هل أنا شخص وحش عشان خلّيت خطيبتي تسيب البلد؟
أنا (28 سنة) أتعرفت علي خطيبتي (27 سنة) من خمس سنين. اتقابلنا في الجامعة وهي كانت طالبة مغتربة.
بعد التخرج، هي بدأت تشتغل، وأنا حاليًا بعمل ماجستير.
الشركة اللي خطيبتي كانت شغالة فيها كانت بتكفل تأشيرة العمل بتاعتها لحد ما الشركة اتباعت وتم الاستغناء عنها. ادوها فترة محدودة تلاقي فيها كفيل جديد، وده خلاها مضغوطة جدًا.
كانت بتقدم على شغل كل يوم وتعمل مقابلات كتير، بس للأسف، محدش عرض عليها وظيفة. هي كانت عايزة تفضل في البلد لأنها بتحب المكان وعلشان نفضل مع بعض.
وأنا كنت خارج مع صديق اقترح عليّ أني أكون كفيل تأشيرتها، أنا بحبها ومكنتش عايز أشوفها متضايقة كده، فاقترحت عليها الفكرة.
هي كانت مترددة في البداية، وقالت إنها مش عايزاني أفتكر إنها معايا عشان بس تاخد إقامة دائمة أو جنسية. بس أنا فعلاً كنت عايزها تفضل وكنت مستعد أعمل كده عشانها.
استشرنا مستشار هجرة وقررنا نعمل الورق لوحدنا. هي اللي كانت بتركز على الإجراءات اللي محتاجين نجهزها.
هي فضلت تقدم على شغل بس مش بنفس الحماس والاستعجال اللي كانت عليهم في الأول.
أنا كنت محتاج أملأ شوية أوراق عشان أكون كفيلها، بس بدأت أحس بعدم راحة ناحية الموضوع. أنا عايزها تفضل في البلد بس حسيت إنه حمل كبير عليّ.
في النهاية، هي خلصت كل الأوراق اللي تخصها ومافضلش غير الأوراق بتاعتي، قلتلها إني مش عايز أكمل في الموضوع.
كانت متضايقة وسألتني ليه.
قلتلها إني اقترحت الفكرة عشان مش عايز أشوفها مضغوطة طول الوقت، بس في الآخر اكتشفت إني مش المفروض أكون مسؤول عنها.
عملنا نقاش طويل وقلت لها إني عايز أكمل علاقتنا بس مش عايز أحس إن عليا مسؤولية كبيرة ناحيتها.
زعلت قوي قالت إنها اتأثرت جدًا بالكلام اللي قلته.
بعدها الأمور اتغيرت ومبقتش تتكلم معايا.
فضلت تقدم على شغل وتعمل مقابلات بس في الآخر التأشيرة بتاعتها انتهت.
قبل ما تمشي، قلتلها إني بحبها ونفسي إنها ترجع تاني. بس هي قالت إنها بقت شايفاني بشكل مختلف بعد اللي عملته معاها.
عدى كام أسبوع من وقت ما سافرت. وحشتني “طبخها”، وجودها، الوقت اللي بقضيه معاها. لسة عايز أكمل حياتي معاها.
أصدقائنا المقربين بيقولوا إني غلطان واني اتخليت عنها . أنا مش متفق مع كلامهم وبحس إنهم منحازين ليها . عشان كده جيت هنا أسأل. هل أنا شخص سيء؟؟
🌹#تحديث
كلمتها في الويك إند. هي مكنش عندها وقت تبيع عربيتها قبل ما تسافر، فبعتت لي وقالت إنها عملت شوية ورق عشان تنقل ملكية العربية ليا.
أنا فاهم إنها زعلانه مني، فقلت لها إني هشتري تذكرة طيران عشان أروح أشوفها.
أنا عمري ما زرت بلدها قبل كده. كنت عايز أثبت لها إني جاد معاها وإنّي لسة ملتزم بالعلاقة، فقلت أسافر وأزورها عشان نتكلم ونحل الموضوع.
هي رفضت فورًا وقالت إن تذاكر الطيران غالية وإني أكيد عندي شغل.
فضلت أترجى فيها عشان تخليني أروح، وفي الآخر قالت إنها مش قادرة تنسى اللي حصل، ومش قادرة تتجاوز الموضوع.
حاولت أوضح موقفي تاني وإنّي فاهم إنها متضايقة، لكن مش المفروض أتحمل مسؤوليتها، كان نفسي تفهمني.
المحادثة كانت طويلة. قالت إنها مش ممكن تثق فيا تاني. وإنّي اتخليت عنها. وإنّي من البداية كانت نيتي اني اغدر بيها، قالت إن الموضوع مش بس عشان التأشيرة، بس ده كان جزء كبير من المشكله.
في النهاية، قالت لي إنها لسة بتحبني، بس خلاص هي شايفة إن مش المفروض نكون مع بعض.
لتوضيح كام نقطة:
🌿ليه ما كنتش عايز أعمل كفالة التأشيره؟
عشان كان لازم أكون مسؤول عنها ماديًا لمدة 3 سنين.
🌿الناس هنا أنتقدتني علشان قولت “وحشني طبخها” الأول.
ده مش معناه إنه أول حاجة وحشتني فيها. أنا كنت بس بقول الحاجات بدون ترتيب معين، وأيوه، هي شخصيًا وحشتني جدًا.
🌿للناس اللي قالوا لي إني شخص سيء، كام واحد كان فعلاً هيوافق إنه يكفل تأشيرة شريك حياته؟
🌹#تحديث
من كام أسبوع، وصلني فلوس من خطيبتي السابقة. ده حصل وأنا نايم بسبب فرق التوقيت بينا، فشوفت التحويل لما صحيت.
كتبت مع التحويل رسالة بتقول “أتمنى ده يساعدك تسدد شوية من قرض الدراسة”.
المبلغ مكانش كبير قوي بس كويس، حاولت أتواصل معاها بس مكنتش قادر أوصلها.
بعدها بأسبوع، صديقة مشتركة بينّا حبت تطمن عليها، بس مكنتش عارفة توصل لها خالص.
الصديقة عملت بحث على جوجل باسمها والبلد اللي هي فيها، ولقت أخبار وترجمتها.
الاخبار بتقول إنها ان**تح/ر*ت.
محدش عارف بالضبط إمتى ماتت، لكن الأغلب إن ده حصل قريب من وقت ما بعتت لي الفلوس، ومحدش قدر يلاقي أي تفاصيل عن الجنازه.
هي مكانتش قريبة من عيلتها . ومكنش موجود كتير من أفراد أسرتها في بلدها.
باقي أصدقائنا عرفوا برضه، ومن وقتها كلهم بيلوموني على اللي حصل.
طبعًا، أنا متأثر جدًا باللي حصل. بس شايف إنه مش عدل إن الناس تقول إني السبب في اللي حصلها أو إني كنت أقدر أساعدها.
هي كانت عندها اكتئاب قبل كده وإحنا مع بعض، وكنت دايمًا بحاول أساعدها تتخطى ده، بس مشاكلها النفسيه كانت بتظهر من وقت للتاني.
هي كمان اللي قررت الانفصال لما كنت بحاول أصلّح الأمور.
اللي حصل أثر على علاقتي بأصحابي بشكل سلبي جدًا، خصوصًا إني بشتغل مع ناس منهم في الجامعة. كمان بعض الأصدقاء المقربين بطلوا يتكلموا معايا.
أعمل إيه؟ إزاي أقنعهم إن اللي حصل مش ذنبي وأخليهم يعاملوني بشكل طبيعي تاني؟؟؟
(القصة حقيقية)
#قصص
