
الفرصة التانية 🌟💫
التاريخ 27 يوليو 2021:
أنا (31 سنة) كنت مرتبطة بواحد عمره (38 سنة) لمدة شهر تقريبًا. خرجنا مع بعض 7 مرات. في أول 3 أسابيع كان باين عليه انه متحمس جدًا. كان بيخطط للمقابلات، دفع حساب كل الأكل والحاجات اللي عملناها، وكان بيكلمني كل يوم. كنا بنتكلم بشكل جميل وكل حاجة كانت باين عليها إنها ماشية ناحية علاقة سعيدة جدا.
وبعدين، الأسبوع اللي فات لاحظت فجأة إنه بدأ يبعد عني شوية بشوية، وامبارح لما سألته إذا كان فاضي الأسبوع ده؟ بعتلي رسالة بيعتذر فيها وقال إنه شايف إننا مش هينفع نكمل مع بعض.
أنا ردّيت وأنا بعيط جامد: “ماشي! بالتوفيق!”
مسحت حسابي على Bumble (التطبيق اللي اتعرفنا علي بعض فيه). تقريبًا على طول بعد ما بعتلي الرسالة دي، لأني كنت خلاص محبطة وحزينة. لكن النهارده قررت أعمل حساب جديد. وبعد مادورت شوية، ظهر لي بروفايله، أكتشفت أن هو كمان مسح حسابه وعمل واحد جديد. مش فاهمة ليه، بس ده أكد لي إنه ما سبنيش علشان واحدة تانية.
بصراحة أنا لسه عندي أمل إن التطبيق يقترح عليه بروفايلي تاني!
عادةً لما حد يبرفضني، ، بقول كلمة واحده “بالتوفيق” وبكمّل حياتي عادي. لكن أنا حاسة إن الشخص ده مميز قوي. عارفة إن مفيش حاجة ممكن أقولها هتغيّر رأيه. لكن، بصراحة نفسي أبعته رسالة. بس يمكن استني أسبوع كمان أو اتنين.
عايزة أقوله أنا حسيت بإيه ناحيته، لأني ملحقتش أعمل كده. كنت مخططة أقوله الأسبوع ده إن مشاعري ناحيته بدأت تكبر. هو كان راجل بمعنى الكلمة، لطيف، كريم، وخلاني أحس إني مميزة جدًا لأول مرة من زمان.
وبجد كنت حاسة إنه هو كمان كان بدأ يحس بمشاعر ناحيتي. هو أثبتلي ده بتصرفاته وكلامه، وكنت حسة إنه صادق.
مش عارفة ليه نهي الموضوع فجأة بالشكل ده، هو خلاني متلخبطة قوي. عارفة إن من حق الناس يغيروا رأيهم فجأة. من غير مايشرحوا. بس أنا عايزه أعرف السبب.
أنا بفكر ابعتله رسالة وعندي أمل أن الرسالة دي تخليه يغير رأيه أو على الأقل تفتح الباب إننا نتكلم أكتر عن اللي حصل.
أنا مش غبية. وعارفة إنه علي الأغلب هيقرأ الرسالة ومش هيرد.
بس أنا عايزه أعبر له عن مشاعري حتي لو فعلاً مردش. علي الأقل هرتاح أني خلاص قولت اللي جوايه.
تفتكروا لازم ابعت الرسالة ولا لاء؟
🌿تحديث:
كل الناس هنا بالاجماع قالولي لاء…أوعي تبعتي أي حاجه.
الناس كلها قالتلي بلاش تذلي نفسك وتجري ورا واحد مش عايزك..لو هو عايز يكمل أو مهتم هو اللي هيكلمني ولو مش عايز يبقي خلاص. كل واحد يروح لحاله.
خلاص أنا هسمع الكلام ومش هبعت له حاجة.
🌿 تحديث 6 يناير 2025 (بعد سنين):
من سنين نشرت هنا وسألت الناس والكل أجمع علي كلمة “لاء” وأنا فعلا سمعت الكلام.
بس بعد 3 شهور هو رجع يتواصل معايا تاني.
أول ماشوفت رسالة منه. قلبي وقع في رجلي. رجعنا نتكلم تاني وبعد 3 أيام عزمني علي العشاء.
لما خرجنا سألته انت ليه سبتني فجأه؟ وليه رجعت تكلمني تاني؟!
كنت عايزه أعرف هو صادق ولا بيحاول يلعب بيا. عشان لو حسيت انه أنسان ملاوع كنت هسيبه علي طول.
هو قالي السبب (بصراحة مش عايزة أقول السبب عشان الخصوصية). بس هو قال اننا مكناش متوافقين في حاجة معينة.
هو قال انه كان معجب بيا جدا بس خاف نتعلق ببعض أكثر ويحصل بينا مشكله بعد كده (بسبب الحاجة دي).
سألته وليه رجعت تكلمني تاني؟
قالي أنه لما قعد مع نفسه وفكر. حس أن علاقتنا مميزه قوي واننا ممكن نتغاضي عن الموضوع اللي كنا مختلفين فيه. وانه ممكن ميأثرش علينا في المستقبل (الموضوع مش كبير قوي ملوش علاقه بقرار الجواز أو انجاب الاطفال أو حاجه كبيره زي كده).
ببساطة، هو افترض حاجة وأنهى الموضوع بدري جدًا بدل ما يستنى ويتكلم معايا. هو اعترف بغلطته واعتذر أكتر من مرة.
كمان سألته إذا كان قابل حد تاني خلال الثلاث شهور اللي ماكناش بنتكلم فيهم؟ وقال لأ. وأكدلي انه مكنش عنده أي ميعاد في الفتره دي.
بصراحة اخترت أصدق كلامه. كنت بس عايزة أتأكد إني مش مجرد “بديل” وخلاص.
باختصار، إحنا بقينا مع بعض من وقت ما رحنا العشاء ده.
إحنا دلوقتي مخطوبين!!! و بنحب بعض بجنون، وهو فعلاً أعز أصدقائي. مامتي بتحبه، وحماتي بتحبني، وهو بيحب حيواناتي الأليفة وهما كمان بيحبوه، فكل حاجة تمام!
قررت أكتب البوست ده مش عشان أتباهى، لكن عشان أحاول أشجع الناس إنهم ما يستعجلوش ويقطعوا علاقتهم مع اللي بيحبوهم بسرعة، و كمان بلاش نرفض الشخص بسرعة لو قرر يرجع لنا تاني.
خطيبي كان باين عليه انه فعلا أنسان كويس. و رغم إني كنت معجبة بيه جدًا، بس لو كان ظهر منه أي علامات حمراء، كنت همشي على طول.
هو كان صريح ومحاولش يلف ويدور. وطلب مني أكون معاه وأنا الحمد لله مضطرتش أتحايل عليه أو ألمّح له حتي.
لو حد رجعلك، ما تفرضش على طول إنه راجع بنوايا سيئة، إلا لو كان عاملّك بطريقة وحشة من البداية.
لكن لو حد كان طيب معاك، حنين، كريم، وكده يعني، وممكن تكون الأمور ما مشيتش كويس أول مرة لسبب ما، مش هيضر لو جرّبتوا تاني!
بس مهم جدًا إنك تتأكد إن الشخص مش بيلعب بيك، ولو حسيت إن ده بيحصل، امشي فورًا!!
آسفة لو كلامي طويل وملخبط شوية! شكرًا إنك قريت!
أحنا دلوقتي مخطوبين ❤
🌿التعليقات علي ريديت:
(طبعا المحققين اللي في ريديت مسكتوش والفضول اشتغل وكانوا عايزين يعرفوا ايه السبب اللي خلاه يسبها أول مره 🤔 قعدوا يدورا في كل تعليقاتها وكل البوستات اللي كتبتها علي ريديت من أول ما أتعلمت القراءه والكتابة، وعرفوا أنها كانت قايله أن خطيبها بيشتغل “طباخ” في مستشفي.. وطبعا لازم ياخد تطعيم وقت كور/*ونا.. هي قالت أنها ضد التطعيم لدرجة أنها قعدت 8 شهور متقابلش مامتها وباباها بسبب موضوع التطعيم ده .. الناس شايفين أن غالبًا هو ده السبب).
(القصة مترجمة من ريديت..أصحاب القصة أجانب).