مراتي اتهمتني اتهام غريب.. قصص

قصة

أنا ومراتي عمرنا 36 سنة ومتجوزين من 15 سنة. احنا اتجوزنا في آخر سنة لينا في الجامعة. بعد ما اتخرجنا، مراتي اشتغلت 3 سنين عشان تساعد في المصاريف. وأنا كملت دراسة في كلية الحقوق (درست 3 سنين عشان أخد دكتوراه في القانون).

في آخر سنة ليا في الكلية، مراتي حملت بابننا “زين”، اللي عمره دلوقتي 12 سنة.

بعد ما ابني اتولد وأنا اتخرجت، لقيت شغل في شركة كبيرة في نيويورك. بدأت أكسب مرتب محترم (ست أرقام)، وقتها مراتي طلبت إنها تبقى ربة منزل عشان تربي ابننا. وافقت وقلتلها إني هتكفل بمصاريف البيت.

الحمد لله عمرنا ما كان عندنا مشاكل في الموضوع ده. صح، أنا كنت بشتغل ساعات طويلة، لكن مراتي كانت مقدرة. البيت دايمًا نضيف، والأكل بيكون جاهز لما برجع. حياتنا كانت ماشية كويس قوي.

مشكلتي الوحيدة كانت إني نادرًا لما بشوف ابني. زين كان بيبقى نايم لما بوصل البيت متأخر.

بس زين ومامته قريبين جدًا من بعض عشان بيقضوا وقت كتير سوا.

نوصل لـ 2020 وجت كورونا. وقتها شركتي، قررت اننا نشتغل من البيت. كنت مبسوط جدًا، عشان هقدر أشتغل من البيت وأقضي وقت أكتر مع مراتي وابني.

زين كان فرحان جدًا، وكان بيجيب الليجو وألعابه ويدخل الأوضة اللي أنا شغال فيها ويقعد يلعب على الأرض جنبي. وكنا بنتكلم وبنبسط مع بعض. في الأول، مراتي كانت فرحانة من الوضع ده. كانت بتحب تشوفنا مع بعض، وكانت ساعات تدخل الأوضة وتقعد معانا.

أنا بشتغل عادي وهما قاعدين معايا.

لكن لو كل حاجة فضلت كويسة، ماكنتش هكتب الكلام ده. صح؟

عدت 3 سنين وشركتي لسه بتسمح بالشغل عن بُعد، وأنا قررت أستغل الفرصة دي. زين لسه بييجي الأوضة يلعب علي الآيباد جنبي، وأحيانًا بيعمل واجب المدرسة وهو قاعد معايا وأنا بشتغل. لكن مراتي ما بقيتش بتقعد معانا زي الأول، هي دلوقتي بتقعد في أوضة تانية تتفرج على التلفزيون.

من كام يوم، سألت مراتي إذا كانت كل حاجة تمام؟ فجأة صوتها بقه عالي وزعقت، وده عمره ما حصل منها قبل كده. بدأت تتهمني إني “سرقت” زين منها!!

قالت إن زمان كان هما الاتنين بيضحكوا وبيقضوا وقت كتير مع بعض، لكن دلوقتي كل اللي هو عاوزه إنه يقعد في مكتبي.

اتصدمت جدًا. قلت لمراتي إن زين ابني زي ما هو ابنها، وإننا دلوقتي نقدر نقضي وقت مع بعض كلنا، مش زي الأول لما ماكنش فيه وقت.

هي قالت إني بحاول “أسرق” ابنها منها!!

فكرّتها إن زين ابني كمان، وليا حق أبقى معاه زي ما ليها بالظبط.

مراتي بدأت تعيط وقررت تسيب البيت وتروح تقعد عند أختها. أنا فضلت واقف مش مصدق إزاي الموضوع كبر قوي كده فجأة!!

بقالها دلوقتي 3 أيام عند أختها، ورسايلها معايا بقت جافة جدًا، وكلها تقريبًا بتطلب مني أرجع أشتغل تاني في الشركة بدل ما أشتغل من البيت.

أنا مش عاوز أعمل كده، أنا عايز أشتغل من البيت وأكون قريب من عيلتي. اتكلمت مع أختها، وقالتلي إني مش غلطان في حاجة، وقالت إنها هتتكلم مع مراتي وتحاول تقنعها.

زين كل شوية يسأل عن مامته وأنا مش عارف اقوله ايه؟ أنا دلوقتي محتار ومش عارف أتصرف؟

🌿تحديث:

رُحت أتكلم مع مراتي في بيت أختها. أول ما شافتني، بدأت تعيط وطلبت مني أسامحها، وقالت إنها آسفة على اللي قالته.

واضح إنها اتكلمت مع أختها، وأختها قالتلها إن ابننا بيكبر وطبيعي انه يبدأ يعتمد على نفسه أكتر.

هي كانت ربة منزل طول الـ12 سنة اللي فاتوا، لكن دلوقتي لما ابننا بدأ يبقي مستقل، ما بقتش عارفة تعمل إيه وحست إنها تايهة.

سألتها إيه السبب اللي خلّى الموضوع يكبر كده؟ قالت إن ابننا قالها إنه عايز يبطل يعمل كيكة معاها يوم السبت، وبدل كده عايز يبدأ يتفرج على مباريات كرة القدم معايا.

كمان مراتي كانت عايزة زين يختار نشاط الطبخ في المدرسة، وهو رفض وأختار لعب كرة القدم (أنا طول عمري بحب الكره وكنت بلعبها في ثانوي وابدأت اتكلم مع زين في الكره).

هي زعلانة عشان ابننا بطل يعمل معاها الحاجات اللي كانوا متعودين يعملوها، وبقة عايز يقلدني في كل حاجة.

مراتي كانت عماله تعيط وهي بتتكلم، أنا فهمت هي زعلانة من ايه مش سهل إن حياتك كلها تبقى مربوطة بحاجة واحدة، وفجأة الحاجة دي تتغير.

سألتها ليه اختفيت 3 أيام؟ قالت إنها كانت محتاجة تدي نفسها شوية وقت بعيد وتفكر بهدوء.

قلتلها إنه هيفضل ابنها دايمًا، وإنه مهما كبر أو اهتماماتة اتغيرت، أكيد هيحتاج مامته طول الوقت.

مراتي رجعت البيت معايا، حضنت زين وعيطت وقالتلة إنها آسفة عشان سابته.

اقترحت عليها إنها تشوف شغل أو حاجة تعملها.

قالت إنها ما بتحبش المجال اللي درستة، قلتلها ترجع تدرس تاني لو حابة وأنا هدفعلها المصاريف كلها.

دلوقتي هي ناوية تدخل مدرسة تعليم الطبخ وعايزة تفتح قناة طبخ على اليوتيوب، قلتلها إني هقف في ضهرها 100%. 🎥🍳

هي كمان عايزة تبدأ تشتغل في مخبز صاحبتها.

كمان طلبت من زين انه يخصص وقت أكتر لمامته.

أنا الحمد لله فرحان جدا عشان مراتي بقت أحسن بكتير ❤️

(القصة مترجمة من ريديت..أصحاب القصة إجانب).

 

قصص واقعية
قصص مكتوبة
قصص قبل النوم
قصص حب
قصص حقيقية
قصص رائعة
قصص عربية
قصص وحكايات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!