهي كل حاجة. ما قدرتش أتخيل نفسي أعيش بالطريقة دي طول عمري.
مش عايزه أكون مضطرة أمشي على قشر بيض طول حياتي علشان عيلته وأسيبه يتجاهل كلامي ويقرر أن كلامة بس هو اللي هيمشي.
الجواز لازم يكوم مبني علي التفاهم والتنازل، وهو ما كانش هيخسر أي حاجة لو ريحني. بس رفض و اختار يعمل كده فيا وفي عيلتي.
بس أقدر أقول بكل أمانة إن هو ومامتة وعيلته خلوني أحس إني “مجنونة” في مواقف كتير جدًا.
علي فكرة دي أول علاقة جديه في حياتي علشان كده ماكنش عندي خبرة قوي.
آخر حاجة قالها إن أنا اخترت عيلتي على حسابه، وقررت أنهي كل حاجة بينا عشان “أرضيهم”.
عامة أنا أخدت قرار نهائي خلاص.
شكرًا جدًا على كل النصايح والدعم اللي ما وقفش أبدًا 🙏❤️
(القصة حقيقية مترجمة من ريديت،أصحاب القصة أجانب)