مش قادر أسامح 😔💔
أنا شاب وعندي أخت أصغر مني.
من وأنا صغير، وأختي ماكانش ليها حد تعتمد عليه غيري.
إحنا اتربينا في عيلة متدمرة، بابا سابنا لما كان عندي 5 سنين، وماما كانت غرقانة في الإد**ان.
علشان كده اضطريت أشيل المسؤولية بدري. كنت باخد فلوس من ماما “من غير ماتحس” علشان أقدر أجيب أكل ليا ولأختي، واشتغلت شغلانة بسيطة وأنا عمري 13 سنة بس.
أول ما اتخرجت من المدرسة، اشتغلت شغلانتين وساعتها أخدت أختي وسيبنا البيت.
كنت بدفع لها مصاريف علشان تكمل تعليم في المدرسة الثانوي، وده كان ضغط رهيب عليا لإني كان لازم ادفع كمان فلوس الإيجار ومصاريف الأكل.
اختي اتخرجت واشتغلت، ونحجت في حياتها واستقلت في شقة لوحدها 🏠.
بعد كده أنا كمان كملت تعليمي وأخيرًا لقيت شغل كويس. بس للأسف، جت كو**ونا، ومشوني من الشغل. علشان كنت لسه متعين جديد.
وقتها الدنيا كانت ملطشه معايا خالص. مفيش شغل، ومش عارف ادفع الايجار. وعلي وشك اطرد من شقتي، وماكنش عندي حد ألجأ له غير أختي.
هي وقتها كانت لسه متجوزة من قريب وعايشه مع جوزها، سألتها لو ممكن أقعد عندها كام شهر لحد ما أشتغل؟ اتفاجأت أنها رفضت وقالتلي “لأ”.
اتصدمت جدا. وبعد أسبوعين اترميت في الشارع.
طلبت منها للمره التانية، وبرضه الاجابة “لأ”.
الحمد لله واحد من اصحابي وافق أقعد عنده شوية، ولقيت شغل مؤقت، وبعدها بفتره الحمد لله ربنا كرمني ولقيت وظيفة في مجالي، ودلوقتي ظروفي بقت أحسن بكتير 💼
من ساعة اللي حصل ده، وأنا مخاصم أختي، ورافض أصالحها نهائي.
هي عايزة تصالحني. وكل شوية تبعتلي رسايل وتتصل بيا وتعيط، حتي جات لي الشغل، وكلمت اصحابي، وعملت كل حاجة علشان تصالحني.
حتى جوزها كلمني وقالي إن هو السبب وهو اللي رفض مش هي، وإنه آسف.
بس أنا مش قادر أسامح، أنا كنت هبقي شحات في الشارع وهي بدل ماتقف جنبي… قالتلي “لأ”.
بصراحة انا حاسس أني عايز أقفل الصفحة دي من حياتي. مع اني حاسس بالذنب شوية. خصوصا لما عرفت انها عندها بيبي دلوقتي.”هي بقالها سنة بتحاول تصالحني”.
اصحابي بيقولولي إني لازم أسامحها، وإنهم في الأول كانوا فاهمين موقفي، بس دلوقتي شايفين إني بقيت قاسي زيادة عن اللزوم.
إنتو شايفين إيه؟ 🤷♂️
▪️ عايز أجاوب علي الاسئلة (التحديث):
▪️ أول حاجه أختي قالتلي”لأ” من غير أي تفسير، وعرفت بعدين إن جوزها هو السبب وهو اللي ماكنش موافق.
▪️ وقت ما رفضت، ماكنتش لسه حامل ولا حاجة يعني مش ده السبب.
▪️ أنا مش ضد التط/*عيمات ولا أنا شخص مش نضيف زي ما في ناس قالت. أنا واخد التط/*عيم، وبستحمى كل يوم وشقتي نضيفة جدًا.
▪️ الناس اللي بيقولوا “انها مش مجبره تعملي حاجة”. ياجماعة أنا قضيت شبابي كله أربي أختي، وأنا مش أبوها، وأول طلب أطلبه منها، تعمل معايا كده. دي مش مجرد مشكلة عائلية صغيرة، أنا شايف أن دي خيانة بصراحة.
▪️ نرجع للمهم:
سمعت نصيحة الناس هنا، وطلبت من اصحابي، يبطلوا يتكلموا معايا في الموضوع ده. كلهم وافقوا ماعدا صديق واحد ما بطلش زن، فبعدت عنه خالص.
كتبت إيميل طويل لأختي، مش هانشره علشان فيه تفاصيل شخصية، بس شرحتلها بكل وضوح: إن رفضها جرحني قوي، وفكرتها بكل الحاجات اللي عملتها علشانها من واحنا صغيرين.
قولتلها حتى لو صدقت قصتك إن جوزك هو السبب، فده برضه مش فارق بالنسبة لي، في الحالتين انتي ماوقفتيش جنبي وماعملتيش مجهود علشاني وكان ممكن تحاولي مع جوزك.
قلتلها كمان إني مش مهتم أتعرف علي طفلها دلوقتي، ومش ناوي أرجع علاقتنا زي الأول، ولو غيرت كلامي في المستقبل، وقتها أنا اللي هكلمها، مش العكس.
وطلبت منها تعتبر اللي حصل ده درس قاسي.
قررت أكمل حياتي ومش هقول أني قفلت الباب نهائي ” أنا سيبته مفتوح فتحة صغيرة جدًا”. ياعالم يمكن أغير رأيي في المستقبل.
هي لسه بتحاول توصل لي وبتكلمني كتير، واضح إنها مش قادرة تتقبل اللي حصل، بس أنا ما رديتش عليها من وقتها.
مافيش حاجة تانية أضيفها، وشكرًا على كلامكم المفيد والداعم 🙏
___________
القصة مترجمة من ريديت. أصحاب القصة أجانب.
