شلت البسلة من الأكل قدام مدير ماما 🍽️🦆 قصة

قصة

شلت البسلة من الأكل قدام مدير ماما 🍽️🦆

عندي 20 سنة وبعيش مع ماما (48 سنة) في إنجلترا.

ماما عملت عزومة عشاء لزمايلها. جوزها عنده بيت كبير وجنينة، وقعدنا هناك.

أنا مش بحب العشا ولا فكرة الأكل مع ناس غريبة، بس كان لازم أقعد معاهم، ودي كانت حاجة غريبة شوية.

الأكل اللي عملوه كان فيه حاجات أنا مش بحبها، زي البسلة، وأنا أصلاً مش بحب البسلة. ماما عارفة ده، بس مكنش مسموح لي أكل حاجة تانية علشان مفيش وقت لتحضير أكل تاني. كمان ماما ما سمحتليش أعمل حاجة لنفسي.

شلت البسلة من الأكل بتاعي علشان أديها للبط اللي في البحيرة اللي جنب بيت جوز ماما، لأني عارف إن البط بيحب البسلة. البط مش المفروض ياكل عيش لأنه مش كويس ليهم. جمعت كل البسلة في كباية صغيرة بالمعلقة.

مدير ماما كان قاعد قصادي وسألني بعمل إيه؟ فقلتله. سكت شوية وبعدين قال “ماشي”.

ما اتكلمناش كتير، بس أحيانًا كان بيسألني سؤال وأنا كنت بجاوب.في الآخر، اداني شوية بسلة هو كمان شالها من الأكل بتاعه.

سألته لو هو كمان مش بيحب البسلة؟ فقال: “أنا بحب البسلة، بس كمان بحب البط، فعادي ممكن ياخدوا البسلة بتاعتي”، بصراحة ده كان تصرف لطيف منه.

كمان إداني 5 جنيه إسترليني عشان أشتري آيس كريم لنفسي وأنا بأكل البط، وده كان برضه تصرف جميل منه.

ما اتكلمناش كتير، بس حسيت إنه راجل لطيف وعجبني.

بس لما مشي، كلم ماما وهي جت لي وكانت زعلانة أو متضايقة. سألتني هو انت قضيت العشا كله بتشيل البسلة؟ فقلت لها لأ. أنا كمان كنت بأكل المكرونة، بس كان فيه بسلة كتير أوي لازم أشيلها.

قالت لي ليه عملت كده قدام الناس؟ ده تصرف مش مؤدب أبدًا، وبيبين إنك مش معجب بالاكل ومش مهتم بالضيوف.

ده بالظبط اللي كنت بفكر فيه، فالكلام ده صحيح. انا بجد مش معجب بالاكل ولا كنت مهتم بالضيوف.

ماما قالت إن الناس دول يستاهلوا الاحترام، وإن ممكن يحسوا انهم مش مرتاحين لما يشوفوا حد بيتعامل مع الأكل بطريقة غريبة أو مش بيتفاعل معاهم.

مدير ماما قاللها قبل ما يمشي إن الاحسن المرة الجاية يكون فيه أكل تاني مخصوص ليا علشان أنا ما أكلتش كتير.

أنا أصلاً مش باكل كتير، فده عادي بالنسبة لي، بس هو طبعًا مش عارف كده. الفكرة بقى إنه قال ل ماما حاجة سلبية كان ممكن متتقالش لو ماكنتش شلت البسلة من الأكل بتاعي.

أنا ما فكرتش في ده وقتها.

فهمت دلوقتي إن ده تصرف مش كويس، لان ماما كانت زعلانة قوي، وأعتقد إني زودتها شوية.

في الآخر ده مجرد عشا، وهو كان راجل لطيف. ماعتقدش إنه كان زعلان منها.

كنت بس عاوز أعرف لو فيه حاجة مهمة أنا مش واخد بالي منها تخلي التصرف ده غلط قوي أو أناني. هل أنا غلطان قوي؟

🌿تعديل:

أنا عندي توحد ومش بحب البسلة بسبب قوامها اللي بيخليني أحس اني مش مرتاح.

أنا معتمد على ماما لأني لسه ماقدرش أعيش لوحدي، بس أنا بتعلم.

ماكنتش واخد بالي إن ده ممكن يغير سياق القصة لحد ما حد نبهني.

شكرًا على آرائكم ..

🌿تعديل:

الناس في التعليقات قالت إني لازم أتكلم مع ماما. فعلاً عملت كده، والمحادثة كانت كويسة جدًا. هي اعتذرت وقالت إن ده مش غلطي. وشرحت لي اللي حصل، وهحاول أوضح باختصار:

ماما كانت متوترة جدًا لأنها مش متعودة تعمل عشا للضيوف. كانت عايزة زمايلها يحبوا العشا بتاعها (فعلا عجبهم وطلبوا منها الوصفة كمان). هي نسيت إني مش باكل البسلة لأنها كانت مشغولة قوي بزمايلها.

هي كانت عايزاني أكل معاهم علشان لما اتعزمت في بيت زميلتها قبل كده. اولادها كانوا بياكلوا معاهم.

ماما ماكنتش عايزة حد يتكلم عن موضوع التوحد بتاعي علشان ساعات الناس بتكون قليلة الذوق وهي بتسأل. وقالت إن دماغها كانت مشغولة طول السهرة.

أنا قلت لها إني كان ممكن أعمل أكلي بنفسي. هي قالت إن ده كان صعب علشان ماكانش فيه وقت، أنا مكنتش واخد بالي علشان أنا مش شاطر في الإحساس بالوقت.

طلبت منها تتواصل معايا المرة الجاية وتكون واضحة أكتر بخصوص اللي ينفع أعمله قدام الضيوف وايه اللي ما ينفعش.

هي قالت إنها هتعمل كده، وقالت إني ممكن أساعد في الطبخ المرة الجاية كمان.

تقريبًا كل التعليقات قالت إن مديرها كان لطيف. وغالبًا ماكانش زعلان ولا متضايق. أنا قلت لماما الكلام ده.

ماما اعتذرتلي تاني وقالت إنها ماكنتش زعلانة مني خالص. كانت بس محرجة لأنها حاولت تخليّني “أتصرف بشكل طبيعي”، وهي غلطانة وماكنش المفروض تعمل كده. وقالتلي انا اسفه علشان طلعت غضبي عليك.

أنا كمان قلت لها آسف، لأني ماكنتش فاهم إن الموضوع ممكن يكون مهم لوضعها في الشغل. كنت فاكر إنهم زي الأصحاب.

هي قالت إنها مرتاحة لأنّي ماعملتش دوشة كبيرة، وماعليتش صوتي، ولا قمت ومشيت. وقالت إنها فخورة بيا علشان فضلت قاعد على الترابيزة وفكرت كمان في البط.

اتفقنا إن احنا الاتنين اتعلمنا حاجات. أنا اتعلمت ودلوقتي بقيت فاهم أكتر عن عشا الشغل والإتيكيت. وهي اتعلمت إنها محتاجة تتواصل معايا أكتر وتشرح لي كل حاجة بهدوء علشان نتجنب التوتر.

في التعليقات، الناس قالوا إن ممكن مديرها عنده خبرة في التعامل مع ناس عندهم توحد. سألت ماما، وكان الموضوع شوية حزين. أخوه الصغير كان عنده توحد لكن توفى من 10 سنين. والمدير كان بيحب اخوه جدًا.

هو قال لها إنه المرة الجاية لازم آكل حاجات بحبها، لأنه كان مضايق إن ماما كانت مهتمة بالمظاهر وسبتني مش مرتاح في وقت العشا. بس المدير قال كمان إن العشاء كان جميل جدًا، وإنه سعيد إنها جزء من فريقه في الشغل.

هو شخص كويس ومدير محترم. وأنا بعتله إيميل شكر مع ماما.

آخر حاجة هي إني أكلت البط البسلة. أعتقد إنهم كانوا مبسوطين. المشكلة بس أن البط أكيد مش بيقولوا انهم مبسوطين.

اشتريت آيس كريم وانا راجع من البحيره. كمان جبت واحد لماما لأن كان معايا فلوس زيادة. كان سايح شوية لما رجعت البيت لأن المشوار كان 5 دقايق مشي، بس عجب ماما وقالت إني رائع.

(القصة حقيقية مترجمة من ريديت).

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!