مش قادر أستني ليوم الخميس علشان اصدم مراتي!!!
أنا وطليقي اتجوزنا وإحنا صغيرين أوي. كان فرح كلاسيكي جدا قلنا وعود الجواز وبعدها لبسني خاتم العيلة. طليقي كان واخد خاتم جدته الكبيرة علشان يدهولي يوم فرحنا. البداية كانت جميلة، لكن بصراحة، ولا أنا ولا هو كنا جاهزين للاستقرار. حصلت مشاكل كثير بينا و انفصلنا . هو مطلبش مني الخاتم ، فاحتفظت بيه طول الوقت ده. إحنا اتجوزنا وعمرنا 19 سنة واتطلقنا وإحنا 22 سنة . لحسن الحظ مخلّفناش.
كل واحد فينا مشي في طريقه. هو لقى حد تاني واتجوز وخلف ولد وبنت.
رحلتي كانت أصعب، مريت بظروف صعبه جدا ، بس رغم كده احتفظت بخاتم الجواز القديم. عمري ما رهنته ولا بعته ولا ضاع مني، حتى في الأوقات الصعبة. مع إن جوازي انتهى، بس كان زي ذكرى حلوه في حياتي. ، الحمد لله ظروفي اتحسنت وفضلت ماشية في طريق النجاح وببني حياتي من جديد.
وأنا بتكلم مع حد من الاصدقاء عرفت إن بنت طليقي اتخطبت. أنا طبعا لسه عندي خاتم جدته الكبيرة ويعتبر إرث عائلي . هو زمان كان بيقول لي إنه عايز يديه لبنته في يوم من الأيام.
احنا ماكنش في بينا أي تواصل طول السنين الي فاتت، أنا مش عارفة هو لسه عايز بنته تاخد الخاتم ولا نسي الموضوع. حاسة بتردد مش عارفة أعمل إيه. نهاية جوازنا ماكنتش حلوة، كنا صغيرين ومغرورين.
هل أتواصل معاه، ولا أسيب الأمور زي ما هي؟ أبعت الخاتم كهدية جواز مع كارت بدون ذكر اسمي؟ ولا أقول إنه مني؟
تعديل: شكرًا على لطفكم! أنا هتواصل معاه وأسيبه يقرر نعمل إيه بعد كده. أتمنى إنه يحب يقابلني، هيكون لطيف إني أشوفه بعد السنين دي كلها.
تحديثنضفت الخاتم عند الجواهرجي وجبتله علبة شيك. وأنا هناك، قررت أعمل لنفسي خاتم جديد بناءً على نصيحة حد من التعليقات. بدل ما يكون فيه ألماسة، اخترت “ياقوتة” . ده كان اسم جدتي اللي عمرها ما فقدت الأمل فيا، قررت أنقش على الخاتم كلمة “للأمام” ، علشان اشجع نفسي اكون أحسن دايما.
طليقي عايش على بعد ساعتين مننا، روحت مع صديقة ليا. أول مرة رحنا ماكنش فيه حد في البيت، فروحنا اتغدينا وجربنا تاني. المرة دي كانوا موجودين في البيت، قررت ما أروحش، خليت صاحبتي تخبط على الباب. شفته وهو بيفتح الباب. هي سلمته الباكدج ورجعت على طول للعربية.
هو ماتكلمش معاها كتير، كان شكله متلخبط شوية، لكن شكرها وخلاص.
مشفتش إذا كان فرح بالخاتم أو اتصل بأمه يقولها إن الخاتم رجع. بتخيل إنه بيحكي لمراته عن الخاتم وهو بيديه لبنته. الموضوع لذيذ في خيالي. (كمان بتخيل دموع وأحضان، بس ده احتمال يكون مبالغة مني).
كتبتله رسالة صغيرة : “كان شرف ليه إني كنت جزء من تاريخ الخاتم ده. برجاء قبوله مرة تانية مع تحياتي لأسرتك بتمني خطوبه سعيده لبنتك.”
بصراحة، عاجبني إني مش عارفة رد فعلهم إيه. بحب أفكر في قصتي الخيالية. أنا ماسبتش في الرسالة اي طريقه للتواصل ، بس حطيت اسمي، ولو هو عايز، هيعرف يوصل لي. لكن مش شايفة إنه فيه داعي. وقتنا مع بعض كان قصير، وخلص، وده أحسن ختام لقصتنا. حاسه قلبي فرحان
شكرًا على المساعدة والمشاركة 
انتهت الرساله الاوليرساله جديدهأنا (48 سنه) ومراتي (44 سنه) مع بعض من 17 سنة. ولسه بنعشق بعض، هي حب حياتي، أعز أصدقائي، وأكتر حد بثق فيه وشريكتي في كل حاجة 
من حوالي سنتين بدأت تعاني من آلام في المفاصل وتورم خفيف في إيديها ورجليها. رحنا للدكتور العام اللي حولنا لدكتور روماتيزم، واتضح إنها مصابة بالتهاب المفاصل الروماتويدي ، وبدأت العلاج.
من حوالي شهر، الجو في شمال تكساس بقى يتغير بشكل جنوني، الحرارة كانت بتتغير كل ساعة، وبدأت تمطر. صحيت في يوم إيديها كانت وارمه جدًا، وصوابعها الرفيعة بقت شبه الهوت دوج ، ورغم إن الدكتور كان محذرها من ده، إلا إنها للأسف نامت وهي لابسة خاتم الجواز. رحنا للدكتور، واضطروا يقطعوا الخاتم 
المشكلة إن خواتمنا كانت معمولة بتصميم خاص من إيرلندا ومكتوب عليها كلام باللغة Gaelic ، ومينفعش تتصلح، ده غير انها اتعملت من 17 سنة. مراتي كانت متدمرة تمامًا، وأنا حاولت أطمنها إني هلاقي حل، لكن كنت عارف قد إيه الموضوع مأثر عليها.
بدأت أدور على الإنترنت، واكتشفت إن الجواهرجي اللي عمل الخواتم قفل المحل بقاله أكتر من 10 سنين علشان كبر في السن. دورت أكتر لحد ما لقيت حسابه الشخصي على الفيسبوك، وبعتله رسالة واستنيت… واستنيت…
بعد فترة، بنته ردت عليا وقالت إن والدها توفى من 6 شهور، قدمت لها التعازي. سألتني عن سبب الرسالة؟ شرحت لها كل اللي حصل. قالت إنها متفهمة جدًا، واعتذرت على اللي حصل.
بعدها بأسبوعين، وصلتني رسالة من بنت الجواهرجي، قالت إنها لقت تصميمات الخواتم ورسوماتها وقوالبها في حاجات والدها، وطلبت مني أتأكد. بعتتلي صور، وأنا أكدت إن دي خواتمنا. وقالت إنها هتبعتهم لينا قريب، وطلبت عنواننا
انهاردة فتحت إيميلي، ولقيت صور لخواتمنا الجديدة. أخوها عمل لنا الخواتم تاني بالحجم الأصلي لمراتي، وكمان عمل اثنين أكبر لو حصل أي تورم في المستقبل، وبعتهم لينا مجانًا
لما سألتها ليه عملوا الخاتم بتاعي كمان وهو سليم، قالت إنه مش هيبقى عادل إن مراتي يبقى عندها خاتم جديد وأنا لأ. وقالت لي نحتفظ بالخواتم القديمة في مكان ونستمتع بالجديدة
الخواتم هتوصل يوم الخميس، ودلوقتي بفكر في طريقة رومانسية أقدمها بيها لأني ماعنديش فكرة مميزه.
ملحوظة: أنا نادرًا ما أخبي عنها حاجة ، بس ماكنتش عايز أقولها إني بحاول علشان كنت خايف يجيلها إحباط لو محاولتي فشلت.أصعب حاجة دلوقتي لحد ما الخواتم توصل هي إني مأقولش حاجة لأننا حرفيًا بنقول لبعض كل حاجة.
ملحوظة 2: بفكر آخدها لمطعمنا المفضل اللي اتقدمت لها فيه، هي ممرضة (في المستشفى العسكري – وده المكان اللي تقابلنا فيه من 18 سنة)، هي دايمًا بتروح الحمام تغسل إيديها قبل الأكل، لما اتقدمت لها أول مرة، حطيت الخاتم في العصير واستنيت. بفكر أعمل نفس الحركة تاني.ملحوظة 3: الناس اللي بتقول إني “راجل رائع”، الحقيقة لأ. مراتي هي كل حياتي ، جابتلي أحلي ولدين في العالم وكان لي الشرف إني أربيهم ودلوقتي هما أصدقائي المقربين. هي السبب إني عايش، ده غير أنها وقفت جنبي ودعمتني لما رجعت أكمل دراستي وأخدت 2 دكتوراه علشان أطور حياتي المهنية. هي بطلة حياتي، وبصحى كل يوم عشان أحب فيها من جديد. ده أقل حاجة أقدر أعملها علشان أسعدها، سعادتها هي سبب نبض قلبي أنا مش فارق معايا لو شكلي طالع “رومانسي زيادة”. لو الراجل مش رومانسي مع مراته، يبقى مايستاهلش يبقى عنده زوجة جميله.أنا لسه راجع من الغداء و مراتي استلمت خواتمها الجديدة. خلينا الموضوع بسيط من غير صور أو فيديو، وفي جو شبه خاص. خطتنا كانت إننا ناخد الخاتم المقطوع “القديم”للجواهرجي المحلي علشان يحاول يصلحه الاول.
دلوقتي احنا معانا 3 خواتم “القديم وخاتم تاني مقاسه واسع وخاتم مظبوط علي مقاس مراتي”
عزمنا ولادنا الاتنين على الغداء في مطعم . بعد ما طلبنا الأكل، ابني الكبير طلب يشوف خاتم الجواز المقطوع، وقال إنه ممكن يصلحه. أخد الخاتم تحت الترابيزه وعمل نفسه بيضغط وبيحاول يصلحه ، وبعدين حط خاتم الجديد الواسع على الترابيزه وسأل مراتي إذا كان الخاتم اتصلح. مراتي اتصدمت ولبست الخاتم، لكن كان كبير عليها 
ابني الأصغر قال إنه ممكن يصلحه، وطلب منها الخاتم، وهي مستغربه وبتبص بنظرة “إيه اللي بيحصل ده؟”، ابني مسك الخاتم الواسع . أخده تحت الترابيزه وبرضه عمل نفس الحركة إنه بيضغط عليه وبيحاول ، وبعدين قال إنه “صغره، بس مش مثالي تمامًا”.
لما لبسته تاني، بدأت تحاول تفهم اللي بيحصل.
وهي بتحاول تشيله عشان تفحصه، أخدت أنا الخاتم منها وعملت نفس التمثيلية زي الأولاد، لكن المرة دي الخاتم بقى مناسب تمامًا على صباعها، وساعتها خلاص فاض بيها! أخيرًا شالته وبدأت تفحصه بتركيز، ومش قادرة تفهم اللي بيحصل… لحد ما ابني الكبير حط الخاتم المقطوع القديم على الترابيزه ، وابني الصغير حط الخاتم اللي كان كبير، وأنا حطيت الخاتم اللي حجمه مثالي.
في اللحظة دي، فضلت تبص لنا كلنا، وشرحت لها إزاي لقيت الجواهرجي وكل اللي حصل. وريتها حتى البوست على Reddit. ما بدأتش تعيط غير لما قرأت التعليقات والدعم اللي الناس قدمته.
طلبنا الأكل، وقعدنا نتكلم عن كل حاجة، واتغدينا كعيلة، وكل واحد رجع لشغله أو بيته بعد كده.
مراتي قالت إنها بعد ما قرت كل التعليقات، كانت هتقتلني لو كنت عملت حاجة علنية وكبيرة قدام الناس، فشكرًا للناس اللي اقترحوا نخلي الموضوع بسيط وشبه خاص.
وبالنسبة للجواهرجي، ردوا على إيميلي بخصوص نشر اسمهم وقالوا إنهم عايزين يحتفظوا بخصوصيتهم ، مراتي ناوية تجهز لهم هدية مميزه وتبعتها لهم.
شكرًا لكل اللي قدموا اقتراحات، وإحنا ممتنين لكل الدعم اللي قدمتوه
مراتي سعيدة جدًا وفرحانة
