الفاصوليا بتاعتي!
(أنا متأكدة إن أي حد هيقرأ القصة دي هيحس إنها غريبة ومش منطقية، بس لما تعرف توقيت نزولها هتفهم هما بيعملوا كده ليه).
صاحب القصة بيقول:
مع كل اللي بيحصل دلوقتي، قررنا نخزن الأكل والحاجات الضرورية للبيت، وطبعًا كمان الأكل المعلب.
مراتي طلبت مني أشتري 30 علبة فاصوليا و15 علبة حمص. اعتقدت إن دي كمية كبيرة، بس مش مشكلة، إحنا أكيد هنستخدمها كلها وهتكفينا لفترة طويلة.
امبارح كنت بفتح دولاب المطبخ أدور على الفاصوليا المعلبة لأني قررت أعملها مع الفلفل الحار. استغربت إن مفيش ولا علبة موجودة! إيه ده؟ هي راحت فين؟
سألت مراتي عليها، قالتلي إنها دفنت كل علب الفاصوليا في الغابة!
في البداية كنت فاكرها بتهزر، لكن اتضح إنها بتتكلم جد وأكدتلي إنها فعلًا عملت كده!!!
قولتلها: “ممكن تشرحيلي السبب؟”
قالتلي إنها خايفة الأمور تسوء أكتر، وإنه ممكن نتعرض – لا قدر الله – للسرقة، وخايفة على الفاصوليا من الحرامية!!!
قولتلها: “اللي بتقوليه ده سخيف جدًا ومش منطقي.”
غضبت مني وقالتلي إنها “بتحمي فاصوليتنا”!!
وأكدتلي إن الفاصوليا مدفونة بشكل آمن في الغابة ورا مجمع الشقق اللي إحنا عايشين فيه، وإن إحنا لو احتجنا فاصوليا في يوم من الأيام، نقدر نروح “المخبأ”، نحفر، ونطلع علبة أو اتنين. لكنها بتفضل نحتفظ بيهم دلوقتي للطوارئ.
قولتلها: “طيب، وإحنا ليه ندفن الفاصوليا بس؟ ليه مش بنخبي كمان الحاجات الغالية والمهمة اللي عندنا؟
قالتلي إن الأكل المعلب هيكون أغلى قيمة من أي حاجة تانية بعدين، وبما إننا بنقدر نطلب أكل طازة كل أسبوع أونلاين من السوبر ماركت، يبقى من المنطقي إننا نفضل نحزن فاصوليا تاني، وهي ناوية تكمل تخزين علب أكتر في الغابة كل أسبوع!!!
طبعًا الموضوع ده كان جنوني بالنسبة لي، وكنت فعلًا مضايق، فقولتلها: “من فضلك، قوليلي دفنتيها فين؟”
رفضت تقولي على المكان، وقالتلي إنها خايفة تقولي علشان ما أروحش أحفر في الغابة وأطلعهم.
قولتلها: “أنا أكيد هعمل كده!”
قالتلي: “مستحيل أعرّض الفاصوليا للخطر أبدًا!”
قولتلها: “إنتي اتجننتي خلاص!”
زعلت مني ومخصماني من امبارح.
أنا شايف الموضوع ده سخيف جدًا وعايز بجد أدور على العلب وأطلعها.
تفتكروا لازم أقنعها تروح للعلاج؟ هل اللي عملته ده طبيعي؟؟؟
🌹 تحديث بعد يومين
قررت إني مش هستسلم، ولازم أعرف مكان الفاصوليا.
أنا مش من النوع العنيد، بس مش عارف ليه الموضوع ده كبر في دماغي. وصممت إنها لازم تقولي الفاصوليا اللي أنا دافع ثمنها فين؟
بصراحة، كنت غبي لما عملت كده.
قولتلها: “لو ما قولتيش المكان فين دلوقتي، أنا هسيب البيت وأمشي!”
اتخانقنا، وأنا فضلت مصمم.
بصراحة مش عارف ليه بالغت قوي كده. كنت أخليها تخبي الفاصوليا وخلاص، أو حتى كنت سيبتها تهدى شوية، بس أنا معملتش كده، وفضلت أضغط عليها.
قولتلها: “يلا نروح الغابة دلوقتي، أو ارسميلي خريطة لمخبأ الفاصوليا!”
في النهاية، للأسف، انفصلت عني.
أنا دلوقتي حزين، ده غير كمان إني دلوقتي مجبر أدفع كل الإيجار لوحدي بدل النص بس، ودي مشكلة مادية كبيرة بالنسبة لي…
🌹 انتهت الرسالة
القصة دي اتكتبت في شهر 4 سنة 2020 مع بداية جائحة كوفيد (كورونا).
طبعًا في الوقت ده الناس كلها كانت خايفة، وكانوا بيخزنوا الأكل بكميات كبيرة. ده حصل في مصر وكمان في الدول الأجنبية. (أنا فاكرة وقتها شوفت فيديو لسوبر ماركت في أمريكا، وحرفيًا الماركت كان فاضي، وكل الرفوف والتلاجات مافيهاش أي بضاعة!)
أعتقد إن البنت اللي في القصة كانت خايفة جدًا، والموضوع كان عاملها هلع. وطبعًا مش كل الناس بتتعامل مع الأزمات زي بعض.
🌹 الناس على ريديت كتبوا تعليقات مضحكة جدًا على القصة دي، هترجم شوية منها:
🌷 تخيل إن جارها واقف في البلكونة بليل، وبعدين يشوفها بتتسحب وماسكة كيس تقيل، وبتتصرف بغرابة، ورايحة الغابة ومعاها مجرفة… وبعدين يلاقيها راجعة من غير الكيس! ياااه على المفاجأة! 😂
🌷 الراجل تعب نفسه علشان يعرف مكان الفاصوليا، وعلى الناحية التانية في الغابة، في طفل اسمه جاك اكتشف العلب وأخدها!
🌷 لما أطفالك يسألوك عن 2020، افتحلهم الرسالة دي!
🌷 دلوقتي هو معندوش لا زوجة ولا حد يساعده في الإيجار، أراهن إنه بيتمنى لو يقدر يعرف مكان الفاصوليا! 😂
🌷 هو مش ذكي، أنا لو مكانه كنت هشتريلها علب جديدة، وأستنى لما تروح تدفنهم، وأمشي وراها من غير ما تحس علشان أعرف مكان الفاصوليا!
🌷 راجل عجوز خلاص بيموت، هتجيله رسالة في البريد، ولما يفتحها هيكتشف إنها خريطة لكنز الفاصوليا المفقود!
🌷 أنا عايز أعرف التحديث… إيه اللي حصل للفاصوليا؟؟؟
🌷 أنا فاكر إني وقتها كنت في سوبر ماركت وكان تقريبًا فاضي، وفي واحدة كانت بتشتري 12 جالون حليب! كنت عمال أضحك من التوتر، ومش عارف أسيطر على نفسي، عمال أضحك طول الوقت وأنا بشوف إيه الحاجات اللي ناقصاني علشان أشتريها… بعد كده بكيت 3 أيام من الخوف! علشان كده أنا فاهم كويس سبب دفن الفاصوليا.
🌷 وفي ناس عرضوا على صاحب المشكلة إنهم يقابلوه في الغابة ومعاهم جهاز كشف المعادن علشان يعرفوا مكان الفاصوليا!
🌷 بعد ألف سنة، مجموعة علماء بيحفروا في الأرض، وهيكتشفوا علب غامضة من القرن الواحد والعشرين! 😂
🌷 مرت سنين ولسه في أسئلة غامضة محدش جاوب عليها: الفاصوليا اختفت فين؟ هل عرف مكانها في النهاية؟ هل مراته استسلمت وسابته الخريطة؟
🌷 هو استعجل، لو كان استنى شوية كانت هتظهر شجرة فاصوليا جديدة في الغابة! 😂
