
راجل وست ستات 👨🦱👩🦱👩🦰👩🦳
أنا (32 سنة) خطيبتي شارون (30 سنة)، احنا مرتبطين من سنتين، وخطبتها من شهر ونص.
بصراحة، حاسس إن من أول ما حطيت الخاتم في إيدها، وشخصيتها وتصرفاتها اتغيرت 180 درجة.
طول فترة ارتباطنا، كنا متفاهمين جدًا، وكان واضح إن عندنا نفس المعتقدات والقيم. بس مش عارف ايه اللي حصل.
لما عرضت عليها الجواز وقالت موافقة، دي كانت أسعد لحظة في حياتي. لكن ماعداش حتى أسبوع، وظهرت حاجات جديدة!!
كنت فاكر إني عارف كل أصحابها، لكن في يوم رجعت البيت لقيت فيه 6 ستات عمري ما شفتهم قبل كده، وشارون عرفتني عليهم.
كنت مستغرب مين دول، وليه ماشوفتهمش قبل كده، هي عرفتني علي أصحابها (ميشيل وأوكتافيا) من أكتر من سنة ونص. لكن دول اول مره أسمع عنهم؟
شارون قالت إنها كانت عايزة تتأكد إن علاقتنا “جد وحقيقية” قبل ما تعرّفني على أقرب الناس ليها.
بصراحة حسيت أن الموضوع ده غريب قوي.
شارون عايشة في شقتها، بس هي بقت بتعزم أصحابها عندي كتير، المشكله انهم بيقعدوا ياكلوا ويشربوا في بيتي وبيخلصوا كل الحاجات اللي عندي بسرعة. بجد حسيت إن عندهم قله ذوق مش طبيعية.
حاولت أتكلم مع شارون عن حكاية إنها بتعزم أصحابها من غير دعوة في نص الأسبوع، بس هي قللت من أهمية كلامي وكانت مستفزه جدًا، وحتي طنشتني خالص.
مفيش فايده فيها برضة جابتهم بيتي تاني (مرتين من غير ما تبلغني، ومرة بلغتني عشان “ترضيني” – على حسب كلامها)، كانوا بيتعاملوا معايا كأني شغال عندهم، وفضلوا يطلبوا مني أجيبلهم حاجات يشربوها.
بعد ماجابتهم بيتي المره الرابعة، وضحتلها إني هجيب ثلاجة مقفوله بالمفتاح. شارون ردت عليا وقالتلي إني” دمّي مش خفيف”.
الأسوأ من كده، أن شارون قررت إن أنا و”البنات” بدأنا علاقتنا غلط، وقالت إننا لازم نتعشى مع بعض في مطعم شيك عشان أتعرف عليهم أكتر.
طبعًا رحت، بس كانت تجربة سيئة جدًا. الستة فضلوا يضايقوني ويسألوني عن حياتي، وبيتي، وشغلي، لكن لو أنا سألت أي سؤال كانوا بيتجاهلوني ومحدش بيرد عليا.
الموضوع بقى أسوأ كمان لما بدأوا يتكلموا عن العلاقات والغيرة، وواحدة منهم اتكلمت علي حاجة، كنت فاكر إن أنا وشارون متفقين عليها تمامًا (تحديدًا . الصداقة مع الحبيب السابق). اتصدمت لما لقيت شارون بتقول أن عادي ومفيهاش حاجة. رغم أننا كنا متكلمين في الموضوع ده زمان وكان رأيها غير كده خالص.
أسوأ جزء بقة لما الفاتورة وصلت، وشارون قالت أن أحنا اللي هندفعها وسلمتني الشيك عشان أحاسب!!! قلتلها إنتي أكيد مش بتتكلمي جد، شدينا مع بعض شوية. وبعدها دفعت بس تمن الحاجات اللي طلبتها ومشيت، وسيبتهم يتصرفوا في باقي الفاتورة.
بعدها، شارون فضلت تتهمني إني “سام” و”ضعيف”، ولما بدات أدافع عن نفسي واتخانقت معاها، كانت بتعتذر وتقول إنها بس “مضغوطة في الشغل”.
بجد الموضوع بقه متعب وغريب، علي فكره أحنا لسه مخططناش للفرح.
أسوأ حاجة حصلت يوم الاتنين اللي فات، وأنا في الشغل، جالي إشعار من جرس الباب الذكي، ولما شفت الإشعار اكتشفت إن شارون وواحده من صاحباتها الجداد وصلوا بيتي، دخلوا، وخرجوا ومعاهم أدوات الجولف بتاعتي!!
الطقم ده كان هدية من والدي ودفع فيه مبلغ محترم ، ففكرة إن شارون تسلفه لحد من غير إذني خلتني أتعصبت جدًا. على طول اتصلت بيها وقلت لها تبلغ صاحبتها ترجع أدوات الجولف فورًا.
شارون حاولت تلعب عليا وقالتلي: بس إنتي وعدتي تسلف الادوات لصاحبتي، فاكر؟ قلت لها إن تمن الحاجة دي يخلي الموضوع جريمة كبيرة، وإن هي وصاحبتها عندهم ساعة واحدة يرجعوهم، وإلا هبلغ البوليس.
شارون فضلت مصممة إنها واخدة إذني، قلتلها بطلي تشتغليني.
المهم، بعد 45 دقيقة جالي إشعار تاني إن شارون وصاحبتها رجعوا الحاجات . وصاحبتها وهي خارجة عملت حركة مش حلوة قدام الكاميرا.
رجعت البيت واكتشفت انهم راميين الادوات على الأرض. وشارون فضلت تتهمني تاني أني “سام”.
قلتلها تبطل الكلام الفاضي ده. وأني لو كنت أعرف إن دي طريقتها من الأول، ماكنتش فكرت أطلبها للجواز أصلاً.
الكلام ده شكله خوفها شوية، وبدأت تبرر تاني وتقول إنها مضغوطة من الشغل، بس أنا خلاص مش مقتنع بالحجه دي.
قلت لها ترجع الخاتم والمفتاح بتاعي، وإننا هنتكلم عن علاقتنا في نهاية الأسبوع.
فضلت تعيط وتترجاني إني ما ألغيش الخطوبة، وأصرت إن الموضوع كله بسبب الضغط.
قلتلها إننا هنتكلم في الموضوع في الويك إند.هي في الآخر استسلمت.
بعد ما مشيت، غيرت أقفال البيت احتياطي.
شارون عماله تبعت لي رسائل طول الوقت، مليانة حب واعتذار، وبتقول إنها كانت بس عايزة تتباهى بيا قدام اصحابها القريبين.
مش عارف، بصراحة مش مقتنع بالكلام ده.
أصحابها بيبعتولي رسايل، و يتهموني إني “سام” و”ضعيف”، وبيقولوا إنهم كانوا عارفين من الأول إني مش مناسب لشارون، واني مش واثق في نفسي.
أصحابي اللي كانوا عارفين شارون طول السنتين اللي فاتوا. اتفاجئوا ومش مصدقين إنها اتغيرت 180 درجة كده. بيقولوا إن أكيد في حاجة ناقصة أو أنا مش حاكي كل حاجة.
كمان شايفين إني أكيد قلت أو عملت حاجة خلت أصحابها يتصرفوا معايا بالطريقة دي، وإني أكيد غلطان في حاجة.
هنشوف الأمور هتوصل لفين…
🌿تحديث:
عزمت ثلاثة من أصحابنا المشتركين، (كيسي، جون، ومايك)، عشان يكونوا موجودين لما شارون تيجي.
شارون وصلت واتفاجئت إن في ناس عندي. قلتلها إنهم موجودين عشان مصلحتنا إحنا الاتنين.
شارون قالت إنها عايزة تكلم ثلاثة من أصحابها الستة عشان ييجوا “يعملوا توازن”، أنا رفضت وقلتلها مش هينفع بسبب سرقة أدوات الجولف.
شارون قعدت على الكنبة وحاولت تعمل دراما وسألتني لو فعلاً عايز أخلي الموضوع ده علني؟!
سألتها ليه اتغيرت كده بعد الخطوبة، وليه كانت مخبية وجود الستة دول؟ بدأت تبرر تاني وقالت إنها بتحافظ على دايرتها المقربة لحد ما تتأكد من علاقتنا.
قلتلها ده كلام فاضي؛ أنا قابلت أهلك، أكيد هما مش أقربلك من أهلك؟
شارون حاولت تغيّر الموضوع بس أنا ما سبتلهاش فرصة. قلتلها أن زيارات أصحابها في بيتي كل شوية كلفتني مبلغ كبير، وهي ما حاولتش حتى تدفع أي حاجة. كمان فكرتها إنها حاولت تخليّني أدفع فاتورة عشا لـ8 أشخاص من غير ما تسألني الأول.
قالت تاني إنها كانت عايزة تبين “أد ايه أنا راجل عظيم”، بس شكلها كانت غلطانة وأن هي اللي زعلانة من تصرفاتي معاها.
قولت لها خلاص، من غير ما أجل الفرح ولا حاجة، العلاقة كلها هتخلص لو مش هتبقي صريحة معايا.
شارون اتعصبت. وخلعت الخاتم ورمته على الترابيزة. وقامت عشان تمشي وقالت “مستحيل هتلاقي واحدة زيي”.
بعد ما مشيت، كيسي وجون ومايك كانوا مصدومين تمامًا. قولتلهم صدقوني دلوقتي؟
أنا لسه مصدوم ومش فاهم ايه سبب تصرفات شارون. أكيد قلبي مكسور، وعارف اني هكون حزين قوي الفتره اللي جايه بس دلوقتي أنا لسه مش حاسس بحاجة.
(القصة مترجمة من ريديت..أصحاب القصة أجانب).
قصص