أختي الجديدة 👩‍👧🦋💗 قصة

قصص

أختي الجديدة 👩‍👧🦋💗

أنا بنت مراهقة، لما ماما ولدتني كان عمرها 18 سنة بس.

أنا بشوف بابا 3 أيام في السنة (في الكريسماس). هو مش بيهتم بيا زي ما بيهتم بأولاده التانيين، بس أنا بحاول ما آخدش الموضوع بشكل شخصي.

جوز ماما (موجود في حياتي من وأنا عندي 4 سنين) هو طيب معايا جدًا، بس مش حاسة إنه هيهتم لو أنا مبقتش موجودة.

الحقيقة هو بيخلّي ماما وأخويا الصغير (ابن ماما وجوزها) مبسوطين جدًا وبيعمل حاجات كتير عشاني. وأنا بعتبره شخص مهم في حياتي.

ماما دلوقتي حامل، والمرة دي هيكون عندي أخت صغيرة!!

أنا حاسة بشوية غيرة، بس الحقيقة جوز ماما عمره ماقال أن هيكون عنده “أول بنت”، بصراحة أنا مقدره جدًا انه أحترم مشاعري، حتى لو مش حاسة إنه بيعتبرني بنته. كفاية أنه قدر أن الموضوع ده هيكون حساس بالنسبه لي.

ماما بقه متحمسة جدًا للبنت الجديدة، وبدأت تشتري هدوم وتجهز أوضة للبيبي معايا.

أنا شاطرة جدًا في الرسم، وبعمل لوحة جدارية لأختي الصغيرة.

ماما دايمًا بتقولي حاجات زي:

أنا فرحانة جدًا إني هقدر أدي للبيبي دي حاجات ماكنتش قادرة أديهالك، وإنها محظوظة عشان هي مش مضطره تبقي لوحدها المره دي، وكمان متحمسة جدًا إنها تشوف جوزها أب مرة تانيه.

أنا عارفة إني أنانية شوية، ومش عايزه حد يفكر إني أنسانة وحشة، بجد أنا عايزة ماما تكون مبسوطة. بس لما بتقول حاجات زي كده، بحس إني مش مهمة ومليش قيمة و إني عبء عليها. وبعدين ببدأ أحس بالذنب عشان أنا فكرت كده.

أنا عايزة ماما تعيش حياة كويسة. وكفاية إنها فضلت معايا وما سابتنيش زي ما بابا عمل.

الرسم بيرحني جدًا، عشان كده بقضي وقت كبير برسم في أوضة البيبي عشان أشغل نفسي أبطل تفكير.

النهارده على العشاء، ماما سألتني ليه ساكتة قوي كده، فتحت قلبي وحكيت لها عن مشاعري.

ماما زعلت قوي، وجوزها قعد يواسيها. قلت لها إني بحبها وفرحانة إنها أمي ومقدرة كل اللي هي عملته عشاني، بس برضه ماما فضلت زعلانة.

دلوقتي أنا حاسّة إني غلطانة، لأنني كنت عارفة إن ماما هتزعل لما أعبر عن مشاعري، رغم كده اتكلمت.

بالنسبة لي، إنك تجرح مشاعر حد عن قصد دي أسوأ حاجة ممكن تتعملها، بس في نفس الوقت بفكر إن الصراحة برضة حاجة مهمة، وده اللي مخليّني متلخبطة جدًا.

كممكن تقولولي رأيكم؟ هل أنا فعلاً غلطانة؟

أنا ناويه أعمل لماما وجوزها الفطار الصبح عشان أصلح الموقف، وهكمل شغل الأوضة طول الليل عشان أفاجئهم.

🌿تحديث بعد كام ساعة:

رحت عشان أتكلم مع ماما، بس لقيتها نايمة. وجوزها طلب يتكلم معايا.

قالي إنه كان عايز يتكلم معايا في الموضوع ده من زمان. ودلوقتي الوقت المناسب. قالي إنه بيحبني، وإن أنا بنته أكيد.

قالي إنه ماكانش عايز يفتح الموضوع ده معايا عشان محسش بمشاعر وحشة ناحية والدي الحقيقي.

وقال إنه عايز يتبناني، بس ماكانش عايز يحسسني بأي ضغط، لانه لو عمل كده، والدي الحقيقي هيضطر يتنازل عن حقوقه.

كمان كان قلقان إن والدي الحقيقي:

1. مايعترضش على الموضوع ويوافق بسهولة، وده ممكن يجرحني.

2. أو ممكن يعترض على الموضوع وده هيعمل مشكلة، وبرضه أنا اللي هزعل وهضايق.

عشان كده كان بيتجنب الكلام في الموضوع.

قلت له إني عايزاه يكون بابايا رسمي، وإني عايزة آخد اسمه.

قالي: “هنشوف نقدر نعمل إيه، ولو ما نفعش، ممكن نحط الاسمين مع بعض. وبمجرد ما تبقي 18 سنة هنغيره رسمي.

قالي إنه هيهتم بيا طول عمره وإنه فخور بيا جدًا، وإني عمري ما كنت ولا هكون عبء عليه

قالي إني مش محتاجة أكون لطيفة طول الوقت، وحتى لو كنت بنت مراهقة شريرة، هيحبني بنفس القدر اللي بيحبني بيه دلوقتي

قالي كمان إنه مش عايزني أحس بضغط ومش عايزني أبقي جليسة أطفال، لأنه حتى لو أخواتي صغيرين بالنسبة لي، أنا مش مسؤلة عن تربيتهم. هو اللي مسؤل أنه يربينا كلنا 💕

🌿تحديث:

كلمت ماما الصبح وقالتلي إنها مش زعلانة مني، بالعكس هي زعلانة من نفسها.

قالتلي إنها كانت بتتمنى لو تقدر تديلي أكتر، وأنا قلتلها إنها متخلتش عني، وده كفاية بالنسبة لي.

قالتلي إنها ماكانتش عارفة إزاي تبقى أم لما ولدتني، ومش عارفة إزاي أنا طلعت كويسة كده، بس هي مبسوطة. وقالتلي إني النهارده لازم أبقى أنانية عشان هي عايزة تروح تتسوق وتجيبلي حاجات كتير.

ماما قالتلي أن أنا أحسن حاجة حصلت لها. وإني لازم أروح لدكتور نفسي عشان انا عايزة أرضي الناس طول الوقت ودي حاجة غلط.

ماما وجوزها اتكلموا مع بابا الصبح، وهو وافق إنه يتنازل عن حقوقه.

أنا حزنت شوية وعيطت ومش عارفة ليه!!! مع إني كنت عايزاة يتنازل.

ماما وبابا حضنوني. وقالولي اننا هنحتفل بالمناسبة دي مع العيلة.

عيلة بابا (جوز ماما)، خصوصًا جدتي وجدي، مبسوطين جدًا إن أخيرًا هيبقى عندي اسم عيلتهم. وجدتي بعتتلي صور لسلاسل دهب عايزة تعملي عليها اسمي الجديد 📿

(القصة مترجمة من ريديت..أصحاب القصة أجانب).

 

قصص واقعية
قصص مكتوبة
قصص قبل النوم
قصص حب
قصص عربية
قصص اطفال
قصص رائعة
قصص وحكايات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!