وصاية ابن خالي 👨👦👦💖
أنا راجل. ابن خالي اسمه “جيمي”. هو راجل في أواخر الأربعينات، بس عقله زي طفل عنده ٨ سنين لإنه عنده إعاقة ذهنية. طول عمره عايش مع أمه، وهي اللي كانت بتراعاه وتهتم بيه، لحد ما للأسف توفت فجأة في بداية السنة اللي فاتت.
جيمي مش قادر يشتغل شغلانة ثابتة، فبيعمل شوية شغلانات بسيطة للناس في البلد أو في المزارع اللي حواليه.
هو وأمه كانوا عايشين على شوية الفلوس البسيطة اللي كان بيجيبهم من شغله، وعلى معاش والدته زي ما هو بيحكي. هما كانوا فقرا جدًا، بس كانوا قادرين يوفروا الحاجات الأساسية. والجيران كانوا بيدوهم هدوم مستعملة أو حاجات مش محتاجينها.
زي ما فهمت، أمه كانت صاحبة البيت اللي هما عايشين فيه، وهو بيت صغير جدًا وحالته وحشة، وعندهم حتة أرض بيربوا فيها كام فرخة وعندهم جنينة بيزرعوا فيها خضار. هم ناس بسيطة من منطقة ريفية وعايشين على قدهم جدًا.
جيمي يقدر يعيش لوحده، يعني يعرف يعمل شوية حاجات بسيطة زي طبخ أكلات سهلة، الغسيل، تنضيف البيت، وشراء الطلبات “لو من ماركت هو عارفه”. وكمان بيهتم بالفراخ والجنينة. بس هو ما بيعرفش يسوق عربية، ويدوب بيعرف يقرأ بالعافية، ومش بيعرف يتصرف أو يتعامل في أماكن مش عارفها.
هو ما بيعرفش يتصرف في حاجات زي دفع الفواتير، وما عندوش حساب في البنك ولا أي حاجة زي كده. كمان هو خجول وبيخاف من الناس الغريبة.
جيمي بيحط الفلوس بتاعته في علبة، وفاهم إنه لازم ما يصرفش أكتر من الفلوس اللي معاه.
بصراحة هو أطيب شخص أنا عرفته، وراجل شغال بجد وعمره ما اشتكى من حاجة.
بعد ما أمه توفت، جيمي فضل عايش لوحده في البيت، من غير حد يرعاه. وهو لسه عايش هناك لحد دلوقتي، بقاله حوالي سنة.
أنا كنت عايش في ولاية تانية من سنين ورجعت قريب، وقلت أروح أشوف أخباره إيه. اتصدمت لما شفت إنه رغم إنه حاول ينظم حياته على قد ما يقدر، لكنه عايش في فقر جامد جدًا. مفيش تكييف في بيته، ولا حتى دفايه. وهو ما دفعش الفواتير، غالبًا لأنه مش عارف يدفعهم أصلاً، فعشان كده معندوش لا كهربا ولا تليفون. الحمد لله إنه عنده بير بياخد منه مايه.
علي فكرة هو محافظ على نظافته الشخصية بس ماعندوش مايه سخنة. كأنه بالظبط عايش في القرن الـ19.
هو عايش على شوية الفلوس اللي بياخدهم من الشغلانات البسيطة اللي بيشتغلها، وبيشتري شوية طلبات وبيأكل من الخضار اللي بيزرعه ومن بيض الفراخ، بس ده طبعا مش كفاية إنه يعيشه كويس، خصوصًا في الشتاء.
واضح إنه بعد وفاة أمه اتساب لوحده ومطلبش مساعدة من حد، ومحدش اهتم بيه.
بصراحة استغربت جدًا إنه مفيش أي حد من خدمات الرعاية الاجتماعية زاره بعد وفاة أمه، لأنه واضح إنه محتاج مساعدة ومش قادر يطلبها.
هو محتاج حد يكون وصي عليه، بس معندوش حد. أمه كانت حنينة عليه جدًا، بس شكلها ما فكرتش في اللي هيحصل لابنها بعد ما تموت.
أنا آخر حد فاضل له من العيلة ” وأخواتي كمان”.
أنا نفسي أبقى وصي عليه، عشان أنا شايف إنه محتاج حد يساعده، بس في نفس الوقت عارف إنه لازم يفضل عايش زي ما اتعود، لأن لو اتشال من بيته وبيئتة مش هيعرف يعيش ولا يتأقلم.
المشكلة إن الرعاية الاجتماعية أكيد مش هيسيبوه يعيش في بيته ده
جيمي حياته كلها بتدور حوالين الجنينة بتاعته، والحيوانات اللي بيربيها، والصيد، والمشي في الغابة. هو قادر ينظم حياته في الظروف اللي متعود عليها. إنما لما يكون مع ناس غريبة وفي أماكن مش عارفها، بيقف تمامًا ومش بيعرف يتصرف، وأنا شفت ده بنفسي.
المشكلة لو اتنقل لدار رعاية، دي هتبقي مشكلة كبيره بالنسبه له.
أنا ورثت بيت في مدينة قريبة، وناوي أعيش هناك علي طول، وقتها هقدر أروح أشوفه علي طول، وهو شكله موافق علي زياراتي ومش مضايق مني.
كمان اتواصلت مع قسيس الكنيسة اللي في قريتة، وقال لي إنه ممكن يتفق مع الناس الكنيسة إنهم يروحوا يطمنوا عليه ويساعدوه علي طول.
دلوقتي أنا عايز أطلع له معاش يساعده بس المشكله أني مش لاقي شهاده الميلاد بتاعته ولا أي ورقه تثبت هويته خالص. لدرجه اني شاكك ان امه ماطلعتلوش شهاده ميلاد اصلا!
حتي البيت اللي هو عايش فيه ملقتش أي ورقه بتثبت ملكيته.
أنا قررت أكون الوصي القانوني عليه بس المشكلة دلوقتي في الورق.
▪️ تحديث:
أول حاجة الأخبار الحلوة:
الحمد لله قدرت أتفق مع ابن خالي، وبعد محاولات كتير عشان يقتنع، أخيرا وافق إنه يبات عندي لحد ما نخلص شوية تصليحات ضرورية جدًا في بيته. على الأقل دلوقتي بقه عنده مكان دافيء وآمن ينام فيه، وأكل كويس.
هو بيبات عندي بليل. وبيرجع بيته الصبح، أنا بروح شغلي وهو بيقضي يومه زي ما هو متعود، بيراعي الحيوانات بتاعته والجنينة وبيتمشي كل يوم (هو بيقول إنه لازم يمشي كل يوم حتى لو الجو وحش جدًا، لأنه لو ما عملش كده بيحس إنه “مخنوق” وبيتوتّر).
برجع من الشغل عليه بنصلح حاجات في بيته وبعدين باخده معايا ونروح بيتي. هو الحمد لله مش معترض على الوضع ده، والأمور ماشية كويس.
وبالنسبه للوصاية وورق ملكيه البيت. كلمت محامي وهو بيخلص لي الاجراءات كلها.
▪️ تحديث:
أخيرًا بقيت الوصي علي جيمي. الاجراءات كانت صعبة وطويله بس الحمد لله القاضي وافق.
جالنا زيارات من الشئون الاجتماعية والدكاترة عشان يقيموا حالته. والأخصائيين الاجتماعيين قرروا، إنه مينفعش يفضل في بيته لوحده، ولازم يعيش معايا. “أنا كنت عايز كده من الأول” . كمان هياخد معاش ورعاية صحية.
هو دلوقتي عايش في أوضة فيها حمام ومطبخ صغير مخصوص ليه في بيتي، عشان يحس بالخصوصية ويقعد براحته. هو اشتغل معايا جامد في توضيب الأوضة الجديدة بتاعته وإحنا الاتنين مبسوطين جدًا بالنتيجة.
الحمد لله هو اتقبل فكرة إنه مش هينفع يعيش في بيته القديم تاني.
عملتله له عشه للفراخ ونقلنا الفراخ بتاعته عندي في البيت (وكان يوم جميل وإحنا بننقل 11 فرخة في عربية نص نقل😂 ). كمان بدأ يزرع شوية حاجات وبيساعدني في شغل البيت.
أنا بجدد بيتي لأن حالته صعبة جدًا، يعني الشغل كتير ومش بيخلص. وجيمي مشغول على طول وبيتحرك كويس زي ما بيحب، وده مخليه مبسوط.
كل فتره بأخده لبيته القديم عشان يصطاد ويمشي في الغابة اللي عارفها. وإحنا كمان بدأنا نستكشف الطبيعة حوالين بيتي عشان يلاقي أماكن جديدة يمشي فيها.
الحمد لله أنا دلوقتي راضي جدًا، جيمي دلوقتي عنده مكان آمن ينام فيه وأنا بهتم بيه، وباين عليه إنه مبسوط بحياته الجديدة
___________
القصة مترجمة من ريديت. أصحاب القصة أجانب
#ريديت
#حواديت_الاجانب
