مراتي اترفع عليها قضية، وأنا زعلان منها قوي ومش عارف إزاي أسامحها ⚖️🧑⚖️🏛️
صاحبة مراتي رفعت عليها قضية، وبقينا مجبرين نسدد مبلغ كبير جدًا، ودلوقتي إحنا مفلسين بسببها، وكمان علينا ديون 😠
• مراتي عملت إيه؟
“على فكرة، أنا مكنتش أعرف كل اللي بيحصل ده خالص.”
مراتي دورت على صاحبتها القديمة (لورا) وعرفت حسابها على (لينكد إن)، وبعدين قررت تعمل حساب مزيف علشان تكلم صاحبتها القديمة منه. عملت نفسها عضوة في منظمة ومحتاجة (لورا) في شغل، وطلبت منها رقم تليفونها.
(لورا) ردت عليها بس رفضت تبعتلها رقم التليفون، وبعتت الإيميل الشخصي.
مراتي عرفت كل زمايل لورا في الشغل (من حسابها على لينكد إن) وبدأت تبعتلهم رسائل مسيئة جدًا لـ (لورا). الرسائل كان فيها حاجات حقيقية لكن محرجة جدًا، وحاجات تانية كذب ومتلفقة ومحصلتش أبدًا، علشان تشوه سمعتها!
مدير لورا في الشغل وصله رسالة مكتوب فيها إنها مدمنة!
المدير اتكلم مع لورا علشان يفهم إيه اللي بيحصل، بس كان عارف إن الرسائل شكلها مزيف، وإن اللي باعتها حد عايز يخرب حياتها.
المدير دعمها وقال لها إنه مش مصدق الكلام ده.
لكن لورا صممت تعمل اختبار مخدرات علشان يتأكد بنفسه إنها مش كده.
اللي مراتي ماكنتش تعرفه بقى، إن في الوقت ده (لورا) كانت حامل!!
طبعًا مراتي ما اكتفتش بده، لاء، دي كمان دورت على كل حسابات لورا على منصات التواصل باستخدام الإيميل الشخصي، وعرفت توصل لحساب جوزها على الفيس بوك، وبعتت له رسالة مكتوب فيها إن لورا بتخونه!
الراجل كان صريح مع مراته وعرفها بالرسائل اللي بتجيله.
لورا قالت لجوزها: “اعمل نفسك مصدق وكمل كلام علشان نعرف مين الشخص ده ونمسك عليه دليل!”
الزوج فضل يسأل مراتي: “طيب هي كانت بتخوني إمتى وفين؟”
مراتي افتكرت نفسها ذكية وقالت له: “كانت بتقابله بعد الشغل” وبعتت له تواريخ محددة.
طبعًا الزوج مستحيل يصدقها لأن التواريخ اللي اتبعتت بتثبت إن الكلام كله كذب، لأنه ببساطة كان متأكد إنه في الأوقات دي كان مع مراته في البيت.
جوز لورا فضل يجاري مراتي في الكلام وعمل نفسه مصدق علشان يمسك دليل عليها.
بعدها لورا خلفت طفلها وعملت حفلة للمولود في مكان عام (لسوء الحظ، واحدة من صديقات لورا قالت علي مكان الحفلة على الإنترنت).
مراتي لما عرفت المكان قررت تروح، وقفت في مكان قريب وحاولت تتكلم مع كام شخص من اللي كانوا معزومين في الحفلة.
طبعًا الكلام كان وحش جدًا (إنها بتخون جوزها، وإنه مش والد الطفل المولود).
الكلام وصل لـ (لورا) في الحفلة، وكانت هتخرج تشوف مين اللي بيتكلم عليها، بس لما مراتي حست، مشت على طول قبل ما لورا تشوفها.
كل الأحداث دي حصلت على مدار سنة أو أكثر…
لورا وجوزها عرفوا بسهولة يتأكدوا إن الرسائل كلها اتبعتت من نفس المكان، ومن خلال IP الجهاز حددوا العنوان، واكتشفوا إن مراتي هي اللي كانت بتعمل كل ده!
لورا تعبت من كل اللي حصلها، وقررت هي وجوزها يجيبوا محامي علشان يرفعوا قضية على مراتي.
طبعًا لورا عندها أدلة كتير جدًا، ومديرها في الشغل وكل أصحابها كانوا مستعدين يحكوا اللي حصل.
لورا شرحت في المحكمة المعاناة اللي اتعرضت لها، وإنها كانت بتتعالج لأن جالها اكتئاب بسبب الرسائل المسيئة وكمان حكت اللي حصل في الحفلة.
كمان عملت اختبار علشان تثبت إنها مش بتتعاطى أي حاجة، واختبار النسب علشان تثبت إن جوزها هو والد طفلها.
يعني قدمت دليل قاطع إن كل الرسائل كانت كذب.
الحقيقة لما شفت لورا في المحكمة زعلت جدًا عليها، كانت عمالة تحكي وهي بتعيط جامد، وبتقول إنها اتعرضت لكل الضغط ده، وهي حامل وكانت خايفة تخسر طفلها من كتر التوتر والاكتئاب.
أنا كنت حاسس بالإحراج جدًا من لورا وجوزها، ومكنتش قادر أبص في وشهم خالص لما سمعت اللي مراتي عملته فيهم.
مراتي أول مرة تعمل حاجة مجنونة قوي كده، أنا عارف إنها أوقات بتكون حقودة وبتغير من الناس، بس كان مجرد كلام وخلاص.
أنا ومراتي مرتاحين مع بعض ونادرًا لما بنتخانق، بس هي فعلًا غلطانة جدًا المرة دي.
أنا فعلًا مضايق منها وكمان دفعت كل فلوسي في حاجة مليش أي ذنب فيها!
🌿تحديث:
قررت أجاوب على كل أسئلتكم:
• إزاي مراتي مدخلتش السجن؟
مراتي فعلًا اتحكم عليها بالسجن، ده غير طبعًا مبلغ التعويض الكبير، بس المحامي قدر يخفف العقوبة، وبقت إنها تقدم خدمة مجتمعية لمدة سنة.
اللي ساعد مراتي في تخفيف العقوبة، إن عيلتها بتشتغل في تنفيذ القانون، وكمان سجلها نظيف ومعملتش أي حاجة مخالفة قبل كده.
• ليه مراتي عملت كده مع لورا؟
مراتي بتقول إن لورا تستحق كل اللي اتعمل فيها، وإنها شخصية نرجسية وكذابة وحقيرة.
ولما ضغطت على مراتي علشان أعرف لورا عملتلها إيه؟ قالت لي، ويا ريتني ما عرفت!
لأني اكتشفت إن كل الحاجات المجنونة اللي مراتي عملتها علشان أسباب تافهة جدًا 😮
• سبب كل ده؟
طلع الموضوع كله بسبب قصة حب قديمة!
هما الاتنين كانوا أصحاب في ثانوي، وقتها مراتي كانت بتحب واحد اسمه (مارك).
مراتي حست إن مارك معجب بصاحبتها لورا، فزعلت جدًا وانفصلت عنه. وبعدين قالت لصاحبتها: “لو عايزة ترتبطي بـ (مارك) مفيش مشكلة.
لورا ما صدقت وارتبطت فعلًا بـ (مارك)، وفي الوقت ده الثلاثة كانوا لسه أصحاب.
(يعني مارك ساب مراتي وارتبط بصاحبتها لورا).
لورا و مارك انفصلوا بعد كام شهر، وبعدها مراتي اتهمت لورا إنها خانت صداقتهم، وإنها لما سمحتلها ترتبط بمارك كان مجرد اختبار صداقة، ولورا فشلت فيه!
اتخانقوا مع بعض وقرروا ينهوا صداقتهم.
علي فكرة لورا دلوقتي متجوزه واحده تاني غير مارك.
قولت لمراتي: “طيب، إيه اللي فكّرك بيها بعد السنين دي كلها؟ وليه قررتي تنتقمي دلوقتي؟”
قالت لي إنها من حوالي سنة ونص كانت في مطعم، وبالصدفة شافت لورا، واتصدمت لما شافتها لأنها خسّت كتير عن زمان وبقت رشيقة جدًا. (أنا ومراتي بنعاني من زيادة الوزن).
مراتي قالت لي إنها حست بالغيرة جدًا علشان لورا عرفت تخس وهي لاء، كمان جوز لورا رياضي، وهي وجوزها شكلهم جذاب جدًا، وده ضايق مراتي قوي.
علي فكرة، حتى بعد ما خلفت طفلها، لما كانت في المحكمة، كانت لسه رشيقة ومحافظة على جسمها، ومش باين عليها خالص إنها لسه مخلفة، وده كان مخلي مراتي غضبانة.
قالت لي إنها لما شافتها في المطعم قررت تتجسس على حياتها، وكان نفسها تعرف إنها مش مرتاحة، لكن اكتشفت العكس 😠
لورا بتشتغل في شركة كبيرة وأكيد مرتبها ممتاز، وكمان جوزها بيشتغل في وظيفة محترمة.
كمان شافت صورهم وهما واقفين قدام بيتهم اللي شكله كبير جدًا وجميل.
طبعًا، مراتي بتقول إن لورا ما تستحقش أي حاجة من دي، وإنها كانت فاشلة زمان…
كنت أتمنى مراتي تقولي إن لورا عملت فعلًا حاجة شريرة تستحق كل اللي مراتي عملته فيها، لكن للأسف كلها أسباب تافهة جدًا ومجرد غيرة ستات وبس 🙁
أنا دلوقتي اتفقت معاها إنها لما تخلص الخدمة المجتمعية، لازم تشتغل ساعات أطول علشان تساعدني في تسديد الديون، وهي وافقت.
• هل مراتي حاسة بالندم؟
هي حزينة ومكتئبة علشان اتقبض عليها وعلشان كل اللي مرت بيه، بس ما قالتش أي كلمة تحسسني إنها فعلًا ندمانة على اللي عملته.
• هل مراتي موافقة على العلاج؟
كل مرة بكلمها وأقول لها لازم نزور استشاري نفسي، بترفض وبتقول إنها هتتعرض للهجوم من الدكتور.
قولت لها: “بالعكس، هو هيحاول يساعدك”، بس هي برضه مصممة إننا لازم نحل مشاكلنا بنفسنا ومش محتاجين حد.
• هل هكمل حياتي معاها؟
رغم كل اللي حصل، أنا لسه بحبها، ومش متخيل حياتي من غيرها، بس من جوايا عارف إنها لو ما تعلمتش الدرس بعد كل اللي حصل، مش هكمل معاها تاني.
الناس في التعليقات بتحذرني منها، وبيقولوا إنها شخصية انتقامية جدًا، وإن لو حصل إنفصال ممكن تعمل معايا زي ما عملت مع صاحبتها.
أنا فعلًا قلقان من النقطة دي، وبفكر أخد احتياطاتي كويس علشان لو حصل أي حاجة في المستقبل.
………….
القصة مترجمة من ريديت، أصحاب القصة أجانب.
