
أنا خلاص صبري نفد 😤⌛
أنا (32 سنة) و مراتي (34 سنة) متجوزين من 8 سنين والحمد لله جوازنا سعيد .
عندنا طفلين، واحد 6 سنين والتانية 4 سنين. لحد فترة قريبة كنا قادرين نقسم شغل البيت وتربية الأولاد بينا بشكل كويس واحنا الاتنين كنا مرتاحين وراضين.
من حوالي 6 شهور، خوارزميات تيك توك وإنستجرام عند مراتي بدأت تعرضلها محتوى أغلبه بينتقد الرجالة بشكل عام، خصوصًا في موضوع “مشاركتهم” في الجواز، تربية الأطفال، وشغل البيت.
أنا معنديش مشكلة مع المحتوي الكويس المفيد، بس المحتوى اللي شوفته على أكونت مراتي مزودها قوي، وبيعمم إن كل الرجالة كسلانين ومهملين.
في الأسابيع اللي فاتت، مراتي بدأت تنزل محتوى خاص بحياتنا الشخصية، وبتصورني كأني زوج وأب مهمل ومش مهتم، وكأني مش بساعد في أي حاجة في البيت.
اتصدمت بصراحة وحسيت بجرح كبير لما شوفت البوستات دي على حسابها، خصوصًا إن عندها اصحاب مقربين وأفراد من العيلتين بيتابعوا حسابها، وبدأوا يكلموني ويسألوني لو كان فيه مشكلة؟!.
المشكلة إن اللي بتنشره ده اصلا مش حقيقي تمامًا، و اللي مضايقني قوي إن تفاصيل حياتنا الشخصية بقت معروضة قدام كل اصحابنا وأهلنا، ده غير الناس الغريبة اللي بقوا يتفاعلوا مع المحتوى ويعلقوا عليه.
حاولت أتكلم معاها في الموضوع، أخدت كلامي باستهتار واتهمتني إني مش حاسس بالمعاناة اللي الستات بيمروا بيها، وإنّي مش فاهم اد ايه هي محتاجة تفضفض!!
بصراحة فقدت أعصابي تمامًا قدام الاطفال. قلتلها إنها عاملة فيها “بطلة” وكل همها تعمل شهرة من الستات السامة اللي على الإنترنت بدل ما تعيش الحياة الحقيقية. و قلتلها إنها جاحدة وبتنشر كلام كذب عني وعن جوازنا.
أول ما قلتلها الكلمة دي وشوفت رد فعلها على كلامي، وكمان لما سمعت بنتي بتعيط، ندمت على اللي قلته فورًا.
بصراحة شكلها كان حزين قوي، ومن وقتها مخصماني ومش عايزه تكلمني، غير بس كلام بسيط جدًا عن الأكل أو حاجات بخصوص الأطفال.
طبعا من حقي أزعل جدا من اللي بتنشره على السوشيال ميديا خصوصا انه كدب، لكن حاسس إني زودتها شوية.
مش عارف بصراحة أزاي اتكلم معاها في نفس الموضوع من غير خناق؟
ياريت تساعدوني.
🌿تحديث:
قعدنا علشان نتكلم في الموضوع تاني، بس المرة دي بعيد عن الاطفال، وكنت مقرر أني أتحكم في أعصابي.
بدأت الكلام و أكدت عليها إني مش عايز الحوار يتحول لخناقة، كل اللي عايزه إني أفهم سبب تصرفاتها دي، وأشرح لها قد إيه الموضوع مأثر عليا، وكمان مأثر على نظرة الناس ليا.
بس تقريبًا أول ما بدأت أتكلم، قطعتني تمامًا ورفضت تكمل النقاش!!
مش عارف بصراحة لو اللي بتعمله ده “عند” وخلاص ولا هي عندها مشكلة معينة، ولا انا اللي اتجننت ومش حاسس بنفسي!!
باختصار، قالت إن كل حاجة بتنشرها على السوشيال ميديا حقيقية، وإن مش من حقي أتحكم في اللي بتقوله أو بتعمله علي الانترنت.
صممت أن كل ده مش حقيقي، وأنها ظلماني، وكنت محضر قايمة بكل الحاجات اللي أنا بعملها في البيت.
🌿اولا الحاجات اللي أنا بعملها:
🌸أنا اللي بودي الاطفال المدرسة
🌸أنا اللي برجعهم البيت.
🌸بطبخ العشاء.
🌸بغسل الاطباق بعد العشاء.
🌸بقص العشب “بياخد مني ساعة كل اسبوع”
🌸بغسل هدومي وهدومها.
🌸بشتري الاغراض من السوبر ماركت.
🌿الحاجات اللي مراتي بتعملها:
🌸كنس ومسح البيت مرتين في الاسبوع.
🌸غسيل ملابس الاطفال والمفروشات والملايات.
🌸تنفيض التراب.
🌸تجهيز وجبه الفطار.
🌸تجهيزات وجبات خفيفة للاطفال.
🌸تجهيز وجبة الغداء.
🌸اداره المصروفات “هي بتشتغل اصلا في الحسابات”.
🌿حاجات بنعملها سوا:
🌸استحمام الاطفال.
🌸تطبيق الملابس.
🌸تنضيف الحمام.
🌸تنضيف البيت مع بعض مرة في الاسبوع
مفيش فايده قعدت تتفهه من الحاجات اللي بعملها وتتريق وتقولي..ياه…ياحرام ده انت بتتعب قوي وانت بتسوق العربية علشان توصل الاولاد. وياعيني غسلت الاطباق..لا..لا…لازم نعملك كيكه علشان نحتفل بالمناسبة دي!!
كل كلامها ان اللي الحاجات بعملها دي أقل حاجه ممكن تتعمل وهي البطلة الشهيدة اللي شايله البيت علي أكتافها.
قولتلها بدل ما نقعد نتخانق وخلاص قوليلي اللي الحاجات اللي انتي عايزاها بالظبط؟!
قالتلي متعملش نفسك مش فاهم وغلبان، انت عارف كل حاجة كويس.
في اللحظة دي مراتي كانت عصبية جدا وقعدت تخبط ايديها علي التربيزه ومسكت كبايه وحدفتها علي الارض!!
مراتي خرجت عن السيطره ومش عايزه تهدي. وبصراحة انا تعبت علشان كده قررت اسيب البيت واروح عند واحد صاحبي لحد ماتهدي “قولتلها هروح فين”
صحيت الاطفال وجهزتهم علشان اخدهم معايا، بعد ما لبستهم وانا ماشي في الممر فجأة مراتي ضر**بتي بكل قوتها علي ضهري!!!
كانت بتصرخ وتقول عايز تاخد الاطفال وتمشي علشان تطلعني مجنونة.
الاولاد كانوا خايفين جدا، ركبتهم العربية ومشيت.
رحت لصاحبي قعدت عندة شويه والاطفال كانوا بيلعبوا في الجنينة مع الكلب. شوية ولقيت البوليس جاي!!
الحمد لله مراتي متهمتنيش اتهامات مجنونة. كل اللي قالته اني اخدت الاطفال ومشيت من غير اذنها!
الشرطه قالولها من حقي اخد الاطفال عادي علشان انا والدهم دي مش تهمه اصلا. بس هما وصلوا عند صاحبي علشان يتكلموا معايا.
مرضتش اقولهم علي اللي هي عملته معايا، بس خلاص دي النهاية مستحيل أكمل معاها تاني.
بكره هتصل بمحامي علشان يبدأ في اجراءات الطلاق وهحاول علي اد ما اقدر انهي كل حاجة بهدوء.
🌿تحديث:
اتكلمت فعلا مع محامي ونصحني اعمل فيها بلاغ وكنت خلاص هكمل في الاجراءات.
بعد كده حماتي اتصلت بيا وقالتلي انها قلقانة جدا علي بنتها وقالت ان اللي بيحصل لمراتي دلوقتي شبه النوبات اللي كانت بتجليها زمان!!
اتضح أن حماتي كانت بتعاني من “اضطراب ثنائي القطب”بس حالتها كانت كويسة ومن سنين مظهرتش عليها أي اعرض.
اللي فهمته بعد كده أن مراتي اتصلت بمامتها وكانت بتبكي وحكيتلها كل اللي حصل وقالت لمامتها انها خايفه اني اسيبها واخد منها الاولاد.
مامتها عايشة في مدينة تانية بعيد، بس قررت تحجز طيران وتيجي بسرعة وقالت لمراتي تروح لأقرب مستشفي.
في المستشفي حولوها لطبيب نفسي.
اتكلمت مع حماتي لفترة طويلة، وبدأت تحكيلي عن النوبات، وإزاي بتظهر، وبصراحة، الكلام اللي قالته شبه جدًا اللي بيحصل لمراتي دلوقتي.
على حسب كلامها، الاول بتركز على حاجة صغيرة أو مش مهمة، وفجأة غضبها بيزيد، وبعدها بيجليها أفكار تانية كتيرة قوي وغريبة، وفي الآخر بتوصل إنها تتعصب على حاجة أصلًا ما حصلتش، لكن “احتمال” انها تحصل.
مش متأكد إني فهمت الموضوع كله، بس سمعتها للآخر، وقدرت جدًا إنها وضحتلي الصورة.
خلاص انا دلوقتي مش غضبان من مراتي. هي من وقتها متكلمتش معايا خالص. أعتقد انها سيباني براحتي.
هنشوف الايام الجايه هنعمل ايه.
🌿تحديث:
مراتي دلوقتي احسن, أخدت ادويه ورجعت لطبيعتها.
لسه الدكتور مش متأكد من التشخيص، أعتقد الموضوع بياخد وقت علشان يتأكدوا من حالتها.
حماتي ست عظيمة مش عارف من غيرها كنت هعمل ايه، هي اللي واقفه جنبي وساعدتني، بجد مش عارف اشكرها ازاي.
اللي فهمتة من الدكتور أن مراتي كان عندها “هوس” معين وللأسف الفيديوهات اللي كانت بتتقرج عليها زودت “الهوس” ده عندها لغاية ما وصلت للحالة اللي كانت فيها ومكنتش قادره تسيطر علي نفسها.
الدكتور طلب منها متابعش اي حاجه علي وسائل التواصل دلوقتي وتتفاعل بس مع الناس اللي حوليها وبيحبوها.
المشكلة ان مراتي دلوقتي حزينة وحسه بالذنب وعايزه تعوضني.
أنا قولتلها اني بحبها وخلاص بجد مش زعلان.
مراتي بتحاول علي قد ما تقدر تبينلي اد ايه هي بتحبني” بكل لغات الحب”
أنا مش عايزها تضغط علي نفسها وعايزها بس تركز علي علاجها. أنا دلوقتي متفائل وحاسس ان كل حاجة ان شاء هتكون أحسن. ومـتأكد أن احنا هنعدي المحنة دي سوا.
هي مراتي حبيبتي وأنا لسة بحبها ❤
(القصة حقيقية مترجمة من ريديت، اصحاب القصة أجانب).