
عقد ما قبل الزواج 📝💍
أنا عندي 25 سنة وخطيبي عندة 27.
عيلتي عندها بيزنس كبير ومشهور وبيكسب فلوس كتير. يعني، أنا فعليًا بنت عيلة غنية. بس بحاول على قد ما أقدر ما أكونش مدلعة.
لما كنت بدرس كنت بشتغل شغلانات عادية “حاليا عندي البيزنس الخاص بتاعي”.
اتعرفت على خطيبي، مارك، وأنا عندي 20 سنة وقتها كنت بشتغل في مطعم. بعدها بكام شهر ارتبطنا، والسنة اللي فاتت اتقدملي.
مارك مش فقير، هو من الطبقة الفوق متوسطة. ومع إنه معندوش مشاكل ماديه، بس هو علي طول مقتصد جدًا ومش بيحب يصرف كتير.
كنت معجبة بيه لأنه بيصمم هو اللي يدفع لنفسه، وبيرفض يروح أماكن غالية مع عيلتي، وكان يطبخلي بنفسه بدل ما نخرج ناكل برة.
اللي بحاول أوصله إن عمري ما حسيت إن مارك بيحاول يستغلني أنا أو عيلتي.
في الأول عيلتي كانت قلقانة من مارك شوية وكانوا بيتكلموا في موضوع “انه ممكن يكون طماع”، بس أنا دافعت عنه واتخانقت مع بابا علشانه. بعد كده أهلي بقوا يحبوه وبقة فرد من العيلة.
لما مارك اتخرج، بابا شغله في الشركة، ودلوقتي هو في وظيفة بمرتب عالي “في الاول اشتغل شغل بسيط وبعدين اترقي”.
يوم الأحد كان عندي شغل بالليل و المفروض كنت هبات عند أختي، لكن جالي سخونية وكنت تقريبًا مش قادرة أتحرك، فقررت أفضل في البيت. وبدل ما أقعد في أوضتنا، روحت الأوضة الخاصة بالضيوف علشان فيها تهوية أحسن، وفيها تلاجة صغيرة وحمام خاص. ماكنتش عايزة أقوم وأمشي كتير، فنقلت حاجتي هناك وقفلت الباب علشان ارتاح وأنام.
مارك رجع البيت وأنا كنت نايمة ومش حاسة بالدنيا، لكن صحيت على صوت عالي في الجنينة. حركت الستارة شوية علشان أشوف مين دول، ولقيت مارك قاعد مع اصحابه. كنت على وشك أقولهم هاي، لكن لاحظت إنهم بيتكلموا عني!!
واحد من اصحابه كان بيضحك وبيقول لمارك “إنت راجل بجد!”.
بعدين بدأوا يضحكوا على إنه ذكي وأنا طيبه ومش هخليه يمضي عقد ما قبل الزواج !!
واحدة من البنات اللي كانت موجودة قالت حاجة زي “يا ساتر، شكلك هتعمل فلوس كتير قوي يا مارك!”.
مارك ضحك وقال: “أيوه، بس 3 سنين كمان وهبقى غني وحر”.
كنت غضبانة جدا. فضلت أسمعهم وهما بينادوني “باربي البنت الغنية” وحاجات تانية زي كده.
ماكنتش عارفة أعمل إيه، فضلت قاعده علي سريري ومتحركتش لحد ما الناس مشت ومارك دخل ينام.
بعت رسالة لأختي، واتسحبت من البيت بهدوء ورحت عندها في نص الليل، دخلت الاوضة وانهارت من غير ما أقول لأختي أي حاجة.
ما رجعتش البيت لحد دلوقتي، وقلت لمارك إني تعبانة وخايفة عليه من العدوي. أختي كانت قلقانة جدًا، بس أنا حتي مكسوفة أقولها.
عيلتي كان عندهم حق، مارك طلع طمعان في الفلوس، وأنا اتخدعت فيه.
للأسف معنديش دليل. وعلى حد علمي بابا ما يقدرش يفصله لمجرد إنه شخص سيئ. ، هو ممتاز جدًا في شغله، ومفيش سبب قانوني يخليه يطرده.
أنا متلغبطة ومكسوفة من عيلتي وغضبانة، مش عارفة أتصرف إزاي، وفعلاً محتاجة أي نصيحة أو وجهة نظر تساعدني.
🌿تعديل:
إحنا مش في أمريكا. ومارك ماكنش بيتكلم عن حاجة تانية كان بيتكلم عني أنا أكيد.
مفيش عليه ديون، لأنه كان واخد نص منحة، وأنا ساعدته في تسديد الباقي.
🌿تعديل:
فتحت قلبي لأختي وحكيتلها عن كل حاجة، بعدها اتصلنا ب بابا، وهتكلم معاه بكرة.
🌿تحديث:
قررت أقدمله عقد ما قبل الزواج علشان أشوف رد فعله.
بعد ما حكيت لبابا، اتفقنا نعزم مارك على الغداء و نقدمه له العقد.
سألته لو كان عنده حد في البيت لأن الجيران اشتكوا من الاصوات العالية. قال لي أه، أصحابه كانوا موجودين. بس مجبش سيرة البنات اللي كانوا معاه.
خلصنا الغداء، وبابا قدمله الأوراق وقاله إن ده لازم يحصل قبل الجواز.
كان واضح عليه جدا انه مصدوم وإنه مكنش متوقع ده خالص.
اتعصب وطلب مني نتكلم لوحدنا. رحنا الغرفة التانية وابتدى ياخد الموضوع بهزار ويقول إني فاجأته وانه حاسس كأننا بنهاجمة.
كان بيحاول يعيش دور الضحية ويبين انه طيب وغلبان. بعد كده قال إنه محتاج يفكر في كل حاجة ومشي.
بصراحة كنت على وشك الانهيار، بس قدرت أتماسك.
الحمد لله عيلتي محاولوش يلوموني ولا يقولوا “مش قولنالك!”.
قعدت ادور في كل حاجة، واكتشفت إن عندي الحق القانوني إني أطرده. المحامي خلّص كل الإجراءات وكتب إخطار رسمي بالطرد.
وبعد كلام كتير، بابا قرر يعرض على مارك صفقة علشان يسيب الشركة.
بعد ما كل حاجة اتظبطت، قررت أبعت رسالة (زي ما حد فيكم اقترح) وكتبت:
“هاي مارك، باربي معاك. سمعت انك هتكون حر بعد 3 سنين، أنا هعملك معروف كبير وهخليك حر من دلوقتي. بوسة كبيرة.”
تليفوني انفجر حرفيًا من كتر الرسائل بعد ما بعت الرسالة. بعتلي واتصل بيا كتير جدا لدرجة إني اضطرّيت أقفل التليفون.
جالي عند أختي وقعد يقسم مليون قسم أن ده كان مجرد هزار. قولتله هزارك مش مقبول وسخيف وان هو ما احترمنيش وسمح لاصحابه يتكلموا عليا.
فضل يتوسلي اني اسامحة واديله فرصة تانيه ولما صممت علي الرفض بدأ يتهمني اني بتجسس عليه وبخربله حياتة!!
بدأ يعتذر تاني ولما سألته عن البنات اللي كانوا معاه, اخترع قصة غريبه وقالي ان دول “بنات عم” واحد من اصحابه!! وانهم متابعني علي انستجرام.
خلاص انا نهيت الموضوع ومش عايزه اشوفه تاني.
(القصة مترجمة من ريديت، اصحاب القصة أجانب).