أختبار الحمل 🤰🔬 قصص

قصة

أختبار الحمل 🤰🔬

أنا وجوزي (عمرنا 30 سنة) قررنا نعزم أصحابنا على الغدا (هما 8 أشخاص).

صاحبتي أستأذنتني لو ممكن نعزم كمان فردين، اللي هما “دوغ” ومراته “ساشا” (الاتنين في التلاتينات). أنا وجوزي عمرنا ما قابلناهم قبل كده، لكن كل أصحابنا اللي معزومين عارفينهم كويس، فقلنا ماشي.

كنا قاعدين مع بعض و “ساشا” طلبت تروح الحمام، قلت لها تستخدم الحمام اللي في أوضة نومي، لأن حمام الضيوف كان مشغول.

أنا وجوزي كنا بنحضر الأكل، وفجأة “ساشا” خرجت من الحمام وهي بتعيط جامد ومسكه حاجة في إيدها.

في الأول افتكرت إنها جرحت نفسها أو حاجة، لكن قالت لجوزها حاجة خلته ينزل على ركبته ويعيط، وبدأ يبوس في بطنها!

كل أصحابنا بدأوا يصرخوا ويعيطوا. وكانت لحظة مجنونة بجد!

في الآخر، “ساشا” قالتلي إنها حامل. طبعًا قولتلها مبروك، وجيبتلها كيس تحط فيه الاختبار (هي اللي طلبت كده).

بصراحة، حسيت إنه غريب شوية إنها تجيب اختبار حمل وتعمله في بيت ناس أول مرة تقابلهم، لكن ما قلتش أي حاجة.

لما الكل قعد علي السفرة وبدأنا ناكل، ساشا قالت: “أتمنى ما تكونيش اضايقتي عشان استخدمت واحد من اختبارات الحمل بتوعك. أنا شفتهم وكان لازم أعمل كده.”

رديت عليها وأنا متلخبطة: “أنا معنديش اختبارات حمل.”

ساشا: “لأ، عندك، في درجك.”

سألتها: “تقصدي العلبة اللي في الدرج اللي تحت، اللي كان مقفول؟”

شكلها فهمت إني بلمح إنها فتحت حاجة مش من حقها، وقالت وهي محرجة: “العلبة كان مكتوب عليها اختبار حمل.”

رديت: “يا ساشا، ده “اختبار تبويض” مش اختبار حمل. أنا معنديش اختبارات حمل. إنتِ عملتي اختبار تبويض؟”

جوزها اتعصب عليا بشكل رهيب وقال إن مراته مش غبية وبتعرف تقرأ اللي مكتوب على العلبة. وأصر إن ساشا تطلع الاختبار وتوريني إني غلطانة.

ساشا رفضت وقالت إنها مش محتاجة تثبت أي حاجة لحد غريب، وأصرت إنهم يمشوا فورًا. وخرجوا وهما غضبانين!!

اتنين من أصحابنا شايفين إن “دوغ وساشا” اتصرفوا بشكل سخيف. أما الباقيين، شايفين إني كان المفروض آخد ساشا على جنب وأتكلم معاها لوحدنا، وقالوا إني كنت غلطانة لما اتكلمت قدام الكل.

بصراحة، الموقف كله كان مفاجئ وكل حاجة حصلت بسرعة قوي. الموضوع كان غريب وملخبط، وما كانش عندي وقت أفكر كويس قبل ما أقولها عن اختبار التبويض.

وبرضه أتأكدت بعدين من صاحبتي إن الاختبار اللي ساشا استخدمته كان فعلاً اختبار تبويض، وإنها مش حامل أصلًا. (ومن غير ماسأل أنا كنت متأكده)

تفتكروا أنا فعلا اتصرفت غلط؟

🌿تحديث:

اتصلت بصاحبتي اللي تعرف “دوغ وساشا” كويس وسألتها هما عملوا كده ليه؟!

قالتلي أن “دوغ” طول الوقت بيقول قدامهم انه نفسه في طفل جدًا.

“ساشا” قالتلهم أن جوزها طلق مراته الاولي، بسبب موضوع الخلفه، وانه اتجوزها مخصوص عشان نفسه في طفل (هي سمعته بيقول كده لأصحابه).

هي خايفة قوي لو مبقتش حامل جوزها يسيبها.

أصحابها قالولها أن كده غلط، وأن دي مش علاقة صحية خالص، بس هي قعدت تدافع عن جوزها وتقول انه بيحبها قوي.

هي بقالها سنه بتحاول تحمل. وبدأت تتابع مع دكتور من قريب.

المفروض كانت تعمل الأختبار، بس كانت مرعوبة وخايفه متطلعش حامل زي كل مرة، عشان كده أصحابها قالولها انهم هيكونوا معاها اليوم ده، عشان يدعموها ويقفوا جنبها.

المفروض انهم كانوا هيتغدوا عندي الأول، وبعدين كلهم يروحوا معاها بيتها عشان لما تعمل الاختبار يبقوا جنبها.

شكلها مقدرتش تصبر ولما دخلت حمامي قررت تعمل الاختبار في ساعتها.

لما ظهر خطين أتصدمت وكانت فاكره انها حامل، عشان كده اتسرعت وبلغت جوزها والناس كلها.

طبعا لما جوزها عرف الحقيقة زعل واتصدم جدًا.

وده اللي خلي أصحابي يزعلوا مني وقتها ويلوموني، عشان عارفين الموضوع ده مهم بالنسبه لها اد ايه.

هي فضلت تغلط فيا وتتكلم عليا وحش، وتقول اني احرجتها وعاملتها وحش في بيتي!!

بس الحمد لله علاقتي بأصحابي رجعت كويسة تاني.

وأيوة أنا كمان بحاول أحمل، ودي كانت حاجة خاصة جدًا ومكنتش قايله لحد ودلوقتي كل الناس عرفت.

(القصة مترجمة من ريديت..أصحاب القصة أجانب)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
error: Content is protected !!