رحلة مراتي 🏖️🌴🌊
أنا راجل عمري 50 سنة ومراتي عمرها 48.
مرض الخرف وراثة في عيلة مراتي “ماري”، وعادة المشاكل في الذاكرة بتبدأ تظهر عندهم في نص الخمسينات أو في الأواخر. مامتها، وجدتها، وكذا قريب تاني من ناحية مامتها اتصابوا بالخرف.
حماتي كانت عايشة معانا لمدة أربع سنين (حمايا متوفي). اولادنا مستقلين ومش عايشين معانا في البيت. بنتي الكبيرة في الجامعة، وابني الصغير في ثانوي.
الـ4 سنين اللي فاتوا كانوا صعبين علينا جدا، وعلى اولادنا (بنتنا نقلت عشان الجامعة بس رجعت تعيش معانا شوية خلال فترة كورونا)، كمان العيش مع حد عنده خرف تجربة قاسية جدًا.
كنا بنتكلم كتير السنة اللي فاتت إننا ناويين ناخد الفلوس اللي فاضلة من مصاريف جامعة بنتي ، وكمان الفلوس اللي حوشناها سوا، ونبيع أو نأجر البيت (ناخد بيت اصغر)، ونسيب شغلنا ونسافر لمدة سنة أو لحد ما الفلوس تخلص. كل اللي كنا مستنيينه إن والدتها تدخل دار رعاية.
أنا فاهم قلق ماري وخوفها من المرض، وأنا كمان كنت مرهق وتعبان قوي. جرّب تعيش فترة الكورونا شغال عن بُعد، مع زوجة شغالة عن بُعد، واولاد في الجامعة والثانوي بياخدوا دروسهم أونلاين، وحماة عندها خرف، وشوف لو تقدر تستحمل!
أخيرًا لقينا مكان فاضي وقدرنا ننقل حماتي لدار رعاية. كنت فاكر إني أخيرًا هاخد نفسي شوية وأرتاح .لكن بعد ما نقلنا حماتي، حالة ماري النفسية اتدهورت بشكل كبير. لقيت نفسي بدل ما كنت براعى حماتي، بقيت براعى مراتي كمان.
ماري كانت حاسة بالذنب الرهيب عشان حطت أمها في دار رعاية، وكمان كان عندها قلق كبير من موضوع الخرف اللي ممكن يجيلها.
خطتنا كانت نبدأ السفر في صيف 2024 (الرسالة مكتوبة سنة 2023).
من شهرين رجعت البيت ولقيت ماري مش موجوده و سايبة ورقة!!
باختصار، قررت تسافر الرحلة بتاعتنا لوحدها 😲
ماري استقالت من شغلها، اخدت كل المدخرات، وبتقولي انها مش متأكدة هترجع إمتى؟! يمكن سنة، يمكن أقل. وكتبت إنها “عارفة إني هعذرها”.
حاولت اتصل بيها مكالماتي بتروح على للبريد الصوتي.
صورت الورقة وبعتها للولاد في رسالة.
احنا كنا بنحوّل أغلب فلوس المرتب”لحساب مشترك” عشان ندفع منه فواتير البيت ونحوش.
🌸وعندنا كروت ائتمان مشتركة (كروت فيزا)
🌸العربيتين والقرض العقاري باسمنا إحنا الاتنين.
🌸وحساب تقاعد (للمعاش).
مراتي قفلت كل الكروت والحسابات المشتركة.
استنيت شهر علي أمل انها ترجع (كان عندي أمل قبل ما تخلص كل فلوسنا)، و في الشهر الاول ماوصلنيش منها غير رسالة واحدة.
بعد ما يأست (الشهر اللي بعده) قررت اروح لمحامية، قالتي مفيش حاجة نقدر نعملها غير اننا نغير اسم المستفيد من التأمين علي الحياه، ونغير مين اللي يقدر ياخد المعاش بتاعي (يعني مراتي تروح تتفسح بفلوسي كلها وكل اللي أقدر أعمله اني امنعها من انها تاخد فلوسي بعد ما اموت لوحدي).
ده غير أن المحاميه نصحتني اني لازم اكمل دفع اقساط القرض العقاري( اقساط البيت).
حتي العربيات مقدرش ابيعها لانها باسمنا احنا الاتنين!!
مراتي عماله تنزل صور من رحلتها علي إنستجرام، وقافله خاصية التعليق، متغاظ منها وعايز اعملها بلوك، بس المحامية قالتلي أوعي تعمل كده.
آخر صوره نشرتها كانت في “هاواي”. و كتبت تعليق علي الصورة “اد ايه جوزي راجل رائع عشان سمحلي أروح الرحله دي!”
أنا هنا بعاني عشان اسدد تمن القرض والتأمين والفواتير ومرعوب يحصل أي ظرف طاريء لاني مش معايا أي فلوس زيادة، وهي بتتفسح وتستمتع ومش مهتمة بأي حاجه!!
أنا غضبان جدا ، بعد ما وفقت جنبها وراعيت مامتها لمده اربع سنين وبعدها وقفت جنبها لما انهارت بعد ما حماتي راحت دار الرعاية، في الاخر يكون ده جزائي!! هو ده رد الجميل.
أنا دلوقتي مش هقدر أروح الرحله اللي كان نفسي فيها أنا كمان، ده غير اني مضطر أشتغل فتره أطول و أأجل التقاعد (الطلوع علي المعاش).
أولادنا زعلانين منها قوي، بس هي أمهم ومهما زعلوا أكيد هيسامحوها في الاخر.
علي فكره مراتي جميلة وملفتة. وأنا مش عايز أفكر ممكن تكون بتعمل ايه دلوقتي.
أنا قاعد زعلان ووحيد في البيت وهي تلاقيها بتستمتع علي الشاطيء.
🌿تعديل:
المحاميه قدمتلي أكتر من حل، بس كلها حاجات قانونيه مفيش داعي أوجع دماغكوا بيها دلوقتي، المشكلة أن رفع دعوي والاجراءات دي بتكون مكلفه جدا، بس لو مفيش فايدة وده الحل الاخير بالنسبه لي أكيد هعمل كده.
🌿تحديث:
المحاميه قدمتلي حل تاني كويس جدا لما عرفت اني خلاص ناوي علي الطلاق، وقالتي انها هتخصم منها كل الفلوس اللي استولت عليها لما نبيع الاصول (يعني يبيعوا البيت والعربية ويخصم منها الفلوس اللي صرفتها) بس الموضوع مش سهل قوي لأننا متجوزين من 25 سنة.
دلوقتي بعد ما قررت الانفصال عنها وارتحت شوية من ناحية موضوع الفلوس، قررت استمتع بحياتي، أنا دلوقتي حر أقدر أطبخ الأكل اللي بحبه ومش مجبر أهتم بأي حد غير نفسي، أنا بحب مراتي بس نفسيتها كانت تعبانه علي طول وده كان مأثر علي حياتنا.
في الشهر الأول كان الموضوع صعب جدا عليا، كنت برجع البيت وحاسس كأني هلاقيها قاعده مستنياني، وكل ما جرس الباب يرن أفتكر انها مراتي وأفرح، كل شوية أروح ابص علي الكاميرا اللي عند باب البيت علي أمل انها ترجع.
دلوقتي بقيت أحسن ومش مستنيها بالعكس، ده أنا بتمني انها تغيب أكـتر لغايه ما المحامية تخلص كل الاجراءات القانونية.
بنتي بتقولي انها هترجع علي راس السنة، بتمني توافق علي شروط الانفصال، وخلاص بقة كل واحد فينا يشوف حياتة.
🌿تحديث:
مراتي بعتت رسالة تبلغني أنها هترجع في راس السنة.
بلغتها اني مش هكون في البيت وهقضي العيد مع أخوية، بصراحة كنت عايز أوصلها اني مش مرحب بيها، هي راحت اليوم ده عند أختها.
بعدها اتقابلنا، قررت ما اكونش غضبان ومتعصب قوي لما اشوفها عشان ما أديهاش إحساس إن الموضوع فارق معايا للدرجة دي.
كانت مصدومة من برودي، ومتضايقه اني مديتهاش أي أهمية، وحست انها مش فارقة معايا ووجودها زي عدمه.
قولتلها كل اللي أنا عايزه دلوقتي إنها توافق على الطلاق.
ده ملخص لكل الكلام اللي دار بينا:
🌿سألتها ليه مشت من غير ما تقولي؟
ردت: عشان هي مكنتش عايزه تستني سنة كمان ولا عايزه تشتغل تاني (خايفة الوقت يعدي ويجيلها خرف وماتقدرش تستمتع بالرحلة).
أنا كنت عايز أستني لغايه ما بنتي تتخرج من الكليه (هي في اخر سنة) وكمان لغايه ما البيت يتباع، ده غير اني كنت هظبط كل أمورنا المادية الأول بحيث لما نرجع من الرحلة يكون لسه معانا فلوس ونعرف نكمل حياتنا، بس طبعا هي مستنتش اعمل كل ده وقررت تتهور وتمشي لوحدها.
🌿قولتليها ليه ما طلبتيش الانفصال قبل ما تمشي، وكنتي أخدتي نصيبك الأول بدل ما تسرقي كل فلوسنا؟
قالتي انها مش بتفكر في الانفصال!!
🌿سألتها لو صرفت الفلوس كلها؟
قالت نصها بس، خافت تصرف الفلوس كلها ومتعرفش تتصرف وهي هناك لوحدها!
🌿كان بيدور في دماغي سؤال (هل اتعرفت علي حد هناك) بس محبتش أسألها، لان السؤال ده معناه اني لسه مهتم ولسه عايزها في حياتي وده مش حقيقي.
بس هي ردت من غير ما أسأل وقالت انها كانت “مخلصة” وماعملتش أي حاجة غلط (مش عارف الكلام ده حقيقي ولا بتقول كده عشان شكلها قدام اولادنا).
قولتلها إنها أنانية. ولما سابتنا وسافرت كنا قلقانين يحصل لها حاجة وما نشوفهاش تاني.
هي طول عمرها مركزة على نفسها.
قولتلها إنها بتختار الطريق السهل وبتسيبنا إحنا نتعامل مع الحاجات الصعبة. لو تعبت؟ الولاد هيشيلوا مسؤوليتها. فلست؟ هتعيش مع العيلة. سابت الكل؟ عادي هنسامحها.
هي فاكرة إن إخواتها وأولادنا هيخلوها تعيش معاهم زي ما أمها عاشت معانا. بس ممكن تكون غلطانة، لأن بعد اللي عملتة الكل زعلان منها. وأكيد مفيش حد هيتعامل معاها زي الاول.
خلاص أنا أخدت قراري، وعلي فكرة أنا مش زعلان، خلاص هقدر أرجع كل فلوسي وأخد نصيبي من الممتلكات وأخرجها من حياتي. ومش هبقي مضطر أراعي ولا أصرف عليها تاني.
أنا خلاص قررت أعيش حياتي.
ماكنتش متخيل إن راجل عنده 50 سنة، واولاده مش عايشين معاه، وعنده شغل كويس وصحتة ووزنة تمام، ممكن يبقى مرغوب كده.
أنا مش بجري ورا الستات، بس الاهتمام اللي لقيته كان أكتر بكتير مما توقعت. بصراحة، كان لطيف إني أقابل ستات جديدة. حسبتها كويس، ولقيت إني هبقى تمام جدًا بعد ما الأمور كلها تخلص، خصوصًا لما أبقى مسؤول عن نفسي وبس 👌😊✨
(القصة حقيقية مترجمة من ريديت، أصحاب القصة أجانب).
