انا اسف لو في اي اخطاء لغويه لان الانجليزي مش لغتي الاولي
لما كنت طالب في الجامعه
وقعت في حب داريا (ده مش اسمها الحقيقي مجرد اسم مستعار)
كانت الاخت الصغيره لاعز صاحب ليه
علشان كده مقدرتش اعترفلها بمشاعري احتراما لصاحبي المقرب
بس اعجابي بيها كان عمال يزيد
داريا انسانه جميله ورائعه
عارفين الناس الي بتعيش علشان تخلي العالم مكان افضل
داريا كانت واحده من الناس دي
ازاي بس ابطل انجذب لانسانه زي دي؟
بعد كده عرفت انها كمان معجبه بيه
ولحسن حظي اخوها وافق عليه
علشان كده حبينا بعض لمده سنتين
كان المفروض اطلبها للجواز رسمي في الوقت ده
لكن للاسف انا ماعملتش كده مش عارف ليه
كنت فاكر اننا لسه صغيرين وقدامنا وقت طويل
ومش ضروري التسرع في الجواز
البلد الي احنا عايشيين فيها بلد مش ديمقراطي
واحنا الاتنين كنا ناشط*يين سياس**يين
وللاسف انا اتعرضت للاعت**قال لمده 9 سنين
(ارجوكم بلاش تحكموا عليه اني وحش انا مش عايز احكي التفاصيل علشان محدش يعرفني بس عايز أأكد اني ماعملتش اي حاجه غير اخلاقيه احنا بس كنا بندافع عن حقوقنا وده للاسف غير قانوني في بلدي بس احنا والله مكناش ابدا متطرف**ين )
من يومها وانا ماشوفتش داريا تاني ابدا
عرفت ان اخوها (صاحبي المقرب) اتوفي
وهي سابت البلد وسافرت
اعتقد انها خافت تتعرض للاعت**قال هي كمان
طبعا مفيش اي وسيله تواصل بينا و انا في المعت**قل
بس بابا قالي انها اتصل بيه اكثر من مره تطمن عليه
وانا بقضي العقوبه الامور ساءت جدا في بلدي
علشان كده اول ماخرجت هاجرت انا ووالدي لبلد تانيه
من وقتها واحنا عايشيين في اوروبا الغربيه
الحياه كويسه
عايش مع بابا وعندي وظيفه ثابته (رغم انها مش عجباني)
من كام شهر لاقيت داريا علي النت
عايشه في دوله قريبه , المسافه بينها 7 ساعات بالقطر
هي مش بتستخدم وسائل التواصل الاجتماعي كثير
بس حسابها مفيش فيه اي دليل انها اتجوزت او عندها اطفال
جزء مني بيصرخ فيه علشان ارجع اكلمها تاني
بابا كمان بشجعني اتواصل معاها
بس انا خايف ومش عايز اكون اناني
ظروف وفاه اخوها كانت صعبه جدا
ومش عايز كلامي معاها يفكرها بكل الحاجات السيئه الي حصلتلنا احنا الاتنين
ممكن كمان تكون متجوزه او مخطوبه
وانا مش عايز اسبب لها احراج او اضر علاقتها واسببلها حزن
حياتي كانت واقفه تماما طول ال 9 سنين
بس اكيد حياتها ماوقفتش
هي نجحت تحقق ذاتها وتبني لنفسها حياه جميله
وانا مش عايز اكون اناني وافسد عليها الي حققته لمجرد انها وحشاني
يمكن تكون حتي مش فاكراني
حتي لو سمحتلي اكون جزء من حياتها مره تانيه
وقتها هكون مجرد عبيء عليها
بسبب حزني واكتئابي ونفسيتي المدمره
هل من حقي احس اني مفتقدها قوي؟؟؟
انا دلوقتي بكتفي اني اتابع حسابها من وقت للتاني و اطمن انها بخير
بس بصراحه الموضوع فعلا مؤلم بالنسبه لي
كل ذره في كياني بتحب داريا
واعتقد اني هفضل احبها للابد
انصحوني اتواصل معاها ولا اسيبها في حالها؟؟؟
🌹#تحديث
كلكم نصحتوني ارجع اتواصل معاها
فعلا عملت كده
بعتلها رساله وكتبت فيها:
“انا مش قصدي ادخل في حياتك بس حبيت اقولك مرحبا , وفكرت اسيبلك معلومات الاتصال الجديده الخاصه بيه , في حال رغبتك في التواصل معايه مره تانيه , ولو مش عايزه تكلميني تاني , خلاص مفيش مشكله , انا اكيد بحترم رغبتك وبتمنالك التوفيق”
وسيبتلها رقم تليفوني وعنوان البريد الالكتروني
عارف ان ممكن يمر وقت علشان ترد عليه
علشان كده حاولت انسي الموضوع
تاني يوم الصبح
رن تليفوني
كان رقم غريب من الدوله الي عايشه فيها داريا
اكيد هي مفيش حد تاني ممكن يكلمني من البلد دي غيرها
حاسيت بالذعر بس الحمد لله فتحت المكالمه في الوقت المناسب
داريا قعدت تسألني اكثر من مره
هو ده انت فعلا؟؟؟
ماكنتش عارف اميز هي بتضحك ولا بتبكي
في الاول ناديني بالاسم القديم الي كانت متعوده تناديني بيه
وبعد كده اعتذرت وناديتني بأسمي الحقيقي
بصراحه الموضوع ده حطم قلبي 😢
المكالمه كانت محرجه شويه
كنت متوتر قوي وهي كمان
بس رغم كده كنت سعيد
الي عرفته انها كانت خايفه عليه قوي وكان نفسها تطمن عليه اني لسه عايش , لان للاسف ناس كثير كانوا معايه في المع**تقل اتق**تلوا في ظروف غامضه
علشان كده هي مش مصدقه اني خرجت وبقيت في امان
قالتلي انها حاولت كثير قوي تتواصل معايه او تشوفني بس ماعرفتش
عرفتني كمان انها كانت بتبعتلي اكل وفلوس وجوابات
بس طبعا مفيش اي حاجه وصلتني منها
هي في الاخر استسلمت
كانت بتحكيلي الكلام ده علشان تأكدلي انها ماا تخلتش عني ابدا
وكانت خايفه اني احس بخيبه امل انها مساعدتنيش اكثر
انا الحقيقه ماعنديش اي فكره علي كل الي هي عملته علشاني وزعلان انها عرضت نفسها للخطر علشان تقف جنبي
مش عايزين نفتكر الحاجات السلبيه دي تاني علشان كده داريا غيرت الموضوع
وسألتني عن المدينه الي انا عايش فيها وشغلي وبابا
قعدنا نتكلم لغايه ماوصلت لشغلي وكنت مجبر اقفل معاها
سألتني لو عايز اكلمها واتساب
طبعا وافقت
قفلت معاها ونزلت الابليكيشن علي تليفوني علي طول
فضلنا نبعت لبعض رسايل طول اليوم
بعد ماخلصت شغلها وهي راجعه بيتها صورتلي صوره كتاب كنا بنتكلم عليه زمان
انا كنت فاكر داريا خلاص ناسيتني ومش فكراني
طلعت فاكره حتي اصغر التفاصيل الصغيره 😍
من وقتها واحنا مش بنبطل كلام مع بعض
لدرجه اني اوقات بنام علي نفسي وانا معاها علي التليفون
أوقات بحس اني رجعت شاب في عمر 24 تاني
وبكلمها وكأنها عايشه في الشارع الي ورايه
واوقات تانيه بحس اننا بنحاول نرجع نسخ مننا ماتت للاسف
احنا فقدنا حاجات كتير بسبب الي اتعرضناله 😢
يعني داريا دلوقتي سلبيه اكثر وخجوله اكثر من زمان
انا عارف ان ده منطقي
انا كمان اتغيرت قوي
وحاسس اني مابقتش استحق داريا
بس ما اقدرش اوصف احساسي لما بسمع ضحكتها
علي فكره داريا لسه لطيفه جدا وعطوفه ودافيه
لسه بتهتم بيه زي زمان انا كمان بهتم بيها
انا عارف ان علشان نرجع تاني زي الاول محتاجين صبر
وانا عندي استعداد اصبر
وسعيد علشان هي رجعتلي تاني
داريا سألتني لو ممكن نتكلم فيديو في نهايه الاسبوع؟
وافقت
بس بصراجه انا محرج جدا منها
وحاسس بتوتر جامد رغم اني فعلا نفسي اشوفها قوي
انا دلوقتي شكلي مختلف عن زمان
فكي مشوه
واسناني مكسره 😢
(بس الحمد لله قريب هيكون عندي تأمين صحي وقتها اقدر ازور الدكتور علشان اتعالج)
كمان انا دلوقتي ارفع كتير من زمان
لما ببص في المرايه بشوف راجل عجوز 😢
ده غير اني خايف لما اشوفها مقدرش امسك نفسي وابكي
وده هيكون محرج ليه
كمان خايف لما تشوفني بالشكل ده تحس بالشفقه ناحيتي وتبقي مجبره تواسيني
لو حد عنده نصيحه اتعامل ازاي في الموضوع ده ياريت يقولهالي
عامه انا سعيد الايام دي علشان داريا في حياتي وشكرا لكل حد شجعني اني ارجع اتواصل معاها تاني
🌹#تحديث
الشهرين الي فاتوا مروا بسرعه جدا
قولت ل داريا اني حاسس بالتوتر من مكالمه الفيديو
قالتلي اتصل بيه دلوقتي حالا علشان ماتفكرش كتير و تبطل قلق
لما شوفتها حاسيت ان كل حاجه بينا حقيقيه قوي
لسه زي ماهي ويمكن اجمل 😍
طبعا بقت ناضجه اكثر
البلد الي هي عايشه فيها دلوقتي مختلفه تماما عن بلدنا الاصلي
والثقافه كمان مختلفه قوي
واضح ان داريا عرفت تتكيف كويس مع البيئه الجديده ومرتاحه اكثر
بعكسي انا لسه مأخدتش الوقت الكافي للتأقلم علي حياتي الجديده
اصعب حاجه اني مش عارف احضنها
كانت عمالي تبكي
ومن غير ما احس اكتشفت ان دموعي انا كمان عماله تنزل
مش باين عليها خالص انها مندهشه من شكلي
بس قبل مانقفل المكالمه قالتلي هو الاكل في البلد الي انت فيها سيء؟
شرحتلها الي حصل وان فكي مكسور
وقولتلها اني قريب هعالجه
سألتني علي عنواني؟
وبدأت تبعتلي خدمه توصيل بقاله عباره عن وجبات
خفيفه لينه سهل اكلها و مشروبات مغذيه
كل اسبوع بتبعتلي الحاجات دي
كنت عايز ادفعلها الحساب , وقولتلها بجد مش ضروري
بس هي رفضت وقالتلي انها بتسد الدين الي عليها من زمان
لان لولا وجودي في حياتها وقت الجامعه كانت مش هتلاقي تاكل 😅
بنتكلم فيديو كل يوم
مجرد مابشوفها حياتي بتكون احسن
وخلاص الحمد لله الاحراج اختفي
امبارح داريا فتحت اللاب توب الخاص بيها وهي بتغسل الاطباق وبتكلمني فيديو
بجد الموضوع ده مدهش
ازاي حاجات بسيطه قوي كده بتخليني احس بالراحه وكأني رجعت وطني تاني
عمري ماتخيلت اني هكون سعيد للدرجه دي وانا بشوف حد بيغسل الاطباق
وجودها بيخليني مااحسش بالغربه
وكأن داريا هي وطني ❤
هي بتشارك معايه كل حاجه
وبتحب تبعتلي صور وعندها فضول تعرف ايه الفرق بين البلدين الي احنا فيهم دلوقتي
بصراحه معنديش طاقه اروح اماكن مختلفه واصورها , بس بعمل ده علشانها داريا تستحق
في الاول كان الموضوع بسيط
تبعتلي صور معجنات وتقولي انزل انت كمان وصورلي المعجنات في بلدك
او القهوه
وبعدين اكتشفت انها بتعمل معايه كده علشان تخليني اخرج ومفضلش حابس نفسي في البيت وخلاص
انا فهمت قصدها
وبلعب معاها اللعبه دي علشان اخليها سعيده ❤
انا فعلا شوفت اماكن كتير في البلد اول مره اشوفها من ساعه ما وصلت
وبدأت كمان اخرج مع زمايلي في الشغل لاول مره , بسببها
داريا اجتماعيه قوي
علشان كده انا عارف ان مستحيل تحس بالوحده
بس في ظروف كتير هي مرت بيها صعب تحكيها لاي حد من اصحابها
احنا بس الي ممكن نتكلم مع بعض في الظروف دي ونحس ببعض قوي
في يوم المرأه بعتلها زهره الاوركيد الي هي بتحبها
كانت فرحانه قوي
داريا بتفرح بأبسط الحاجات
انا عارف ان الحاجات الي اقدر اعملها علشان تكون سعيده مش كثير
بس هي فعلا تستحق اكثر من الي اقدر اديهولها بكتير
بس انا هعمل اي حاجه علشان خاطر داريا
ولسه بتعلم اكثر
في احتاجات بتحصل الايام دي في البلد الي داريا فيها
وفي شر*طه مكاف*حه الشغب في الشارع وغاز مسييل للدموع
داريا حاسه بالتوتر ومش عارفه تنام
انا بفضل معاها علي التليفون احاول اهديها لغايه ماتنام
برغم القلق بس بتقولي فاكر لما كنا احنا الي بنعمل قلق في الشارع 😅
لسه عندها حنين رغم كل الي حصل وكل الي اتعرضتله هي واخوها
اخر حاجه
داريا هتيجي تزورني في مدينتي
كنت بقولها علي مكان جميل قوي في مدينتي
قالتلي انها كمان عايزه تشوفه
قولتلها تعالي معايه
وهي موافقه
انا لسه مش حاسس بالتوتر قوي بس متأكد ان قريب هكون متوتر جدا
شكرا لكل حد قدملي نصيحه او تشجيع 🌷🌷🌷
