تصرفات جوزي المريبة 😕 😢
مش عارفة أبدأ إزاي… جوزي بيشتغل لوقت متأخر جدًا كل يوم (أو هو بيقولي كده).
فكرت أكتب المشكلة وأخد النصيحة، آسفة علشان كلامي مش مترابط، لأني حزينة وبكيت كتير قوي.
أنا عمري 30 سنة، وجوزي عمره 32. كنا مع بعض في الكلية واتجوزنا من 8 سنين، وعلاقتنا كانت مثالية جدًا.
أنا بحب جوزي قوي، وهو كمان بيحبني. أحيانًا بنتجادل ونتخانق، بس مش كتير.
حاليًا عندنا 3 أطفال (صبيان)، ومن وقت ما خلفتهم بقى صعب علينا نقضي وقت طويل مع بعض.
أهلنا عايشين في مكان بعيد عننا، وللأسف مش لاقيين جليسة أطفال تقدر تتحمل أطفالي المشاغبين.
وظيفة جوزي متعبة جدًا ومرهقة، وفي السنين اللي فاتت اضطر يلغي إجازته أكتر من مرة بسبب مديره في الشغل، لأنه راجل صعب جدًا.
أحيانًا بحس إني بشوف جوزي لدقايق بس في اليوم، لأن الأطفال بياخدوا مننا وقت كبير وطاقة.
من ست شهور، مدير جوزي في الشغل اتغير، والحمد لله ساعات شغله قلت، وكمان ما بقاش متوتر زي الأول.
هو آه لسه بيشتغل كتير وأحيانًا بيسافر كام يوم، بس الموضوع اتحسن عن الأول، وبقينا نقضي وقت أطول مع بعض، بس برضه لسه مش فرحانة.
حاسه كأني أنا وجوزي مجرد زمايل في نفس البيت، وكأننا اتنين أغراب عن بعض.
اتكلمت معاه بصراحة وقلت له إني بفتقده، وإني حاسة إنه بعيد عني قوي.
جوزي وظّف جليسة أطفال، وبدأنا نخرج في مواعيد مع بعض. بدأت الأمور تتحسن، وجوزي بقى بيهتم بيا أكتر، ويقولي إنه بيحبني، ويشتريلي ورد 💐
كنت فرحانة قوي، وحسيت بالأمل إن جوزي القديم الرومانسي بدأ يرجعلي تاني ❤️
من شهر تقريبًا، لاحظت حاجة غريبة… جوزي كان بيتكلم عن رحلة شغل لمدة أسبوع في شهر أغسطس.
حسيت إن في حاجة مش منطقية، لأن الصيف بيكون للرحلات العائلية مش لرحلات الشغل! بس سكت وما علّقتش.
بعدها، جوزي كان في الحمام وجاتله رسالة… بصيت في التليفون، كان إيميل من واحدة اسمها “أليسون”، والعنوان كان “رحلتنا”!
استغربت قوي، وسألت جوزي… مسك تليفونه وقال ده مجرد بريد عشوائي!
حاولت أعدي الموضوع، بس لاحظت إن جوزي من وقتها وهو بيخبي تليفونه!
الأسبوع اللي فات، شفت حاجة تانية غريبة… جوزي معاه فاتورة من محل مجوهرات بمبلغ كبير جدًا!
إحنا الحمد لله ماديًا كويسين قوي، بس برضه المبلغ كان بالنسبة لي كبير ومش منطقي!
بطني وجعتني من كتر الخوف والرعب، وقررت أدور في لاب توب جوزي… كنت عايزة أتجسس على الإيميلات بتاعته.
اكتشفت إن اللاب مش في البيت! الظاهر جوزي أخده معاه الشغل… وده كمان غريب، جوزي طول عمره كان بيسيبه في البيت!
كنت حاسة بالتوتر، بس عمالة أكذب نفسي، ومش عايزة أتكلم معاه في حاجة.
من جوايا مش عايزة أصدق شكوكي في جوزي.
النهارده الصبح، اكتشفت فاتورة (كارت المشتريات) في درج الشرابات!
ليه بيخبي الفاتورة؟
كل المشتريات كانت في الشهر اللي فات، والمحلات اللي اشترى منها كلها “محلات ملابس حريمي”، ومفيش حاجة من اللي اشتراها.موجودة عندنا في البيت.
يبقى الحاجات دي لمين؟
جوزي بيشتغل لساعات طويلة كل يوم، وممكن بسهولة يكون بيقابل واحدة تانية يوم واحد في الأسبوع على الأقل.
مش عارفة أفكر، ومش معايا الباسورد بتاعه علشان أتجسس عليه.
أنا حتى خايفة أتصل بالمكتب في الوقت اللي بيقولي إنه هناك وأتأكد هو فعلًا موجود في المكتب ولا لأ.
حتى مش قادرة أحكي لحد دلوقتي، لأني عارفة إني ممكن أنهار ومش هقدر أمسك نفسي.
المفروض إنه يوصل البيت كمان كام ساعة، مش عارفة أعمل إيه؟
مش عايزة أربي الأطفال لوحدي وأعيش وحيدة 😢
🔹️تحديث:
أنا هديت شوية وخلاص ما بقيتش بعيط، وقررت أتصل بأختي الكبيرة وأتكلم معاها في الموضوع ده.
هي عايشة في مكان بعيد عني، بس إحنا طول عمرنا قريبين من بعض، وهي كمان عارفة جوزي كويس.
المكالمة مع أختي كانت غريبة جدًا… قلتلها كل حاجة وأنا متوترة جدًا وبدأت أعيط تاني، وكنت حزينة وزعلانة قوي.
ردت عليا وقالتلي:
“اختي، كل حاجة هتبقى كويسة، لازم تهدي وتتكلمي مع جوزك لما يرجع البيت، أوعدك إن كل حاجة هتبقى أحسن. اقفلي المكالمة وخدي دش وحاولي تكوني أهدى، استني جوزك.”
وبعدين قالتلي: “أنا بحبك.” و قفلت الخط!
إيه اللي بيحصل في حياتي؟ أنا حاسة إن أختي اتجاهلتني 😮
ما كانتش مستغربة خالص ولا متأثرة بالكلام اللي بقوله، أنا خلاص هتجنن.
🔹️تحديث:
بعد ما كلمت أختي، جوزي بعت رسالة وقاللي إن أختي كلمته، وهو راجع البيت دلوقتي!
حسيت بالخوف والرعب… أنا مش مستعدة أتكلم معاه دلوقتي، أنا غضبانة جدًا من أختي لأنها نقلت الكلام لجوزي! الحقيقة، أنا كنت حاسة إن العالم كله بينهار حواليا 😫
كنت فعلًا منهارة، ولما سمعت صوت الباب بيفتح، كنت راكعة على ركبتي في المطبخ وببكي.
لما جوزي شاف حالتي، نزل بسرعة يشوفني، بدأت أبكي بصوت أعلى. قعد يعتذر، وأنا بهز راسي وبقوله: “لا… لا… لا… كتير قوي…” ما كنتش قادرة أسمع هو بيقول إيه.
حاول يحضني علشان أهدى، وأنا كنت عاملة زي الطفل اللي بيرفض الحضن بس ماسكة في هدومه.
قعدت في الحالة دي كام دقيقة لغاية ما استوعبت هو بيقول إيه، كان بيقول:
“أنا آسف علشان خوفتك… من فضلك اسمعيني… أنا مش خاين… من فضلك اسمعيني…”
أخيرًا، سكت وقلتله: إيه؟!
كنت متلخبطة قوي…
الحمد لله، كل حاجة بقت أحسن، وعرفت إن ده اللي حصل:
بعد ما اتكلمنا أنا وجوزي عن مشكلة التواصل، وإني حاسة إننا مش قريبين من بعض زي الأول، جوزي اتصل بأختي وطلب منها نصيحة.
أختي قالتله على فكرة إنه ياخدني في رحلة مفاجأة، وهي هتاخد الأطفال وتهتم بيهم.
صاحبة أختي اسمها “أليسون”، بتنظم رحلات، وأختي أدت رقمها لجوزي، وفعلاً اتواصل معاها علشان يخططوا للرحلة.
فاتورة المجوهرات كانت “عقد”، جوزي ناوي يفاجئني بيه على العشاء في الرحلة.
والهدوم كمان كلها كانت مفاجأة رومانسية ليا (أخذ هدوم من دولابي علشان يعرف مقاسي، والبنات اللي في المحل ساعدوه).
أختي هي اللي قالتله يحضر كل ده علشان تكون مفاجأة رومانسية.
وطبعًا ما كانوش متوقعين إني هكتشف الموضوع من بدري وأفترض الأسوأ.
أنا طول عمري بعاني من مشكلة “القلق الزايد”، وبعد ما خلفت أطفالي، المشكلة زادت عندي.
بس المرة دي كانت أسوأ مرة في حياتي، كنت حاسة إن حياتي كلها بتنهار.
طبعًا هو ما قالش كل الكلام ده مرة واحدة لما كنت في المطبخ، الأول أكدلي إنه مخلص ليا، ولما فهمت إن دي مش نهاية جوازي، ارتحت شوية، بس حسيت بالإحراج جدًا.
بعد ما بقيت أهدى، جوزي شرحلي كل حاجة، وقعدنا نتكلم طول الليل.
جوزي فتح كل رسائل البريد الإلكتروني علشان أتأكد، وعرفني مكان الرحلة، واتحمست قوي! 😀
أنا دلوقتي مش زعلانة منه خالص.
الظاهر إن أختي قالتله: الحق، ارجع البيت بسرعة قبل ما مراتك تتصل بالمحامي 😂
أختي عارفة مشكلة “القلق” اللي عندي، علشان كده ممكن أعاتبها وأقولها: إزاي تخليه يخبي عليا؟
بس أنا دلوقتي فرحانة ومش عايزة أضايق نفسي بأي حاجة.
أعتقد إني محتاجة أعالج المشكلة دي عندي، وبدأت أحس إن كلام الناس عني، إني “اعتمادية” وبعتمد على الناس اللي حواليا في كل حاجة، كان صح.
بس هأجل ده لوقت تاني…
دلوقتي، أنا بستمتع بيومي مع الأطفال، ومستنية رحلتي ❤
________________
القصة مترجمة من ريديت، أصحاب القصة أجانب.
