الموضوع معقد جدًا وأنا مش عارف أعمل إيه 😓
أنا ست عندي بنتين بيتعاملوا مع بعض كويس، لكن بصراحة هما مش قريبين من بعض قوي.
بنتي الكبيرة متجوزة “ستيف”، والصغيرة متجوزة “آدم”.
ستيف وآدم شخصياتهم مختلفة عن بعض خالص، ومن أول يوم اتقابلوا فيه وهما بيكرهوا بعض.
ستيف بيشتغل عدد ساعات قليلة لأنه بيحب يقضي وقت كبير مع بنتي. هما بيحبوا قوي السفر وعايزين طول الوقت يتفسحوا ويشوفوا أماكن مختلفة في أمريكا. هو متعود يصرف ببذخ، وعلي طول بيقول إنه مش هياخد فلوسه معاه لما يموت.
آدم بقه بيشتغل ليل ونهار. هو مدير تنفيذي في شركة، وعنده بيزنس تاني وربنا كرمه وعنده عقارات كتير، هو مؤمن بفكرة إنه لازم يكسب أكبر قدر ممكن من الفلوس وهو شاب عشان يقدر يطلع علي المعاش بدري.
ستيف شايف إن آدم بيشتغل في الشركة زي العبد، وبيقول له أمثالك هما اللي خربوا المجتمع.
وآدم شايف إن ستيف كسلان، وقال له بصراحة إن الناس اللي زيه، اللي بيعملوا مجهود قليل وعايشين علي الشحاته، هم السبب في مشاكل المجتمع.
علي فكرة، هما مش وحشين خالص بالعكس، الاتنين كويسين جدًا، والحمد لله بيعاملوا بناتي كويس.
أنا طلعت علي المعاش السنة اللي فاتت بسبب حالتي الصحية، جوز بنتي “آدم” بنى لي بيت جميل عشان أعيش فيه مرتاحة. وأنا عملت كل حاجة في البيت الجديد على ذوقي.
طبعًا آدم هو صاحب البيت، وهو اللي بيدفع كل الفواتير، وما بياخدش مني إيجار غير “دولار” واحد بس في الشهر. هو اتفق معايا إنه محدش غيري ينفع يعيش في البيت، وكان واضح جدًا بخصوص النقطة دي.
للأسف ستيف اضطر يسيب شغله، ودلوقتي هو وبنتي الكبيرة عايشين على مرتبها بس. وطبعًا الموضوع صعب جدًا. بنتي الكبيرة كلمتني وهي بتعيط، وقالت لي إن الفلوس اللي معاهم قربت تخلص، ومش هيقدروا يدفعوا إيجار الشهر الجاي. وسألتني لو ممكن ييجوا يعيشوا معايا لحد ما ستيف يلاقي شغل جديد.
أنا لو معايا فلوس زيادة، كنت ساعدتهم يأجروا شقة تانية. بس الفلوس اللي معايا يادوب بتكفيني.
وفي النهاية، دي بنتي، ومقدرش أسيبها تترمي في الشارع، عشان كده وافقت أن هي وجوزها ييجوا يعيشوا معايا. بس عرفتهم إن ده وضع مؤقت. وحطيتلهم قواعد. وكمان عطيت لهم مهلة محدده.
أنا مكنتش فاكرة إن بنتي الصغيرة وآدم هيعرفوا، لأنهم عايشين في ولاية تانية، لكن للأسف بنتي أكتشفت.
هي شكت إن في حاجة غريبة لأن هي اللي بتدفع كل الفواتير والصيانة (من فلوس آدم). لما لاحظت إن استهلاك الفواتير زاد، كلمتني عشان تعرف السبب.
اضطريت أقولها الحقيقة، قعدت تزعق وقالت لي إني خنت ثقة آدم.
قلت لها إني أم، ومقدرش أشوف واحدة فيكوا في ظروف صعبة وماساعدهاش. وحكيت لها عن القواعد والمهلة اللي حطيتها، وطلبت منها تخبي على آدم ومش لازم تقول له.
للأسف قفلت السكة في وشي.
أنا مش عارفة إيه اللي هيحصل بعد كده.
عارفة إني مانفذتش الاتفاق، لكن كان عندي سبب قوي.
انتوا ايه رأيكوا؟
▪️تحديث:
أنا وبنتي لسه قافلين مع بعض دلوقتي.
اتكلمت معاها بكل صراحة وفتحت لها قلبي. قولت لها إني عارفة إني مانفذتش الاتفاق، بس غصب عني مقدرش أتخلي عن أختها. اتكلمنا لفترة طويلة، وفي النهاية وافقت إنها تخبي علي آدم.
قالت لي إنها هتدفع فلوس الفواتير الزيادة من جيبها عشان جوزها ما ياخدش باله.
واتفقنا إن أختها وجوزها هيقعدوا معايا 3 شهور بس، بدل ال6 شهور اللي كنا متفقين عليهم في الأول.
أنا محظوظة إن عندي بنت بالحنية دي.
