أنا اتعلمت الدرس!!!
أقرب صديقة ليا، سارة (26 سنة)، وجوزها مات (28 سنة)، حطوني في موقف صعب جدًا مع خطيبي جاك (30 سنة).
أنا أعرف مات من وأنا صغيرة، كان جاري وكنا أصحاب لحد ما. أتعرفت علي سارة. كانت زميلتي في الجامعة، وصاحبتي القريبة.
لما عرّفت سارة على مات، حصل توافق بينهم وبدأوا يخرجوا مع بعض. كنت مبسوطة إنهم حبوا بعض، بس كنت متضايقة شوية إني بقيت الشخص التالت اللي دايمًا مهمش، لأنهم كانوا مشغولين ببعض جدًا.
بعد ما اتخرجت، مات قطع علاقته بيا خالص، وده زعلني، بس كنت لسة صاحبة سارة، فكنت متقبلة الموضوع. كنت بشوف سارة كتير، لكن علاقتي بمات كانت سطحية، مجرد سلامات و بس.
سارة كانت ساعات بتحاول تخلينا نخرج كأزواج، أنا وهي وجوزها ومعايا شخص تاني، بس لاحظت إن شخصية مات بقت سيئة جدًا وكان بيبقى وقح وشايف نفسه عليا، لكن الحقيقة هو زوج محب ومخلص لسارة، فعشان خاطرها تجاهلت الموضوع.
لما اتخطبت لجاك، مكنش عندنا نية نعمل حفلة خطوبة. سارة كانت متضايقة إننا مش هنحتفل، فعملت تجمع صغير في بيتها عشان تفرحنا.
الحفلة كانت لطيفة، ولما كانت بتخلص، أنا وخطيبي رحنا نشكر سارة ومات على لفتتهم الجميلة. قبل ما نمشي. مات كان مش في كامل وعيه، فجأة سلم عليا وقال قدام خطيبي إنه مبسوط إني خلاص باستقر، ومرتاح إني هبطل اعجب بيه وأحط عيني عليه!!!
اتصدمت وقلت له ده مش حقيقي. ضحك وقال لجاك إني كنت دايمًا بجري وراه وهو تعب من كتر ما حاول يبعدني عنه 😲
جريت علي ساره و دخلتها في الموضوع وطلبت منها تحل المشكلة، هي قالت أن جوزها مش في وعيه وإنها واثقة فيا وعارفة إني مستحيل أعمل كده.
جاك خطيبي اتضايق جدًا ومشي. جريت وراه وحاولت أشرحله إن الكلام ده مش حقيقي، للأسف قالي إنه مش عايز يكون “الخيار التاني” لحد.
من ساعتها وهو مش بيكلمني ولا بيرد على مكالماتي😢
اتكلمت مع سارة كذا مرة عشان توضح الموضوع لجاك، لكن هي مش مهتمة.
مش فاهمة ليه مصدقين ده، وليه لسة مصحباني لو شاكة إني معجبة بجوزها؟
أنا كنت وصيفة في فرحها وعملت كل حاجة. وساعدتها كتير وقت الحمل، وكنت بقعد مع ابنها كذا مرة. عمرها ما بينت إنها شاكة فيا أو في تصرفاتي.
أنا حاسة بالإهانة إن الناس دي شايفين إني بحب شخص زي مات اللي شخصيته متعبه و مش مريحة.
محتاجة مساعدة عشان أقنع جاك إن الكلام ده مش حقيقي.
كمان زعلانة من جاك لأنه استسهل إنه يرمي علاقتنا بسبب كلام شخص مش في وعيه.
ومش عارفة أعمل إيه في علاقتي بسارة؟؟؟
🌹#تحديث
اتكلمت مع سارة تاني وسألتها ليه كانت شايفة إني معجبة ب مات؟
قالت لي لما عرفتهم ببعض في الأول كنت بتكلم عن مات بطريقة حلوة جدًا وبتكلم عنه بحماس، وهي فهمت من ده إني مهتمة بي.
قلت لها إني كنت بعزه عشان أعرفه من زمان، بس ده مش معناه إني عايزة أكون معاه.
قالت لي إن لما ابتدوا يخرجوا مع بعض، كنت بزعل كتير بسبب الموضوع ده
قلت لها إن أنا مكنتش بزعل إنهم ارتبطوا، لكن كنت بزعل لما كانت بتعمل معايا خطط وبعدين تكنسلها و تسيبني عشان تروح له، ولما كنا بنخرج مع بعض، مكنتش بحب أبقى الشخص التالت اللي محدش بيهتم بيه و كانوا بيتجاهلوني.
الموضوع مكانش له علاقة بيه كشخص، بس أنا مكنتش حابة أحس إن صاحبتي المفضلة بتبعد عني.
سألتها ليه ماقلتش حاجة من زمان؟
قالت إنها كانت “بتعرف تدير الموقف”. هي طلبت من مات إنه يبطل يتكلم معايا خالص، وكانت بتظبط الأمور بحيث نتقابل أنا وجوزها قليل جدًا أو ميكنش في أي فرصة نتواصل مع بعض.
دلوقتي بعد ما وضحت لها إن عمري ما كنت معجبة ب مات، طلبت منها تتكلم مع جاك وتقوله الحقيقة.
قالت إنها مش عايزة تكذب!!
ده ضايقني جدًا. يعني كانت عارفة تتجاهل الموضوع الوهمي ده لسنين وتلعب بيا، بس مش عايزة تتكلم مع خطيبي وتساعدني اصلح علاقتي.
قلت لها إني مش هكمل صداقتي بيها…..
لما فكرت في الموضوع، لقيت إني كنت دايمًا بعمل حاجات كتير عشانها وهي كانت بتستغلني بس، ومكنتش بتقدملي أي حاجة.
🌹#تحديث
كتبت رسالة طويلة ل جاك، شرحت فيها كل حاجة عن علاقتي بسارة ومات، وضفت صور محادثات بينا عشان أوضح موقفي.
أكدتله بأفضل طريقة أقدر عليها إني عمري ما كنت معجبة بأي حد غيره، وإنه الوحيد اللي اخترته.
بعد أيام من الصمت، جاك وافق إنه يقابلني ونتكلم. لما قعدنا مع بعض، قال إنه شايف الموضوع من ناحيتين. الأولى، إنه ممكن يكون كلام مات وسارة حقيقي، وهو مش عايز يكون “الخيار التاني” في حياتي.
الثانية، إنهم ناس أشرار وبيتلاعبوا بيا، وده بيدل على سوء تقدير كبير مني إني أختار صديقة بالشكل ده، وهو مش عايز الصفة دي في شريكة حياته.
يعني أي احتمال من الاحتمالين يوصل لنفس النتيجة إنه عايز يلغي الخطوبة.
قال لي إني كنت دايمًا بوصف سارة إنها من أهم الناس في حياتي، وكنت بروح أساعدها في أي وقت. مرة لغيت خطط معاه عشان أقعد مع ابنها اللي كان مريض، وده ضايقه وقتها لكن هو شاف إن ده جزء من شخصيتي الطيبة والمراعية، بس دلوقتي شايف الموضوع بمنظور مختلف.
عيطت واتوسلت له ماينهيش الخطوبة، قال إنه محتاج ياخد استراحة شوية.
فكرت في كلامه بعدها، وفعلاً لقيته عنده حق. أنا كنت صديقة متعلقة جدًا وصبورة بزيادة، وماخدتش بالي أن علاقتي بسارة كانت من طرف واحد.
كمان كنت بتنازل بزيادة في علاقتي بجاك. مكنتش عايزة أتجوز أو أخلف بدري، لكن وافقت على التوقيت اللي هو اختاره. كمان رفضت فرصة عمل كويسة جدًا فيها فلوس أكتر لأنه مكانش عايزني أسافر.
بحبه، لكن فعلاً محتاجة أطور من نفسي وأبقى أقوى.
رجعتله الخاتم ونهيت الموضوع.
رجعتله كل الهدايا اللي جايبها لي كمان. هو اتضايق من كده، لكن مكنتش مرتاحة أحتفظ بالحاجات الغالية دي. هو كان بيكسب أكتر مني وكان كريم جدًا معايا، لكن مقدرتش أحتفظ بالحاجات دي دلوقتي.
سارة كانت ساكتة شوية بعد اللي حصل، لكن بعد كده بدأت تتصل بيا.
تجاهلت مكالماتها كتير، لكن النهارده الصبح رديت عليها وقلت لها عن انفصالي. كنت بدور على تعاطف من صاحبتي القديمة، لكن هي كانت مهتمة أكتر تعرف لو كنت لسة هقعد مع ابنها في الليلة اللي هي ومات ناويين يسافروا فيها. لما قلت لها لا، اتعصبت جدًا.
عملتلها بلوك من كل حاجة.
خسرت خطيبي، وصاحبتي المفضلة، وعلاقتي بابنها اللي كنت بحبه جدًا، وكل ده في ضربة واحدة.
لكن برضه ممتنة لكل اللي ساعدوني أفهم إن الموضوع أكبر من أنه يتصلح، وساعدوني آخد خطوة وأبعد عن الفوضى دي.
(القصة حقيقية)
