هدايا الكريسماس 🎁
أنا مخطوبة ل “نوح”، وده أول كريسماس أقضيه مع عيلته.
أنا قابلتهم أول مرة في الصيف اللي فات لما انتقلنا عشان نكون قريبين منهم بعدما نوح خلص جامعته.
إحنا فرحنا في شهر فبراير اللي جاي.
علشان أنا ماعنديش عيلة، وشايفة إزاي عيلته مترابطة وقريبين من بعض، كنت عايزة أعبّر عن تقديري ليهم من خلال الهدايا اللي حضرتها للكريسماس، فحاولت أجيب حاجة تناسب شخصية وذوق كل فرد فيهم.
🌿واحدة من أخواته بتحب القراءة، فعملت لها “كوفر للكتب” بتفاصيل مستوحاة من كل الكتب اللي بتحبها.
🌿واحدة من بنات إخواته عندها طيف التوحد وكانت عايزة هدوم للعروسة بتاعتها ، فصنعت لها شوية “هدوم” تقدر تلبسهم للعبة.
🌿حماتي كانت معجبة “بصندوق مجوهرات” شافته أكتر من مرة وقالت إن عمرها ما كان عندها واحد، فشتريت لها واحد جميل.
🌿حمايا دايمًا بيشتكي إنه مش لاقي “إطار صور كبير”ومناسب يلم صور كل العيلة، فجبته له واحد كبير يقدر يحطة في مكتبه، ومليتة بالصور اللي نوح وفرها لي.
🌿أخته التانية بتحب الميك أب وقالت إنها مش معاها فلوس تشتري حاجات معينة بتحبها في الفترة الاخيرة، فشتريت لها الميك أب اللي هي عايزاه.
🌿أما أخوه، جبته له قطعة تذكارية عليها توقيع من فريقه الرياضي المفضل.
🌿أما باقي ولاد وبنات إخواته، فجبته لهم هدايا كانوا حاطينها في قوائم أمنياتهم، بس الأهل مكنوش هيجيبوها.
باختصار…كنت عايزة أظهر قد إيه أنا ممتنة لعيلته وأجيب لهم حاجات تناسب ذوق كل واحد فيهم ❤️🎁
نوح كان متوقع إنهم هيحبوا كل الهدايا دي. بس قال لي مكنتش ضروري أبذل كل المجهود اللي عملته ده (أنا قعدت أسابيع أدور وأتتبع ذوقهم علشان اجيب الهدايا دي)، علي أمل انها تعجبهم قوي.
لكن يوم الكريسماس حسيت إن في حاجة غلط. فضلت طول اليوم قلقانة وعماله أفكر إن يمكن الحاجات اللي جبتها مش عجباهم أو حاجة. بصراحة رد فعلهم كان غريب.
محدش قال أي حاجة وقتها. لكن تاني يوم، سألوا نوح “هو إيه اللي في دماغ خطيبتك؟”
وقالوا ل نوح إني عاملة زي “المهووسة” لأني جبت لهم حاجات شخصية قوي وأنا لسة يعتبر غريبة عنهم.
تاني يوم روحنا عندهم (أنا ونوح) ، اعتذرت عن الهدايا اللي جبتها وقلت لهم إني هكون حريصة أكتر المرات الجاية. عرضت كمان إني أعوضهم.
لكن واحدة من أخواته قالت لي في وشي إني “مهووسة” وإن “مش غريب إن عيلتي مبقتش عايزاني لو أنا بعمل حاجات غريبة زي دي”.
نوح زعق لها.
اعتذرت تاني وقلت لهم إن مكنتش في نيتي أزعل حد ابدا، وإني هتعلم من اللي حصل.
برضه فضلوا مصممين إني “اتعديت الحدود”.
نوح قال إننا هنمشي، وإنهم لازم يعتذرولي.
حاسّة بذنب كبير جدًا. نوح واقف معايا وبيقول إني معملتش أي حاجة غلط. بس أكيد ماكنوش هيزعلوا بالشكل ده لو كلام نوح حقيقي مش كده؟
محتاجة أعرف هل أنا غلطانة؟
🌿مش متأكدة إذا كان ده له علاقة بالموضوع أو لا، بس أنا اتربيت في بيت مليان مشاكل وتعاسة. أهلي ماكنوش طيبين معايا ولا مع أختي. هي كانت أكبر مني بكتير وكانت بتكرهني، يمكن عشان طريقة تعامل أهلي معاها.
لما كان عندي 16 سنة كنت حاسة إن مفيش أي حد عايزني، وفضلت فترة طويلة معنديش مكان أعيش فيه.
هل ده اللي كانت أخت نوح بتقصده. أنا كنت صريحة معاهم لما سألوني وحكيت لهم الحقيقة.
🌿حبيت أوضح إننا قابلنا بعض قبل الكريسماس، أكتر من مرة، و قبلها كنا بنتكلم كتير في التليفون. أنا زورتهم لأول مرة في الصيف.
🌿الناس بتسأل هديتهم كانت ايه؟ هم جابوا لي بطاقات هدايا (Gift Cards)، و لاء…. هما ما رجعوش الهدايا بتاعتي واحتفظوا بيها.
🌿حابّة أشكر كل الناس اللي علّقوا. أنا ناوية أتكلم عن اللي حصل مع المعالج النفسي بتاعي وأشتغل على بناء ثقة أكبر في نفسي. أنا لسه في مرحلة التحسين والتطوير. بقالي فترة في العلاج، بس دي أول مرة أكون عندي معالج نفسي فعلاً شاطر. الماضي بتاعي خلاني معنديش ثقة كبيرة في نفسي، وعمري ما كانت كويسة أصلاً.
عمري ما كان قصدي أحرج حد، أو أخلي حد يحس بعدم راحة، أو أضايق أي حد بأي شكل.
من تعليقات الناس، شايفة إن في ناس كتير بتقول إني غلطانة جداً وكان لازم أبقى عارفة أن ده مش صح.
لكن الحقيقة، أنا مكنتش عارفة. ده كان أول كريسماس ليا في جو عائلي مع خطيبي، وكنت فعلاً عايزة أعمل حاجة كويسة.
خلاص أنا مش هعتذر تاني ولا هفضل أعمل مجهود زيادة عشان أثبت أي حاجة لأي حد.
نوح عايز يرجع يتكلم مع عيلته لما يهدى شوية، بس ده ممكن ياخد وقت لأنه زعلان جدًا ومستعد يفضل بعيد عنهم لو هما ما اعتذروش.
ناس كتير هنا وقفوا جنبي وقالولي اني مش غلطانه…وأنا مقدرة كمان الناس اللي قالت لي أن اللي عملته كان مش مناسب وأكتر من اللازم.
(القصة حقيقية مترجمة من ريديت)
#حواديت
#قصص
#قصص حقيقية
