إسطبل الخيول 🐴
أنا بنت عمري (25 سنة) بشتغل في إسطبل خيول.
يوم السبت بندي دروس للأطفال المبتدئين اللي عايزين يبدأوا يتعلموا ركوب الخيل.
الأطفال وأهاليهم بيحضروا لمدة ساعة ونص كل سبت.
لما الأطفال بيجوا بنقولهم 3 قواعد ضروري يلتزموا بيها:
1. ممنوع الجري في الإسطبل أو حوالين الخيل.
2. ممنوع الصريخ في الإسطبل.
3. ما تقربش جنب الحصان أبدًا أو تقف وراه.
المجموعة الجديدة اللي شغاله معايا دلوقتي كان تالت درس ليهم النهارده. غالبًا الأطفال بيكونوا شاطرين وبيسمعوا الكلام، ولو ما التزموش الأهالي عادةً بيتدخلوا وبيخلوا ولادهم يهدوا.
لكن عندي ولد عامل مشكلة من أول يوم. هو صوتة عالي، بيجري، وبيعمل شوشرة كتير وبيعطل الدنيا جدًا.
بعد أول درس، كلمت مامته على جنب وطلبت منها إنها تساعدني و تهديه، ولو هو رافض يسمع كلامي يبقى مفيد جدًا لو هي نبهته أو زعقت له.
واضح إنها ما أخدتش بالها أو ما اهتمتش بكلامي، لأن الأسبوع اللي فات حصل نفس المشاكل.
قلت له لو ما سمعش الكلام مش هيقدر يركب الخيل. مفيش فايده برضة الولد عمل أزمة وزعق، ومامته ما ساعدتش في حاجة.
النهارده كنت متوترة من فكرة تعليمه، ومش عارفة إذا كان صبري خلاص بيخلص ولا هو كان أسوأ من العادي، بس بجد كان بيجنني.
فجأه لمحته بيجري بأقصى سرعته ناحية حصان واقف. قبل ما يوصل قريب من الحصان، قدرت أمسك دراعه وأوقّفه. شكله اتخض مني لأن صوته كان عالي وصرخ.
مامته جت تجري عليا، مسكت ابنها، وابتدت تقول لي اوعي تلمسيه تاني وإزاي أعمل كده في ابنها.
حاولت أشرح لها إن اللي ابنها عمله خطر علي نفسه وعلى الأطفال اللي حواليه. بس هي ما سكتتش وبدأت تتخانق معايا، وأنا بصراحة كنت زهقت جدًا، فقلت لها لو ابنها حصل له حاجة في الإسطبل ده لأنه خوّف حصان، يبقى ده ذنبها هي.
هي اتعصبت جدًا واخدت ابنها ومشت وهي غضبانة.
باقي الأهالي شكلهم كانوا مرتاحين إنها غالبًا مش هتيجي تاني.
لكن لما حكيت لواحدة صاحبتي عن اللي حصل، قالت لي إني مجنونة جدًا علشان قلت كده للأم. هل أنا غلطانة؟
🌿للناس اللي بتسأل: الولد عمره 7 سنين. والاطفال كلهم في عمر من 6 الي 8 سنين.
🌿يوم الاتنين، مديرة الإسطبل جالها مكالمة من الأم. كانت متعصبة جدًا وبتطلب استرداد الفلوس اللي دفعتها في الدروس التلاتة وكلام كتير زي كده.
أنا كنت شارحت لمديرتي كل اللي حصل قبل كده، فمديرتي قالت للأم إنها مش هترجع لها الفلوس لأنها وافقت على ده لما سجلت عندنا “ممنوع استرداد الفلوس”.
كمان قالت لها إن ابنها خطر على نفسه وعلى اللي حواليه، وعشان كده مش مرحب بيه يرجع تاني.
الأم اتجننت وابتدت تصرخ وتشتم قبل ما تقفل السكة.
عدّى أسبوعين هاديين تمامًا قبل ما الأمور تتقلب.
أول حاجة حصلت إننا وصلنا الإسطبل الصبح ولقينا كل الاحصنة خرجوا من المرعى بتاعهم. الاحصنة عندنا عايشين “حرين” بمعنى إنهم بيكونوا برة طول الوقت. بس طبعا فيه سور حوالين المرعي.
بطريقة ما، كلهم هربوا، لكن لحسن الحظ لقيناهم في الغابة القريبة من الإسطبل.
افتكرنا إن يمكن حيوان بري دخل المرعى وفزعهم، يمكن ذئب مثلا؟ رغم إن الذئاب مش بتظهر كتير عندنا، بس لمحنا واحد قريب قبل كده، فمش مستحيل يعني.
فحصنا السور، وصلحناه، وكل حاجة بقت تمام. ما فكرناش كتير في الموضوع. لحد ما الأمور بدأت تتصاعد.
بعدها بكام يوم بليل، جات لي مكالمة إن الكوخ اللي الاحصنة الصغيره أحيانًا بيباتوا فيه مولّع نار! كان الموقف مرعب جدًا.
الحمد لله الاحصنة الصغيرة ما كانوش جوة وقتها، بس واضح إن حد كان عايز يأذيهم. (الدنيا بتكون ضلمة جدا بليل علشان كده الشخص ده مأخدتش باله انهم مش جوه الكوخ).
في نفس اليوم، اشترينا كاميرات وبلغنا الشرطة طبعًا، بس ما كانش في دليل علي أي حاجة.
الشرطة قالوا لنا إن غالبًا اللي عمل كده شوية أطفال لأن مؤخرًا كان في حريقة متعمدة في صندوق قمامة وكمان في كوخ فاضي في جنينة.
ركّبنا الكاميرات وبدأنا نعمل”نظام نوبات” ونسهر في الإسطبل بالليل. لمدة أسبوع ونص ما حصلش أي حاجة، فوقفنا السهر هناك.
بعد كام يوم، وصلت الصبح ولقيت جروح على كام خيل. حد دخل الإسطبل بالليل و أذى الخيول فعلاً!!
كلمت زمايلي والشرطة، ولما شغلنا تسجيلات الكاميرات، ظهر في الفيديو راجل وهو بيدخل وبيخرج من الإسطبل. تخيل مين؟! جوز الأم المجنونة!
الشرطة قبضت عليه، وإن شاء الله هما الاتنين ياخدوا جزاءهم.
الأسابيع اللي فاتت كانت مجنونة جدًا ومرهقة، لكن الحمد لله أنا بخير، والخيول كمان بقت أحسن.
(القصة حقيقية مترجمة من ريديت)
#حواديت_قصص
#قصص
