مطعم التاكو 🌮🍽️
أنا متجوزة (تيم) صاحبتي المقربة (كيت) متجوزة (بيرت).
أنا مسافر في رحلة شغل. وكيت قاعدة في البيت، هي بتشتغل بس حاليا واخدة اجازة لانها حامل في الشهر السابع ومحتاجة ترتاح في السرير.
أنا متعودة كل أسبوع، بعدي عليها مرة أو مرتين عشان أجيب لها عشا (تيم جوزي بيطبخ أكل زيادة مرة في الاسبوع عشان صاحبتي)، أنا بحب أفرّحها شوية، وأقرا قصص لبنتها الكبيرة قبل النوم.
أنا بعمل كدة عشان كيت تقدر تنام بدري وترتاح.
بيرت “جوزها” شغال في مكتب، ومن ساعة ما كيت بقت حامل وهو بيتعمد يتاخر في الشغل ويشتغل ساعات أطول (هو بياخد مرتب ثابت، مش أوفر تايم ولا حاجة). عشان كده صاحبتي بقت حزينة وحاسة بالوحدة.
النهارده بالليل كنت بكلمها – حوالي الساعة 6 كده – وفي وسط الكلام قالتلي إن نفسها قوي في أكل من مطعم “تاكو” هي بتحبه، المطعم دة قريب من بيتي، وقريب كمان من مكتب جوزها.
كانت بتشتكي لي إنها طلبت من جوزها يجيب لها “الأكل اللي نفسها فيه” وهو راجع من الشغل. بس هو قال لها إنه مش هيقف يجيب حاجة لانه مش فاضي. وقال لها تطلب دليفري من أي مطعم قريب وخلاص.
صاحبتي كانت زعلانة جداً، قالتلي ان جوزها الاول كان بيجيب لها التاكو اللي بتحبه من غير حتي ما تطلب، ودلوقتي مش عايز حتي يجيبلها حاجة بسيطة.
بعد ماقفلت معاها، اتصلت بجوزي، عادي كنت بدردش معاه و حكيتله الكلام اللي صاحبتي قالته.
أنا في ولاية تانية خالص، فالموضوع كان مجرد كلام كان قصدي اتسلي مع جوزي عشان قاعده لوحدي في الأوتيل.
بعد شوية، اكتشفت إن تيم “جوزي” راح بنفسه وجاب لصاحبتي التاكو اللي نفسها فيه، وكمان طلع علبة تونة من التلاجة (بيرت جوزها بيكره التونة). و راح حط الحاجات دي على باب بيتها، وبعت لها رسالة وقالها في حاجات مراتي بعتهالك.
بعد كده جوزها رجع البيت. هل جاب تاكو، كتب تلوين، أو حتى قرر يبقي انسان ذوق ويتصرف كويس؟ لا طبعاً، ما جابش أي حاجة.
كان غضبان ومضايق جدا لما عرف اللي جوزي عمله.
كلم تيم وفضل يشتم فيه ويقول له إنه “بيهينه وبيحطه في موقف محرج.” وقال لجوزي كلام صعب وجارح، جوزي رد عليه و قال له إنه زوج فاشل، وأب فاشل.
بيرت فضل يزعق ويقول ألفاظ صعبة بصوت عالي لدرجة إن بنتهم بدأت تعيط.
جوزي قفل السكة في وش بيرت، وعمله بلوك
بعدها جوز صاحبتي بعت لي رسالة مكتوب فيها “أبعدي جوزك عن مراتي!”
جوزي بعت لصاحبتي رسالة وقال لها “لو احتاجتي حد في حالة طوارئ انتي عارفة هتتصلي بمين، لكن أنا مش هستحمل “جوزك الزفت ده” أكتر من كده.
الموضوع اتعقد جداً، ومش عارفة إيه اللي هيحصل بعد كده. جوزي حاسس بالذنب إن الأمور خرجت عن السيطرة بالشكل ده، خصوصاً أن بنتهم كانت بتعيط.
هو حاسس إنه كان غلطان. وبيرت شايف إن جوزي بيدخل في اللي ملوش فيه. بس أنا شايفة إنه راجل طيب جداً.
إيه رأيكم؟
🌿تعديل:
بيرت بعت إيميل لجوزي الصبح واعتذر. قال إنه نسي إني كنت مسافرة، وماكانش فاهم إن تيم حط الأكل قدام البيت.
جوزي رد عليه وقاله حصل خير.
بيرت رجع البيت ( هو كان بايت في أوتيل بعد الخناقة).
اتكلم بهدوء مع مراته، وده الحوار اللي حصل بينهم:
بيرت اعترف انه كان بيتهرب من صاحبتي لأنها مش مبسوطة وعلي طول حزينة من ساعة ما حملت.
كيت “صاحبتي” كانت متجوزة واحد تاني قبل بيرت، جوزها الأوللاني توفي وهي حامل، بعدها حصل لها مشاكل في الحمل والدكتور طلب منها تفضل في السرير، وللأسف الحمل ماكملش.
صاحبتي قالت لجوزها أن الحمل ده رجّع لها الذكريات المؤلمة، عشان كده هي حزينة علي طول، والفتره دي صعبة عليها.
جوزها قال انه كان متضايق وزعلان لأنها مش مبسوطة، عشان كده بقه بيتأخر في الشغل وبيتجاهلها.
المشكلة أنه قالها كلمة جرحتها جدا (قال، إنها المفروض تكون مبسوطة إن ابنها اللي من جوزها الأولاني ما تولدتش).
صاحبتي اتصدمت من الكلام، ولما سألته ليه بيقول كده؟! ماقالهاش أي تفسير منطقي.
صاحبتي خلاص تعبت ومش عايزة تكمل.
بصراحة أنا مستغربة لأنهم عَدّوا بحاجات صعبة جدًا قبل كده، أصعب من الموقف ده بكتير (هو خانها قبل كده). بس أظن إن دي كانت القشة الاخيرة في علاقتهم.
على أي حال، أصحابنا كلهم متجمعين عندها وقعدين بياكلوا معاها وبيحولوا يواسوها.
صاحبتي وجوزها كانوا عاملين اتفاق ما قبل الزواج. و البيت ملكها، يمكن يبقي فيه خلاف على الحضانة، لكن من الناحية المادية هي هتكون تمام.
على أي حال، كيت عندها أهل وأصحاب هيقفوا جنبها ويدعموها مهما حصل.
(القصة حقيقية مترجمة من ريديت. أصحاب القصة أجانب)
#قصص
