
بلاي ستيشن 5 🕹️🎮
أنا (ولد، 15 سنة) ماما وبابا اتعرفوا على بعض لما كانوا لسة في الجامعة ، هما ارتبطوا فترة قصيرة و بعدها سابوا بعض. وقت ما انفصلوا كانت ماما لسه حامل فيا، ولما خلفتني اضطرت ترفع قضية على بابا عشان يصرف عليا.
اتربيت مع ماما وما كانش في أي علاقة بيني وبين بابا طول طفولتي تقريبًا. ماما كانت طالبة مغتربة، وأهلها قاطعوها بسبب ظروف ولادتي. و للأسف، من سنتين ماما اتوفت بسبب مرض صعب، وبعدها بقيت تحت وصاية بابا واضطريت أروح اعيش معاه في بيته.
بابا متجوز وعنده ولدين (5 و7 سنين). في الأول الوضع ما كانش وحش قوي، بس كنا حاسين اننا أغراب عن بعض.
أنا عندي أوضة لوحدي، وبحاول أكون مع نفسي أكتر (في حالي) بس احنا بناكل مع بعض معظم الوقت.
من حوالي 10 شهور، كنت محظوظ إني لقيت شغلانة كويسة في دار رعاية مسنين، أنا بعمل “دعم فني للكمبيوتر”، الشغل عبارة عن صيانة 12 جهاز كمبيوتر. فلوس الشغل ده كويسة جدًا ده غير اني باخد إكرامية ووجبات مجانية.
الحمد لله قدرت أحوش مبلغ كبير. بس بغباء، بدل ما أكون حريص وأخبي الموضوع، قررت “أحدث” أوضتي، جبت تلفزيون جديد، سماعات، بلاي ستيشن 5.
طبعًا إخواتي لما شافوا الاجهزة الجديدة انبهروا بيها وكانت مغرية جدًا بالنسبه لهم وعايزين يجربوها.
وافقت انهم يلعبوا بس بشرط:
“إنهم يقدروا يلعبوا على الـPS5 في أي وقت طالما أنا مش بستخدمه، لكن لو أنا عايز ألعب أو أتفرج علي التلفزيون، تبقي الأولوية ليا أنا ومش من حقهم يعترضوا”.
كمان كنت كريم جدًا معاهم واشتريت “يد تحكم” زيادة (مع إني مش محتاجها) واشتريت كمان اسطوانات العاب”مناسبة للأطفال” كان نفسهم فيها.
في الآخر اضطريت أغير كلامي لـ “يلعبوا بس وأنا موجود” لأن الولد الصغير اللي عنده 5 سنين بوظلي “يد التحكم” لما وقع عصير عليها.
وهنا بدأت المشاكل.
اخواتي راحوا اشتكوا لـ”بابا ومراته”، وبعد كده “أمروني” أطلع الـPS5 من أوضتي وأحطة في الريسبشن!!
أنا رفضت وقلت أنا شاريه بفلوسي. و ده خلّاهم يقولوا إن عندي فلوس كتير والمفروض أساهم معاهم في الإيجار وفواتير الميه والكهربا وكمان الأكل!!
قلت لهم: “ماشي، اعملوا عقد وأنا هجيب محامي يراجعه عشان أتأكد إن الكلام ده مش متعارض مع “قانون الأسرة”.
بعدها بابا قال للولدين إنه هيشتري لهم PS5 هدية في الكريسماس.
امبارح بالليل، بعد ما بابا شاف اسعار “بلاي ستيشن 5″، هددني وقالي يا إما أدي الـPS5 هدية لأخواتي في الكريسماس بمزاجي، أو هيكسره ويرميه وأنا في المدرسة.
أنا اتعصبت جدًا، فدخلت على “فيسبوك ماركت” وعرض الجهاز للبيع، وفيه حد اتواصل معايا واشتراه.
اخواتي اكتشفوا الموضوع و اتأثروا جدًا، وأنا كنت مضايق وزعلان علشانهم هما ماعملوش حاجة علشان يتعاقبوا.
طبعا لما بابا يرجع هيعرف اللي حصل، عايز نصيحة ايه التصرف الصح في الحالة دي؟
🍃تحديث:
أنا في الشغل دلوقتي، بس مرات بابا كلمتني الصبح وكلامها كان إيجابي جدًا. قالتلي إنها ما كانتش تعرف بوجودي (عرفت قبل ما أجي أعيش معاهم على طول)، وإن ده اتسبب في مشكلة كبيرة بينها وبين بابا. اعتذرتلي عشان الصدمه كانت لسه مأثره عليها وما كانتش مرحبة بيا في الأول.
كمان قالت لي إنها ما كانتش تعرف التهديدات اللي بابا قالهالي بخصوص الجهاز، ووعدتني إن ده مش هيحصل تاني طالما هي موجودة. إخواتي الصغيرين اعترفوا لها بموضوع العصير. قالتلي إنها هتجيب لي “يد تحكم” جديده في الكريسماس، وعرضت كمان تدفعلي فرق السعر عشان أقدر اشتري PS5 جديد (فرق الفلوس بين الجهاز اللي بعتة والجهاز الجديد).
غالبًا مش هاخد الفلوس، بس على الأقل دي خطوة إيجابية منها. وعلى فكرة، دي أطول محادثة حصلت بيني وبينها لحد دلوقتي.
علي فكره انا عندي ورث يخص ماما مش هستلمة غير لما أكمل ال 18 سنة، بس أعتقد اني محتاج اتكلم مع محامي واراجع معاه كل حاجة.
🍃تحديث:
عندي اجتماع مع عيلتي انهارده (عيلة بابا) مرات بابا بعتتلهم المنشور بتاعي علي ريديت وكلهم قرروا يجتمعوا عشان يتكلموا مع بابا (الموضوع شكله كبير).
🍃رد الاب:
ابني نشر منشور مسيء ومتحيز، وبيحكي تفاصيل الحاجات اللي بتحصل جوه بيتي.
أخويه نصحني ارد علي الناس وأقول وجهه نظري:
بصراحة، أنا ما كنتش ناوي أطلب من “جوناه” يدفع إيجار. بس هو عنده دخل كويس قوي من شغله. واستخدم الفلوس دي عشان:
يظبط أوضته✅
يشتري ماركات جزم غالية✅
ويجيب أحدث آيفون✅… كل ده لنفسه.
أنا مش فارق معايا إطلاقًا هو بيصرف فلوسه إزاي، لكن بصراحة أنا شايف تصرفاته دي بتدي مثال سيء لاولادي التانيين.
الموضوع بقه اللي جاب اخري، لما “جوناه” عمل باسورد للـ PS5. ساعتها قلتله ببساطة: لو مش عايز تشارك حاجتك مع اخواتك، ليه أنا بقه أديلك إقامة مجانية في بيتي؟
ابني المفروض يكون ممتن. صحيح إن بينا صلة دم، لكن أنا ما ارتبطتش بأمه “ماي”، غير 5 شهور بس أيام الجامعة. كنت واضح جدًا مع “ماي” إني مش عايز أطفال، لكن هي دبستني في طفل. ودخلتني في مشاكل قانونية ودفعت بسببها آلاف الدولارات لمده سنين، (مصاريف رعاية الطفل)، وده أثر علي حياتي.
كان ممكن ببساطة اسيبه في دار رعاية بعد وفاة مامته بس أنا عملت بأصلي ووافقت أخليه يعيش معايا.
ظهوره في حياتي فجأه عمل مشاكل مع مراتي” اللي اتهمتني بأني خنت ثقتها” بسبب حاجه حصلت من زمان جدا.
كل اللي طلبته انه يسمح لأولادي يلعبوا بالجهاز في أي وقت، وبدل ما يسمع كلامي ويقولي “حاضر” قرر يعمل حركة مستفزه وعدوانيه ويبيع الجهاز عشان يحرم أخواته من اللعب (منتهي الانانية).
ازاي بقه ابقي غلطان، يعني سمحتله يعيش في بيتي وبقه عنده عيله وأخوات عايز ايه تاني؟!
ما طلبتش منه سنت واحد (رغم ان عنده ميراث كبير) كل اللي طلبته يحترمني ويسمع كلامي.
بصراحه مش شايف نفسي استحق كل الهجوم اللي حصل ده.
دلوقتي بعد ما سمعتوا وجهه نظري أعتقد أن الناس هتغير رأيها في اللي حصل.
(القصة حقيقية مترجمة من ريديت، أصحاب القصة أجانب).