
عيلتي الحقيقية 👨🦰👩🦰
أنا شاب عمري 19 سنة.
أنا وأختي الكبيرة (خلينا نسميها روز عمرها 34 سنة) طول عمرنا قريبين مع بعض وعلاقتنا كانت ممتازة دايمًا. أحنا اتربينا مع عيلتنا الجميلة بالتبني، وأختي كانت مهتمة بيا دايمًا وبتاخد بالها مني.
كبرت في بيئة دافية ومليانة حب، وأصحابي دايمًا كانوا بيقولولي إني محظوظ.
من صغري وهما بيحكوا لي إن أنا وأختي كان عندنا أب وأم مدم**ين، وعمرهم ما اهتموا بينا. ما كانوش حتى بيكلفوا نفسهم يأكلونا، وكانوا دايمًا يسيبونا في بيت واحد صاحبهم اللي كان برضه مد**ن زيهم وكانوا بيرمونا بالأيام ومحدش بيسأل فينا.
قالولي أن أمي وهي حامل فيّا كانت علي طول مش في وعيها (بس الحمد لله طلعت كويس)، ولما اتولدت، أختي هي الوحيده اللي اهتم بيا .
من كام شهر، صاحبي عرض عليا أعمل اختبار DNA عشان أعرف معلومات عن أهلي الحقيقين، خصوصًا إن أختي ما كانتش بتتكلم عن الموضوع ده كتير.
بعد ما النتائج طلعت، اكتشفت إن عندي خالة (عندها 32 سنة).
على طول اتواصلت معاها (خلينا نسميها جينيت)، واتفقنا إننا نتقابل. كل ده حصل من غير ما أقول لروز أي حاجة.
لما تقابلنا، أول حاجة لاحظتها أن فينا حاجات شبه بعض، زي لون الشعر ولون العينين.
حاولنا نفهم الموضوع أكتر، فسألتها لو عندها أخ أو أخت.
قالت لي لما كان عمرها 13 سنة، أختها اللي كانت عندها ** سنة طلعت حامل والأب كان مد**ن. وبعد ما ولدت بشهر، أخدت البيبي وهربت بعد خناقات جامدة جدًا مع أهلها.
قعدوا يدورا عليها لمده سنة ونص. ومقدروش يعرفوا مكانها وفي الاخر استسلموا.
حاولت أربط الأحداث ببعض، وطلبت منها توريني صورة لأختها. فروحنا بيت أهلها. الأم ما كانتش في البيت، والأب توفى من 3 سنين.
لما شفت الصورة، كنت متأكد. دي روز 100%
روز طلعت أمي الحقيقية مش أختي 🥺
احنا ما كانش عندنا أهل مد**نين ولا حاجة، وكل القصة دي كانت كذب، هي ضحكت عليا وعلي أهلي بالتبني.
قولت ل جينيت إن الموضوع ده صعب عليا جدًا واني مصدوم، وطلبت منها تستني شويه ومتقولش أي حاجة دلوقتي.
🌿تعديل:
أنا قاعد عند صاحبي المقرب بحاول استوعب الموضوع.
أكيد هتكلم مع روز بس لسة مش عارف اقولها ايه، هل أخد جينيت معايا وافجأها ولا ممكن تغضب؟
لسه بفكر هعمل ايه.
🌿تعديل:
الناس بتسأل ازاي هما اتبنوني؟
اللي أعرفه اني كنت مع روز في المول لوحدنا، بابا وماما بالتبني شافوها محتاسه بيا ومش عارفه تتصرف وحاولوا يساعدوها.
في الأول أخدونا علي دار رعايه، وقعدنا هناك سنة كامله، وقتها بابا وماما بالتبني كانوا بيزورونا في الدار علي طول.
أختي كانت بتعيط وبتطلب منهم يتبنوني عشان هي مش عايزاني أكبر هناك. وهي كمان مكنتش عايزة تعيش في الدار.
هما بالفعل بدأوا الاجراءات وجابوا محامي ونجحوا انهم يتبنونا احنا الاتنين.
هو ده الكلام اللي أنا أعرفه (الله أعلم الكلام ده كمان صح ولا لاء) بس أعتقد أن أهلي بالتبني اتخدعوا زيي وميعرفوش الحقيقة. يا إما بقه هما كمان كدابين.
🌿تحديث:
قعدت عند صاحبي أسبوع وبعدين قررت أواجه روز.
روحت بيتها وطلبت منها نتكلم، وقولتلها أنا عرفت كل حاجة. واكتشفت الحقيقة.
قعدت تبكي، الظاهر انها فهمت علي طول أنا قصدي ايه.
قولتلها علي أختبار النسب وعلي جينيت.
بعد ما هدت شويه أعترفتلي بالحقيقة. عرفت أن ابويه الحقيقي كان راجل فظيع وانه دخل السجن لمده 10 سنين. وطبعا مكنش مهتم بيا ولا عايز يعرفني اصلاً.
جدتي (مامت روز) كانت عايزة روز تتخلي عني، بس هي كانت رافضة عشان كده كانوا بيخانقوا علي طول.
لما روز ولدتني أهلها قالولها أنها جابت العار للعيلة وأنهم مش هيساعدوها في تربيتي ولا هيصرفوا عليها ولا سنت واحد.
كانت عايزة تدور علي شغل عشان تقدر تصرف عليا. بس مكنتش قادره تهتم بيا وفي نفس الوقت تشتغل. فكانت عايشه علي السلف من اصحابها وكل معارفها.
اتخانقت تاني مع أهلها وقالتلهم لو مش هيساعدوها ماديًا يبقي هتبعد عنهم أحسن. وهما صمموا علي موقفهم ( كانوا بيضغطوا عليها عشان تتخلي عني).
وفي الاخر قررت تاخدني وتهرب في نص الليل. وسافرت في مدينة تانية.
اتبهدلت بيا ومكنتش عارفه تعمل ايه. وبعد كام يوم من التشرد قعدت في المول تعيط. بابا وماما بالتبني شافوها وسألوها مالك؟
وقتها قررت تخترع القصة المزيفة. وقالت اننا أخوات وقالت اسامي مزيفة.
الزوجين أخدونا علي دار الرعايه.
وفي الاخر عشنا مع أهلنا بالتبني (هما عملوا المستحيل عشان ياخدونا احنا الاتنين ومنتفرقش عن بعض).
روز كانت عارفة ان أهلها بيدورا عليها عشان كده بعتتلهم رسالة وقالتلهم انها مش هترجع. وخلاص ياريت يسبوها في حالها وهي هتهم بنفسها وبيا.
بعد كام سنة جدي (والد روز) دور عليها تاني وقدر يوصل ل روز. وقتها كان عمرها عدي ال18 سنة.
جدي طلب منها تسامحه وفعلا اتصالحوا وبقوا يتواصلوا مع بعض في السر (محدش تاني كان يعرف خالص). بعدها أنا قابلته كام مره في الجنينه علي أساس انه من معارف روز (أنا فرحان اني اتعرفت عليه قبل ما يموت).
أهلي بالتبني ميعرفوش كل الكلام ده.
بعد ما سمعت كل كده حسيت اني سامحتها.
قولتلها أنا فاهم ليه عملتي كده من الأول. بس ياريت لو كنت عرفت إنك أمي من زمان. حضنا بعض لمدة ساعة تقريبًا وقعدنا نعيط، وبعدين رجعت على بيت أهلي عشان أتعشى معاهم.
أنا سعيد جدًا إنها أمي. لأول مرة من سنين حاسس إني مكتمل. ما يهمنيش إنها كذبت، لأنها عملت كده لصالحنا. وبصراحة، مش قادر أتخيل حياتي دلوقتي لو كانت رمتني واتخلت عني.
شكرًا Reddit على مساعدتي اني أرتب أفكاري واتعامل مع كل اللي حصل! ❤️
(القصة مترجمة من ريديت..أصحاب القصة أجانب).