سجادة الصلاة🧎♂️🧎♀️
أنا بنت. من حوالي أسبوعين، زميلي في الشقة (ديف عنده 23 سنة) عرض علي صاحبته (جولي عندها 22 سنة) إنها تيجي تقعد معانا. بعد ما اتطردت من بيتها.
ديف سألني قبلها لو ينفع تقعد معانا لحد ما تلاقي مكان؟ وأنا وافقت.
كان باين علينا إننا متفقين مع بعض، وهي مكنتش بتضايقني خالص، كمان كانت بتحترم قواعد البيت. فكل حاجة كانت ماشية كويس.
من كام يوم كنت قاعده مع واحده صاحبتي، وبالصدفة صاحبتي لقت حساب جولي على إنستجرام. اكتشفنا إن جولي كانت بتتصوّر في أوضتي وهي لابسة هدومي، والإكسسوارات، والأحذية بتاعتي. يعني باختصار، عملت كذا فوتوشوت في أوضتي وهي لابسه حاجتي! 😳
طبعًا أنا اتجننت لما شفت ده! لكن أكتر حاجة وجعتني كانت الصور اللي كانت واقفة فيها على سجادة الصلاة بتاعتي (واللي مهمة جدًا لديني وإيماني) وهي لابسة جزمتها. هي عارفة كويس قد إيه السجادة دي مهمة بالنسبالي، وعارفة كويس إن اللي عملته ده قلة احترام 😡
قررت الغي اجازتي ورجعت البيت تاني يوم على طول. لما وصلت، لقيت جولي هناك وواجهتها بكل اللي عرفته. على طول بدأت تعيط وتقول إني مكبره الموضوع وإني خوفتها بسبب عصبيتي. (بصراحة أنا كنت بزعق، فده ممكن يكون فعلاً خوفها).
قلت لها تخرج فورًا وأخدت منها المفتاح الاحتياطي بتاعي. هي لمت شوية حاجات ومشيت، واتفقنا إن ديف هو اللي هيجيب لها باقي حاجتها.
بعد ساعة، رجعت تاني وحاولت تدخل من الباب الخلفي. كنت في المطبخ وقتها، قولتلها تطلع برا. وحذرتها أكتر من مرة إني هبلغ الشرطة لو حاولت تدخل البيت تاني.
فضلت مصممة ودخلت البيت فعلاً، كنت مش طيقاها وبلغت الشرطة.
الشرطة وصلت وطلبوا منها كذا مرة إنها تمشي، بس هي فضلت تتخانق معاهم، في الآخر الظابط اتضايق منها وقرر يقبض عليها. قضت الليلة في الحبس، واضح ان تليفونها كان في عربيتها ومش معاها، عشان كده ما قدرتش تتواصل مع ديف.
لما ديف رجع من الشغل في نفس اليوم، سلّم عليا عادي جدًا، بصراحة استغربت رد فعله. فسألته: “إنت كلمت جولي؟….قالي: “لأ”.
حكيت له كل اللي حصل، بدأ يزعق فيا ويقول إني مش كويسة وإنّي زودتها جدًا لما بلغت الشرطة.
🌿توضيح:
الظباط في البداية طلبوا منها إنها تمشي. وحاولوا يتكلموا معاها لمدة 15 دقيقة على الأقل. وشرحوا لها إنهم مش عايزين يقبضوا عليها. بس هي فضلت تزعق وتشتم فيا وفيهم. وفي الآخر، واحد من الظباط قالها انه هيعد لغايه 5 ولو مشيتش هيقبض عليها. عدّ لغاية 5، وهي ما مشيتش زي ما طلبوا، فقبضوا عليها.
أنا شفت صفحتها الساعه 3 الفجر استنيت لغايه الصبح عشان أرجع البيت ولما رجعت كانت الساعه 10 الصبح. وفي الوقت ده كان ديف راح الشغل.
🌿 تعديل:
أنا مش مسلمه ولا من الشرق الأوسط. بس حبيت أوضح إن في أديان تانية بتستخدم سجاد الصلاة.
أنا من أصل إثيوبي، وبتبع ديانة توحيدية اسمها “Eebe Waaq”. للأسف، الديانة دي قربت تنقرض، وعدد أتباعها ممكن يكون أقل من 20 ألف شخص في العالم كله.
جولي شافت السجاده دي عندي قبل كده. وهي عارفه كويس هي اد ايه مهمه عندي (أنا ورثتها من أجدادي)…هي دخلت أوضتي ودورت عليها مخصوص عشان تتصور بيها..وحجتها انها جميله ولونها دهبي من الحرير وشكلها “روحاني”.
🌿تحديث:
ديف اتكلم معايا واعتذرلي..هو مكنش عارف الحقيقة كلها. ولما فهم القصة عرف أن عندي حق.
هو قالي أن جولي بتحاول تكون مؤثره ومشهوره علي الانستجرام. وعشان انا عندي هدوم واكسسوارات غاليه وشيك هي كانت عايزه تستغل الموضوع ده.
كان هدفها تزود عدد المتابعين والتفاعل علي صفحتها. عشان الشركات بعد كده يطلبوا منها تعملهم اعلانات.
اللي اكتشفته بقه أنها بتاخد هدومي تتصور بيها من زمان من قبل حتي ماتيجي تقعد معانا في الشقه.
كمان كل أصحابها بيشتكوا منها عشان بتاخد هدومهم تتصور بيها وعامله نفسها غنية وعندها هدوم كتير.
لسه الصور معروضه علي الانستجرام. بس ديف طلب منها تحذف الصور اللي فيها سجاده الصلاه. هي وافقت بس رفضت تحذف باقي الصور التانيه.
ديف شكله صادق جدًا في ندمه على اللي حصل. والأهم إنه انفصل عنها!
هي عملت بث مباشر عشان تحكي اد ايه أنا انسانه شريرة.
(القصة مترجمة من ريديت..أصحاب القصة أجانب).
قصص حقيقية
قصة واقعية
