الموقف ده من أغرب المواقف مرت عليا في حياتي، ولو مكنش حصل قدام صاحبتي، كنت هقول إنه أكيد متألف 😳
على فكرة، ده مش ريديت.
أيام ما كنت لسه في الكلية، روحت أنا وصاحبتي الكوافير اللي متعودين عليه.
صاحبة الكوافير كانت بنت أمورة قوي “ما شاء الله”، خلينا نسميها “سارة”.
سارة كانت قاعدة بتتكلم مع بنتين كمان (التلاتة كانوا في العشرينات تقريبًا). هما كانوا قاعدين قريب من صاحبتي، علشان كده هي سمعت الحوار كله. وأول ماخرجنا من الكوافير حكيتلي اللي حصل بالتفصيل.
(أنا وقتها مكنتش جنبهم علشان كده ماسمعتش الحوار بنفسي).
طيب مين البنتين اللي كانوا مع سارة؟
اللي صاحبتي فهمته من الحوار. إن البنت الأولانية تبقي صاحبة سارة، خلينا نسميها “رانيا”، والبنت التانية عروسة لسه مخطوبة قريب جدا، وسارة هي اللي عملت لها الميك اب في خطوبتها، وهنسميها “نرمين”.
تمام، طيب إيه المشكلة بقى؟ 🤔
نرمين راحت لسارة عادي علشان تتفق معاها تعملها ميك اب الخطوبة. جه يوم خطوبة نرمين ولبست الفستان، وعملت شعرها، وكله تمام.
خطيب نرمين وصل علشان ياخدها من الكوافير. خلينا نسمي خطيبها “هيثم”.
هيثم دخل عادي علشان ياخد نرمين… ولما سارة شافته…. اتصدمت!! 😳
ليه اتصدمت يعني إيه المشكلة؟
المشكلة إن هيثم يبقى خطيب صاحبتها رانيا!!
في اليوم اللي أنا كنت فيه في الكوافير مع صاحبتي، سارة جمعت نرمين ورانيا علشان يتكلموا ويشوفوا هيعملوا إيه مع هيثم؟ وهيحلوا المشكلة دي إزاي؟ والظاهر لسه مكنش حد من أهلهم يعرف.
طبعًا أنت متوقع إنهم مثلًا كانوا بيتفقوا إزاي يعلموه الأدب، ولا إزاي يخلوه يحرم يلعب ببنات الناس؟ ده العادي، صح؟
الصدمة بقى، وأغرب حاجة في الموقف العجيب ده كله… إنهم كانوا بيتخانقوا عليه!! 😵
ودي قاعدة تقولها: “ده اتفق مع أهلي وجابلي شبكة!”
والتانية تقول: “ده مش عارفة عملي إيه!”
وكأنهم بيتنافسوا عليه!
وفي الآخر اتفقوا إن واحدة فيهم تخرج معاه، والتانية تطب عليهم، ويقولوا له إنه لازم يختار واحدة فيهم “دلوقتي”😂
عارفة إن الكلام غريب وعجيب ومش منطقي… بس للأسف حقيقي، وحصل.
طيب إيه موقف أهل هيثم؟ وازاي وافقوا إنه يخطب اتنين في نفس الوقت كده! الله أعلم 🤷♀️ بصراحة، الموضوع ده ملوش تفسير خالص.
يعني لو قولت بيتسلى بالبنتين ماشي… بتحصل، خاطب واحدة وماشي مع التانية، برضه بتحصل.
لكن عامل حفلة خطوبة للاتنين؟ وجايب شبكتين؟ وأهله راحوا يخطبوله مرتين؟!!
على فكرة، أنا مش عارفة هل أهله فعلًا راحوا معاه في المرتين ولا لأ، بس أكيد يعني، أهل البنات مش هيوافقوا غير وأهله معاه! فمش عارفة عملها إزاي دي 🤯
ده الموقف الأولاني.
_______________________
الموقف التاني: بعد ما اتخرجت، اشتغلت في شركة. وقتها قابلت بنت وحبيتها قوي، وفتحتلي قلبها على طول وقالتلي قصتها.
البنت دي وقتها كانت حزينة قوي وقلبها مكسور… ولسه فاكرة قد إيه هي كانت موجوعة وهي بتحكي 💔
هي من محافظة، وخطيبها خلينا نسميه “تامر”، كان قريبها بس من محافظة تانية (هما كانوا كاتبين الكتاب).
لما تامر اتقدملها، وافقت عليه، وأهلها مسألوش عليه لأنه قريبهم، وكانوا واثقين فيه.
المهم، حبته واتعلقت بيه جدًا، وكتبوا الكتاب، والدنيا كانت ماشية تمام.
وهوووب! فجأة اكتشفت إن تامر أصلًا متجوز 😵 في المحافظة التانية، وطبعًا كان مخبي عليها!
لما أهلها عرفوا الحقيقة، طبعًا فركشوا الجوازة دي خالص.
عارفين بقى هي كانت حاسة بإيه؟
مش محتاجة تقولي… أكيد كرهته، ومكنتش طايقاه، ولا عايزة تبص في وشه تاني.
الحقيقة؟ لأ… هي كانت بتقولي إنها لسه بتحبه! ولو مكنش أهلها رافضينه رفض قاطع، كانت كملت عادي واتجوزته! وكل الحزن والوجع اللي كانت حسه بيه علشان كانت لسه بتحبه، ونفسها تكمل معاه 😔
ده كلامها هي على فكرة… هي قالتلي كده بالظبط.
طيب السؤال هنا…ليه بنبقى عايزين نكمل مع أشخاص مؤذيين؟وليه، رغم إننا عارفين ومتأكدين إن العلاقة دي مدمرة ومش صحية، بنبقى برضه عايزين ندي فرصة تانية وتالتة؟
(علي فكره أنا بنتكلم هنا عن فترة الخطوبة مش بعد الجواز)..
علماء النفس بيقولوا إن فيه أسباب كتير للموضوع ده:
🔹 عدم الثقة بالنفس:
عقلنا بيقولنا لو سبناه، ممكن مفيش حد تاني يحبني… أو مفيش حد تاني هيحبني زيه. وبنخاف من الوحدة.
🔹 الاستثمار في العلاقة:
علشان انت استثمرت وقت كبير في العلاقة وجهد، فبتستخسر تضيع الوقت ده كله! وبتسأل نفسك: لسه هبدأ من الصفر مع حد جديد؟ 😩
🔹 الأمل في التغيير:
بيبقى عندنا أمل إن كل حاجة هتبقى أحسن في المستقبل. أو بنحس إننا مسؤولين عن الشخص المؤذي ده ولازم نساعده يبقى أفضل. وساعات بيصعب علينا نسيبه علشان بنحس إنه “يا حرام” هيدمر لو بعدنا عنه.
🔹 الخوف من أعراض الانسحاب:
علماء النفس بيقولوا لما بنحب شخص، وبنتعود على وجوده في حياتنا، الجسم بيفرز هرمونات معينة. لو بعدنا عن الشخص ده فجأة، الهرمونات دي بتبطل تتفرز، وده بيخلينا نعاني من أعراض الانسحاب…زي الإد/*مان بالظبط!
وده اللي بيخلينا مش عارفين ننام، ضربات قلبنا بتزيد، توتر، قلق، بكاء، قلة شهية، حزن شديد… 😢
بس! علماء النفس بيقولوا إن الأعراض دي بتستمر من “شهرين لأقصى حاجة 6 شهور”، وبعد كده بتختفي (بشرط إن الشخص نفسه يبقى عايز ينسى ويكمل حياته). أما اللي رافض ومش عايز يتقبل البُعد نهائي… هو اللي بيخلي مدة الأعراض تزيد.
وفي حاجات كتير بنعملها بتخفف الألم شوية في الفترة دي…ممكن أكتبلكوا مقال عنها مرة تانية ✍️
🔹 حاجة كمان:
عقلك بيخليك تركز على إيجابيات الشخص، وتنسى قد إيه هو مؤذي!
🔹 آخر حاجة:
أوقات بيكون بسبب الخوف… لو الشخص المؤذي بيهددك أو بيخوفك إنك لو سبتيه ممكن ينتقم. وأوقات بنخاف من كلام الناس. وإن ممكن حد يشمت فينا.
في الآخر عايزه أقول ان “البحر مليان سمك”..يعني لما تبعد عن السمكة الشريرة خليك متأكد ان ربنا هيبعتلك سمكة تانية طيبة وأموره وتعيشوا في تبات ونبات وتخلفوا “بساريا” صغيرة.
ابقوا فكروني احكيلكوا عن أغرب فرح أنا حضرته في حياتي..أنا عندي مغامرات كتير لسه عايزه احكيها..
قولولي ايه أغرب علاقة سمعتوا عنها؟؟
