
بصراحة… أنا مذهول دلوقتي 🤯
اكتشفت إن خطيبتي “كيم” عملت حاجة مجنونة تمامًا.
اخدت كام يوم أجازة من شغلها الأسبوع ده بحجة إنها “مريضة” ومكنتش بتقابل حد.
قالت إنها حاسة نفسها تعبانة وعايزة تقعد في البيت لوحدها.
على مدار ال7 سنين اللي كنا مع بعض فيهم، عمري ما تخيلت أنها ممكن تعمل حاجة زي دي. هي اصلًا شخصية عاقلة وعمرها ما بتعمل أي حاجة غريبة.
هي عملت وشم على وشها!!
ما قالتش لأي حد عن الكارثة دي قبل ما تعملها.
طول الوقت اللي قضيناه مع بعض، “كيم” عمرها ما جابت سيرة انا عايزة وشم ابدًا.
أختها زارتها لأنها قلقِت عليها واكتشفت المفاجأة الكبيرة. هي لسه متعافتش ووشها أحمر وورام.
كيم أمريكية من أصول آسيوية. هي عملت رموز يابانية نازلة من جبهتها لتحت عينها. أنا مش عارف حتي معني الرموز دي ايه!!
أهل كيم مهاجرين يابانيين. أختها وهي بتقولي علي المصيبة اللي عملتها دي، قالتلي أن ده شيء مرفوض تمامًا في الثقافة اليابانية. الوشوم عندهم مرتبطة بالجريمة ومش محبوبة نهائي.
أهلها منهارين تمامًا، ومش مصدقين اللي هي عملته.
كيم كلمتني امبارح بالليل عن الموضوع، وكانت متضايقة قوي واتخانقنا علشان قلتلها إن اللي عملته ده جنون تمامًا.
هي بتشتغل في شركة، وبتتعامل بشكل مباشر مع عملاء. أول ما مديرها يعرف، هيطردها من الوظيفة اللي درست علشانها سنين.
هي ما فكرتش في شغلها، أو عيلتها، أو حتى فيّا!!
أنا قلقان عليها دلوقتي. ده مش طبيعي. هي عملتلي حظر بعد خناقتنا وبقت بتتجاهلني أنا وأختها لأننا بنحاول نساعدها.
أنا حتي مش قادر أستوعب ولا عارف المفروض أعمل إيه دلوقتي.
هل ممكن أكون سعيد وأنا هتجوز واحدة راحت عملت وشم على وشها ؟
أنا محتاج أهرب، مش كده؟؟
🌿 تحديث:
الخطوبة خلاص انتهت. كيم قالتلي إنها مش عايزة تشوفني تاني، صحيت الصبح لقيت خاتم الخطوبة وبوكس فيه الحاجات اللي كنت جايبها لها على باب بيتي.
عيلتها بيحاولوا يساعدوها، بس هي مش بترد على أي حد ورافضة تتكلم مع أي شخص.
علي فكرة، كيم عندها 29 سنة، وأنا عندي 28. في الـ7 سنين اللي عرفتها فيهم، عمرها ما اتصرفت بالشكل ده.
علاقتها كانت كويسة بأهلها، وبالرغم إنهم كانوا متحكمين شوية احيانًا، لكن كانوا طول الوقت بيدعموها.
هي عملتلي حظر ومش عايزة تشوفني. أنا حرفيًا مش عارف أقول إيه. في يوم كنت خاطب، واليوم اللي بعده خطيبتي فجأه سابتني…
🌿 تحديث: بعد 9 شهور.
لما انفصلت عني، كنت منهار تمامًا مكنتش قادر اصدق إني فجأه فقدت حبيبتي الجميلة اللي قضيت معاها 7 سنين من حياتي.
اليوم اللي سابتني فيه كان أسوأ يوم في حياتي..كنت حاسس بشعور صعب مش قادر حتي أوصفة.
كنت على وشك أسيب شغلي وأرجع أعيش مع أهلي. أنا بحمد ربنا أن مديرتي طلعت انسانة طيبة ومتفهمه، المديرة سمحتلي آخذ 4 أسابيع أجازة عشان أحاول استوعب اللي حصل.
الحقيقة أنا عمرى ما نسيت كيم، لكن خلاص حاولت اتقبل اللي حصل. كنت فاكر إني خلاص اتعافيت من وجع حبها وبقيت تمام، لحد من أسبوعين.لما جالي مكالمة من كيم!!
هي كانت عامله لي حظر وفجأه لقيتها بتتصل بيا، أول ما شوفت رقمها دماغي ماكنتش قادر يستوعب
فتحت المكالمة، وكانت هي فعلاً. ما تكلمناش كتير، ماكنتش عارف أقولها إيه. قالتلي إنها عايزه تقابلني علشان نتكلم.
الوشم لسه موجود، لكن دلوقتي بتغطيه بالميك اب. قالت لما يبقي معاها فلوس، هتحاول تشيل الوشم.
هي خسّت جدًا. ولسة مش قادرة تلاقي شغل جديد، غالبًا هتحتاج تنتقل لمدينة تانية عشان تلاقي وظيفة (للأسف اتطردت من وظيفتها القديمة).
مش دي كيم اللي وقعت في حبها. كأنها واحدة تانيه شبهها.
هي حكتلي إيه اللي حصل:
السنة اللي سبقت الوشم كانت صعبة جدًا عليها. الضغط من كل حاجة كان عمال بيزيد يوم ورا التاني. هاحترم خصوصيتها، وهحتفظ بمعظم اللي قالته سر. لكن الحاجة المهمة هي إنها بدأت تستخدم دواء “مخ*ر” علشان تستوعب اللي بيحصل في حياتها وتقدر تركز في شغلها. وده اللي خلاها توصل للحالة دي.
مش هتكلم عن اللي حصل بعد ما اختفت، للأسف في حاجات عملتها هتفضل تلاحقها لبقية حياتها.
طبعا دلوقتي بقة عندي تفسير ليه هي عملت كده (بسبب الادmان)، لكن الأمور مبقتش أفضل بالنسبه لي.
اتكلمنا تقريبا طول الليل، وقالت إنها عايزة نرجع لبعض تاني. ونحاول نكون زي الأول.
هي بتتصرف كأن حياتي ما تأثرتش خالص. قلت لها إيه اللي حصل بعد ما سابتني. قد إيه اتألمت، واني كنت علي وشك اسيب شغلي وأسيب البلد كلها.
حسيت انها مهتمتش قوي بكلامي..وقالت طالما ده محصلش يبقي خلاص مفيش داعي انك تشتكي.
حتي معتذرتش علي الطريقه اللي سابتني بيها ولا عن الورقه اللي كان فيها كلام صعب (كانت سيبهالي جوه البوكس)، ولا عن المكالمة اللي شتمتني فيها.
هي عارفة ومتأكده انها غلطانة بس هي حسة أن خلاص طالما كان عندما ظروف. ده يشفعلها كل حاجة عملتها وطالما قررت ترجع تاني يبقي خلاص ننسي اللي فات ونفتح صفحة جديدة (بسهولة كده!)
بعتلها رسالة امبارح وقولتلها صعب جدًا نرجع.
اتجاهلتني ومحاولتش حتي ترد عليا!
مش عارف ليه انا بتألم دلوقتي كده، كل مشاعر الحزن القديمة رجعت تهاجمني تاني، ياريتها ماكلمتني وياريتني ما شوفتها، وياريتني ما عرفت كل ده.
مش عارف هل قراري صح ولا أنا كنت أناني معاها؟
(القصة حقيقية مترجمة من ريديت).