سمعت حماتي بتتكلم عني ومش عارفه اتصرف ازاي!!!
انا عمري 23 سنه
مخطوبه ل مارك 24 سنه
كنا محددين ميعاد الزفاف في يوليو 2025
كان عندي اعتقاد ان عيله خطيبي بتحبني
وكان واضح علينا اننا متفقين مع بعض كويس
مارك عنده اخين اكبر منه (26 و 29 سنه) , والاتنين متجوزين
الحقيقه كنت متحمسه اكون جزء من العيله خصوصا انهم بيعاملوني بلطف
توضيح بسيط:
من سنه وانا فاتحه الانستجرام
شوفت اكونت لشخصيه عامه بتشارك نصايح ومعلومات ملهمه
في نصيحه عجبتني جدا كانت بتقول:
“الاشخاص الاغبياء بس هما الي بيتظاهروا انهم يعرفوا كل حاجه
بطل تتظاهر…….. بس اسأل.”
النصيحه دي كانت مميزه بالنسبه لي وغيرتني
لاني في الاول كنت بعمل نفسي عارفه كل حاجه وبتحرج اسأل عن الحاجات الي ماعرفهاش , بس بعد النصيحه دي قررت اتغير
وبدأت اسأل في الحاجات الي ماعرفش عنها حاجه
احيانا بفتح تطبيق بكتب فيه الملاحظات دي شويه اسئله كاتباها:
ازاي الثقب الاسود بيشتغل؟
ايه هو الاكل المناسب للبط؟
ازاي بتشتغل المصابيح الكهربائيه؟
هو الناس كلها بتشوف الالوان بنفس الطريقه؟
ليه في قواقع فاضيه من جوه؟
اسفه علي المقدمه الطويله
بس كنت عايزاكوا تفهموا شخصيتي وطريقه تفكيري
انا عارفه اني احيانا بكون مزعجه
نرجع للمشكله
عيله خطيبي كانوا عاملين حفله شواء
كان موجود في الحفله حماتي وحمايا واخوات خطيبي وزوجاتهم
انا اخر واحده وصلت الحفله لاني اتأخرت في الشغل
دخلت البيت وانا بمشي في الجزء الخلفي من الحديقه
سمعت حماتي بتتكلم عني
الحقيقه هي كانت بتسخر مني
كانت بتقول بصوت عالي
هي الشمس بتشتغل ازاي؟
احط الشوكه فين؟
ليه الناس مش بتحبني؟
ازاي امسح وشي؟
وقفت مكاني ومعرفتش اتحرك , كنت مصدومه ومش عارفه افكر
وسمعتهم كلهم عمالين يضحكوا
مرات اخوه دافعت عني وقالت انها شايفه ان الموضوع عادي ولطيف اني بسأل كتير
حاسيت بشويه امل انهم هيتكلموا عني كويس
ويقولوا ان كلامهم مجرد هزار
لكن للاسف حماتي ردت وقالت لطيف ايه……دي مجرد بنت غبيه.
وكلهم ضحكوا تاني
حتي مارك كان بيضحك معاهم
وقتها قلبي اتكسر ان خطيبي ماحاولش يدافع عني ومانطقش ب كلمه كويسه في حقي , وكان بس يضحك معاهم وخلاص.
علشان كده ماشيت بهدوء من غير ماحد يشوفني ورجعت بيتي
بعت رساله ل مارك اني مريضه ومش هقدر اروح حفله الشواء
دلوقتي انا مش عارفه اتعامل ازاي في الموقف ده؟
اكيد مش هقدر استخبي من خطيبي للابد
مش عارفه هل الموضوع مجرد مزحه وخلاص والمفروض مااخدش الموضوع بجديه
ولا الموضوع فعلا كبير وهما شايفيني مجرد بنت غبيه؟
🌹#تعديل
في ناس في التعليقات بيقولوا انهم مايقدروش يتحملوا الاشخاص الي زي
انا معترفه اني احيانا بزودها شويه
بس انا مش بسال طول الوقت
انا بس بعمل كده مع الاشخاص القريبيبن مني.
وعلي فكره انا مش وقحه ولا بقاطع حد في الكلام واسألتي مش غبيه
انا كمان اغلب الوقت بدور علي الاجابات لوحدي علي النت من غير ما ازعج اي حد.
🌹#تحديث
اولا بشكر كل الناس الي ردت علي اسألتي بخصوص الثقوب السوداء والبط والمصابيح والقواقع 😂 انتوا اكيد اصدقائي.
والناس الي طلبوا مني اسكت خالص
انا اكيد مش مهتمه بكلامكم
معظم الناس هنا قالولي انفصلي عن مارك
انا فعلا قررت اعمل كده وكلامكم شجعني اكثر
قررت ابعت رساله ل مرات اخو مارك الي دافعت عني
وقولتلها ممكن نتقابل ونشرب مع بعض قهوه؟ وافقت
اتقابلنا وقولتلها اني سمعت الكلام الي اتقال عني
بان عليها الحزن وقالتلي انها محرجه مني
واعترفت ان الكلام كان سخيف و مؤذي
واتأسفت انها ما دفعتش عني اكثر
قولتلها مفيش مشكله وانا مش بلومك علي حاجه
انا بس كنت عايزه اتأكدت اني فهمت الموقف صح
دلوقتي اتأكدت ان الموضوع كان فعلا سخريه مني.
قررت اواجه مارك
وكنت متوقعه انه هيحاول يحور في الكلام ويضحك عليه
الحقيقه انا كنت متوتره جدا لدرجه ان رجلي كانت بتترعش لاني من جوايه عارفه ان دي اللحظه الي هدمر فيها علاقتي بخطيبي الي بحبه من سنين.
بصيت في عينه وقولتله هي الشمس بتشتغل ازاي؟
اتفاجأ جدا من كلامي
كملت وقولتله احنا بنحط الشوكه فين؟
ليه مفيش حد بيحبني؟
قولتله انا كنت هناك و سمعت الكلام الي اتقال عليه
غضب مني وقالي ان مش صح تننصت علي الناس
وقولتله و مش صح نسخر من حد
قالي ده مجرد هزار وبلاش تكبري الموضوع كده
ده مجرد ضحك وخلاص
قولتله لاء الموضوع مش مضحك
حاول يعتذر و وعدني انه هيكون صادق معايه في كل حاجه
سألته لو مامته اتكلمت عني بالطريقه دي قبل كده؟
قالي اه
قولتله وانت دافعت عني؟
قالي اه هو حاول يدافع عني
بصراحه ماكنتش مصدقاه
قالي انه بيحبني وبيحترمني
قولتله انا كمان بحبك بس انا محتاجه استراحه من علاقتنا
مارك هو حبيبي الاول والوحيد علشان كده انا ماعنديش خبره ومحتاجه وقت افكر هعمل ايه
بعد كده مارك فضل يبعتلي رسايل طول اليوم ويتصل بيه بس انا مش عايزه ارد عليه
اليوم الي بعده قررت اديله فرصه تانيه يشرح موقفه
اتقابلنا وكان باين عليه انه حزين وتعبان
قاله انه حكي لمامته الي حصل
قولتله انا مش عايزه اعتذار منها بس انا ماقدرش اتحمل السخريه مني
احنا مش مدرسه ابتدائي
علي فكره حماتي ربه منزل ومش مهتمه بالتعليم
لو سألتها عن اي حاجه تخص الاكل هتقعد تشرح نص ساعه عن طريقه طبخ شوربه الطماطم لكن المواضيع التانيه الي ماتعرفش عنها حاجه مش بتكون مهتمه بيها
مارك قالي بلاش عصبيه والموضوع مش مستاهل
وقتها قلعت الخاتم واتمنيتله التوفيق
وقولتله ياريت ماتتصلش بيه مره تانيه
اكثر حاجه مزعلاني انه مادفعش عني قدامهم كمان مش مهتم بمشاعري وعمال يقنعني انه مجرد هزار وخلاص.
#بعد 3 شهور
خطيبي السابق ما بلغش عيلته اننا انفصلنا بس انا عملتلهم كلهم بلوك باستثناء مرات اخوه اللطيفه
بعد اسبوع من الانفصال
مرات اخوه بعتتلي رساله وسألتني هتيجي امتي في بيت حماتي علشان كلهم عايزين يعتذروا
قولتلها انا خلاص انفصلت عن مارك
اتصدمت علشان مارك بيكذب عليهم وبيقولهم احنا لسه مع بعض واني بس زعلانه شويه
قالتلي ان الاخوات لسه بيخانقوا مع بعض بسبب الموضوع ده
قولتلها انا خلاص انتهيت من الحكايه دي وياريت بلاش تنقلي اي اخبار تخصهم تاني من فضلك لاني فعلا مش مهتمه
انا قابلت شخص جديد
لسه الموضوع في الاول وانا مش عايزه اتسرع
وبحاول اركز اكثر علي الدراسه والشغل
وبفكر لما اخلص دراسه اتبني قطه جميله
وكمان سجلت في دوره تدريبيه علشان اتعلم حاجه جديده ❤
