“محكمه الدعاوي والمطالبات الصغيره”
النهارده عندنا ٣ قصص مختلفه. المشترك بينهم أن الثلاثة راحوا المحكمه.
🌹 القصه الاولي :
صاحبتي قررت تعمل فرحها لمدة 3 أيام، واضطريت أشتري 3 فساتين مختلفة (دفعت فلوس تعديلات للفساتين وأحذية معينة) كل ده كلفتني أكتر من 700 دولار. كمان كانت عايزة تسريحات شعر معينة لكل يوم.
للأسف، من بداية شهر مارس شعري بدأ يحصله تساقط بسبب مشاكل صحية، وكان بيقع بشكل فظيع (بالخصلات). في شهر مايو، أخدت القرار الصعب إني أقص شعري.
قلت لصاحبتي عن قراري قبل الفرح بأسبوعين سكتت وما قالتش حاجة.
بعدها بأسبوع، جات تزورني في بيتي، ولما كانت خلاص هتمشي، قالت لي إنها قلقانة علشان أنا قصيت شعري، طمنتُها و قولت لها حتى لو مش هيبقى في تناسق بيني وبين باقي وصيفات الشرف (بسبب قصه شعري المختلفه) بس أطمني الصور هتكون حلوه.
تاني يوم، بعتت لي الرسالة دي:
“بعد كلامنا امبارح، حابة أفكرك بحدودي: أنا كنت متسامحة جدًا وكريمة، لكن مش هقدر أسمح لكِ تقللي من احترامي. زي ما أنتِ عارفة، فرحي كان حلمي لسنين طويلة. وأنا وجوزي استثمرنا فلوس كتير في الفيديو والصور لليوم ده، علشان لما نرجع نبص عليهم في المستقبل، عايزين نشوف اللي حلمنا بيه بالظبط هو اللي موجود . من أول ما طلبت منكِ تكوني وصيفة شرف في 2019، كنت واضحة جدًا في طلباتي. التوقيت اللي اختارتيه علشان تقصي شعرك وكمان ما قولتليش من بدري كل ده ضايقني.
كنت هحس بالاحترام لو كنتي تواصلتي معايا قبل الفرح بوقت كفايه، علشان كنا نلاقي حل مع بعض، ورغم إني متعاطفة مع ظروفك الصحية، مش هقدر أضحي بحلمي علشان أساعدك ،لو كنتي عرفتيني من بدري كنا هنلاقي حل أحسن. بصراحه انتي متناقضه. وبما إنك مش هتقدري تلتزمي بالي انا عايزاه بالكامل، أنا بطلب منكِ تنسحبي من المشاركة في فرحي.”
الكلام ده كان قبل الفرح بـ أيام.
على طول بعتت لها ولجوزها فاتورة بطلب تعويض عن الفساتين والأحذية اللي اشتريتها، مع العلم إن واحد من الفساتين لسه عندها بالرغم إني دفعت تمنه.
ولا هي ولا جوزها ردوا، فقررت آخد الموضوع للمحكمة.
اللي مزعلني قوي أنها اتهمتني إني متناقضة وأنانية بعد ما قضيت الأسبوعين اللي فاتوا أساعدها في تحضيرات الفرح. كمان اشتغلت مع وصيفة شرف تانية علشان نفاجئها بحفلة توديع العزوبية. ولما طلبت مني أساعدها علشان تشد عضلاتها قبل الفرح، روحت معاها الجيم علشان أقف جنبها.
لما وافقت أكون وصيفة شرف كنت مستعدة أنفذ كل اللي طلبته مني حتى لو كان بياخد وقت ومجهود وفلوس كتير. فهل أنا غلطانة إني رفعت عليها قضية بعد ما طردتني من الفرح علشان قصيت شعري؟
🌻#تحديث
وصلني إشعار بتحديد جلسة في المحكمة يوم 7 فبراير، ولأنها قضية صغيرة، كنا هنمثل نفسنا (من غير محامي). بدأت أجمع الأدلة وعملت ملف علشان أثبت حقي قدام القاضي.
في اليوم المحدد، هي حضرت. أدونا فرصة علشان نتصالح لكن ده ما نجحش. لما رجعنا للجلسة، اكتشفت إنها كمان عملت ملف بالأدلة بتاعتها.
الجلسة استمرت وكل طرف أخد فرصة يعرض وجهة نظره. مش هخش في التفاصيل لكن الموضوع أخد حوالي 10-15 دقيقة.
في ولايتي، الحكم مش بيتقال علي طول، لازم استني لحد 90 يوم!
فضلت أستنى. وأستنى. وأستنى. وفي الآخر يوم 5 مايو (بعد حوالي 90 يوم) جالي الحكم.
كسبت القضية 🎉🎉🎉
المحكمة أمرتها تدفع لي مبلغ 808.94 دولار للفساتين والأحذية.
بس لازم أرجع لها الفستانين والأحذية اللي عندي.
ما اعتقدتش إنها هتستأنف الحكم (أو ربنا يسهل وما تعملش كده).
بشكل عام، أنا سعيدة جدًا بالنتيجة وجاهزة أقفل الصفحة دي. شكرًا لكل اللي اهتموا بالموضوع.
أتمنى إن ده يكون الختام اللي كلكوا مستنيينه.
ملحوظة: شعري وصحتي بقوا أفضل بكتير. الأماكن اللي كان فيها صلع بدأ الشعر يطلع فيها تاني، وأنا الحمد لله مبسوطة جدًا 🥰
@$@$@$@$@$@$@$@$@$@$
🌹 قصة جديده:
مش عارف أعمل إيه. النهارده الصبح جاري كان بيخبط على بابي بقوة وبيزعق ويشتم. لما أخيرًا خلّيته يسكت، اكتشفت إنه كان بيطير الدرون (الطياره بالريموت) بتاعته في الجنينه عندي، والكلب بتاعي أخيرًا قدر يمسكها ويدمرها.
هو بيقول إن الدرون دي بـ 900 دولار وطلب مني أدفع له فلوسها دلوقتي حالا !!!
رفضت وقفلت الباب في وشه. بعد كام ساعة البوليس جه علشان ياخد الدرون، كانت لسه مرميه في الجنينه عندي، بس الكلب بتاعي اتجاهلها تمامًا بعد ماوقفت عن الطيران (اتكسرت)
الشرطة سألتني عن الموضوع وقالولي إن جاري اتصل بيهم وقال إنّي رفضت أديله الإذن يدخل ياخدها!!!
ده مش حقيقي، هو ما طلبش مني يدخل اصلًا.
أنا قلقان إنه يحاول يرفع عليّ قضية بسبب تدمير ممتلكاته. هل هيبقى ليه أي حق لو الموضوع وصل المحكمة؟
هو من زمان بيتعمد إنه يطير الدرون بتاعته فوق الجنينه عندي علشان يغيظ الكلب بتاعي. طلبت منه كتير يوقف الموضوع ده بس كان دايمًا بيرفض ويقول لي إن الهواء اللي فوق الجنينه مش ملكي!!!
مرة اتصلت بالبوليس عشان أشتكي لما كان بيطير الدرون قريب جدًا من الكلب وكان هيخبط الكلب ويعوره.
البوليس ما قالوش إنه ممنوع يطيرها في الجنينه، لكن طلبوا منه يبطل علشان ما يحصلش مشاكل.
لكن هو ما اهتمش بالعكس ده بقه يتعمد يضايقني أكتر.
🌻#تحديث
الشريف (المأمور) بعتلي استدعاء، جاري قرر يرفع عليّ دعوى في “محكمة الدعاوى الصغيرة” علشان ياخد تعويض عن الدرون بتاعته.
حماتي بتشتغل سكرتيرة قانونية، فرتبتلي استشارة مع محامي علشان أسأل عن الحاجات اللي المفروض أعملها قبل ميعاد المحكمة.
المحامي قال لي كويس قوي انه جاري رفع عليّ قضية. و نصحني أرفع عليه أنا كمان دعوى و اشتكي من الاضرار الي هو سببهالي.
كمان قال لي إننا بنعيش على بعد أقل من 5 أميال من المطار، وان الي بيعمله ده مش قانوني.
دورت على رقم الخط الساخن (للطيران الفيدرالي) على جوجل وقولتلهم ان جاري بيطير قريب من المطار، وهو مش عامل تصريح.
أخدوا معلوماتي واتصلوا بيّ مرة واحدة لحد دلوقتي، فعرفت إنهم بيحققوا في الموضوع
جبت تقارير للمحكمة، وكمان صور لحديقتي، وصور للسور المشترك بينا، وفواتير طبية للكلب بتاعي، وكام فيديو قصير لجاري وهو بيعمل حركات “طيران” بالدرون فوق الكلب وبيحاول بيستفزه قبل كده.
حجه جاري قدام القاضي كانت “إني اتعمدت اشتري ترابيزة عاليه علشان أخلي الكلب يعرف ينط لفوق و ويمسك الدرون، وإنّي دربته على ده”.
فعلاً، أنا لسه شاري ترابيزة جديدة، بس علشان أقعد وآكل برة.
أنا قولت إن طيارته كانت بتسبب قلق للكلب علشان كده هاجمها، وبفضل نصايحكم، قلت كمان إن الكلب كان ممكن يموت لو بلع جزء من الدرون أو لو الدرون اتخبطت فيه.
في النهاية، القاضي حكم إن جاري لازم يدفع لي حوالي 2000 دولار مقابل فواتير الطبيب البيطري.(الأشعة، وفحوصات الأسنان، والتخدير، والأدوية)
🎉🎉🎉
كمان اتمنع من إنه يطير الدرون فوق ممتلكاتي.
أنا ركبت كاميرات مراقبة في الجنينه الأمامية والخلفية. هو واضح إنه غضبان مني قوي، فحبيت أكون حذر وأخد احتياطاتي.
الحاجة الوحيدة اللي ممكن تخلي الموضوع أحسن هي إن الـ FAA ” الطيران الفيدرالي” يلاقوا سبب لتغريمه أو ياخدوا منه الدرون الجديده اللي جابها.
$@$@$@$@$@$@$@$@$@$@$
🌹 القصه الثالثه:
كنت عازمه صحباتي عندي في البيت، صاحبتي جابت واحدة معرفتها معاها في العزومه.
البنت دي حطت الـ “MacBook” ماك بوك بتاعها على الكنبة
وأنا بقعد علي الكنبه من غير ما اخد بالي ان الجهاز موجود ، للأسف قعدت عليه والجهاز اتكسر.
بما إن دي غلطتي تمامًا، عرضت إني أدفع لها تمنه، ووافقت.
هي اشترته من 3 سنين وكان سعره وقتها 2200 دولار. قلت لها إني هحول الفلوس لحسابها البنكي خلال أسبوع.
دلوقتي بعتت لي إيميل بتقول فيه إنه بناءً على الاتفاق اللي حصل بينا، هي مستنية ال 2700 دولار اللي أنا وافقت عليها!!!
ماكنتش فاهمه هي ليه زودت الفلوس، فأخدت رقمها من صاحبتي وكلمتها.
لقيتها بتقول لي إنها دلوقتي متوقعة إني أدفع لها تمن MacBook الجديد ، لأنها كانت “هتعمل تحديث للجهاز”.
و قالت لي لو ما وافقتش، هتروح ترفع عليّ قضية في محكمة الدعاوى الصغيرة.
القاضي ممكن يوافق على الكلام ده؟؟؟
أحول لها الـ 2200 دولار ولا أقول لها ترفعي قضية؟
🌻#تحديث
عملت شوية بحث عن تصليح الشاشة للـ MacBook، ولقيت إن تصليح الشاشة لموديل جهازها هيتكلف حوالي 310 دولار.
فبعتت لها رسالة قلت لها : “بما إنها ما وافقتش على العرض الأول بتاعي اللي كان 2200 دولار، أنا بسحب العرض ده وبدل كده هعرض إني أدفع تكاليف التصليح.”
ردت عليّ بالإيميل وقالت لي إني “وقحة” وإنها هترفع عليّ قضية في المحكمة.
بعد كام يوم، اتبلغت رسميًا وروحت للمحكمة. حكيت للقاضي إني عرضت عليها 3 اختيارات:
1. يا إما أكتب لها شيك لجهاز جديد بـ 2200 دولار.
2. أجيب لها جهاز مُحدث من أبل أو مستعمل وسعره حوالي 1400 دولار.
3. أصلح لها الـ MacBook بتاعها بما إن المشكلة كانت في الشاشة بس والتكلفة حوالي 300 دولار .
(طبعت الإيميل اللي بيثبت كلامي وأنها رفضت وشتمتني) وقدمت كل ده للقاضي.
كمان قلت له إني في البداية عرضت أجيب لها جهاز جديد من متجر أبل وهي رفضت وقالت إنها عايزة الفلوس كاش. حاولت أوضح للقاضي إنها بتحاول تستغلني.
هي كانت بتتعامل مع القاضي بشكل وقح طول الوقت وده خلّى القاضي يتضايق منها، وده ساعدني في القضية.
بعد ما القاضي سمعنا احنا الاتنين، حكم إني أدفع 50% بس من تكلفة التصليح، لأنها كانت سايبة الجهاز بتاعها بإهمال على الكنبة.
يعني في الآخر هدفع حوالي 200-250 دولار بس لكل الموضوع 🎉🎉🥳
لو ما أخدتش بنصايحكم كنت دفعت 2200 دولار بدل حوالي 200 ، وبصراحة كنت مستمتعه بنظرتها وهي خارجة من المحكمة 🤭
#قصص
