فرصة تانية 🌟💫
أنا مع جوزي من 15 سنة، ومتجوزين من 6 سنين من الـ15 دول.
زي أي علاقة، عدينا بلحظات حلوة جدًا ولحظات وحشة جدًا.
احنا ابتدينا نرتبط وإحنا صغيرين قوي – كنا تقريبًا 19 سنة – فكان في تحدي كبير إننا نتأقلم ونبقى ناضجين.
بالرغم من كل الأوقات الصعبة اللي عدينا بيها، فضلنا مع بعض وكانت الحاجات الكويسة في علاقتنا أكتر بكتير من المشاكل.
بس آخر سنتين أو تلاتة كانوا صعبين جدًا. حاجات كتير حصلت في نفس الوقت وخلتني أجيب اخري وحست أني خلاص مش قادرة أتحمل أكتر من كده.
أول حاجة كانت إنه بقى كسول جدا وما بقاش يعمل دوره في شغل البيت.
لما اشترينا البيت اتفقنا إننا نقسم بينا شغل البيت “الطبخ والتنضيف”، لكن هو ماكانش ملتزم خالص. كنت دايمًا محتاجة أفكره ينضف، يطلع الأكل من الفريزر، أو انه لازم يكنس، يشغل الغسالة، أو ينضف المطبخ، والحاجات دي كلها.
لقيت نفسي بعمل كل حاجة لوحدي في البيت، وده كان مرهق جدًا، وضغط عليا، وخلاني متضايقة جدًا.
الحاجة التانية كانت إدارته السيئة جدًا للفلوس. إحنا الاتنين مرتباتنا كويسة قوي وناجحين في شغلنا. أنا بحوش فلوسي بحرص شديد، لأني جاية من عيلة فقيرة. كنت بشوف أهلي بيتعبوا عشان يوفروا كل سنت، وماكانش عندهم فرصة يستمتعوا بحياتهم.
أما جوزي، فهو من عيلة غنية وكان متدلع جدا وهو صغير. عشان كده عمره ما كان شاطر في التوفير.
كان بيصرف كل فلوسه من غير ما يهتم يحوش لأي حاجة زي التقاعد أو حتى يسدد جزء من قسط البيت. كان بيصرف على حاجات عشوائية زي ألعاب (أغلبها ما بيلعبش بيها)، حاجات تافهه وملهاش لازمة، وأكل وحلويات.
ده ماكانش مشكلة كبيرة بالنسبه لي لما كنا لسة مرتبطين، لكن دلوقتي بعد ما بقينا عايشين مع بعض وبنتشارك في مصاريف البيت، الموضوع بقى مشكلة كبيرة جدًا.
ده غير انه فضل يراكم ديون على الكريدت كارد، وكنت أنا اللي بضطر أسددها علشان بيصرف كل مرتبة ومابيكنش معاه زيادة.
الحاجة التالتة كانت إنه بيزعل جدًا لما أتكلم معاه في أي حاجة مضايقاني في تصرفاته. يفضل يطوّل في الكلام علي نفس الموضوع ويحس كأنه هجوم شخصي عليه، حتى لو كانت حاجة بسيطة زي إني أقول له الحوض محتاج يتنضف، أو ألمّح إني نفسي نخرج مع بعض في ميعاد علشان بقالنا شهور ما عملناش حاجة مع بعض.
في نفس الفترة تقريبًا، عادات أكله بقت مش مضبوطة خالص. وزنه زاد جدا من كتر كمية الوجبات السريعة والسكريات اللي كان بياكلها .
بعد فترة، زهقت.
من حوالي سنة ونص، حصل بينا خناقة كبيرة تاني، وقلت له إني مش قادرة أستحمل أكتر من كده، وإن كل اللي بيعمله وكل تصرفاتة بقت مش مقبولة.
قلت له إني مش عارفة إذا كنت عايزة أكمل في الجوازة دي ولا لأ، وإنه يمكن لازم كل واحد فينا يمشي في طريقه.
بصراحة، الفترة اللي بعد كده كانت صعبة شوية. انفصلنا لفترة، وهو راح قعد عند واحد من اصحابه. كنا بنتكلم من وقت للتاني خلال الوقت اللي انفصلنا فيه.
أهله كانوا داعمين لقراري (رغم إنهم كانوا متضايقين وزعلانين من اللي حصل).
بعد شوية، قررت إني أدي له فرصة أخيرة . كنت محتاجة أشوف تغيير جذري في تصرفاته، وكمان أتأكد إن التغيير ده مستمر. ولو ده ما حصلش، يبقى خلاص. مش هقضي حياتي وأنا مُستغلة وبتعامل زي الشغالة أو مربية لرجل بالغ.
قلت له الكلام ده بصراحة.
قال لي إنه بدأ يشوف معالج نفسي علشان يتكلم عن مشاكله ويفهم ليه كان بيتصرف بالطريقة دي، وإنه كان فاكر إننا خلاص انتهينا للأبد.
وقال إنه بدأ يفهم قد إيه هو كان غلطان.
طيب ده كان من حوالي سنة ونص…نيجي بقى للوقت الحالي.
مش ببالغ لما أقول إن الفرق بين جوزي الأول ودلوقتي زي الفرق بين الليل والنهار – لدرجة إني ساعات بحس إني مش عارفة إذا كنت متجوزة نفس الشخص ولا واحد تاني خالص.
بس يعني… مش عارفة، حاسة إنه زودها شويه في حاجات (عارفين التطرف!)
مش عارفة إذا كان ده يعتبر شكوى (أظن لأ).
دي الحاجات الجديده اللي هو بيعملها:
🌿الاهتمام بالبيت:
احنا قررنا إن الأفضل نقسم شغل البيت، هو يعمل التنضيف كله وأنا أطبخ
بصراحة، هو عمل اللي عليه وزيادة! البيت دايمًا نضيف جدًا، وبينضفه كويس جدا أكتر من مرة في الأسبوع. وكمان، بدأ يطبخ وجباتنا للأسبوع كله.
هو عنده وقت أكتر مني لأنه بيشتغل من البيت، و أنا بشتغل في شركة ولازم اروح المكتب مرتين في الأسبوع. بس برضو – فيه أسابيع عدت وأنا حرفيًا ما عملتش أي حاجة في البيت. هو بيعمل كل حاجة – بيكنس، وبينضف الحمام، وبيقص النجيلة، وبيطلع الزبالة، وكمان بيطبخ وجباتنا. الموضوع وصل لدرجة إني بقيت تقريبًا بتمنى إنه يسيبلي شوية شغل أعمله!
🌿موضوع إدارة الفلوس:
أنا قلت له إن من شروطي علشان أوافق أدي له فرصة تانية إننا – نعمل حساب مشترك، وهو وافق. وبصراحة… مش متأكدة إذا كان صرف أي فلوس على نفسه السنة اللي فاتت.
بجد مش شايفة إنه صرف أي حاجة على نفسه خالص. لدرجه اني بقيت بتمني بشتري لنفسة حاجة!!!
وبتمني كمان أنه ياخد وقت لنفسة ويرتاح فيه.
🌿الخناقات بسبب إنه بياخد الأمور بشكل شخصي:
هو مستمر في زيارة المعالج النفسي بتاعه (وكمان رحنا معالج زوجي)، والموضوع اتحسن جدًا بصراحة. دلوقتي لما يحصل أي نقاش أو خناقة، بياخد وقته عشان يفهم أنا بشتكي من إيه (وأنا كمان بعمل كده)، وبيحاول بجدية يفهم سبب المشكلة بدل ما يفتكر إني ضدّه. بس الموضوع وصل لدرجة إني أحيانًا بيسكت، وبيتنازل بسرعة زيادة عن اللزوم!!
🌿عاداته في الأكل اتغيرت 180 درجة.
كمان اشترك في جيم وبقى بيروح بانتظام. جسمه اتغير تمامًا -وكمان بطل كل الأكل الغير الصحي. ما أظنش إني شفته لمس أي سناكس من اللي كان بيحبها جدًا زمان.
كل حاجة اتحسنت أكتر بكتير مما كنت أتمنى، وأنا فعلاً مبسوطة… بس مش قادرة أمنع نفسي من التفكير إن جوزي بقه بيجي علي نفسة لدرجة إنه بقه بيتجنب تمامًا أي غلط ممكن يعمله، وبقى بيحرم نفسه من الحاجات اللي بتفرحه. وخايفة إنه يتعب نفسيًا لأنه دايمًا بيضغط على نفسه علشان ما يضايقنيش.
قلت له الكلام ده كتير وطلبت منه إنه يخف على نفسه وما يضغطش عليها بالشكل ده – لكنه دايمًا بيقول إنه تمام ومبسوط كده.
لاحظت كمان إنه بقى عنده شوية برود أو تحفظ هو ما كانش كده الاول. بالعكس جوزي زمان كان دايمًا رايق وبيهزر معايا ومنفتح أكتر.
وأصحابنا كمان لاحظوا ده (انه بقى متحفظ أكتر ومش مرح زي الاول).
على أي حال… كنت بس عايزه افضفض. البوست بس غرضة أخرج كل اللي جوايه.
بس أنا متقبلة لأي نصيحة عن إزاي أتعامل مع الموضوع ده.
كل اللي عايزاه إن جوزي ما يفقدش شخصيته تمامًا…
(القصة حقيقية مترجمة من ريديت)
#قصة قبل النوم
#قصة مسلية
