شكلها مبهدل قوي
أنا شاب عندي 23 سنة، حاليًا في السنة الأخيرة في الماجستير. حبيبتي (سارة) عندها 20 سنة بتدرس معايا في نفس الجامعة.
أهل سارة كانوا بيعاملوها معاملة وحشة جدًا، وكانت عايشة في فقر جامد.
سارة جميلة جدًا، حرفيًا من أجمل البنات اللي شوفتها في حياتي. مشكلتها الوحيدة في الهدوم اللي بتلبسها.
هدومها بتخليها شبه “الشحاتين” بالظبط.
هدومها كلها يا متبهدلة ومتقطعة، أو مش علي مقاسها، وذوقها غريب جدًا. ممكن تلبس أحمر في أحمر وبيبقي شكلها بشع.
هي بتجيب كل هدومها من محل “الملابس المستعملة” لأن الحاجات هناك رخيصة وتقدر تشتريها.
بصراحة، أوقات بحس بالإحراج لما بخرج معاها، لأن عقلي مش قادر يستوعب إزاي واحدة بالجمال ده تقدر تظهر بالشكل ده اللي… مش حلو خالص.
أهلي وأصحابي كمان لاحظوا الموضوع وعلقوا عليه.
أنا جبت سيرة سوء المعاملة اللي سارة اتعرضت لها لأنّي حاسس إن أكيد أهلها كانوا “مهملين” قوي لدرجة إنهم سمحوا لبنتهم تخرج من البيت بالشكل ده.
أهلي من الطبقة المتوسطة العليا. وأنا الحمد لله قدرت أخدت منحة كويسة ومدفعتش في الكلية غير مبلغ بسيط، عشان كده أهلي قرروا يدوني 50,000 دولار هدية.
أنا مصرفتش حاجة من المبلغ ده، فقلت لنفسي، ليه ما أساعدش سارة عشان يبقي مظهرها أحسن.
أنا وهي أحتفلنا “بذكري اليوم اللي اتقابلنا فيه”، وبالمناسبة دي جبت لها هدية “بطاقة مشتريات”، بـقيمة 5,000 دولار عشان تقدر تشتري هدوم من Macy’s “محل مشهور”، وطلبت منها تروح تتسوق.
سارة فرحت بالهدية، بس قالت إنها مش هتقدر تقبلها (هي جابت لي ساعة وكارت، وعجبوني جدًا).
سألتها ليه مش عايزة تاخدها؟ قالت إنها كتير قوي.
قلتلها إن الهدية دي مش ليها لوحدها. دي ليا أنا كمان، ولما سألتني قصدي إيه؟
اعترفتلها بصراحة إن لبسها بيخليها شبه الشحاتين، وإنّي عايز أعلمها إزاي تلبس وأساعدها تغير كل دولابها.
سارة زعلت جدًا واتضايقت مني، وحصلت بيننا خناقة كبيرة. اتهمتني إني مش شايفها جميلة (وده مش صح أبدًا! المشكلة بس في طريقة لبسها).
قالتلي لو كل اللي يهمك بنت حلوة تتباهى بيها، يبقى دورلك على واحدة تانية.
حاولت أمسك أعصابي على قد ما أقدر، بس بصراحة، كنت متضايق جدًا من رد فعلها. أنا حتى ما طلبتش منها تجيب هدوم جديدة من فلوسها، أنا اديتها 5,000 دولار عشان تشتري دولاب كامل، وفي الآخر تعمل كده؟
بصراحة أنا شايف رد فعلها كان مبالغ فيه جدًا ومقدرتش الهدية خالص.
كل أصحابي متفقين معايا إن رد فعلها كان مبالغ فيه، بس أختي قالت إن احتمال تكون اتكسفت من الطريقة اللي اتكلمت بيها، وإنّي كنت بتصرف بأنانية.
أنا مش شايف نفسي غلطان في الموقف ده خالص.
يا ريديت ايه رأيكوا هل أنا فعلاً غلطان؟؟
🌿 تحديث:
في ناس في التعليقات بيقولوا إني بركز بس على الشكل، وبيتهموني إني أنسان تافه وسطحي، ده مش حقيقي أنا بحب كل حاجة في سارة، لكن أنا ركزت في الكلام علي المشكلة بس وماقولتش كل التفاصيل الحلوه اللي ما بينا.
🌿 تحديث:
ياجماعة انتوا مش قادرين تفهموا أد ايه ذوقها فظيع.
هي من سنين بتشتري هدوم مستعملة وبتتقطع بسرعة، كل الناس حرفيًا بتعلق، الموضوع باين قوي، كل شوية أسمع تعليقات من أصحابي زي: “هي رايحة حفلة تنكرية، هي مشردة ولا ايه، هي شكلها مضحك ليه كده، ايه الهدوم الغريبة دي”.
أنا مش مجرد شخص غبي، لبسها فعًلا غريب قوي. والناس اللي بتقول يمكن هي ذوقها كده وبتتعمد تقطع هدومها، لاء ده مش حقيقي. هي مش بتعرف تلبس.
🌿 تحديث:
اتكلمت معاها وقبل حتي ما أعتذر، انهارت وقعدت تعيط. ولما هديت أخيرًا، قررت تفتحلي قلبها وتحكي لي.
طلع أن أهلها كانوا بيعاملوها بعنف شديد، أسوأ بكتير مما كنت متخيل. حياتها كانت صعبة ومكنش عندها غير طقم واحد بس بتلبسه، ومكنتش بتغيره خالص.
ولما أخيرًا خرجت من تحت سيطرة أهلها، مكنتش عندها أي فكرة إزاي تلبس. فراحت لمحل التبرعات واشترت شوية هدوم بألوان فاقعة لمجرد إن شكلها كان نضيف. ومكنش عندها أي خبرة في اختيار اللبس المناسب. وعمرها ما حسّت إنها المفروض تسأل حد.
هي كانت فاكرة إن “تيشيرت + بنطلون = طقم”، بغض النظر عن اللون أو المقاس أو إذا كان متبهدل ولا لأ.
ولما قلتلها إن طريقتها في اللبس غريبة، أخدت الموضوع بحساسية جامدة واتجرحت.
هي كانت فاكرة إن ذوقها في اللبس “عادي”، ولما كنت بحاول ألمّح لها قبل كده عشان تلبس حاجة تانية، كانت بتفتكر إن المشكلة في الطقم ده بس، مش في ذوقها كله. لكن لما قلتلها بصراحة إن ذوقها كله في اللبس مش حلو، حسّت بإحراج جامد.
إحنا رايحين نتسوق بكرة وهنشتري لها شوية هدوم جديدة.
أنا اعتذرت لها إني مكنتش لطيف ولبق لما فتحت معاها الموضوع.
هي قالتلي خلاص مفيش مشكلة وسمحتني، وقالت إنها غالبًا مكنتش هتفهم قصدي لو فضلت ألف وأدور ومتكلمتش بصراحة.
الحمد لله إحنا دلوقتي كويسين ❤️
“القصة مترجمة من ريديت، أصحاب القصة أجانب”
