قصة هل من حقي اطلب ثمن تورته حفل الزفاف من صاحبتي , بعد ما وعدتها انها هديه؟؟؟

ماري هتتجوز كمان أسبوعين. هي سألتني لو ممكن أعملها تورتة حفل الزفاف؟ اتحمست قوي ووافقت وقلت لها إن التورتة هتكون هدية مني.

(على فكرة أنا أصلاً بقالّي فترة برفض أعمل أي كيكة للعيلة أو الأصدقاء لأنني حامل وعندي كمان طفل عمره سنة، وحاليًا بدرس الماجستير عشان أقدر أترقى وأكون مديرة مدرسة).

ماري عرضت عليّا فلوس مقابل التورتة، وأنا رفضت وقلت الكلمة دي بمنتهى الوضوح: “التورتة هدية زفافك”.

بدأت أنا وماري نعمل تصميم التورتة. ماري طلبت إن التورتة تكون أربع طبقات (أبيض وشوكولاتة وأصفر وليمون)، كمان عايزة ورد وزينة من عجينة السكر، كمان 3 كريمات زبدة بنكهات مختلفة.

طبعًا الطلبات كثيرة قوي، بس علشان أنا واخدة إجازة لمدة سنة علشان حملي، كان عندي وقت ووافقت على تنفيذ طلبها.

روحت حفل توديع العزوبية الخاص بماري، وصيفة العروس سألتني على الهدية اللي ناوية أجيبها لماري؟ قلت لها إني هعملها التورتة مجانا. البنات وقتها قالوا لي ده هدية مميزة قوي وغالية وتمنوا لو حد كان عمل معاهم كده.

بعد الحفلة، ماري بعتت لي رسالة وقالت لي: “ليه مجبتيش معاكي هدية زفاف؟”

قلت لها: “أنتِ عارفة إن التورتة هي الهدية”. وفكرتها إني هعملها لها مجانًا.

قالت لي: “لا دي مش هدية دي خدمة! وإن الهدية لازم تكون حاجة تستخدمها في جوازها مش تورتة وخلاص”.

قلت لها: “أنا حاليًا مش بشتغل لأنني واخدة إجازة، ورغم كده اتحملت لوحدي تكلفة التورتة”.

قالت لي: “دي مش مشكلتي والصديقة الحقيقية لازم تجيب هدية”.

قلت لها: “خلاص سبيني أفكر وهرد عليك”.

بعد نص ساعة، بعتت لها فاتورة بتكلفة التورتة. الفاتورة كانت ثمنها 700 دولار وقلت لها لازم تدفع على الأقل 350 دولار دلوقتي وبعدها قدامها أسبوع تكون سددت باقي الفاتورة.

ردت عليا وقالت لي: “إيه سبب الكلام ده؟”.

قلت لها: “مش أنتي قولتي إنها مش هدية؟ خلاص يبقى ادفعي تكلفة التورتة، وأوعدك إنّي هجيبلك هدية كويسة”.

قالت لي: “بس أنا مش هقدر أتحمل التكلفة دي”.

قلت لها: “والله دي مش مشكلتي، ده شغلي”.

قالت لي: “بس مفيش تورتة بتتكلف 700 دولار”.

قلت لها: “التكلفة دي علشان المكونات والنقل لأن مكان الحفلة بعيد عن بيتي 45 دقيقة، وكمان العمالة الإضافية، وجوزي بيساعدني في التوصيل وهو كمان بياخد أجره غير الحجز في آخر وقت ده غير إن حجم التورتة كبير قوي والأشكال الكثيرة اللي هننفذها بعجينة السكر”.

قالت لي: “أنا مش هدفع أي حاجة، أنتِ وعدتيني بتورتة مجانية وخلاص مفيش وقت أدور على حد يعملها لي”.

قلت لها: “دي مش مشكلتي”.

قالت لي: “طيب خلاص اعمليها مجانا وانسي موضوع الهدية”.

قلت لها: “للأسف العرض خلاص انتهى”. ومردتش أرد على رسائلها بعد كده.

اللي عرفته بعد كده إن ماري وخطيبها عاملين مجموعة بيكلموا فيها مع أصحابهم، والكلام اللي وصلني إنهم بياخدوا رأي الأصدقاء في اللي حصل.

والناس منقسمين، في ناس بيقولوا لازم أعمل التورتة مجانا زي ما وعدت، وفي ناس بيغلطوا ماري وبيقولوا إنها حطت نفسها في ورطة.

جوزي أصلاً مش بيحب ماري من زمان وهو دلوقتي واقف في صفي وبيقولي: “حتى لو هتخسري صداقتها، أوعي تعملي لها أي حاجة مجانًا”.

دلوقتي أنا فعلاً محتارة ومش عارفة إيه التصرف السليم في الحالة دي. ياريت تساعدوني؟

تحديث:

ماري وخطيبها توم حصل بينهم خلاف كبير، وواضح إن ماري دفعت فلوس كثير قوي أكثر من اللازم علشان الفرح.

ماري كانت قايلة إن خطيبها وعيلته هم اللي هيدفعوا كل تكاليف الفرح. توم خطيبها مهندس ومن عيلة غنية جدًا. مش عارفة إيه مصدر ثروتهم بس اللي أعرفه إن توم وإخوته كانوا في كليات غالية جدًا اللي مكناش نعرفها.

ماري وخطيبها كانوا طول الوقت بيتخانقوا علشان تكاليف الفرح، وإن التورتة بتاعتي كانت القشة الأخيرة.

المفروض إن ميزانية الفرح كانت 30,000 دولار، لكن واضح إن ماري دفعت لحد دلوقتي ضعف المبلغ ده علشان الفستان والديكورات والزهور والصور والأكل والرفاهية، وكمان حجز طيران لعيلتها، وكمان تكاليف المكان اللي عيلتها هتقعد فيه، ده غير إن الفرح أصلاً هيتعمل في قصر فخم جدًا.

أنا شوفت صورته على النت. عندنا صديقة مشتركة اسمها (بام) وهي مخطوبة.

خطيبها يبقى صاحب العريس المقرب، توم العريس كان بيحكي لصاحبه وبيشتكيله طول الوقت من بذخ ماري.

بام قالت لي إن العريس دلوقتي رافض يدفع تمن التورتة مش علشان هو ميقدرش على تمنها، بس علشان هو خلاص اتخنق من طلبات ماري ومش مستعد يدفع ولا دولار واحد زيادة وقالها: “اتصرفي إنتِ، أنا مليش دعوة”.

دلوقتي مفيش أي حد يعرف إيه اللي هيحصل، وهل الزفاف هيتم ولا لأ.

ماري متواصلتش معايا علشان تقولي أعملها التورتة ولا خلاص.

على فكرة أنا عارفة إنتوا دلوقتي أكيد بتسألوا: “إيه وضع ماري المادي؟”.

ماري من الطبقة المتوسطة. عارفة إن كل الناس ممكن تفكر إن ماري طمعانة في فلوس خطيبها بس أعتقد إن ده مش حقيقي.

هي بتسوق نفس سيارتها القديمة من 10 سنين ومغيرتهاش، رغم إن خطيبها طلب منها تغييرها (وده دليل إنها مش طماعة).

أنا لما اتجوزت، جوزي قال لي: “اعملي في الفرح أي حاجة تخليكِ سعيدة”.

ممكن هي كمان خطيبها قال لها نفس الكلام، خصوصًا إنه فعلاً بيدفع لها كل الفلوس اللي هي عايزاها.

أنا على حسب معرفتي بماري بأكد إنها فعلاً مش إنسانة طماعة.

تحديث:

زي ما قلت قبل كده، ماري أصلاً مش إنسانة طماعة. بالعكس هي أصلاً بتعرف تحافظ على فلوسها كويس.

علشان كده كلنا مستغربين إنها مصممة على هدية وكمان عايزة التورتة مجانًا!

اللي عرفناه بقى إن ماري أصلاً كانت بتحاول توفر الفلوس على قد ما تقدر، على الرغم إن الميزانية وصلت للضعف.

عائلة خطيبها متعودين دايمًا على الحفلات الغالية الشيك. علشان كده توم أكد عليها إن الفرح لازم يكون فخم علشان يناسب عيلته.

هم بيحبوا يتفاخروا بالفلوس قدام الناس بالطريقة دي.

المشكلة بقى إن توم مكنش بيدخل في أي حاجة. هو بس بيقول لها “وفري فلوس على قد ما تقدري”، علشان إنتِ شاطرة في ده.

كل ما ماري تختار حاجة رخيصة شوية ما تعجبش خطيبها ويقول لها عايز حاجات أشيك.

عمل كده في اختيار المكان والورد وحتى الفستان قال لها لازم تختاري واحد مرصع بالجواهر.

يعني الحقيقة إن ماري كانت بتحاول على قد ما تقدر تلتزم بالميزانية، بس الحاجات اللي كانت بتختارها ما كانتش على ذوق خطيبها.

ولما أنا طلبت منها 700 دولار، خطيبها اتهمها إنها مش عارفة توفر الفلوس.

اللي عرفته بقى إن المشكلة أصلاً كانت في خطيبها مش في ماري.

هو اللي خلاها تقولي إني لازم أجيب هدية كمان غير التورتة المجانية، وهو اللي صمم إنه مش هيدفع تمن التورتة!

ماري زعلت جدا لأنها حاسيت إن التورتة دي كانت هي الحاجة الوحيدة في الفرح اللي على ذوقها، وزعلت مع خطيبها وهما دلوقتي مش بيتكلموا.

اللي مزعل ماري كمان إن خطيبها لما اشتكى لخطيب بام (اللي حكالنا بعد كده كل حاجة) ماري حسيت إن شكلها وحش قدامنا وخطيبها خلاها تبان قدامنا جشعة وطماعة وهي فعلاً مش كده بالعكس هو لو مكنش دخل كانت هي هتعرف تعمل فرح كويس بميزانية أقل بكتير ماري بعتت لي رسالة اعتذار وأنا قبلت اعتذارها.

ماري كتبت رسالة على حسابها على التواصل الاجتماعي وقالت إن الفرح اتأجل، واعتذرت عن الإزعاج من بعدها وهي مختفية، هي غالبًا عند أهلها، ومش بترد على أي حد خالص.

خطيب بام بيقول إن العريس زعلان جدًا لأن فلوسه كلها موجودة في حجوزات الفرح.

أنا حقيقي معرفش هما انفصلوا ولا لأ، كل اللي أعرفه إن الفرح اتأجل.