هل أنا غلطانة علشان مش بتكلم اليابانية
أنا (34 سنة) اتعرفت على جوزي (33 سنة) أونلاين واتجوزنا من 6 سنين.
أنا سافرت من بلدي علشان أعيش معاه في اليابان من وقتها. هو ياباني وعنده شغل مستقر هناك، وأنا شغلي كـ *freelancer* رسامة (عمل حر)، فكان عندي مرونة في الانتقال.
أنا وجوزي بنتكلم مع بعض بالإنجليزي ، يمكن تكون لاحظت إن الإنجليزي مش لغتي الأولى، ولا حتى لغته هو، لكن على الأقل بنقدر نتفاهم.
حاولت علي قد ما اقدر أتعلم ياباني علشان أقدر أتكلم مع أصحابه وعيلته، بس اللغة اليابانية مش سهلة خالص. كنت لازم أبدأ من الصفر وأتعلم القراءة بـ”كانجي”، و”هيراجانا”، و”كاتاكانا” لوحدي.
(سنة 2020)، الحكومة ادت لنا فلوس، وهو اشترى لي شوية كتب وقواميس، وقال لي أتعلم اللغة بجدية أكتر في وقت الحجر الصحي… لكنه ما علّمنيش أي حاجة بنفسه.
كان بيقولي بما إنك بتعرفي تتكلمي 4 لغات، يبقي إضافة لغة جديدة كمان المفروض تكون مش صعبة بالنسبة لك.
حاولت… لكن عمري ما كنت كويسة كفاية بالنسبة له، دايمًا بيقول إن القواعد النحوية بتاعتي زفت. وإني المفروض دلوقتي أكون بتكلم زي أهل البلد.
قررت السنة اللي فاتت (صيف 2022) إني أشتغل شغلانة بدوام جزئي في مطعم علشان أتمرن أكتر على الياباني. والمفاجأة إن الناس اللي شغالين هناك حبوني، وكانوا فاهمين الياباني بتاعي!
كمان دلوقتي بقيت بعرف أقرأ وأكتب شوية (بقيت بعرف أكتب عنواني بالكانيجي وأقرأ القوائم). 🙌
الأسبوع اللي فات كنت في عشا عائلي عند عيلته… واحنا بناكل، قولت غلطة في الجرامر “القواعد النحوية”، ما كانتش غلطة كبيرة قوي بدليل أن الكل فهم أنا كنت عايزة أقول إيه. لكن جوزي قدام عيلته قال عليّا “غبية” علشان ما بفهمش الجرامر الصح. 😔
الكلام دا ضايقني جدًا لأنه قاله قدام الناس، فرديت عليه بالإنجليزي:
“الإنجليزي بتاعك مش أحسن من بتاعي، وإنت ما تعرفش تتكلم لغتي أصلاً، ليه بتقول عليا غبية؟”
هو اتعصب جدًا من اللي قلته، ومن يومها مش بيتكلم معايا. هل أنا غلطانة؟
تعديل:
هو مش شخص وحش، أنا بحبه جدًا ❤️ بس هو صريح جدًا، لو ما عجبوش حاجة بيقولها على طول من غير تفكير.
هو عمره ما علّق على شكلي أو جسمي، بس حساس جدًا ناحية مهاراتي… كتير بينتقد أسلوبي في الرسم أو أي مهارة عندي.
بيقول عليّا إني كسلانة… وإن مفيش أي عذر يمنعني من إتقان اللغة طالما عايشة هنا بقالي 6 سنين. 😞
يمكن أكون بدافع عن نفسي، بس السنة اللي فاتت أخدت شهادة في اختبار اللغة اليابانية، وقال إن أكيد بالحظ علشان الياباني بتاعي “وحش”. وقال إن المفروض كنت أوصل لـ Level أعلي من زمان علشان أنا عايشة هنا من فترة طويلة! 😔
تعديل: (بعد 6 شهور).
اتطلقنا. بعد ما فكرت في الموضوع أكتر وأكتر، حسيت إن الـ6 سنين دول كانوا جحيم بالنسبة لي… تعبت من كتر ما بحاول أقنع نفسي بالعافية أنه كان كويس معايا 😔
من يناير اللي فات بدأت أشتغل في شركة يابانية بدوام كامل، وكل الناس في شغلي الجديد بيقولوا إن لغتي اليابانية كويسة جدًا. الحمد لله شغلي ماشي تمام لحد دلوقتي!
أجرت شقة لوحدي وعايشة في طوكيو و معتمدة على نفسي، وكل حاجة تمام. رغم إن جوزي السابق كان دايمًا يقول إني مستحيل أقدر أعيش في اليابان من غيره. 🙃
بصراحة، أنا معجبة بشخص جديد، بس واخدة الموضوع بهدوء 😊
**تعديل:**
أنا دلوقتي بستخدم الياباني في شغلي، وبكسب تقريبًا نفس المرتب اللي كان جوزي السابق بياخده رغم إني لسة بشتغل في الشركة من 4 شهور بس. الشخص اللي معجبة بي دلوقتي بيتكلم ياباني بس، ونتفاهم كويس جدًا مع بعض. 😌
كنت دايمًا بقول إن جوزي السابق كان شخص كويس (ولسه شايفة إنه شخص كويس)، لكن معاملته معايا ما كانتش صح.
في حاجات كتير عملها ضرتني جسديًا ونفسيًا.
قبل ما أكون معاه، كنت بشتغل موديل”وظيفة جانبية”، وكنت باهتم بنفسي جدًا. بس بعد ما اتجوزته، قال لي إن شكلي ما يهمش، وإنه مش بيحبني ألبس لبس شيك أو أعمل ميك اب، لأنه شايف إن الزوجة ما ينفعش تجذب رجالة تانية. 😔
عملت اللي هو عايزه، وفضلت أقنع نفسي “الراجل ده بيحبني زي ما أنا، مهما كان شكلي…” بس اكتشفت بعد كده إنه كان بيتابع بنات على إنستجرام وتويتر. 😤
هو عمره ما كلم البنات دول، فقلت مش مشكلة وسكت، لكن الموضوع فضل شاغلني. خصوصًا إنه عمره ما قال لي أي حاجة إيجابية عن شكلي (بصراحة، ما قالش حاجة إيجابية عن أي حاجة بعملها غير الأكل بتاعي). ده خلاني أفقد الثقة في نفسي.
دخلت في حالة اكتئاب واضطريت آخد مضادات اكتئاب، وخلال الـ6 سنين دول زاد وزني 20 كيلو. 😞
لما بقول إنه عمره ما قال حاجة إيجابية عن شكلي أو مجهودي، ما أقصدش إنه كان دايمًا بيقول كلام سلبي عني، لكن كان واضح عليه إنه مش مهتم أو مش فارق معاه الموضوع.
دلوقتي، بعد ما اتطلقنا، ما بقيتش محتاجة آخد مضادات الاكتئاب. وكمان خسيت 15 كيلو لحد دلوقتي… بعدها قابلت الشخص اللي معجبة بي حاليًا. 😊
اتصدمت لأن الشخص ده دايمًا بيقول إني شكلي حلو ولطيف، ولاحظ لما غيرت تسريحة شعري أو لون ضوافري، وبيقول إن ريحتي جميلة، وكمان بيشكرني لما أعمل حاجة كويسة في الشغل (هو شغال معايا في نفس الشركة). 🥰
الناس التانية كمان بيقولوا إني شكلي حلو جدًا دلوقتي، وباين عليّ إني أسعد بكتير. 😌
لسة مكملة في تعليم اللغة اليابانية
ياريت تتمنولي التوفيق في حياتي.
