الترقية الجديدة! 🎉🚀
أنا موظفة في شركة. الحمد لله اترقيت الشهر اللي فات بعد سنين من التعب والتوتر والشغل الصعب. الفلوس الزياده اللي هاخدها من الترقية هتغير حياتي للأحسن أكيد. ده غير اني هشتغل في مكتب قريب من بيتي، وكمان هبقى عندي وقت أكتر أقضيه مع عيلتي 😍
الشركة عينت موظفة في المكتب الجديد قبل ما أنا أترقي. وفجأه اكتشفت أن الموظفة الجديدة تبقي أمّ الطفل اللي كان بيتمر علي ابني وطلع عينه حرفيًا “ابنها اسمه تيمي”.
الموضوع مكنش شوية غلاسه من ابنها كده ولا خلاص؛ لاء الموضوع كان صعب جدًا لدرجة اننا نقلنا ابننا وإخواته لمدرسة تانية، وبعنا بيتنا ونقلنا لمكان تاني خالص. الولد كان قاسي قوي وعذب أولاد كتير في المدرسة لدرجه أن الموضوع وصل للبوليس.
دلوقتي الحمد لله حياتي بدأت تستقر، والشغل الجديد كان بالنسبة لنا بداية جديدة بعد الألم والخوف اللي شوفناه. وابني بدأ يتعافى ويبقي أحسن. هو بيروح علاج نفسي.
دلوقتي الشركة عيّنت “جين”– أم تيمي– وأنا هبقى المديرة بتاعتها.
أول ما اتقابلنا وهي عرفت انها في فريقي، وشها جاب ألوان. أنا كمان كنت متضايقة جدًا.
أنا عارفة الناس اللي بتشتغل معايا في الفريق وعلاقتي بيهم ممتازة. لكن مع جين أنا تقريبا مش بتكلم معاها غير لو مضطره وبالكتابة بس كمان. مفيش بينا كلام مباشر.
أعمل إيه دلوقتي؟ أكيد مش هسيب شغلي ومش هرفض الترقية.
هل أقعد أنا وجين مع الـHR ونحاول نوصل لحل؟
حاسه كأني بخون ابني وعيلتي، بس مهنيًا المفروض أفصل المشاكل عن الشغل.
هل أتجاهل الموضوع علي أمل إنها تتضايق وتستقيل؟
هل أطلب من الـHR ينقلوها لمكتب تاني؟
علي فكرة السنة اللي فاتت سلوكها معايا كان سيء جدًا زي ابنها بالظبط، والقاضي كان هيعملها “عدم تعرض” بس اكتفى انه يعملها تحذير رسمي.
احنا تقريبا مش بيتكلم والموظفين في الفريق وزمايلي في الإدارة لاحظوا بس محدش قال حاجه لغايه دلوقتي.
أنا محتاره ومش عارف أتعامل مع الموقف ده ازاي؟
▪️تحديث “بعد سنة”:
بشكر الناس علي ريديت لأنكم ساعدتوني أرتب أفكاري قبل ما أعمل أي حاجة غبية 🤯
عندكوا حق كان لازم أروح للـHR أول ما بقيت مديرة جين، بس كنت متوتره ومش عارفة اتصرف صح.
بعد يومين “سام” –مديري – سألني عن تصرفاتي الغريبه مع جين.
حكيتله اللي حصل بيني وبينها (وابنها اللي كان بيتنمر على ابني لدرجه أن الموضوع وصل للمحكمة)، هو اتفاجئ ودعمني جدًا 👍.
قالي إن جين كانت بتشوه سمعتي قدام زمايلنا. وبتقول إني سامة ونرجسية وكلام فاضي كتير. الحمد لله زمايلنا ما صدقوش الكلام ده.
أنا وسام رحنا للـHR وشرحنا له كل حاجة . الـHR كان متعاون جدا.
وبعدين اكتشفنا حاجة مكناش عارفينها. المدير اللي وظّف “جين” ماطلبش منها أوراق الكشف عن السجل “فيش وتشبيه”. ودي حاجه لازم الشركه بتطلبها قبل ما الموظف يتعين.
الـHR أدي لجين مهلة 30 عشان تعمل الورق، وماعملتش حاجة. أداها أكتر من مهلة تانية ومفيش حاجة اتعملت.
في الاخر سام عمل معاها اجتماع وقالها ان هو مديرها دلوقتي ولازم تروح تعمل الورق حالًا. وافقت وقالتله تمام أكيد هعمله. ومن بعدها اختفت ومابتردش علي اي حد في الشركة.
ودي كان أحسن نهاية للموضوع بصراحة.
عيلتي دلوقتي الحمد لله أحسن، والشغل ممتاز، وابني بيتعافى وبقى أحسن 🥳. حتى مدرستهم الجديدة عملوا برنامج ضد التنمر عشان الطلاب يحسوا بالأمان.
الصيف ده هنروح نزور أهلنا وننبسط مع بعض ✈️🌞، وحاسه إن في حمل كبير اتشال من قلبي ❤️
________
القصة مترجمة من ريديت. أصحاب القصة أجانب.
