“لا يعتمد عليه ومعرفش يكون سند حقيقي !!!”
أنا ومراتي عندنا بنت عندها 8 شهور. الأسبوع اللي فات كنت راجع من الشغل، وأنا لسه علي أول مدخل البيت، لقيتها بتجري نازلة من المدخل حافية. أول ما شافتني، صرخت فيا إني أتصل بالطوارئ ، لأن في حريقة في المطبخ.
سألتها بنتنا فين لأنها مش معاها، وقالت لي إنها جوة وطلبت مني أتصل الطوارئ بسرعة.
إحنا ساكنين في منطقة ريفية، واستجابة الطوارئ بتكون بطيئة، فخفت جدًا إن البيت كله يولع والبنت تكون جوة قبل ما المطافي تيجي. حاولت أجري وأدخل البيت، وهي كانت بتحاول تمنعني وبتصرخ تاني وتقول إن فيه حريقة ومينفعش أدخل!!!
دخلت البيت، هو متصمم بحيث لازم أعدي علي المطبخ عشان أوصل للممر اللي فيه أوضة الطفلة. لقيت النار طالعة من الزيت في طاسة على البوتاجاز، والحيطه اللي فوق البوتاجاز والستاير اللي جنبه كانوا بيولعوا. طفيت الطاسة “رميت عليها غطا حله” ، وبعدين طفيت الحيطة والستاير باستخدام مطفأة الحريق. بعد كده جريت على أوضة الطفلة وجبت بنتنا.
وأنا خارج برا، لقيت مراتي اختفت. عرفت بعدين إنها راحت تدور على جار عشان تستخدم تليفونه.
أنا مضايق جدًا من رد فعلها تجاه الحريقة، لأنها خرجت من البيت من غير بنتنا، وكمان حاولت تمنعني من الدخول قبل ما المطافي تيجي. والمشكله الكبيره انها حطت بنتنا في خطر لأنها محاولتش تطفي النار باستخدام غطا أو صينية على الزيت، أو حتى تستعمل مطفأة الحريق. لو مكنتش وصلت في الوقت المناسب، مش عايز أفكر في اللي كان ممكن يحصل.
المطافي جات بعد ما كنت طفيت الحريقة، ومراتي رجعت مع جار جابها بالعربية. كنت غضبان منها بسبب الي حصل ده ، وهي سكتت خالص.
قررت أروح أبات عند أخويا ومراته في الليلة دي، وأخدت بنتنا معايا. مراتي زعلت جدًا منّي بسبب ده، وفي اليوم اللي بعده قالت لي “إزاي تسيبني لوحدي بعد اللي حصل، أنا كنت محتاجة حد يوديني على الطوارئ لأن رجلي اتعورت من الجري وأنا حافية”.
الكلام ده زعلني أكتر، لأنها مهتمة برجلها أكتر من اللي كان ممكن يحصل لما خرجت من البيت وهو بيولع من غير بنتنا. أنا بقالى أسبوع تقريبًا قاعد عند أخويا، ومش عارف أعمل إيه؟ هل انا غلطان علشان غضبان منها قوي كده!!!
🌹انتهت الرساله الاولي🌹
(قصه جديده قريبه من الاولي)
🌹الرساله الثانيه🌹
أنا وجوزي (30 سنه) ومعانا اولاد أخوه (ولد رضيع وبنت 5 سنين) كنا قاعدين في الجنينة الخلفية بتاعت البيت. غالبًا باب الجنينة كان مفتوح “مش فاكرة بصراحة” فجأة، البيتبول (الكلب) ظهر من العدم وهاجم بنت أخوه اللي عندها 5 سنين. البنت صرخت، وأنا لفيت وضربته برجلي بكل القوة اللي قدرت عليها. لحسن الحظ ضربتي للكلب في فكّه خلته يسيب البنت. جوزي كان واقف كام خطوة بعيد، وصرخ وقال حاجة زي “الكلب ده بتاع مين؟!”، وأنا كنت في حالة هلع وقلت له يجيب الاسبراي من جوه البيت (“سبراي الدببة”). أنا بحب الحيوانات، بس الموقف كان مرعب، الكلب كان شكله مجنون، “كلب مسعور”، و كان خارج عن السيطرة.
جوزي جري، بس الغريب إنه جري بره الجنينة وقفّل الباب وراه!!!
بدل ما يجري ناحية بنت أخوه أو ابن أخوه اللي كان نايم في سرير الأطفال اللي برة في الجنينة!!! جوزي خرج بره البيت خالص وسبنا في الموقف ده وقفل الباب وراه!!!
أنا حاولت أحط البيبي على ترابيزة عاليه علشان أضمن إن الكلب مش هيقرب منه، وأنا في نفس الوقت شايلة البنت على كتفي. حاولت أحطها فوق الشواية عشان تبقى بعيدة عن الكلب، بس الكلب كان بينط وبيعضّ في الهوا، وأنا كنت خايفة لو شيلتها تاني إنه يقدر يوصل لها ويشدها من إيدي (لأنني قصيرة) . جريت على الجاروف وضربته بيه لحد ما وقف. مش قادرة أنسى الصوت ولا الإحساس ده. كان الموقف كله مليان توتر لدرجة إني ما خدتش بالي إنه عضني مرتين 😢
بقالنا أسبوع كامل مش بنتكلم مع بعض، رغم إننا عايشين في نفس البيت. حتى ما سألتوش كان راح فين وقتها. هو رجع بعد دقائق، بس علشان ياخدنا في العربية ويودينا المستشفى.
دلوقتي هو زعلان إني “بتجاهله”، لكن أنا شايفة إنه السبب في إني اضطريت أقتل الحيوان ده. لو كان جاب الاسبراي (اللي أنا دايمًا حاطاه في شنطتي لأي موقف خطر سواء من حيوان أو غيره) ماكنتش أحتاج أعمل اللي عملته. الاسبراي كان جوه البيت، وهو عارف مكانه كويس. بدل ما يساعدني، حرفيًا جري بعيد وسابني أنا وطفلين نواجه الموت. ، ده غير ان هو اصلا اللي عرض نراعي الأطفال في الويك إند.
مش عارفة، هل ده سبب كافي للطلاق؟ مش عارفة حتى لو أقدر أبص له تاني. أي جاذبية كنت بحس بيها ناحيته تقريبًا اختفت. إمبارح حاول يلمسني عشان يعدي من جنبي، وأنا من غير تفكير شيلت إيده كأنه حد غريب بيضايقني في مكان عام، لأني حرفيًا اتخضيت ومش قبلاه.
هو دلوقتي طول الوقت، بيحاول يتكلم معايا وبعدين بيتضايق لما ما بردش عليه، شويه و يرجع تاني يحاول.
انا ماكنتش متوقعة إنه يبقى بطل ويواجه الكلب بإيده، لكن على الأقل كان يساعدني؟ على الأقل ما يسيبنيش في موقف حياة أو موت مع طفلة وبيبي؟ المفروض أعدي ده على إنه “تصرف عفوي بسبب الرعب”، انا حتي مش قادره أسمع أي كلام منه؟؟
🌹#تحديث
بجد بشكر كل الناس، وآسفة لكل حد مرّ بحاجة مشابهة، لأن الموضوع حقيقي كان صعب جدًا.
بالنسبة للناس اللي كانت قلقانة على صحتي النفسية، أنا استخدمت تطبيق من الشغل امبارح عشان أطلب مساعدة نفسية، لأن حسيت إني محتاجة ده جدًا، وحطيت الموضوع أولوية، المختصة اللي كلمتني قالت إنها عايزة تخلي الحوار مريح أكتر لأن كان باين عليّا التوتر الشديد كل مرة احاول أتكلم فيها عن اللي حصل، وده كان باين حتى من خلال مكالمة الفيديو.
الليلة اللي فاتت، قلت لجوزي إني محتاجة مساحة -الحقيقه ماكنتش لطيفة معاه زي ما كنت ناويه – هو عاند وما كانش عايز يمشي (البيت بتاعي)، لكن قلت له إني مش قادرة أبص له، و صعب عليا أشوفه دلوقتي . هو عيّط، وأنا بصراحه حسيت بلا مبالاة قدام دموعه.
أنا فعلاً مش بنام كويس، ف مش عارفة إذا كنت مرهقة زيادة، ولا لسه متأثرة جدًا باللي حصل، خاصة بعد الجلسة النفسية اللي أثرت عليا عاطفيًا.
🌿جالي شوية أسئلة عن أخته وجوزها، فقلت أرد عليكم:
هما مش بيتكلموا معاه. مش عارفة إمتى حصل ده بالظبط، لأني كنت في حالة عدم وعي في المستشفى وأنا بعمل الغرز وبتعالج، لكن أظن إن بعد ما خلصت وكنت بحاول أشرح لهم إزاي حاجة فظيعة زي دي حصلت للبنت الصغيرة وبحاول اتأسف ، سألوني جوزي كان فين؟ أنا الحقيقه ما عرفش هو كان فين وقتها علشان كده ماقولتش أي اجابه , بس الظاهر لما سألوا جوزي بعد كده . اجابته ماعجبتهمش علشان كده مخاصمينه .
بنت أخوه خرجت من المستشفى امبارح، وده فرحني جدا. بعتلها ورد ودبدوب، ولعبة كان نفسها فيها . أنا ما رحتش المستشفى، كنت خايفة تشوفني و تتوتر. أخته وجوزها بعتولي ورد برضه، وده خلاني أعيط تاني. أنا بجد متلخبطة جدًا.
أخو جوزي “ابو البنت” بعتلي رسالة طويلة ما قدرتش أخلصها لحد دلوقتي، بس كانت من ألطف الحاجات اللي حد بعتها لي في حياتي… كمان بعتلي كارت فيزا ب 1000 دولار. كنت حرفيًا فاكرة إني قرأت الرقم غلط… الناس دي طيبين جدًا
لسه حاسة بالذنب إني ماقدرتش أعمل حاجة أكتر للبنت. و كل حاجة بتتعاد تاني في دماغي 😢
على أي حال، أنا لسه ما فكرتش في إجراءات الطلاق بشكل جدي، لكن مش ضد الفكرة، والحقيقة إن التفكير في الطلاق ريحني شوية. عارفة إن “الصراع أو الهروب” غريزة ، بس أنا دلوقتي متأكده اني مش عايزه أبقى مع حد سابني في وقت الخطر. أظن إني أقدر أقول بثقه إني من النوع اللي بيواجه. وعايزة حد يقف معايا في المواجهة. يمكن جوزي الاحسن ليه يكون مع واحده شاطره في الجري علشان يجروا سوي لو حصل حاجه 😅
مش عارفة… حاسة إني خلاص، بس في نفس الوقت لسه متلخبطة
حاليًا مبسوطة إني عندي مساحة شخصية علشان أقدر افكر كويس.
شكرًا لكل الناس اللي خلوني أحس إني مش مجنونة، أنا عارفه ان جوزي ماكانش قصده يخذلني… بس في النهاية هو عمل كده…..
