هل العقاب ده مناسب ولا مبالغ فيه؟؟؟
أنا راجل (٣٢ سنة) وطليقتي (٣١ سنة) خلفنا كلير (١٦ سنة) في سن صغيرة جداً.
إحنا متفاهمين كأبوين، وعندنا قاعدة ثابتة: لو بنتنا كسرِت حاجة، هي اللي بتدفع تمنها.
جدتي معندهاش أحفاد غيري أنا وأختي (٢٧ سنة).
عمتي عمرها ما اتجوزت، هي اشتغلت مع جدّي وجدّتي في محلهم لتفصيل الملابس، وبعد ما هما اتقاعدوا، استلمت هي المحل.
السنة اللي فاتت خطيب أختي (٢٩ سنة) قدَّم لها خاتم الخطوبة.
جدّي عرض يعمل بدلة الفرح لخطيب أختي، وأختي كانت فرحانة جداً بالفكرة.
جدتي طلبت مني أسأل أختي عن فستان أحلامها وأسجل الكلام.
أختي “وهي فاكرة إن الموضوع بينا بس”، حكِت لي بالتفصيل عن الفستان اللي في بالها، بس قالت إنه غالي جداً، عشان كده كانت هتشتري حاجة أرخص.
بعد كام شهر، جدّتي فاجأت أختي بفستان الفرح اللي بتحلم بيه، وكان مناسب تماماً والكل كانوا متأثِّرين 😍
للأسف، جدتي توفّت من قريب، والموضوع أثّر علينا قوي.
أختي كانت محطّمة، لكن قررت إن الفستان ده هيكون زي رمز لوجود جدتي في الفرح.
المشكلة بقى مع كلير. هي جسمها أكبر من أختي بكثير.
من ٣ أيام، رحنا نزور أختي ونطمن عليها. كانت الزيارة لطيفة، لكن كلير طلبت تجرب الفستان. أختي ردّت عليها بلطف وقالت “لأ”.
كلير اتضايقت، لكن ما علّقت بعدها.
بعدها، قررنا نروح نشتري عشا، أنا وأختي رحنا نجيب الأكل، وكلير قررت تقعد تلعب مع الكلب.
لما رجعنا، لقينا الفستان مُدمّر. كلير حاولت تلبسه، وقطعته “كام غرزه اتفكت”، ولما اتزنقت جواه، قررت تقطعه للخروج منه بدل ما تستنى مساعدتنا. الفستان اتقطّع لأجزاء 😲
أختي كانت منهارة وطلبت مننا نمشي.
أنا عاقبت كلير، وكلمت عمتي وعرضت عليها صور للفستان وسألتها لو ينفع يتصلّح؟
ردت وقالت لي “لأ” وقالت إنها ممكن تعمل فستان جديد، بس مش هيكون زي الأول 😢
بعدها، فجرت لي مفاجأة؛ جدتي الله يرحمها خيَّطت أغلب الفستان بإيديها، واستخدمت قماش غالي جداً، وأشتغلت حوالي ٥٠٠ ساعة في تصميمه، لأنه كان الفرح الوحيد في العيلة. تكلفة الفستان كانت حوالي ١٢ ألف دولار 😲
كلير معاها حوالي ١٥ ألف دولار من شغلها ومن مسابقات كتابة فازت بيها. الفلوس دي كانت المفروض تساعدها في الجامعة.
وديتها البنك وبدأت إجراءات تحويل المبلغ كله؛ ١٢ ألف دولار لعمتي مقابل الفستان الجديد، و٣ آلاف دولار لأختي كتعويض معنوي.
شرحت لكلير سبب اللي حصل، لكن كانت منهارة وفضلت تقول إن دي كانت فلوس الجامعة وإن الموضوع مش غلطتها.
قلت لها إنها لازم تشتغل لو ما أخدتش منحة، وإنها غلطانة لأنها لبست الفستان بعد ما أختي قالت لها “لأ”، وكمان ما استنتش لحد ما نرجع ونحاول نساعدها تخرج من الفستان بالراحة.
كلير كلمت مامتها، ورغم إنها شايفة إن كلير غلطانة بعد ما عرفت القصة بالكامل، قالت لي إني ما كانش المفروض “أضيّع مستقبلها” بسبب فستان.
فكرتها بقاعدة “ادفع تمن الضرر”، لكن مامتها لسه شايفة إني غلطان.
هل أنا غلطان؟؟؟
🌹#تحديث
امبارح اتكلمت مع طليقتي على التليفون، وبعد نصايحكم، بعتلها الصور وهي اتصدمت. ما كانتش مصدقة لما قلتلها إن الفستان اتقطع بالشكل ده، وكانت فاكرة إنه مجرد شوية خياطة مفكوكة.
بعد كده طليقتي وقفت في صفّي لما شافت المنظر. و طلع إنها قضت اليوم بتسأل بنتنا ليه عملت كده، وفي الآخر “كلير” اعترفت وقالت إنها كانت زعلانة إن جدتها مش موجودة عشان تعمل لها فستان، وشافت إن “مش عدل” إن عمتها تاخد فستان جميل ببلاش كذكرى وهي لأ، مع إننا اديناها حاجات كتير بعد وفاة جدتها.
هي أعترفت بالحقيقة. أنها لبست لفستان، وعرفت تطلعه لما الخياطة اتفكت، بس من غضبها قطعته بالكامل “عن قصد”.
كان في دماغها “إني لو ما قدرتش اخد فستان من جدتي، يبقي محدش تاني ياخده!!! “دي كانت كلماتها.”
الصراحة لما عرفت إنها عملت كده “عمدًا” الموضوع بقى أسوأ. فكرة إن بنتنا قاسية كده خلتنا نحس إنها مش البنت اللي حاولنا نربيها.
كلير هتروح جلسات علاج نفسي، العقاب اللي أخدته هيفضل زي ما هو، بس هنشوف هيحصل إيه في العلاج.
أما بالنسبة للناس اللي عرضت تساعد في خياطة الفستان، شكرا بجد من كل قلبي. عمتي هتشوف لو ممكن تستغل أي قماش من الفستان القديم في الفستان الجديد.
ما اتكلمتش مع أختي لسه، بس كلمت خطيبها. هي مش في حالة كويسة، والتوتر اللي حصل اتسبب لها في التهاب . هي بتعاني من مرض كرون، للأسف أختي دلوقتي في السرير مريضة. الحقيقة ده متوقع، لأن مرض كرون بيتأثر بالمواقف المتوترة “نفسيتها أتأثرت بسبب اللي حصل”.
قلت لخطيبها إن عمتي هتعمل فستان جديد، ووعدته أني هاخد باقي القماش لعمتي يوم الاتنين.
خطيبها شكرانا على اعترافنا بالمشكله وأننا بنحاول ندور علي حل، بس طلب مسافة شوية عشان أختي تقدر تتعافى من اللي حصل ومنكنش مضطرين ندويها المستشفى.
بالنسبة للـ٣ آلاف (الفستان ب 12000 دولار وأنا أخدت من كلير 15000)، هنشوف حال أختي خلال الأيام الجاية. لو احتاجت تروح المستشفى يبقى الفلوس هتروح لمصاريف علاج أختي، لأن التصرف الأناني من “كلير” هو السبب في الوضع ده، فالمفروض هي اللي تتحمل التكلفة. لو ما دخلتش المستشفى، ممكن أفكر أرجع الفلوس لكلير بعد ما تروح علاج نفسي شوية وتفهم خطأها وتصلح الأمور.
هنشوف إيه اللي هيحصل في الشهور الجاية……
🌹#توضيح
لو أختي كانت قررت تاخد الموضوع للمحكمة، وده من حقها، بنتي كانت هتخسر كتير جدًا، لأني مش هدفع مصاريف محامي، وكمان هقف في صف أختي. ولو بنتي ما عندهاش فلوس في البنك، كنت هخليها تشتغل وتدفع كل سنت لأختي.
هي لسه عندها مدخرات تانية، وعندها حساب استثمار وغيره. دي كانت عقوبة خفيفة على اللي عملته،
🌹 تحديث (بعد 5 شهور)
يا جماعة، الفترة اللي فاتت كانت طويلة وحصلت حاجات كتير،
🌿اولا الفستان: زي ما بعضكم اقترح، “جدّي” استخدم أجزاء من الفستان الأصلي وعمل بيها إكسسوارات عشان أختي تلبسها، وعجبتها جدًا.
عمتي قدرت تعمل نسخة تقريبًا مطابقة للفستان القديم، فكان قريب قوي من الأصلي حتى لو مش هو نفسه.
🌿أختي: اضطرت تروح المستشفى عشان تعالج الالتهاب. كان موقف مرعب، ولأن مناعتها ضعيفة. كنت خايف جدًا إني أفقد أختي، لكن الحمد لله عدّت علي خير.
دلوقتي هي متجوزه من جوزها الرائع 😍 حاولنا نخلي “كلير” تدفع تكاليف العلاج، لكن أختي رفضت تاخد الفلوس، والحمد لله عندهم تأمين كويس.
🌿خطيب أختي كان زعلان ومتردد إنه يخلي “كلير” تحضر الفرح، لكن أختي أصرت أنها تحضر.
“كلير” ما كانتش جزء من وصيفات العروسة، بس كانت معزومة وشاركت في اليوم المميز.
🌿وأخيرًا، “كلير”: أعتقد إنها لما شافت عمتها مريضة بالشكل ده كان دافع يخليها تبدأ تدرك قد إيه اللي عملته كان غلط.
اعترفت بنفسها في الجلسات النفسية إن غيرتها كانت غلط.
لسه بتواجه صعوبة أحيانًا في غضبها، لكن بتتحسن.
اتضح إنها كانت بتفرغ غضبها وطاقتها في الرياضة مع أصحابها في المدرسة، عشان كده كانت هادية طول الوقت، بس الحظر (2020) خلّى المشاعر تتراكم بشكل مش صحي. طبعًا ده مش عذر، لكنه تفسير.
بعد ما شفت الجهد اللي بذلته واعترافها بالخطأ ومحاولة تحسين العلاقة مع أختي، رجعت لها الـ٣ آلاف اللي أختي رفضت تاخدهم للمصاريف الطبية.
“كلير” دلوقتي بتشتغل مع عمتي وجدها يوم واحد في الأسبوع وبتساعد ناس في مراجعة مقالاتهم عشان تجمع فلوس إضافية.
وأنا ساعدتها بمبلغ كويس يوم تخرجها من المدرسة .
هي بدأت الدراسة في الكلية من الخريف بمنح دراسية، وكملت في العلاج النفسي. الأمور لسه متوترة بينها وبين أختي، لكنهم بيحاولوا.
“كلير” بجد بتحاول وبتظهر ندمها، وعمالة تصلح في الأمور. لسه محتاجين شوية وقت عشان الأمور تبقى أفضل، لكن هنكمل مع بعض ❤
#قصص
