صندوق التلاجة المقفول 🧊📦
أنا وجوزي (28 سنة) مع بعض من خمس سنين، احنا عشنا مع بعض في نفس البيت من 3 سنين. علاقتنا كانت حلوة جدًا، بجد. عندنا حساب مشترك بنحط فيه فلوس كل شهر علشان نغطي المصاريف المشتركة زي الإيجار والأكل والحاجات دي. كل حاجة بنقسمها بينا.
جوزي طويل، ووزنه حوالي 90 كيلو، وبيتمرن كل يوم.
علشان يحافظ على وزنه وطاقته، بيحتاج يأكل كتير، وده تمام… إلا في حاجة واحدة.
إحنا بنجيب سناكس مع بعض، لكن هو دايمًا بياكل نصيبي قبل ما ألحق أمد إيدي عليه. الأكل العادي والمكونات موجودين عادي، لكن لو الحاجة جاهزة وسهلة، أنا عمري ما بشوفها!
بنتخانق بسبب الموضوع ده، وهو بيعتذر، وبعدين نفس الحكاية تتكرر. وصدقوني، ده فعلاً الحاجة الوحيدة الوحشة اللي بيعملها. غير كده، هو محترم وبيراعي مشاعري في كل حاجة تانية. بس السناكس بالنسبة له قصة تانية تمامًا! 😅
الأسبوع اللي فات حصلت مشكلة كبيرة لما خلص جبنة غالية كنا شاريينها، وأنا كنت متحمسة جدًا آكل منها. كلها اختفت في ساعة واحدة. أنا اتجننت حرفيًا. خاصمتة يوم كامل، وفي الآخر طلبت أونلاين صندوق بيتقفل للتلاجة.
من كام يوم، روحنا السوبر ماركت واشترينا السناكس. بعدها قسمت كل حاجة نصين وحطيت نصيبي في الصندوق وقفلت عليه.
رد فعله كان كأني برتكب جريمة!
قال إن ده عدم احترام وتحكم، وإنه إزاي أجرؤ أخبي أكل هو دفع فلوس فيه. لما قلت له إن دي فلوسي برضة، صرخ وقال إنه مش فارق معاه وخرج برة البيت. و قفل الباب جامد لدرجة أن في صورة وقعت من على الحيطة واتكسرت.
ما رجعش البيت غير تاني يوم علشان يغير هدومه للشغل وخرج تاني على طول. ولما رجع متأخر دخل على أوضه الضيوف على طول وما كلمنيش.
بقالنا 4 أيام على الوضع ده. امبارح بالليل حاولت اصالحه وكلمته وطلبت منه نتناقش في الموضوع، لكن هو قال إنه معندوش حاجة يقولها غير لما أشيل الصندوق المقفول.
بصراحة أنا مصدومة من رد فعله ده، وبقيت قلقانة فعلاً إنه ممكن يكون بياخد مخد*/ت أو بيعدي بأزمة نفسية أو حاجة كده. دي أغرب طريقة شفت راجل كبير يتصرف بيها في حياتي.
بيعملني بتجاهل كامل، وبعدين فجأة يسألني إذا كنت شلت الصندوق ولا لسه. وأنا بصراحة مش ناوية أشيله.
إحنا المفروض نجدد عقد الإيجار الأسبوع الجاي. بصراحة بفكر انهي الموضوع كله.
هل العلاقة دي أصلاً تستاهل أحاول أنقذها؟ هل في حاجة أقدر أعملها علشان أحل المشكلة؟ هو رافض يتكلم أو يتواصل معايا غير لو شلت الصندوق، وده مش هيحصل.
🌿يا جماعة، حصلت حاجات كتير قوي.
جوزي فضل يخرج ويتأخر ورافض يتكلم معايا. حاولت أكلمه عن موضوع الصندوق تاني، وقلت له إني مش شايفة إن الصندوق هو المشكلة الحقيقية. لكن دماغة كانت زي الحجر، مصمم إن الموضوع تحكم وإساءة إني “حرماه من الأكل”.
فضلت أضغط عليه وأسأله إذا كان بياخد حاجة أو بيخوني. قلت له إن رد فعله المبالغ فيه على حاجة صغيرة زي دي، وخروجه المتكرر بالليل، بيخليني أشك جدًا. قلت له إني حسه إنه بيستخدم قصة الصندوق حجة علشان يبقى برة البيت ويعمل حاجة غلط.
الكلام ده خلاه يدخل في نوبة صراخ استمرت لوقت طويل، وفي الآخر مسك اللابتوب بتاعي (ماك بوك) ورماه في الحيطة وكسّره. بصراحة، حسيت إنه كان هيأذيني فعلاً.
اتصلت بوالدي، وهو اتصل بالشرطة. مش عايزة أدخل في تفاصيل قانونية كتير، بس أنا هرفع عليه قضية بتهمة تدمير الممتلكات، لأن اللابتوب كان سعره 2500 دولار.
والدي وصاحبتي نقلوني من البيت امبارح، وأنا دلوقتي بدوّر على مكان جديد أعيش فيه. مش معايا حاجات كتير غير هدومي وشوية أجهزة مطبخ صغيرة. سبت صندوق القفل في البيت، لكن اخدت السناكس معايا، لأنه بصراحة يستاهل. وكمان سبت الصندوق مقفول. 🙃
جوزي السابق قاعد يبعت لي رسايل زي المجنون. كنت بفكر أعمله بلوك، لكن حاسة إني محتاجة أحتفظ بالرسائل علشان تكون دليل في حالة إن تصرفاته زادت عن حدها.
بعت له رسالة أول ليلة وقلت له إن العلاقة انتهت، وشلت كل صورنا وكل حاجة تخصنا. بعدها بدأ يتكلم ويصرخ في الرسايل.
شوية من رسايله:
– بيتنرفز وبيصرخ إني لسه ما شلتش الصندوق المقفول.
– بيطلب مني أرجع له الحاجات اللي كان جابهالي هدية.
– بيقول إني مديونة له بفلوس إيجار لبيت جديد.
– فجأة بيقول إني مديونة له بعربية (؟!)، مع إني عمري ما سقت عربيته!
– بيقول إن ال “ماك بوك” بتاعي كان قديم وما لهوش قيمة، وإنه مش هيدفع تمن واحد جديد (مع إني اشتريتة السنة اللي فاتت وهو جديد تمامًا).
مستوى الغرابة ده خارج عن السيطرة تمامًا.
بعد حوالي ساعة، واضح إنه استوعب إن إحنا فعلًا انفصلنا وإنه مش هيقدر يضغط عليّا بالكلام تاني. بعدها بدأ يبعت لي رسائل طويلة يقول فيها إنه عايز يكمل حياتة معايا، وإنه بيحبني، وإنه عايز يبقى شخص أحسن علشاني. قال لي أحتفظ بالهدايا وإنه هيشتري لي ماك بوك أحسن.
انهار لما شاف إني شلت صورنا من السوشيال ميديا، وبدأ يبعت لي لقطات شاشة من بحثه على جوجل عن دبل خطوبة، ويقول لي أختار واحدة. كمان بعت لي كام رسالة صوتية وهو عمال يعّيط.
أي احترام كنت حاسة بيه ناحيتة خلاص اختفى تمامًا. مش عايزة أي علاقة تربطني بالشخص ده تاني. مش فارق معايا إذا كان بيمر بانهيار نفسي أو واخد حاجة. دي مش مشكلتي.
صورت رسايله وبعتها لمامتة. خليها هي تتصرف مع ابنها. ده آخر حاجة ممكن أعملها علشانه.
أما أنا، أكيد هبقى كويسة. عندي شوية فلوس كنت محوشاها، هدفع إيجار مكان لوحدي. الأسبوع ده كان غريب جدًا. حاسة إنه المفروض أكون زعلانة، لكن الحقيقة عنديش أي مشاعر ناحيته غير الاحتقار.
أهلي كانوا داعمين جدًا، وبيشتروا لي السناكس المفضلة اللي بتريحني نفسيًا.
كمان بيشجعوني أروح علاج نفسي، وفعلاً حاسة إنها فكرة كويسة. هابدأ أدور على معالج مناسب أول ما أستقر في مكاني الجديد. 💪✨
(القصة حقيقية مترجمة من ريديت)
#قصص حقيقية
#قصص
