أنا راجل هندي عمري 28 سنه و خطيبتي عندها 32 سنة، هي مش عايزاني أكلم أصحابها قبل الجواز خالص!!!
احنا مع بعض بقالنا سنتين ونص تقريبًا، وعلاقتنا كانت معلنة على السوشيال ميديا، بننزل صور وفيديوهات من الرحلات والوقت اللي بنقضيه سوا، وواضح للكل إننا مرتبطين على الإنستجرام. لكن خطيبتي مالهاش متابعين كتير على الإنستجرام.
احنا كنا مقررين نتجوز السنة اللي جاية في نوفمبر أو ديسمبر ٢٠٢٤، ففكرت إنه أحسن لو أعرفها على عيلتي.
الشهر اللي فات، استأذنتها وقررنا نتعشى مع عيلتي في مطعم، وأهلي اتعرفوا عليها واعجبوا بيها وقرروا نحدد ميعاد للفرح. بس هي قالت إنه بدري عليها الجواز السنة دي، فقررنا نخليه في فبراير ٢٠٢٥ بعد ٦ شهور.
عادة في مدينتي، بنحجز قاعات الفرح بدري عشان نضمن قاعة كويسة. فأخدت رأيها واتكلمت مع أهلي وحجزنا قاعة، وبعد كام يوم هي كمان حجزت قاعة للفرح تانيه لأهلها. ده عادي في تقاليدنا، يبقى فيه احتفالات من ناحية العروسة واحتفالات تانيه من ناحيه العريس.
لحد هنا، أنا عرفتها على أهلي وعلى أصحابي المقربين. لكن، أنا عمري ما قابلت أصحابها بشكل رسمي.
اللي حصل الأسبوع اللي فات خلاني متلخبط جدًا.
واحدة من أصحابها بعتتلي رسالة على إنستجرام، لأنها مش قادرة توصل لخطيبتي وقلقانة عليها.
رديت عليها بكل أدب وقلت لها إنها ممكن تكون مشغولة في الشغل وهبلغ خطيبتي إنها بتحاول توصل لها.
كلمت خطيبتي وقلت لها، لقيتها بتقولي: “يا ربي، ليه تبعتلك؟ اعمل لها بلوك!”
استغربت الصراحة واعتبرت إن ده طلب غريب، فقلت لها مش هاعمل كده. ردت عليّا وقالت لي: “لو انت مش هتعملها بلوك، صاحبتي هتعملك.” وبعدها بشوية شفت إني محظور على إنستجرام من صاحبتها!!!
الموقف ده خلاني اتعصبت شوية، وبعتت رسالة لصاحبتها على حساب تاني قلت لها إني مش مبسوط من اللي عملته، وده أسلوب مش محترم.
وضحت لها إني مش عايز أفسد صداقتهم، بس حاسس بعدم احترام عشان عملولي بلوك مرتين (قبل كده كلمتها في حاجه بخصوص خطيبتي وعملتلي بلوك برضه)
وأنا بس كنت عايز أعرفهم وأقابلهم (هي وجوزها). صاحبتها ما ردتش عليّا، لكن قالت لخطيبتي اللي غضبت مني تاني.
أنا جاد معاها وخليتها تقابل أهلي وأصحابي. وهي معندهاش حد من عيلتها خالص.أصحابها بس اللي هيبقوا حاضرين الفرح من ناحيتها.
عمري ما خرجت مع أصحابها، وطلبت منها أكثر من مره تعرفني عليهم وهي معارضة بشدة، والموقف الأخير ده مضايقني جدًا.
هي بتقول إن خطيبها السابق كان بيدايق أصحابها ومش عايزة الموضوع يتكرر.
يمكن ده كان منطقي من سنة، لكن دلوقتي احنا هنتجوز بعد ٦ شهور، وهي لسة مترددة وبتقول هتعرفني عليهم بعد الجواز!!!
هي بتقول إنها مش متأكدة من الجواز دلوقتي بعد ما عبرت عن رغبتي في مقابلة أصحابها، وبتقول إني هابقى متحكم في المستقبل.
تفتكروا أنا بطلب حاجة صح لما بقول لها عرفيني على أصحابك؟ أعمل إيه؟
#تحديث
بعد موقف البلوك، اكتشفت حاجة غريبة جدًا إنه خطيبتي اللي كانت دايمًا بتقول إن والدتها متوفية، طلعت مش ميتة فعلًا!
من ساعة موقف صاحبتها وأنا مش قادر أثق فيها. خطيبتي دايمًا بتقول إن مافيش حد من عيلتها عايش وإنها بنت وحيدة وأبوها وأمها متوفيين.
كل ٣ أو ٤ شهور بتروح بيت العيلة في البلد عشان تزور عمتها، وبتقول إن هي الوحيدة اللي عايشة هناك، بس الصراحة الموضوع كان دايمًا مريب شوية. وكل مرة بتروح هناك بتقعد يومين أو تلاتة. كمان كانت في حاجات تانية مريبة، زي لما كانت بتجيلها مكالمة بتطلع من شخص مسميه “رقم بابا البيت”، وكان اللي بيتكلم ست وكانت دايمًا بتقولي ان دي عمتها.
أهلي كانوا مترددين من موضوع الجواز لأنهم ماكانوش مرتاحين للسرية دي وكمان عشان هي خلت صاحبتها تعمل لي بلوك.
بصراحة أنا كنت بفكر إن ده ممكن يكون اختلاف أجيال، وكنت بحاول أفهم أهلي إنه ممكن يكون الموضوع مش كبير كده. لكن برضه أهلي ماكانوش مرتاحين للعلاقة دي، وفي يوم الأسبوع اللي فات، قرروا يروحوا قريب من مكتبها وسألوا زميلتها لو كانت تعرف حاجة عن أهلها، لكن الزميلة ما قلتش حاجات كتير.
عارف إن ده تصرف مش صح من أهلي، لكن هما
شايفين الموضوع من منظور مختلف وعايزين يطمنوا عليّا. حاولت أفهمهم بعد كده إنه غلط يدخلوا الحاجات دي في الشغل، ووافقوا إنهم مش هيكرروا ده تاني، لكن طلبوا مني أفكر كويس وأدور وراها كويس قبل ما أقرر أتجوز.
بصراحة، بدأت أشوف الموقف بطريقة مختلفة، وبدأت أحس أني الموضوع غريب ومش مريح.
خطيبتي دايمًا بترفض إني أتكلم مع حد من أصحابها أو أقاربها أو حتى أتابعهم على السوشيال ميديا. وكانت بتقول إن السبب إنها خايفة عيلتها ترفض الجواز عشان اختلاف العادات والثقافات، بس في نفس الوقت كانت بتتكلم عن قد إيه أهلها منفتحين وإن تربيتها كانت عصرية وكده. وكانت بتشتم في أهلي إنهم شكاكين وعندهم عقلية قديمة، وبتقول لو أهلها كانوا عايشين كانوا هيبقوا فرحانين بالجواز ده.
أهلي في الأول كانوا معجبين بيها وعرضوا حتى إنهم يشيلوا جزء من مصاريف الجواز عشان هي كانت ظروفها المادية مش تمام، لكن بدأوا يشكوا فيها لما خلت صاحبتها تعمل لي بلوك.
كل ده خلاني أشك جدًا وقررت أروح النهارده لبيت العيلة بتاعها في البلد عشان أتأكد.
روحت هناك وكنت عامل نفسي بسأل على حد تاني، ولما خبطت الباب، اللي فتحتلي كانت والدتها!!! عرفت إنها والدتها لأن خطيبتي كانت فرجتني صور ليها قبل كده. كانت صدمة بالنسبة لي!
شكلها كويس ومبسوطة وشبه خطيبتي قوي.
أنا وخطيبتي مش بنتكلم قوي من يوم ما أهلي راحوا مكتبها. هي كانت متعصبة وقالت إن أهلي مجانين عشان عملوا كده، وإن أهلي ناس شكاكة وبيتحكموا في حياة الناس،أنا معترف إن تصرف أهلي كان غلط، بس برضه مش من حقها تشتم في عيلتي، وهي طول الوقت مخبية حاجات كتير وغامضة جدا.
لسه ماواجهتش خطيبتي بالموضوع ده ومش عارف آخد قرار و أعمل إيه. دي كدبه كبيرة ومش شايف أي سبب منطقي يخليها تعمل كده.
والدتها كانت كويسة وفي صحة تمام، تقريبًا في سن الخمسين أو الستين.
#تحديث
عدي تقريبًا شهر من وقت ما نشرت سؤالي عن تصرفات خطيبتي الغريبة والكذب بتاعها عن وفاة والدتها. فكرت أعمل تحديث بسيط عن الموضوع ده لأن ناس كتير كانت بتسألني.
بعد ما اكتشفت إن والدتها لسة عايشة، فضلت مصدوم كام يوم، لكن مع الوقت بدأت أهدا، وكان عندي فضول أفهم أكتر.
بعتلها رسالة عشان عايز أعرف السبب الحقيقي ورا كذبتها في موضوع وفاة والدتها. ردت عليّ برسالة طويلة، بس ممكن أختصرها في كذا سبب قالتهم:
بتقول إنها كذبت عن وفاة والدتها عشان والدتها ماخدتش الاحترام الكافي في علاقتها القديمة، وإن خطيبها السابق ما كانش بيسمحلها تقعد في بيت والدتها في البلد أكتر من يومين.
خطيبها السابق كان بيعرف عليها بنات تانية وبيخونها، ووالدتها كانت في المستشفى وقتها.
شايفة إن والدتها هتاخد احترام أكتر لو قالت إنها ماتت زي ما أبوها المتوفي بيُعتبر محترم بعد وفاته.
ولا سبب من دول مقنع بالنسبة لي بصراحة.
قلتلها إن ٩٠٪ من أسبابها دي مرتبطة بخطيبها السابق، وسألتها ليه كان لازم تكذب عن والدتها، خصوصًا إني كنت دايمًا داعم ليها في مشاكلها العائلية.
وضحتلها إن تفسيراتها دي ما دخلتش دماغي خالص.
بعدين قالتلي إني غلطان لما وصفتها إنها عندها اضطراب الشخصية النرجسية (كنت قلتلها كده قبل كده بسبب إنها ما بتحسش بالذنب وبتعمل حوارات عشان تخفي أخطائها).
قالتلي إنها راحت لطبيب نفسي، وشخص حالتها بإن عندها اضطراب ما بعد الصدمة المركب اللي ممكن يسبب أوقات تصرفات نرجسية.
ورغم كده، مش شايف إزاي ده يبرر إنها تعمل قصة معقدة بالشكل ده عن والدتها وتخدعني أنا وأهلي لدرجة إنها حددت تاريخ معين لوفاة والدتها.
وبالرغم إني حاسس بالذنب وممكن تكون بتعاني من اضطرابات فعلا، بس لسة شاكك إن فيه سر أكبر من كده، سواء يخصها أو عيلتها، وده اللي خلق كل القصص دي.
آخر مكالمة بيني وبينها وضحتلها إن، بغض النظر عن اللي بتقوله، إحنا مش في وضع يسمح بإصلاح العلاقة.
ما أقدرش أعيش طول عمري اشك فيها. وصعب يكون في بينا ثقة تاني بعد كل اللي حصل.
طلبت منها بكل بساطة تقول الحقيقة، لكنها ما قالتش حاجة أقدر أعتبرها مهمة أو مقنعة.
تعديل: السبب الحقيقي أن خطيبتي من طائفة مختلفة وفي قريتها ممنوع تتجوز من طائفتي…
(القصة حقيقية )
