اتحولت للتحقيق علشان بغني بالصيني 🎤🎶 😁 قصة

قصص

اتحولت للتحقيق علشان بغني بالصيني 🎤🎶 😁

🌸ملحوظة صغيرة قبل ما القصة تبدأ :

(الاحداث دي حصلت في 2020 وقتها الصينيين كانوا بيتعرضوا لكلام سخيف).

دي حاجة غريبة بصراحة،

كنت في مبنى شركتي و بكلم مراتي في التليفون وبهزر معاها وغنيتلها أغنية صينية (بصوت واطي)، كان هزار خاص بيني وبينها.

لكن حد سمعني وأنا بعمل كده وبلغ إدارة الموارد البشرية (HR) وقال إن اللي عملته كان سخرية من الصينيين (وبسبب الظروف الحالية، الموضوع اتاخد بجدية كبيرة).

إدارة الموارد البشرية قررت اني أفضل في البيت لمدة أسبوع لحد ما يحققوا في الموضوع.

قبل ما يبلغوني بالقرار، سألوني لو كنت اتكلمت “بطريقة صينية” مع حد على التليفون، كنت مستغرب من السؤال بصراحة، وقلت آه.

حاولت أوضح أكتر، لكن اتقال لي بشكل حاد جدًا إني أمشي فورًا وما أرجعش غير لما يتواصلوا معايا. وكمان قالوا إن أي محاولة مني إني أوضح موقفي لأي حد قبل ما التحقيق ينتهي يعتبر محاولة للتلاعب في التحقيق.

فسمعت الكلام وخلاص.

يوم الاتنين، اتصلوا بيا علشان “مقابلة”، طول الفتره دي ماكنتش اتواصلت مع أي حد خالص، لما وصلت للشركة لقيت موظف جديد قاعد على مكتبي وكل حاجتي مختفية.

أخدوني على مكتب وقالوا لي إن ده “جلسة استماع للفصل” (مين بيستخدم الكلام ده أصلاً؟) والسبب هو السلوك العنصري خلال فترة الاختبار بتاعتي.

سألتهم: “هل يعتبر عنصري أو مخالف لسياسة الشركة إني أتكلم وأهزر مع مراتي بلغتها الأم وأنا في استراحة؟”

10 ثواني من الصمت، والناس بدأوا يبصوا لبعض في الأوضة، والتوتر كان واضح بينهم. في اللحظة دي، المدير التنفيذي سأل: “تقصد إيه؟”

وضحت إن مراتي صينية، وإحنا بنتكلم مع بعض بالصيني، وعيلتي من أمي كمان صينيين، وكمان عندي أصحاب كتير صينيين، وابني نصه صيني. أي حد بيشتغل معايا بشكل مباشر عارف الكلام ده.

سألوني ليه ما قلتش الكلام ده من الأول، وإن الشركة خلاص جابت حد جديد مكاني.

في اللحظة دي…المدير التنفيذي بدأ يتكلم بانفعال أن في موظفيين سابوا شغلهم و بدأوا يدربوا الموظف الجديد، وكلام كتير عن إني اتسببت في خسارة الشركة فلوس ووقت.

في الآخر سألني: “خلال الإجازة اللي قضيتها الأسبوع ده كله ، ما فكرتش تبعت إيميل أو تمسك التليفون اللعين وتشرح الحقيقة؟”

قولت اللي حصل مع إدارة الموارد البشرية وانهم قالوا لي ما أتواصلش مع أي حد لأي سبب.

طلبوا مني أخرج من المكتب وأقعد برة.

بعد حوالي ساعة، الناس اللي كانوا في الاجتماع بدأوا يخرجوا واحد ورا التاني، وكانوا غضبانين بشكل واضح جدًا، وكذا واحد منهم بص لي، لكن محدش قال ولا كلمة.

بعد كده دخلت واتكلمت مع المدير التنفيذي، والحمد لله خصصوا لي مكتب جديد، ورجعت للشغل.

الشخص المسؤول عن الموارد البشرية ما جاش الشركة من وقتها…

(القصة حقيقية مترجمة من ريديت).

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!