واحدة أعرفها اتكلمت معايا وكانت محبطة وحزينة قوي علشان جوزها نسي عيد ميلادها. وماكنتش عارفة تتصرف إزاي.
هي عايزة توصله إن الموضوع ده جرحها، بس في نفس الوقت مش عايزة تتخانق ومش عايزة تبان مادية 😢
عملت بحث على الموضوع ده علشان أساعدها وأشوف علماء النفس بيقولوا إيه، وده الكلام اللي لقيته:
نسيان عيد الميلاد أكيد بيجرح، لأنه بيكون علامة على الاهتمام والحب بينك وبين جوزك أو خطيبك. وفي دراسة اتعملت بتقول إن نسيان المناسبات المهمة بيأثر على نفسيتنا وبيضعف العلاقة.
فيه كذا سبب ممكن يخلي جوزك ينسى عيد ميلادك:
ضغط الشغل: ممكن يكون جوزك مشغول جدًا في شغله، وعليه التزامات ومسؤوليات كتير، وده يخليه ينسى التواريخ المهمة.
اختلاف الأولويات: هو كراجل ممكن يكون حاسس إن عيد الميلاد ده مش حاجة مهمة أوي يعني للدرجة دي. 🤷♂️
كمان قريت مرة زمان إن الراجل بيبقى فاكر إنه لازم يجيب لمراته هدية كبيرة وغالية علشان تبقى سعيدة وراضية 🎁 طبعا الهدايا الكبيرة حلوة أكيد، بس لو الظروف مش مساعداه وافتكرك بأي حاجة بسيطة (حتى لو وردة أو توكة ولا ميدالية حتى) ، المهم إنه يحسسك إنك مهمة وإنه مش ناسيكي ومقدرك حتى لو على قد إمكانياته، فالبنت او الست غالبًا هتقدر ده وهتبقى سعيدة وراضية.
طبعًا الكلام ده علي أغلب الستات، مش كلهم، لأن فيه بنات مش بترضي فعلًا غير بالهدايا القيمة والغالية.. بس أنا عندي قناعة إن بنات كتير بتوافق بالحاجة البسيطة عادي والله، لو هو فعلًا مش بخيل معاها ومش بيستخسر فيها حاجة.
في دراسة تانية اتعملت وقالت إن 35% من الأمريكيين نسوا عيد ميلاد شريكهم مرة واحدة على الأقل، والدراسة بتقول إن الرجالة بتنسى عيد الميلاد أكتر بكتير من الستات (أعتقد إن دي حاجة معروفة مش محتاجة دراسة 😅).
في كمان ناس لغة الحب بتاعتهم هي “الهدايا” يعني علشان يحسوا إن الطرف التاني في العلاقة فعلًا بيحبهم، لازم يجيلهم هدايا من وقت للتاني. وطبعا الناس دي أكتر ناس بتتأثر لو شريكهم نسي عيد ميلادهم، لأن المخ بيترجم على طول إنه “مش بيحبني”.
هو عامة فيه 5 لغات للحب، لو عايزين ممكن أبقى أشرحهم في مرة إن شاء الله.
طيب نعمل إيه بقى في المشكلة دي؟ 🤔
*الأحسن قبل المواجهة تكتبي مشاعرك على الورق، لأن الكتابة بتساعد على تفريغ مشاعر الغضب، فده هيخليكي تهدي شوية ✍️
كمان هتقري الكلام اللي انتي كتبتيه وتشوفي لو فيه كلام جارح، اشطبي عليه، وحاولي كده تعملي فلتر للكلام الصعب، علشان إحنا عايزين نوصل المشكلة ونحاول نحلها، يعني عايزين جوزك يصالحك ويراضيكي، مش نعقد الموضوع أكتر بكلام جارح يخليه يسيب المشكلة الأساسية ويمسك في الكلام الجارح “وهما اصلا مابيصدقوا”.
*حاجة كمان مهمة قوي: طريقتك في الكلام:
يعني لو عليتي صوتك وإنتي بتتكلمي وقعدتي تزعقي، هيسيب المشكلة كلها ويقولك: “انتي بتعلي صوتك عليا! اااه قلبي الحقوني”🤯
واحنا مش عايزين نديله حجة ونخليه يتلكك، لأااااااا. إحنا بنتكلم بهدوء أهو، مالكش حجة 😎
*حاجة كمان: أسلوب اللوم والعتاب مش بيجيب نتيجة.
يعني بدل ما تقعدي تقولي “إنت إنسان مستفز، ومش بتهتم بيا، وحراااااااام عليك يا أخي، أنا عملتلك إيه علشان تعمل معايا كده…واهي اهيء” 🙄
هنا هو مش سامع المشكلة أصلًا! هو كل اللي سامعه “زن زن زن” وعمال جوه دماغه يقول “أسكتها إزاي دي بقى؟” 🤐 فهنا هو مش هيفكر إزاي يراضيكي، كل اللي هيفكر فيه “إزاي يسكتك”!
يبقى علشان ناخد حقنا تالت ومتلت، وبرضه ما نطلعش نفسنا غلطانين ونخليه كالعادة يتلكك ويقولك: “أصل أسلوبك وحش!” لا! إحنا أذكياء وهنعرف نوصل زعلنا بذكاء 😎
أيوه! يعني أعمل إيه؟
بدل ما تقولي:
“إنت إزاي تنسى عيد ميلادددددددددددي؟! إنت ما بتحبنيش، أو إنت مش بتقدرني، أو إنت بخيل!!” وتقعدي تقولي لوم واتهامات…
الأحسن تعبّري عن “مشاعرك” بوضوح. يعني قولي:
“أنا حسيت بالزعل لما ما احتفلتش بعيد ميلادي…”
أو:”الموضوع ده جرحني… أنا حاسة بألم جوايا.”
ويا سلام بقى لو بدأتي الموضوع معاه بطريقة إيجابية، ده هيخليه يركز معاكي أكتر ويتقبل الكلام.
يعني ممكن تقولي له:
“فاكر لما كنا مخطوبين وإنت اتفقت مع أهلي وعملتلي مفاجأة حلوة قوي في عيد ميلادي؟ بجد ده كان أجمل يوم في حياتي…” 🎉
“أنا زعلانة قوي قوي إنك نسيت عيد ميلادي السنة دي… أنا عارفة إنك مشغول الأيام دي، وعندك ضغط جامد، وعارفة إنك بتتعب في الشغل علشاني أنا والأولاد، ونفسك تعملنا كل اللي نفسنا فيه، ربنا يعينك يارب…” 🙏
“بس عارف؟ لو كنت جبتلي هدية حلوة ولا عملتلي مفاجأة، كنت هبقى مبسوطة قوي والله… ومليش دعوة، أنا ليّا هدية عندك! لازم تجيبهالي وتعوضني كمان بخروجة حلوة.” 😍🎁
“والسنة الجاية هعملك تذكير على الموبايل علشان ميبقاش عندك حجة!”
وخدي فعلاً الموبايل بتاعه واعملي لنفسك رسالة تذكير! 😄
ولما يعوضك بخروجة حلوة أو هدية، عبّري عن فرحتك وافرحي بجد من قلبك، واشكريه إنه وافق يصالحك، ومهانش عليه زعلك، ده هيخليه عايز يرضيكي على طول 💕
والسنة اللي بعدها، ممكن تفكّريه كمان قبلها بكام يوم، علشان يلحق يعملك مفاجأة حلوة.
إحنا أصلاً البنات والستات نِستاهل إنهم يتعبوا علشانّا. 👑💪
ربنا يفرّح الناس كلها، ويارب كل البيوت تبقى هادية، وكلها حب وسعادة ❤️🏠
