إزاي تقدم هدية كبيرة من غير ما تبقى حاجة محرجة؟🎁🎀 قصص

قصة

إزاي تقدم هدية كبيرة من غير ما تبقى حاجة محرجة؟🎁🎀

أنا بشتغل موظفة في شركة.

زميلي في الشغل خسر عربيته من قريب – مش عارفة التفاصيل بالظبط، يمكن عطلت أو حاجة زي كده.

هو للأسف الأسبوع اللي فات اضطر يلغي فرحه عشان ابنه مات فجأة. الراجل بجد حالته وحشة جدًا.

هو مش من النوع اللي بيحاول يخلي الناس تحس بالشفقة عليه عشان يستغلهم. لا لا هو فعلا مش كده ابدا.

أنا أصلًا بقالى كام شهر بفكر أشتري عربية جديدة، مكنتش مستعجلة قوي. بس لما عرفت إن الراجل ده بيروح وييجي الشغل كل يوم بأوبر، فكرت أن الاحسن أجيب عربية جديدة ليّا وأدي له عربيتي القديمة.

قررت خلاص إني هعمل كده، بس لسة مش عارفة إزاي ؟ أنا عايزة أحافظ على كرامته، عشان كده مش عايز الموضوع يكبر. بصراحة، مش حابه كمان إن زمايلنا في الشغل يلاحظوا لما يشوفوه سايق عربيتي.

أنا مش بعمل كده عشان أتباهى أو حاجة، هي الظروف جت كده.

أنا مش هستفيد قوي لو بيعت العربية وبصراحة معنديش خلق لموضوع البيع ده.

إزاي أتعامل مع الموضوع ده بطريقة ظريفة؟ إيه أكتر طريقة لطيفة أقدّمله بيها العربية وازاي أرفض الفلوس بذوق لو هو عرض يدفع تمنها، من غير ما يكون الموضوع محرج؟

في كلام معين أو حاجات ممكن أعملها تخلي الموضوع أسهل؟

أنا كنت بفكر أكلمة في مكتب فاضي وأقوله ببساطة: “بص، أنا عايزاك تاخد الحاجة دي”.

بس مش عارفة؟! أعمل إيه لو زعل أو حسيت إنه اتضايق؟ لو رفض ياخدها؟ ولو الموضوع بقى غريب بعد كده بينا؟

خطيبي أقترح عليا أبيعهاله بسعر رمزي علشان ما يحسش إنها صدقة، بس حاسة إن الموضوع هيبقى بايخ جدًا لو قلت له: “بص أنا عارفة إن عندك كل المشاكل دي، بس لو دفعتلي 500 دولار هديلك عربيتي”. لأ، الطريقة دي مش هتنفع معايا خالص.

فكرت أبيعهاله بس اقوله أدفع علي مهلك خالص وفي أي وقت حتي لو 5 دولار كل فترة، بس أنا فعلاً مش بحاول أكسب فلوس من الموضوع ده. كل اللي عايزاه هو إني أساعد زميلي وخلاص.

إزاي أتعامل مع الموقف ده بطريقة صح؟

🍃تحديث:

كنا في نهاية الاسبوع وهو ماشي. جريت عليه وقلت: “هاي! عامل إيه؟” قال وهو بيتنهد: “بحاول أكون أحسن.”

سألته: “طب لقيت حل لمشكلة عربيتك؟”

قال: “آه، أنا محتاج فعلا عربية، بس مش قادر أشتري واحدة جديدة دلوقتي.”

كنا واقفين قريب من جراح العربيات، والعربيتين بتوعي كانوا واضحين قدامنا.

قلت له: “بص، أنا اشتريت العربية دي (وشاورت على العربية الجديدة)، عشان كده عايزة أديلك العربية دي (وشاورت على العربية القديمة).”

كان متفاجئ جدًا ومصدوم مش قادر يتكلم، فبدأت أتكلم بسرعة وقلت له: “ما قدرتش ألاقي ملكية العربية – أكيد موجودة في الدولاب عندي في حتة – بس معايا كل الورق اللي محتاجه علشان تروح “الهيئة الحكوميه” وتنقلها باسمك.

ولو ما لقيتش ورقة الملكية أوعدك اني هطلع واحدة بديلة، والعربية محتاجة تغيير زيت لأنه بقاله فترة، فهغير الزيت في الويك اند. وبعدها هسيبلك المفتاح على مكتبك.”

حاولت أبص في عينيه، بس الكمامة كانت مغطية نضارته بالبخار. كملت كلامي:

“بص، هما عرضوا عليا مبلغ صغير عشان العربية، وحسيت إن ده مش مستاهل، وما كنتش عايزة أدخل في دوشة البيع أونلاين. وكمان ما عنديش مكان في البيت أركنها فيه، فقلت لنفسي: ليه ما أخليش [زميلي] ياخدها ويستفاد بيها أحسن؟”

كنت بترعش، الجو تلج، وبدأت أحس بالبرد جدًا وابتديت أنط شوية علشان أدفي نفسي.

“فـ…ممكن تاخد عربيتي، لو سمحت؟”، كنت عايزه انهي كلامي وأخد أي رد فعل منه.

شال نظارته، وبص لعيوني وقال: “أنتي غيرتي حياتي بالهدية دي”.

فضل يبكي وهو مغطي وشة وأنا كنت ساكتة خالص وسيباه براحتة. كمل وقال: “مش قادر أوصف اللي إنتي إدتهولي.”

أنا كمان بدأت أعيط.

بصراحة كنت بردانة عشان كده مشيت.

مرتاحة قوي عشان ما أصرش على موضوع الفلوس. لو قرر يفتح الموضوع بعدين، هشوف هعمل ايه، بس أنا راضية جدًا باللي حصل.

دلوقتي بس محتاجة ألاقي الورقة اللي مش عارفة مكانها 😵

واضح إني كنت بفكر في الموضوع زيادة عن اللزوم، والموضوع طلع أبسط بكتير! 😅

(القصة حقيقية مترجمة من ريديت. أصحاب القصة أجانب).

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!