عزومة عيدالميلاد 🎄🎁🎅
أنا عندي ٢٠ سنة وهو عنده ٢١ سنة.
اتعرفت علي حبيبي من الانترنت. هو من دولة في أوروبا وأنا عايشة في أمريكا.
إحنا نعرف بعض من سنتين، وهو بدأ ييجي أمريكا بانتظام من 10 شهور، عشان ناوي يستقر هنا السنة الجاية ويدرس.
هو شخص رائع، بحس إنه أطيب وألطف وأظرف شخص قابلته في حياتي، ومش عارفة إزاي كنت محظوظة كده.
بصراحة هو أحلى مني بكتير، وأنا أصلًا معنديش ثقة في نفسي، عشان كده أحيانًا بحس بالإحباط، خصوصًا إن البنات دايمًا بيبصوا عليه وإحنا ماشين.
أنا وزني زايد، بس عادي أنا أقدر أمشي، ولو احتجت أجري أقدر أجري، وأقدر ألمس صوابع رجلي. ده غير إني مهووسة بنظافتي الشخصية جدًا.
أنا بحاول ألبس حاجات تليق عليّا، وبحب قوي اهتم بمظهري بس دايمًا بغطّي دراعي وضهري، وعلي طول بلبس جاكيت.
الحقيقة أنا عمري ماكنت رفيعة، وأنا صغيرة ماما وبابا كانوا دايما بيقولولي لازم تخلصي طبقك كله، وحرام تسيبي أكل في الطبق. أنا فاكره وأنا عندي ٥ سنين رفضت أخلص طبقي، واضطريت أقعد علي السفره بالساعات لغايه ما خلصته كله.
علي فكرة بابا وماما ماكنوش وحشين ابدًا بالعكس هما بس كانوا صغيرين قوي وظروفهم المادية صعبة وكانوا فاكرين إن ده الصح (دلوقتي علاقتي بيهم ممتازة).
كمان هبقي كدابه لو قولت إن أهلي هما السبب بس، لإني بحب الطبخ قوي وبحب أعمل حلويات وكل الأكل اللي بطبخه مش صحي.
أنا اتعرضت للتنمر كتير بسبب وزني والنظاره وده خلي ثقتي في نفسي تقل جدًا.
دلوقتي حبيبي عايزني اتعرف علي أهله، هما عازمني عندهم في عيد الميلاد.
بصراحة أنا مرعوبة وخايفة جدًا من الموضوع ده.
أكيد نفسي اتجوزه واعيش سعيده معاه، وعارفة إني لازم اتعرف علي أهله. وهما يتعرفوا عليا. بس أنا خايفة قوي.
عمري ماركبت طيارة قبل كده ومش عارفه الكراسي في الطياره بتكون حجمها قد ايه، وخايفة الكرسي يكون صغير عليا.
كمان مش عايزه امشي في بلد كل اللي فيها رفيعين وبيحبوا يركبوا العجل كل يوم.
خايفة إن الناس يشوفوني بالصورة النمطية للأمريكان التخان اللي بياكلوا ماكدونالدز طول الوقت.
مرعوبة إن عيلته ما تحبنيش لأنهم أكيد عارفين إنه يقدر يلاقي حد أحسن مني بكتير.
بصراحة أنا كنت مكتئبة جدًا اليومين اللي فاتوا و بفكر في الموضوع كتير، وهو أكيد لاحظ وحاسس إني متغيره.
أنا مش عايزاه يفتكر إني مش عايزة أقابل عيلته وإني مش جد في العلاقة أو حاجة، أنا بس مش عايزة أحرجه.
سؤالي: أعمل إيه؟ أروح؟ لو كنت أقدر أخس بسرعة في الأسابيع اللي جاية كنت رحت، بس للأسف ده مستحيل. هل مفيش حل غير إني ما أروحش وأقوله السبب؟ ده ممكن يبوظ علاقتنا؟ أنا تايهة ومش عارفة أعمل إيه؟
🌿تعديل:
كل الناس هنا بتقولي سافري. خلاص أنا هبلغه إني موافقه قبل ما ارجع في كلامي تاني.
🌿 تحديث:
كلكم نصحتوني اتكلم بصراحة مع حبيبي عن مخاوفي وبلاش ارفض السفر. أنا فعلاً عملت كده.
طلبت منه نتكلم، في الأول مكنش فاهم في ايه وحس بالقلق.
اتكلمت معاه بصراحه وبعد ما خلصت كلام عن مشاعري ومخاوفي وكل حاجة، بصّ لي كأني مجنونة وقال لي: “إنتِ بجد فاكرة إن عيلتي سطحيين كده؟”
حسسني إن الموضوع ابسط من كده بكتير، وإني بفكر أكتر من اللازم.
اتكلمنا كمان عن ثقتي في نفسي والحاجات اللي مضايقاني، وسألني لو فيه أي حاجة يقدر يعملها عشان يساعدني ويخليني أحسن.
قلتله إنه أصلًا بيجاملني كتير قوي وبصراحه هو عامل اللي عليه وزياده.
اتفقنا إن أول قرار هناخده في السنة الجديدة هيكون إننا نبدأ ناكل أكل صحي، ونخرج نمشي كل يوم.
أما بالنسبة للسفر ، فعلاً رُحت، وكانت تجربة جميلة جدًا!
أول ما ركبت الطيارة (وقدرت أقعد في الكرسي عادي)، حسيت بالراحة واتحمست قوي.
عيلته رائعة، مامته أطيب ست في الدنيا (وكمان بتعمل مشروبات لذيذة جدًا)، وهو أكيد أخد خفة الدم من باباه. بجد مكنتش عايزة أسيبهم وامشي.
الأكل، الأسواق، التلج، الناس، كل حاجة في ألمانيا كانت جميلة ومش قادرة أستنى لحد ما أسافر هناك تاني.
شكرًا لكل الناس اللي أقنعوني أروح. أنا مبسوطة جدًا إني خرجت من منطقة الراحة بتاعتي ❤️
(القصة مترجمة من ريديت، أصحاب القصة أجانب).
