
مفاجأه أختي 🎉💍
انا بنت.
أختي الصغيره هي المفضلة عند عيلتي.
الحقيقة أن في سبب منطقي لده. وهو انها عانت من ظروف صحية صعبة جدا وهي صغيرة. الحقيقة انها خفت ولسه عايشة ده يعتبر معجزه.
بعد ما ربنا شفاها تماما بقت هي البنت المفضلة. طول الوقت بتاخد كل اللي هي عايزاه واحيانا علي حسابي. ولما كنت بعترض علي ده كنت بسمع كلام يأذيني زي “اني لازم ابطل غيرة من اختي البطلة”.
الحقيقة أن اختي بقت دلوعة. ودلوقتي بعد ما عدي 20 سنة هي لسه برضة دلوعة قوي. بس رغم كده احنا دلوقتي قريبين من بعض اكتر من زمان.
فرحي في شهر يوليو. وعلشان أنا وخطيبي منقدرش نتحمل تكالف كبيره اتفقنا نعمل حفل زفاف صغير ونعزم (30 فرد بس) في بيت جد خطيبي (هو بيت جميل وبيطل علي البحيرة).
لما ماما وبابا سمعوا الكلام ده رفضوا وقالوا انهم عايزين فرح كبير ومستعدين انهم يدفعوا كل تكاليف الفرح، في البدايه رفضت انا وخطيبي بس مع اصرارهم الرهيب…وافقنا، مكناش عايزين نكسر بخاطرهم لان موضوع (الفرح الكبير) كان مهم قوي بالنسبه لهم.
الأسبوع اللي فات ماما عزمتني عندها.
بابا وماما وحبيب أختي سألوني “رأيي هيكون إيه” لو حبيب أختي اتقدملها (قدملها الخاتم) خلال فرحي علشان يبقى حفلة خطوبة وكمان فرح في نفس الوقت !!
(ماما شافت ريلز على إنستجرام عن ناس بتتقدم لوصيفات الشرف وشافت إن ده حاجة لطيفة، وأختي هي وصيفة الشرف بتاعتي).
أنا قلت لأ طبعا، ده كلام فارغ. وضحكت.
ماما اتجننت وفضلت تعيط. قالتلي إني أنانية وما عنديش تقدير.
وقتها اتهمتها إنها بتميّز بيني وبين أختي، قلتلها إني كنت مستغربة ليه هي عايزه تدفع تكاليف فرحي، لكن دلوقتي عرفت السبب.
بدأت تعيط وطردتني من البيت.
بعد كده ماما وجوز أختي المستقبلي بعتولي رسايل بيحذروني فيها من إني أفضح خطتهم لأختي (هما عايز يعملولها مفاجأه).
أنا وخطيبي محبطبين و لسه مش عارفين نعمل إيه.
أهلي صرفوا تقريبًا 30 ألف دولار، وفات الأوان على إلغاء الفرح.
ماما كلمتني النهارده علشان تتفق معايا علي تفاصيل المفاجأه “طلب الجواز”، وأنا اتوسلت لها ما تبوّظش يومي.
قالتلي طالما هي اللي بتدفع، يبقي من حقها تطلب اللي هي عايزاه، وإني المفروض أبطل غيرة من أختي علشان هي ملهاش ذنب ومتعرفش حتي اللي هما بيخططوله.
بس الحقيقة إن اليوم كده هيبقى عن أختي مش عني.
قلت لخطيبي يسأل جده لو لسه موافق نعمل الفرح في بيتة. لو وافق هنرجع لخطتنا الأصلية.
مش متأكدة لسه إذا كنت هسمع كلام اهلي واسيبهم يعملوا حفلة “عرض الزواج” الكبيرة بتاعتهم. ولا هلغي الفرح ده واعمل حفله تانيه صغيره.
شكرا انك سمعتني.
🌿تحديث:
ماما بتقول إنهم لسة مكملين في خطة “العرض الجواز” حتى من غير مساعدتي.
الخطة الأصلية كانت:
🌸المفروض أقول خطاب وأقول لأختي إن في مفاجأة ليها وإن اليوم ده عننا إحنا الاتنين مش فرحي وبس.
🌸وبعدها صاحباتها وخطيبها يعملوا رقصة متفقين عليها على أغنيتها المفضلة.
🌸وبعدين هو يقدم لها الخاتم.
علي حسب معرفتي بأختي فهي مش هتضايق لو خطيبها اتقدملها في فرحي.
ساعات بفكر أوافق وخلاص عشان أخلص، بس أنا غضبانة جدًا، وخطيبي كمان مش عايزني أتنازل المرة دي، خصوصًا إننا كنا مبسوطين بفكرة فرح بسيط في الجنينة هما اللي صمموا علي الفرح الكبير.
جوز أختي المستقبلي، بعتلي رساله ورديت عليه فضلنا نتعاتب شوية وفي الاخر قالي إني غيورة وحقوده. عملتله بلوك. بعدها بعت لخطيبي يعتذر، بس ما رديناش عليه.
خطتي دلوقتي إني أتجوز قبلها بأسبوع عند جد خطيبي (من غير ما نقولهم) هعزم 20 شخص بس، الحمد لله قدرنا نغيّر حجز شهر العسل، وهنسافر الصبح بعد الفرح على طول.
الفرح الاول مدفوع بالكامل ومفيش إمكانية لاسترداد الفلوس في الوقت القصير ده (3 أسابيع). أعتقد إن ده كان هدفهم من الاول، إنهم يقولولي الكلام ده قبل ميعاد الفرح بوقت قصير جدا عشان ما أقدرش أعمل حاجة.
دلوقتي هيكون عندهم على الأقل أسبوع لما يشوفوا صور فرحي على السوشيال ميديا. ممكن بقه يحولوا الفرح لحفلة خطوبة ويستمتعوا براحتهم!
أعتقد كده مفيش حد خسران.
🌿تحديث:
عملت محاوله اخيره مع ماما علي امل انها تغيير رايها بس مفيش فايده.
حاولت تاني وتالت معاها ومع بابا. شويه اتفاوض وشويه اتخانق وكل ده مجابش اي نتيجة.
مكنش فاضل غير أختي، قررت إن حتى لو ده هيبوظ مفاجأتها، لازم أقولها لانها الوحيده اللي ممكن تساعدني في الموقف ده، فقلت لها. هي ما كانتش مبسوطة قوي من ماما، لكن كانت زعلانة أكتر إني خربت مفاجأتها.
وزي ما توقعت، قالتي خلاص عديها وامشي مع الموجة وخلاص بلاش تعاندي.
ما قلتلهاش عن تاريخ فرحي الجديد. وقررت اني هعمله من وراهم.
فرحي كان زي الحلم الجميل…مانكرش ان فكره أن اكتر ناس بحبهم في الدنيا مش معايا كانت بتنكد عليا كل شويه…بس حاولت ابعد الفكره دي عن دماغي واستمتع باليوم.
جوزي كان رائع، وعدني إنه هيسعدني لبقية حياتي وإنه هيعوضني عن كل حاجة وحشة مرّت عليا في الماضي.
أهل جوزي عملولنا مفجأه حلوه. وكان معايا اصحابي وشويه من قرايبي وخالتي المفضلة. طلبنا منهم ما ينشروش أي صور و ما يعملوش بث مباشر لوسائل التواصل الاجتماعي لحد ما نكون في شهر العسل.
ماما نزلت منشورات كتير انهارده بتشتكي اني بنت وحشة وجاحده واهدرت فلوسها علي الفاضي. وبتقول انها عايزه تعويض.
كل عيلتنا عمالين يعلقوا وزعلانين مني وبيدعموا ماما. وبيهاجموا الناس اللي حضرت فرحي. بس محدش منهم رد علي الهجوم احتراما لرغبتي.
الغريب انها ما اتصلتش بيا نهائي. رغم اني كنت متوقعه عكس كده.
مش عارفه لو الحفله هتتحول لحفله خطوبه أختي. بتمني فعلا يعملوا كده علشان يستفادوا من الفلوس.
🌿تحديث:
أيوه، هم عملوا كده (حولوا الحفلة لخطوبة) وملوا الإنترنت بصور ومنشورات عن قد إيه كانت الليلة سحرية.
أختي الصغيرة كتبت عن يومها المميز وإنها محاطة بالناس اللي بيحبوها بجد.
من اللي فهمته، أن حوالي 30-40% من المدعوين حضروا.
ده معناه إنهم مش هيقدروا يرفعوا عليا قضية بسبب الفرح، فكل حاجة تمام ☺️
(القصة حقيقية مترجمة من ريديت)