
الوصاية 🏡💸
أنا راجل عمري (59 سنة)، عندي 5 أولاد، بنتين (21 و24 سنة)، و3 أولاد (28، 30، و35 سنة).
من كام سنة، أمهم توفت وسابت لهم ورث كبير جدًا. كل واحد فيهم أخد أكتر من 300 ألف جنيه إسترليني.
قبل ما تتوفى، كانت وصيتها إن الفلوس دي ما تتصرفش على الفاضي. لازم:
1. تتصرف لسداد أي ديون.
2. تتصرف عشان يكملوا تعليمهم.
3. أو لشراء بيت في المستقبل.
اتنين من أولادي، (بنتي اللي عندها 24 سنة وابني اللي عنده 28 سنة)، ضيعوا الفلوس كلها في كام سنة بس.
بنتي صرفتها كلها على السفر من غير أي اهتمام، قاعدة في فنادق فخمة وبتاكل في مطاعم غالية.
أنا فاهم فكرة إن حد ياخد أجازة ويسافر شوية، لكن إنها تضيع كل الفلوس على السفر عكس وصية أمها؟ أنا شايف أن ده غلط جدًا.
ابني حاله أسوأ. حرفيًا صرف كل الفلوس على المخ**ت والبنات. مسابش أي فلوس لمستقبله زي ما أمه كانت عايزة.
فضلت أزنّ عليهم كتير عشان يحافظوا علي فلوسهم، لكن زي ما كنت متوقع، الفلوس كلها راحت على الفاضي. ولما ده حصل، قررت أشيلهم هما الاتنين من وصيتي، عشان ماينفعش فلوسي اللي تعبت فيها طول عمري تترمي علي الفاضي كده.
قلت الكلام ده لإخواتهم في السر، عشان يبقوا مستعدين للتعامل مع العواقب بعد كده. لكن واحد منهم (مش عارف مين) سرب لهم الكلام ده.
دلوقتي أولادي قلبوا الدنيا وقالوا إني “ميت بالنسبة لهم” وإنهم “معندهمش أب” وكلام زي كده.
أنا مش عايز أدخل في خلاف طويل مع أولادي، لكن مستحيل أسمح إن فلوسي تتضيع بسهولة كده.
حد عنده أي نصيحة تساعدني في حل الموضوع؟
🌿تعديل:
أخدت بنصيحة الناس، إنّي أعمل “وصاية” لأولادي اللي عندهم مشاكل.
(الوصاية معناها أن بيكون في خبير مالي هو اللي مسئول عن الفلوس….والفلوس دي بتتوزع عليهم في مواعيد معينة أو بشروط محددة).
قبل ما أعزمهم عندي عشان نتكلم في الموضوع، ابني اتصل بيا واعتذر عن تصرفاته. وكان باين عليه إنه حاسس بالندم على الكلام اللي قاله، واعترف إنه كان غلطان لما ضيّع ورث والدته.
المهم، طلبت منهم يجوا عشان أقولهم علي خطتي. زي ما قلت، ابني كان باين عليه الندم، لكن بنتي كانت لسة متضايقة مني.
قلت لهم إني هرجع لهم نصيبهم في الورث، لكن عشان هما أثبتوا إنهم مش بيعرفوا يديروا الفلوس كويس، هعمل ده من خلال وصاية. ووضحت إني هاتكلم مع محامي أو خبير مالي متخصص عشان يرتب الموضوع.
ابني اتقبل الخبر بشكل كويس جدًا وقال إن ده حل كويس. مش عارف إيه اللي خلاه يغير موقفه بالشكل المفاجئ ده، لكن زي ما قلت، باين عليه إنه صادق. كمان عرض إنه يبدأ يروح جلسات علاج نفسي عشان يتعالج من المخ**، وطلب مني ادفعله التكاليف، أنا وافقت (وطبعا لازم أتأكد إنه بيروح للمعالج ده فعلاً).
بنتي ما تقبلتش الموضوع خالص، يا ساتر. كانت أسوأ بكتير مما توقعت.
هي كانت غضبانة. وفضلت تقول اشمعني أخواتي هيبقي ليهم حق التصرف في فلوسهم وهي لاء.
حاولت أشرح لها إن إخواتها أثبتوا إنهم مسؤولين وبيعرفوا يتعاملوا كويس مع الفلوس.
قالت أن الكلام ده مش مقبول بالنسبة لها.
هي شايفة أنها مضيعتش الفلوس ولا حاجة. وعادي من حقها تسافر. وكان عندها الجرأة إنها تشتمني وتغلط فيا بكلام جارح جدًا، واتهمتني إني بأذيها وعايز أذلها!!
قلتلها خلاص بما إني قربت على التقاعد، يبقي لازم أنا كمان أستمتع بالسفر. ويمكن بقة أصرف”ورثها” اللي أنا اشتغلت بيه طول عمري واتفسح أنا كمان.
انفعلت وخرجت من البيت وما كلمتنيش من وقتها.
أنا فخور جدًا ب ابني عشان اتقبل الموضوع. ومُحبط جدًا من بنتي.
بصراحة بفكر جدّيًا إني أصرف “نصيبها” علي نفسي وأسافر.
🌿تعديل:
بناءً على تشجيع الناس الطيبين هنا، حجزت تذاكر ل”هونج كونج” بعد كام أسبوع. هستخدم كل الإجازات اللي عندي علشان أسافر في جولة في الصين.
من زمان وأنا نفسي أزور البلد دي ودلوقتي أنا متحمس جدًا!
(القصة حقيقية مترجمة من ريديت..أصحاب القصة أجانب).