استعدوا يا شباب القصة دي طويلة ومجنونة 😅
أنا طالب هندي….
الموضوع بدأ لما امتحانات الصف العاشر اتلغت، ومن يومها وأنا مذكرتش بجد حتى ساعتين. قررت، ادخل علمي في الصف 11 على أمل إني أدخل كلية الهندسة ، لكن بسرعة فهمت إن ده مش سهل خالص. بالعافية عديت الصف 11 بنسبة 49%.
لما دخلت الصف 12، قررت إني أبدأ من جديد، وسجلت في مدرسة منزلية (مدرسة مفيهاش حضور)، وبدأت أذاكر بجد لمدة يومين أو تلاتة، لكن بعد كده رجعت تاني لنفس العادات. كانت فيه فترة في حياتي مكنتش بعمل فيها غير إني باكل، وأنام، وأتفرج على أفلام. كنت أتفرج على أفلام رعب طول الليل لمدة شهور وأنام طول اليوم، وأهلي كانوا فاكرين إني بذاكر طول الليل.
لكن بعد شوية، أدركت إن الوقت فات، ومحتاج أعمل حاجة عشان أدخل جامعة كويسة. حاولت أذاكر تاني، بس مكنتش فاهم أي حاجة في الفيزياء أو الكيمياء حتى بعد ما بذلت مجهود كبير، في الرياضيات كنت بفهم شوية وكنت شاطر في الانجليزي، بس ده مكنش كفاية .
فهمت بسرعة إني مش هعرف أجيب حتى 50% في امتحان القبول في الهندسة ، فبدأت أدور على كليات بره الهند وإجراءات القبول والتكاليف، وكل حاجة قدرت ألاقيلها معلومات على الإنترنت.
اكتشفت إن في أمريكا بعض الجامعات الكبيرة بتقدم مساعدات مالية كاملة للطلاب الأجانب (منح دراسية)، بس لازم تكون متفوق جدًا عشان تاخد المنح دي، زي إنك تكون جايب درجات ممتازة، وعندك أنشطة خارجية ممتازة، وكل حاجة تقريبًا تكون مثالية، وأنا مكنش عندي أي حاجة من الحاجات دي.
بدأت أدور في المواضيع دي وعرفت إن تقديم طلبات القبول للجامعات في أمريكا بيبدأ من 1 أغسطس. فعملت خطة تزوير منظمة جدًا.
هم بيطلبوا نتائج الصفوف من 9 إلى 11، ونتيجة متوقعة للصف 12. عدلت نتائج الصفوف من 9 إلى 11 بشكل متقن جدًا بحيث محدش يقدر يلاحظ إنها متعدلة “تزوير”، وعملت نتيجة متوقعة مزيفة بالكامل للصف 12، وحتى اشتريت ختم مزور مشابه لختم مدير المدرسة عشان الموضوع يبقى مثالي.
بما إن كل الشهادات دي لازم تتبعت من إيميل رسمي للمدرسة، فعملت إيميل مزيف للمدرسة، وبقى شكله رسمي بالظبط.
بعد كده بدأت أجهز ملف للتقديم في الجامعة . كان لازم يطلبوا مني إنجازات أكاديمية في الثانوية، وإنجازات خارج الدراسة، فعملت بروفايل مزيف بالكامل ليا، ومذكرتش أنشطة صعبة التحقق زي الفوز بميداليات أولمبياد، لكن حطيت حاجات برضه تبان كويسة، ولو حد حب يتحقق، كانوا هيبعتوا إيميل للمدرسة ” الايميل اصلا مزيف والرسايل بتوصل عليا أنا.
وكان لازم أكتب شوية مقالات، تقريبًا كل كلية عندها سؤال عن ليه عايز تيجي عندنا وإيه اللي بنقدمه مش موجود في كليات تانية، فاستعنت بـ الذكاء الاصطناعي وطلبت منه يكتب مقال كويس، وطلعت بمقالات مقبولة للتقديم.
طيب، عملت ده وقدمت طلبات كتير لعدد كبير من الكليات. قدمت تقريبًا لكل كلية في أمريكا بتدي منحة كاملة
طلعت النتايج، وزي ما كنت متوقع، اترفضت من كل الجامعات، يمكن يكونوا اكتشفوا إني مزيف أو حاجة زي كده، مش عارف. لكن جامعة واحدة، مش هذكر اسمها لأسباب واضحة، وهي من أفضل 25 جامعة في أمريكا وجامعة محترمة. مش عارف إزاي قبلوني😅
كمان أدوني دعم مالي كويس جداً غطى تقريبًا كل حاجة ما عدا تكلفة الوجبات، اللي كانت حوالي 5 آلاف دولار في السنة. كنت عارف إننا نقدر نتحمل ده، لكن فكرت إنه لو والدي لسه بيدفع مصاريف جامعتي، هفضل طول الوقت تحت رحمتة و لازم أسمع كلامه وأبرر له كل حاجة بعملها طول ما هو بيدفع. عارف إن ده غلط، بس في الوقت ده، كنت عايز الحرية بأي تمن، ولو أقدر أروح الجامعة من غير ما أصرف ولا دولار من فلوس أهلي،وقتها بس هحس بالحرية الكاملة.
فخططت لحاجة غلط تانية وكبيرة. عملت شهادة وفاة مزيفة لوالدي (عارف إنكم هتقولوا إيه ده)، لكن فعلًا عملتها وبعتها للجامعة، وقلت لهم إن والدي اتوفى بسبب مرض خطير، ووالدتي بتاخد معاش والدي (والدي شغال في وظيفة حكومية)، والمعاش تقريبًا نصف المرتب الأصلي بس، فمش هنقدر ندفع حتى الـ 5 آلاف دي.
الجامعة اخدت الموضوع بجدية وزودوا دعمهم المالي لدرجة إنه بقى يغطي كل التكاليف، يعني المصاريف، والسكن، والوجبات، وحتى تذكرة ذهاب وعودة للهند كل سنة.
كان فاضل حاجة أخيرة، وهي إني أبعت لهم النتيجة النهائية للثانوية العامة، عشان اثبت إني اتخرجت بدرجة كويسة، كنت قلقان إن ممكن ما أنجحش حتى في الصف الـ12. دي كانت العقبة الوحيدة دلوقتي.
جبت النتيجة، وجبت 58%، وده كان أكتر من كافي بالنسبة لي. أول ما استلمت النتيجة، عدلتها وخليتها 91% علشان أوريها لأهلي، واللي فرحوا بيها جدًا، وكنت حاسس بالذنب شوية.
وبعد ما عدلتها وخليتها 91%، بعتها للجامعة من الإيميل الرسمي للمدرسة اللي كنت عملته “المزيف”. الجامعة قبلتها بسرعة وخلوا قبولي رسمي، وبقى كل شيء جاهز.
لما حكيت للكل عن قبولي، كل الناس اتفاجئوا، ازي قدرت أدخل جامعة في أمريكا بمنحة كاملة!!!
أصحاب والدي ووالدتي بدأوا يجوا البيت يباركوا لي ويسألوني عن نصايح لأولادهم، إزاي هم كمان يقدروا يعملوا ده، وأنا الوحيد اللي كنت عارف إزاي عملت كده.
لما قلت لوالدي في الأول، كان رد فعله: “إنت حتى مش عارف الألف من كوز الدرة، إزاي ده حصل؟”
دلوقتي كان لازم أطلع تأشيرة لأمريكا، والحاجات دي مش صعبة أوي، بس لو شكوا في أي حاجة غلط، زي تزوير في الشهادات أو حاجة مشبوهة، هيترفض طلب التأشيرة فوراً.
فيه مقابلة قصيرة مدتها حوالي 2-3 دقايق مع موظف أجنبي في السفارة أو القنصلية الأمريكية، بيحققوا فيها إنك شخص موثوق، وكمان بيتأكدوا إنك بتتكلم إنجليزي بشكل كويس.
وقت المقابلة، شفت بنت اترفضت قدامي على طول، وكنت أنا الدور اللي بعدها. معرفش ليه رفضوها؛ كانت بتتكلم كويس وبتجاوب على كل الأسئلة صح، وده خلاني أتوتر جداً.
لما جي دوري، الموظفة سألتني ليه اخترت الجامعة دي وكل ده، فقلت لها حاجة مميزة عن الجامعة وقلت كمان إنهم قدمولي منحة كاملة، يعني تغطية لكل المصاريف. أول ما شافت ده على الورقة اللي معاية، قالت “آه، ده كويس”، وابتسمت وقالت مبروك، وقالت “أكيد إنت ذكي جداً”، وأنا لوحدي اللي عارف قد إيه أنا “ذكي”، وكتبت حاجة بسرعة على الكمبيوتر وقالتلي إن تأشيرتك اتوافقت، وما سألتش أي أسئلة تانية.
وصلت هنا في أمريكا في أغسطس 2023 من غير ما أدفع ولا دولار، الجامعة دفعتلي تمن التذكرة، وبعتوا أتوبيس عشان ياخد كل الطلاب المغتربين اللي وصلوا في اليوم ده من المطار.
لما وصلت، بدأت اتعرف علي الناس، واتعرفت على كام طالب من الهند وبلاد تانية، وكتير منهم عندهم منحة كاملة زيي، وكلهم عباقرة؛ في منهم عامل أبحاث في مجالات معينة، وفي اللي كسب جوائز في الأولمبياد والحاجات دي، وأنا بقى… مزور.
المهم، بدأت الدراسة، وعندنا هنا امتحانين نصف تيرم وامتحان نهائي،في الأول حاولت أذاكر وقلت خليني أنسى كل حاجة حصلت قبل كده وأبدأ حياة جديدة ونظيفة هنا، لكن مش عارف ليه، ماكانش عندي اهتمام بالمذاكرة خالص، عادة ولا مش عارف ليه بالضبط.
جت الامتحانات، وكان لازم أجيب 3 من 4 في المعدل عشان أقدر أحافظ على المنحة بتاعتي للتيرم الجاي، واتوترت جداً.
و خططت تاني……
في قاعة الامتحان بيكون فيه حوالي 100 شخص في وقت واحد، فعملت إيه بقى؟ ما دخلتش القاعة بأي شنطة ولا حاجة، وطبعاً عادي نقدر ندخل بالتليفون أو أي جهاز إلكتروني بس مش مسموح يبان على الديسك، لو شافوه معاك وعرفوا انك بتغش يبقى خلاص راحت عليك.
بياخدوا موضوع النزاهة الأكاديمية هنا بجدية جداً، أكتر من الكليات في الهند، فالغش سهل، بس لو اتقفشت خلاص ضاعت.
قعدت جنب باب الخروج، وأول ما استلمت الورقة ولقيت المراقب باصص للناحية التانية، طلعت من القاعة، وخبّيت الورقة في الجاكت وكتبت الإجابات من الإنترنت. في آخر وقت، بيكون فيه زحمة لأن الناس بتدخل وتخرج وتسلم الامتحانات، فدخلت مع الزحمة وسلمت ورقتي.
عملت كده في كل الامتحانات وجبت تقريباً الدرجات النهائية في كل المواد، وجبت معدل 4/4 التيرم اللي فات.
بعد كده جات أجازة الشتاء، ورجعت الهند شهر، ورجعت هنا تاني في آخر يناير، امتحان التيرم الجديد كان قريب، عملت نفس الحركة وجبت الدرجات الكاملة.
وعلى الرغم من إني باخد كل حاجة ببلاش، كنت محتاج شوية فلوس أجيب حاجات أو أعمل أي حاجة، وكوني طالب مغترب مش مسموح أشتغل شغل جزئي في ماكدونالدز أو أي محل تاني، ممكن أشتغل بس ده خطر؛ لو اتقفشت هيرحّلوني. ولو أهلي بعتولي فلوس هيقدروا يبعتوا بالكتير 10 آلاف روبية، وده ملوش قيمة هنا.
طيب، ده اللي حصل… عملت خطة تانية. تقدر تعمل تدريب وتكسب فلوس، مفيش قيود على ده.
عملت سيرة ذاتية مزيفة بالكامل، وعدلت شهادتي عشان أبان كأني طالب تسويق في السنة التالتة. ما كتبتش في ال CV أني درست الكمبيوتر أو الهندسة عشان المقابلات بيكون فيها اسئله تقنية وكده، فعملت شهاده “تسويق” عشان مقابلاته عادية مش صعبة أوي وقدمت لأكتر من 100-150 شركة.
جالي مقابلات، حضرت إجابات كويسة،وحفظت كل الإجابات الشائعة للمقابلات، ونجحت في وظيفة تسويق في شركة تأمين صغيرة في نيويورك.
الشغل عن بعد، كل اللي بعمله هو ابعت شويه ايميلات وأحيانا بعمل مكالمات تليفونية. الشغل بدوام جزئي. بشتغل حوالي 2-3 ساعات في اليوم، ومعظم الوقت، بشوف أفلام أو بعمل أي حاجة تانية، وبكسب حوالي 1500 دولار في الشهر، وده كافي جدا بالنسبة لي هنا.
بصرفهم على الأكل، وشراء إلكترونيات جديدة كل شهر، وحاجات من دي. عارف إن المفروض أستثمر وكده، بس مش بحب أعمل أي حاجة فيها استخدام لعقلي إلا لو كانت غش 😅
مش عارف اللي بعمله ده صح ولا غلط. هو غلط أخلاقيًا عارف، بس محصليش أي مشكلة لحد دلوقتي، بصراحة لسة خايف يحصل حاجة وحشة في حياتي قريب لو فضلت أعمل الحاجات دي.
حاسس بإيه دلوقتي بعد ما حكيت عن كل ده؟؟
🌿 الرسالة انتهت.
(القصة تبان غريبة قوي بس هي بجد حقيقية وظهرت في الاخبار الاجنبية)
المشرف في الموقع “ادمن” قعد يدور ورا صاحب الرسالة وعرف انه متابع جامعه معينة “جامعة ليهاي” فقرر يبعت رسالة للجامعة ويبلغ عن الطالب , وفعلا قدروا يوصلوله واتحكم عليه بسجن من شهر الي 3 شهور بتهمه التزوير والمفروض كمان غرامه 85000 دولار بس الجامعه اتنازلت عن المبلغ وطبعا اتفصل واترحل للهند.
قصص واقعية
قصص حقيقية
